Gihangop namo kamo sa YA Matag Semana
Gihangop namo kamo sa YA Matag Semana—usa ka sinemana nga publikasiyon dinhi gayod sa inyong app sa Gospel Library nga gisulat alang sa mga young adult pinaagi sa mga young adult, ingon man usab sa mga lider sa Simbahan ug ubang mga eksperto mahitungod sa mga hilisgotan nga haom kanato karon.
Ang Among Tumong
Ang among tumong mao ang pagtabang kaninyo nga makit-an ang mga tubag sa inyong mga hagit ug ang kalig-on sa pag-atubang niini. Himoon nato kini pinaagi sa tambayayong nga pagsuhid sa ebanghelyo ni Jesukristo ug sa pagsuta kon sa unsang paagi nga ang mga young adult sa tibuok kalibotan naningkamot sa pagsunod niini.
Mahitungod Kanamo
Unang butang ang unahon: kining tibuok nga seksiyon nadasig tungod kaninyo. Nag-atubang kita og mga desisyon, bag-ong mga hagit, ug daghang kinatibuk-an nga mga kausaban atol niining panahona sa atong kinabuhi. Ug gusto namong mogiya kaninyo latas niining tanan. Gusto usab namo nga inyong mahibaloan nga gitan-aw kamo namo kon si kinsa kamo kay sa kon minyo ba kamo o dili, mao kini kon ngano kini nga seksiyon wala gitawag of YSA Matag Semana. Kini nga hilisgotan gihimo alang sa tanang mga young adult, dili minyo o minyo o nabalik sa pagka-dili minyo, tungod kay ang inyong impluwensiya sa Simbahan—ug sa kalibotan—posibling dili masukod, bisan unsa ang inyong kasamtangan nga kahimtang diha sa pagka-young adult.
Naghunahuna usab kami nga ang mga hilisgotan nga among hisgotan makahatag og kadasig sa tanan nga mga young adult, bisan niadtong kapin na sa 30 anyos ang pangidaron. Nasayod kami nga ang inyong interes sa mga hisgotanan ug mga hagit nga atong hisgotan malagmit dili mausab tungod lang kay mag-birthday na usab kamo. Ang mga isyu nga atong giatubang karon mahinungdanon sa kadaghanan kanato ug may igong kadak-on nga angayang tambayayongan natong tanan, bisan pila nay atong edad.
Nasayod kami nga tanan kamo managlahi og gigikanan, mga kaagi sa edukasyon, mga kahimtang sa ekonomiya, mga kultura, ug mga sirkumstansya. Mao nga hisgotan nato ang managlahing mga hisgotanan, ug daghan sa atong mga sugilanon mabasa sa kapin sa 20 ka pinulongan diha sa Gospel Library—gusto kaming makatabang kaninyong tanan ug mahimong makahuloganon kaninyong tanan. Ang mga young adult sa tibuok kalibotan nanagdala sa ilang hugot nga pagtuo ug mga talento ngadto sa Simbahan. Sa daghang mga dapit, dili lamang kita mga lider ugma damlag, nangulo kita sa Simbahan karon, lakip na sa mga dapit diin ang Simbahan dugay nang naestablisar. Ug ang atong impluwensiya moabut gani lapas pa kay sa karon, tungod kay kita mao usab ang mga ginikanan sa mosunod nga henerasyon.
Makapadayon Kita
Daghan pa kaayo ang among ikasulti mahitungod sa bili ug potensyal sa mga young adult, apan kon magpadayon kami, sama ra nga nanghambog kami (tungod kay ang atong henerasyon ingon gayod niana kamaayo). Igo na ang pag-ingon, ang Dios nagkinahanglan kanato, nagkinahanglan kita sa Dios ug sa Iyang Simbahan, ug nagkinahanglan usab kita sa usag usa. Sa pagtambayayong, “makahimo [kita] og kasaysayan,” sigon sa gisulti ni Presidente Russell M. Nelson bahin sa mga young adult. “Siya makapahimo kaninyo nga makakab-ot sa imposible. …
“… Kamo ‘usa ka pinili nga henerasyon’ (1 Pedro 2:9), nga gi-orden nang daan sa Dios nga makabuhat og talagsaong buhat—sa pagtabang sa pag-andam sa mga katawhan niini nga kalibotan alang sa Ikaduhang Pag-anhi sa Ginoo!”1
Bisan sa padayong nagkausab nga karon ug sa wala mahibaloi nga mga dili kapugngan nga umaabot, ang pagka-young adult posible nga usa ka talagsaong panahon sa pagdiskobre sa kaugalingon ug sa paglambo, pagkakita sa atong katuyoan dinhi sa yuta, ug sa pagkat-on unsaon sa pagtuman ang ebanghelyo nga sentro gayod sa atong kinabuhi. Mahinamon kami nga maania niini nga panaw uban ninyo ug manghinaot nga kamo makanunay nga bisita!
Asa Kami Makit-an
Ang YA Matag Semana anaa diha sa Gospel Library ubos sa Mga Magasin o Adults > Mga Young Adult. Makita usab ninyo ang pipila sa among mga sugilanon diha sa Liahona nga magasin, diha sa Liahona nga pahina sa Facebook, ug diha sa ChurchofJesusChrist.org home page.
Gusto Kami nga Makadungog gikan Kaninyo
-
Unsa nga mga hilisgotan ang gusto ninyong mahisgotan?
-
Unsa nga mga istorya ang ganahan ninyong ipaambit?
-
Unsay inyong mga sugyot ngari kanamo?
Mahimo kamong mosumiter sa inyong kaugalingon nga mga istorya, mga ideya, ug feedback sa liahona.ChurchofJesusChrist.org. Naghinam-hinam kami nga makadungog gikan kaninyo!