Susu Maia i TM Faalevaiao

Ata

Talavou matutua

Susu maia i TM Faalevaiao—o se lomiga faalevaiaso ua i ai iinei o lau polokalama o le Potutusi o le Talalelei ua tusia mo talavou matutua e talavou matutua, faapea ma taitai o le Ekalesia ma isi tagata atamamai i autu e talafeagai ia i tatou i lenei vaitaimi.

O La Matou Sini

O la matou sini o le fesoasoani ia te outou ia maua tali i o outou luitau ma le malosi e fetaiai ai. O le a tatou faia lenei mea e ala i le suesueina faatasi o le talalelei a Iesu Keriso ma iloilo pe o faapefea ona taumafai talavou matutua uma i le lalolagi atoa ia ola ai.

E Uiga Ia i Tatou

Ia muamua mea e faamuamua: o lenei vaega atoa na musuia e outou. Ua tatou fetaiai ma filifiliga, luitau fou, ma le anoanoai o suiga i lenei vaitaimi o o tatou olaga. Ma e matou te mananao e taialaina outou i nei mea uma. Matou te mananao foi ia e iloa ua matou vaai ia te oe po o ai oe nai lo lou tulaga faalefaaipoipoga, o le mafuaaga lea e le‘i ta’ua ai lenei vaega o le YSA Faalevaiaso. O lenei anotusi ua faia mo talavou matutua uma, e le’i faaipoipo pe ua faaipoipo pe ua toe nofotoatasi, aua o lou aafiaga i le Ekalesia—ma le lalolagi—e lemafuatiaina, e tusa lava po o le a le tulaga o i ai nei lou talavou matua.

Matou te manatu foi o autu matou te taulimaina o le a fiafia i ai talavou matutua uma, e oo lava ia i latou ua silia ma le 30 tausaga le matutua. Matou te iloa autu tou te fiafia i ai ma o luitau o le a matou talanoa i ai atonu o le a le suia ona faapea ua faia se isi ou aso fanau. O faafitauli o fetaiai ma i tatou i lenei vaitaimi e faatatau lava i le toatele o i tatou ma e lava le tele tatou te galulue faatasi i ai, po o le a lava lo tatou matutua o i ai.

Ua matou iloa e eseese uma lava auala o tou soifua ai, talaaga o aoaoga, tulaga faaletamaoaiga, aganuu, ma tulaga. O lea o le a tatou kavaina ai ni autu eseese, ma o le tele o a tatou tala o le a maua i le silia ma le 20 gagana i le Potutusi o le Talalelei—matou te mananao ia oo atu ia te outou uma ma ia talafeagai mo outou uma. O loo ua aumaia e talavou matutua mai le lalolagi atoa o latou faatuatua ma taleni i le Ekalesia. I le tele o nofoaga, e le na o le avea ai o i matou ma taitai o a taeao, o loo matou taitaia le Ekalesia i lenei vaitaimi, e aofia ai eria lea ua leva ona faatulagaina ai le Ekalesia mo se taimi umi lava. Ma o le a oo atu o matou aafiaga i tala atu o le asō, aua o i matou foi o matua o le isi augatupulaga.

E Mafai Ona Matou Faaauau Pea

E tele naua mea e mafai ona matou tau atua e uiga i le taua ma faamoemoega o talavou matutua, ae afai matou te faaauau pea, o le a foliga e pei ua matou faaviivii (aua e talitutusa lava le lelei ma lo tatou augatupulaga). E lava le faapea atu, e manaomia i tatou e le Atua, tatou te manaomia le Atua ma Lana Ekalesia, ma e tatou te manaomia foi le tasi ma le isi. “O le a [tatou] ausia faatasi mea taua faasolopito,” e pei ona saunoa ai Peresitene Russell M. Nelson e uiga i talavou matutua. “O le a Ia faia oe ia faataunuu mea faigata. …

“… O outou ‘o se tupulaga filifilia’ (1 Peteru 2:9), na muaifaauuina e le Atua e faia se galuega ofoofogia—e fesoasoani ai e saunia tagata o lenei lalolagi mo le Afio Mai Faalua o le Alii!”¹

E ui i le fesuisui mai pea o lenei taimi ma le le mautinoa o le lumanai, e mafai ona avea le tulaga faaletalavou matua ma se taimi matagofie o le iloaina o le tagata lava ia ma le tuputupu ae, saili o tatou faamoemoega iinei i luga o le fogaeleele, ma le aoaoina pe faapefea ona faatumauina le faaogatotonuina o le talalelei i o tatou olaga. Matou te fiafia e faatasi ma outou i lenei faigamalaga ma faamoemoe o le a outou avea ma ni tagata asiasi masani!

O Fea e Maua ai i Matou

O le TM Faalevaiaso o loo maua i le Potutusi o le Talalelei i lalo o Mekasini po o Talavou > Matutua. O le a e mauaina foi nisi o a matou tala i le mekasini o le Liahona, i luga o le itulau o le Liahona i le Api o Foliga, ma i le itulau autu o le ChurchofJesusChrist.org .

Matou Te Fia Faalogo Atu Ia Te Outou

O a ni autu e te fia vaai o kavaina?
O a ni au tala o i ai e faasoa mai?
O a ni au fautuaga mo i matou?

E mafai ona e auina mai au lava tala, manatu, ma manatu faaalia i le liahona.ChurchofJesusChrist.org. Matou te fia faalogo atu ia te oe!