Aisea e tatau ai ona ou tausia lo’u tino e pei o se malumalu?

O o tatou tino sa foafoaina i le faatusa o le Atua. O ni meaalofa mai le Tama Faalelagi e mafai ai ona tatou oo i le olaga i le tino ma faaauau atu ai ia avea atili e pei o Ia. O lenei malamalama e aafia ai le ala tatou te tausia ai o tatou tino ma o tatou lagona e uiga i le Tama Faalelagi ma i tatou lava. A tatou tausia o tatou tino o ni malumalu o le Atua, tatou te maua faamanuiaga faaletino, faalelagona ma faaleagaga.

Saunia oe lava ia faaleagaga

O a ni faamanuiaga ua e maua a o e taulimaina lou tino e pei o se malumalu o le Atua? O a auala ua tuputupu ae ai lou malamalamaaga i le paia o lou tino a o e maua ni aafiaga i le olaga ma vaavaai i olaga o isi?

O a ni luitau o loo feagai ma alii talavou a o latou taumafai e taulima o latou tino o ni meaalofa paia mai le Atua? E faapefea ona fesootai le ala o loo latou taulima ai o latou tino i le mana o le perisitua?

Ia suesue ma le agaga tatalo ia mau ma punaoa nei. O le a se mea ua musuia oe e le Agaga e faasoa atu i alii talavou?

Kenese 39:1–21; Tanielu 1:3–21 (Sa faaalia e Iosefa ma Tanielu le faaaloalo mo o laua tino)

1 Korinito 6:19–20; MF&F 93:33–35 (O i tatou o malumalu o le Atua)

MF&F 88:15–16 (O le agaga ma le tino o le auga atoa lea o le tagata)

MF&F 130:22; Mose 6:9 (Ua faia i tatou i le faatusa o le Atua)

Gordon B. Hinckley, “O le a Faatupulaia le Filemu o Ana Fanau,” Ensign, Nov. 2000, 50–53

Vitio: “O le Mustang Mamona,” “Ola Mama: O Fea e Tuaoi Ai?”

7:43

NaN:NaN

Aoao atu i le ala a le Faaola

Sa alofa le Faaola ia i latou sa Ia aoaoina. Sa Ia silafia i latou ma tagata e mafai ona avea ai i latou. Sa Ia sailia ni auala tulaga ese ia latou tuputupu ae ai—auala sa faapitoa lava mo na o i latou. Pe a latou oo i ni tauiviga, e le liliuese o Ia mai ia i latou ae faaauau pea ona alofa ma auauna atu ia i latou. O le a se mea e mafai ona e faia e alofa ma auauna atu ai i alii talavou e pei ona faia e le Faaola?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faamanatu i alii talavou mea sa latou aoaoina i le lesona o le vaiaso ua te’a. E i ai ni a latou fesili po o manatu e uiga i mea sa latou talanoaina?
Faaali atu se ata o se malumalu, ma valaaulia alii talavou e tusi i lalo ni upu e oo atu i o latou mafaufau a o latou mafaufau e uiga i le malumalu. O a ni upu faafeagai o na upu? Fai atu i alii talavou e faasoa atu ia mea sa talosagaina i latou e fai e fai ai o latou tino faaletino e pei o ni malumalu o le Atua.

Aoao faatasi

O gaoioiga taitasi o loo i lalo o le a fesoasoani i tagata o le korama ia malamalama ai o o latou tino e paia. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau korama:

Ia tuu atu i alii talavou taitoatasi se mau o loo i lenei otootoga. Ia valaaulia alii talavou e suesue ia fuaitau ma otooto i se fuaiupu mea ua latou aoaoina i le mafuaaga e paia ai o latou tino. Fai atu ia i latou e faasoa atu mea e mafai ona latou faia e tausisia ai le mama o o latou tino ma mafaufau.
Ia valaaulia alii talavou taitoatasi e faitau se vaega o se tasi o lauga o loo fautuaina atu i lenei otootoga. Ona tuu atu lea i alii talavou ni nai minute e saunia ai se lesona puupuu e uiga i le paia o le tino. Ia uunaia i latou e faaaoga se upusii mai le lauga faatasi ai ma o latou lava aafiaga ma molimau patino.
Faitau faatasi o se korama le 1 Korinito 6:19–20 ma le MF&F 93:33–35. Fai atu i alii talavou e fai se lisi o auala ua pei ai o tatou tino o se malumalu o le Atua. Ia valaaulia i latou e talanoa nisi o luitau e feagai ma le autalavou i le tausia o o latou tino ia pei o se malumalu. O a ni mea e mafai ona latou faia e foia ai nei luitau?
Vaevae le korama i ni vaega taitoalua. Tofi se tagata se toatasi o vaega taitasi e faitau le Kenese 39:1–21 ae o le isi e faitau le Tanielu 1:3–21 (moa ta o nei tala, tagai i le Tusi Ata o le Talalelei, 11, 23). Fai atu ia i latou e vaavaai mo ni auala sa faaalia ai e Iosefa ma Tanielu le faaaloalo mo o laua tino, ona faasoa atu lea i le tasi ma le isi mea latou te maua. E mafai faapefea ona latou mulimuli i faataitaiga a Iosefa ma Tanielu?
Ia valaaulia alii talavou e tagai i le faasino mataupu o le Mo Le Malosi o le Autalavou ma faailoa po o fea o tulaga faatauaina e faatatau i le tausisia o o tatou mafaufau ma tino ia mama. Vaevae le korama i ni vaega, ae tuu atu ia i latou e suesue nei vaega ma sue tali i le fesili “Aisea e tatau ai ona ou tausia lo’u tino e pei o se malumalu?” Valaaulia i latou e faasoa atu ni mea e mafai ona latou faia e ola ai i nei tulaga faatulagaina.
Ia faaali atu se tasi o vitio o loo fautuaina atu i le otootoga lenei. Ia valaaulia alii talavou e faailoa ma talanoaina ia tala faatatau o loo faaaogaina i le vitio e faamalamalama ai le taua o le tausisia o o tatou tino mama. O le a se mea e mafai ona latou faia e uunaia ai e le tasi le isi ia ola i tulaga faatulagaina o loo aoao mai i le vitio?
Fai atu i alii talavou e faaaoga le vaega “Ofu ma Foliga Vaaia” i le Mo le Malosi o le Autalavou e tali ai fesili e pei o le “O a tulaga faatonuina o le Alii e faatatau i le tauagafau?” “Aisea e taua ai le mulimuli i nei tulaga faatauaina?” ma le “E faapefea ona faaalia i lo tatou tauagafau le faaaloalo mo le paia o o tatou tino?”

Fai atu i alii talavou e faasoa atu mea sa latou aoaoina nei. Pe ua latou malamalama lelei i le paia o o latou tino? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaalu o se isi taimi i lenei aoaoga faavae?

Motugaafa faafaiaoga

“Aloese mai le taumafai e aoao atu mea uma lava e mafai ona tautalagia i se mataupu e tasi. O i latou o loo e aoaoina atonu ua i ai so latou malamalama i le mataupu. Ia manatua o lau lesona e le na o le pau lea o le taimi o le a latou aoao ai e uiga i le mataupu” (O Le Aoao Atu, E Leai Se Isi Valaauga E Sili Ai [1999], 106).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Tuu atu lana molimau e uiga i faamanuiaga e oo mai i le taulimaina ma le faaaloalo o o tatou tino.
Fuafua ma tagata o le korama e galulue faatasi e faataunuu le vaega “Soifua Maloloina Faaletino” o le Tiute i le Atua (itulau e 31–35).