E mafai faapefea ona ou avea ma se faiaoga o aiga sili ona lelei?

I le avea ai ma tagata e umia le perisitua, ua poloaiina i tatou e “aoao [la tatou] tiute” ma “galue … i le filiga atoa” (MF&F 107:99). O se tasi o tiute sili ona taua mo e umia le Perisitua Arona o le valaaulia lea o tagata uma e o mai ia Keriso (tagai MF&F 20:59). O ositaulaga ma aoao o loo i ai tiute faaopoopo e “asiasi atu i fale o tagata taitoatasi o le ekalesia” ma “leoleo lea i luga o le ekalesia e lē aunoa, ma faatasi ma faamalosia i latou” (MF&F 20:47, 53). O se tasi ala tatou te faataunuu ai nei tiute o le auauna atu lea o ni faiaoga o aiga. E matua tele so tatou aafiaga lelei o ni faiaoga o aiga pe a tatou alolofa, leoleo, ma faamalosia i latou ua tofia i tatou e aoao.

Saunia oe lava ia faaleagaga

O le a se mea ua e faia ia avea ai ma se faiaoga o aiga e sili atu ona lelei? Ua faapefea ona faamanuiaina lou olaga ma olaga o isi e aoaoga i aiga? O a ni aafiaga e mafai ona e faasoa atu i alii talavou?

O a lagona o alii talavou e uiga i aoaoga i aiga? O a ni aafiaga e mafai ona latou faasoa e le tasi ma le isi?

Manatua: I le sauniaina o lenei lesona, atonu e te mafaufau e fai atu i uso o le korama o loo auauna atu o ni faiaoga o aiga e valaaulia a latou soa faafaiaoga o aiga e faatasi mai i lenei fonotaga faalekorama ma auai i le talanoaga o le avea ma faiaoga o aiga e sili atu ona lelei.

Suesue ma le agaga tatalo mau ma punaoa nei. O le a le mea o le a uunaia ai alii talavou ia avea ma ni faiaoga o aiga sili atu ona lelei?

Faataunuuina o Lo’u Tiute i le Atua (2010), 28–29, 52–53, 76–77

Alema 18:12–40; 22:4–18 (Faataitaiga a Amona ma Arona)

MF&F 20:46–59 (Ua i ai i e umia le Perisitua Arona se tiute e valaaulia tagata uma e o mai ia Keriso)

Jeffrey R. Holland, “Sui Vaaia i le Ekalesia,” Ensign po o le Liahona, Nov. 2016, 61–67

Thomas S. Monson, “O Leoleo Mamoe Moni,” Ensign po o le Liahona, Nov. 2013

“O Tiutetauave o Faiaoga o Aiga,” Tusitaulima 2: Taitaiina o le Ekalesia (2010), 7.4.1

Vitio: “Faiaoga o Aiga: Faamalosiauina o E Umia le Perisitua Arona”

5:50

Aoao atu i le ala a le Faaola

I soo se nofoaga, na avea le Faaola ma faataitaiga ma faaaoao sili ia i latou na Ia aoaoina. E mafai faapefea e alii talavou ona aoao mai au faataitaiga —ma faataitaiga a isi o loo umia le Perisitua Mekisateko—a o latou tauivi e faataunuu o latou tiute o ni faiaoga o aiga?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faailoa atu le lesona o lenei vaiaso:

Valaaulia alii talavou e lipoti mai mea na latou faia e faataunuu ai soo se tofiga na latou maua i le lesona o le vaiaso ua tea.
Valaaulia alii talavou e faasoa mai ni aafiaga na latou maua i le avea ai ma faiaoga o aiga po o le asiasia foi e ni faiaoga o aiga. Aisea e poloai ai e le Alii e o loo umia le perisitua e asiasi i aiga o ni faiaoga o aiga?

Aoao faatasi

O le faamoemoega o lenei lesona o le fesoasoani lea i alii talavou taitoatasi e fai se fuafuaga ia avea ma se faiaoga o aiga sili atu ona lelei. Tuu atu i alii talavou se taimi i le taimi o le fonotaga a le korama e tusi ai fuafuaga i a latou tusi o le Tiute i le Atua . Fautuaina i latou e faasoa mai a latou fuafuaga i le tasi ma le isi. I fonotaga a le korama i le lumanai, valaaulia i latou e faasoa mai ni aafiaga na latou maua i le auauna atu o ni faiaoga o aiga.

Faitau faatasi Mataupu Faavae ma Feagaiga 20:53, ma valaaulia alii talavou e fai se lisi (pe tusi se ata) o ni auala e mafai ai e faiaoga o aiga ona “leoleo i le ekalesia e lē aunoa, ma faatasi ma faamalosi i latou.” E mafai faapefea ona agai i luma alii talavou i le avea ai o ni faiaoga o aiga? Mafaufau e valaaulia le epikopo, le taitai vaega o faitaulaga sili, po o le peresitene o le korama a toeaina e talanoa i le korama e uiga i le ala e avea ai ma se faiaoga o aiga lelei. (Tagai i le Tiute i le Atua,52, 76.)Fuafua e fai atu i alii talavou e mafaufau i ni fesili ao lumanai le fonotoaga e mafai ona o latou fesili atu ai i nei taitai e uiga i aoaoga o aiga. Fai i alii talavou e su’e a latou tusi i le vaega “Galue” o a latou Tiute i le Atua (itulau e 53 po o le 77) ma fai ni fuafuaga e avea ai ma ni faiaoga o aiga sili ona lelei.
Fai atu i alii talavou taitasi e faitau se tasi o tala mai le saunoaga a Peresitene Thomas S. Monson “True Shepherds” po o le saunoaga a Elder Jeffrey R. Holland “Sui Vaaia i le Ekalesia.” Fai atu e o mai taitoatasi i luma o le potu, toe faamatala le tala i ana lava upu, ma faasoa mai se mea ua aoao mai ai e uiga i le ala e avea ai o ia ma se faiaoga o aiga sili ona lelei. O le a se isi mea o loo faamamafa atu i alii talavou mai nei lauga?
Vaevae le korama i ni vaega se lua, ma fai atu i vaega taitasi e fai se lisi o auala e mafai ona latou faaleleia ai i le avea ma ni faiaoga o aiga. A mavae ni nai minute, valaaulia se tasi o vaega e faaopoopo i le latou lisi e ala i le faitauina o vaega o le saunoaga a Elder Jeffrey R. Holland“Sui Vaaia i le Ekalesia.” Valaaulia le isi vaega e faaopoopo i le latou lisi e ala i le faitauina o le vaega 7.4.1 o le Tusitaulima 2. Talosaga atu i vaega e faasoa mai a latou lisi, ma uunaia ia alii talavou taitasi e filifili se tasi o mea mai le lisi o le a ia galue ai ao lei oo i le isi ana asiasiga o faiaoga o aiga. Valaaulia ia uso o le korama e faatino i se tala se asiasiga lelei a faiaoga o aiga.
Faaali le vitio “Faiaoga o Aiga: Faamalosiauina o E Umia le Perisitua Arona” ma fai atu i alii talavou e vaai mo auala e mafai ai e i latou e umia le Perisitua Arona ona auai i aoaoga o aiga. O a ni aafiaga e mafai e alii talavou ona faasoa mai e tali tutusa ma mea na latou vaai ai i le vitio? O a mea ua aoao e alii talavou mai lenei vitio e mafai ona fesoasoani ia i latou e faaleleia i le avea ai ma ni faiaoga o aiga?

5:50
Fai atu i le afa o le korama e faitau e uiga ia Amona i le Alema 18:12–40; fai atu i le isi afa e faitau e uiga ia Arona i le Alema 22:4–18. Valaaulia i latou e vaai ma faasoa mai mea na latou aoao mai ia Amona ma Arona e mafai ona fesoasoani ia avea ai i latou ma faiaoga o aiga e sili atu ona lelei—mo se faataitaiga, o le ala na la aoao atu ai i le Agaga, aoao atu ma le alofa, fetuunai a la aoaoga ia talafeagai ma manaoga, faasoa atu molimau, faaaoga tusitusiga paia, fai atu fesili, ma isi. (O lenei gaoioiga na sii mai se gaoioiga o le suesuega faaletagata i le itulau 193 o Talai Lau Talalelei).

Fai atu i alii talavou e faasoa mai mea na latou aoaoina i le aso. Pe ua latou malamalama pe faapefea ona avea ma faiaoga o aiga e sili atu ona lelei? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Fesoasoani i le korama e saunia se aoaoga puupuu e uiga i aoaoga o aiga e faalagolago i mea ua latou aoaoina i le aso. E mafai ona latou faasoa atu i le korama a toeaina i se fonotaga i le lumanai a le korama.
Faamatala atu i le vaiaso a sau, o le a valaaulia ai i latou e faasoa mai ni aafiaga o loo latou maua.