E mafai faapefea ona ou maua le mafanafana pe a maliu se tasi ou te alofa i ai?

O le oti o se vaega taua o le ata o le faaolataga. Ina ia avea faapei o lo tatou Tama Faalelagi, e ao ona tatou oo i le oti ma maua ni tino toetutu, atoatoa. A tatou malamalama o le oti o se vaega o le fuafuaga o le Tama Faalelagi, ma na faatoilalo e Iesu Keriso le oti e ala i Lana Togiola, e mafai ona tatou maua le faamoemoe ma le toafilemu pe a maliu se tasi e pele [ia te oe].

Saunia oe lava ia faaleagaga

Pe ua e maua pe na maua foi e isi e te iloaina le faamoemoe pe a maliliu ni isi e pele ia te i latou? O a ni mau po o ni mataupu faavae sa fesoasoani atu?

Atonu ua uma ona feagai nisi o alii talavou ma se maliu o se tasi e pele [ia te i latou]. O le a oo uma i ai i latou i se aso. O le a se mea e te manao ia latou iloa o le a fesoasoani ai ia i latou?

Ia suesue ma le agaga tatalo ia mau ma punaoa nei. O a ni lagona e te maua a o e suesue?

Mosaea 16:7–8 (O Le Toetu o Iesu Keriso ua aveese ai le tui o le oti)

Mosaea 18:8–10; MF&F 81:5 (E tatau ona tatou faamafanafana atu ia i latou o e manaomia le faamafanafanaga)

Alema 11:42–45 (Ona o le Toetu o le Faaola, o le a tatou toe maua ai o tatou tino)

Alema 28:12; MF&F 42:45–46 (Tatou te faavauvau mo e ua maliliu, ae o le oti e suamalie ia i latou o e oti o i le Alii)

Alema 40:11–14 (O le a ola pea o tatou agaga pe a tatou oti)

MF&F 137:5–10 (Ua vaai Iosefa Samita i lona uso o Alavini, tamaiti laiti, ma isi o i le malo selesitila)

MF&F 138 (Faaaliga a Peresitene Iosefa F. Samita e uiga i le lalolagi o agaga)

Thomas S. Monson, “Mrs. Patton—e Faaauau Pea le Tala,” Ensign po o le Liahona, Nov. 2007, 21–24; tagai foi i le vitio “Seia Tatou Toe Feiloai”

3:39

Russell M. Nelson, “Faitotoa o le Oti,” Ensign, Iulai 1992, 90–93

Shayne M. Bowen, “‘Oute Ola A’u, O le Mea Lea e Ola Outou,’” Ensign po o le Liahona, Nov. 2012, 15–17

Vitio: “O Loo Avea Pea i Tatou o se Aiga,” “O le a Ia Tuuina Atu ia te Oe le Fesoasoani”

4:46

4:47

Aoao atu i le ala a le Faaola

Sa fesili le Faaola i ni fesili sa mafua ai ona mafaufau ma [i ai] lagona loloto o ni isi o tagata. E mafai faapefea ona e valaaulia alii talavou e mafaufau loloto ma saili mo musumusuga? E mafai faapefea ona e fesoasoani ia latou lagona le saogalemu i le faasoaina atu o o latou lagona patino?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

O a ni mea ua valaaulia alii talavou e fai o se taunuuga o mea sa latou aoaoina? Valaaulia i latou e faasoa mai pe faapefea ona avea le faatinoina o mea ua latou aoaoina ma aafiaga i o latou olaga ma olaga o o latou aiga ma uo.
Faasoa atu sou lava aafiaga, po o se aafiaga mai se isi tagata, e uiga i le mauaina o le toafilemu i le mavae ai o le maliu o se tasi e pele. Valaaulia alii talavou e faasoa atu o latou aafiaga.

Aoao faatasi

O gaoioiga taitasi o loo i lalo o le a fesoasoani i tagata o le korama e aoao ai e uiga i le olaga pe a mavae le oti. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau korama:

Ia valaaulia alii talavou e tusi i lalo a latou fesili, manatu, po o popolega e uiga i le oti, ona tuu atu lea latou te sue mo tali i mau o loo fautuaina atu i lenei otootoga pe mai le saunoaga a Elder Russell M. Nelson “Faitotoa o le Oti.” Ia uunaia i latou e tusi i lalo ni mau faapitoa po o faamatalaga o loo ta’ua ai le tiute o le Faaola i le fesoasoani ia i tatou e faatoilalo le oti. Fai atu ia i latou e faasoa atu mea ua latou maua. Valaaulia i latou e faasoa atu o latou lagona e uiga i mea ua faia e le Faaola mo i tatou.
Faaali le vitio “O le a Ia Tuuina atu ia te Oe le Fesoasoani,” ma valaaulia alii talavou e faasoa atu se mea sa faagaeetia ai i latou. A uma le vitio, talanoa pe o le a se eseesega e i ai le lalolagi pe ana faapea e iloa uma e tagata le mea ua iloa e le alii talavou i le vitio.

4:47
Faasoa atu le tala e uiga ia Mrs. Patton mai le saunoaga a Peresitene Thomas S. Monson “Mrs. Patton—e Faaauau Pea le Tala,” pe faaali atu le vitio “Seia Tatou Toe Feiloai.” Fesili atu i alii talavou pe o le a sa latou tali atu i le fesili sa fesili ai Mrs. Patton ia Thomas Monson talavou. Ia faitau faatasi o se korama le Mosaea 18:8–10 ma le Mataupu Faavae ma Feagaiga 81:5. Ia talanoa i le tiutetauave o loo i ai i e umia le perisitua e tuuina atu le faamafanafanaga, lagolagosua, ma isi auaunaga faaleperisitua i aiga o e maliliu nisi e pele ia i latou. E mafai ona e valaaulia se sui o le au epikopo e auai i le talanoaga lenei.

3:39
Valaaulia le afa o le korama e faitau le tala e uiga ia Sister Ramirez o loo i le saunoaga a Elder Shayne M. Bowen “‘Oute Ola A'u, O le mea lea e Ola ai Outou,’” ae valaaulia le isi afa e faitau le tala e uiga i le atalii o Elder Bowen o Tyson. Fai atu ia i latou e faasoa atu ni mea latou te aoao ai e uiga i auala e maua ai le mafanafana pe afai e maliu se tasi e pele ia i latou ma pe faapefea foi ona faamafanafana atu i isi. Ia valaaulia alii talavou e faasoa atu soo se aafiaga sa latou oo i ai ina ua maliu se tasi e pele ia i latou. Na faapefea ona fesoasoani lo latou malamalama e uiga i le Togiola ma le ata o le faaolataga latou te maua ai le faamafanafanaga? Afai e talafeagai, faasoa atu sou lava aafiaga.
Vaevae le vasega i ni vaega se lua. Fai atu i se tasi o vaega e faitau le Mataupu Faavae ma Feagaiga 137:5–10 ma le isi vaega e faitau le Mataupu Faavae ma Feagaiga 138:57–58. Fai atu i alii talavou e talanoaina ia latou vaega ni mea o aoao mai e nei mau e uiga i mea o le a tutupu pe a mavae le oti. Ona talanoa lea faatasi o se korama, le auala e mafai ai e lenei malamalama ona fesoasoani i se tasi ua maliu se e pele ia te ia. E faapefea ona fesootai lenei malamalama ma lo tatou tiutetauave o le faia o le galuega o le talafaasolopito o aiga ma le malumalu?

Fai atu i alii talavou e faasoa atu se mea sa latou aoaoina nei. Pe ua latou malamalama i le ala e maua ai le mafanafana pe a maliu se tasi latou te alolofa i ai? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“O fesili e tusia i luga o le laupapa ae lei amataina le vasega o le a fesoasoani i tagata o loo aoaoina e amata ona mafaufau e uiga i autu ao lei amataina le lesona” (O Le Aoao Atu, E Leai Se Isi Valaauga E Sili Ai, 100).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia taitaia se talanoaga e uiga i mea e mafai ona fai e tagata o le korama e tuuina atu ai le auaunaga mo se tasi e le’i mamao atu se taimi sa maliu ai se tasi e pele ia te ia. O i ai ni tina ua maliliu a latou tane po o isi o le uarota po o le alalafaga e ono manaomia se fesoasoani?