O le a le perisitua?

O le perisitua o le mana faavavau ma le pule a lo tatou Tama Faalelagi. Na foafoaina e le Atua ma pulea le lagi ma le lalolagi, e ala i le mana o le perisitua. O le mana lenei ua Ia faaolaina ma faaeaina ai Lana fanau. Na te tuuina mai i e agavaa e umia le perisitua le pule e faatautaia ai sauniga o le faaolataga. E mafai ona agavaa fanau uma a le Tama Faalelagi ina ia taliaina nei sauniga ma maua le mana ma faamanuiaga o le perisitua.

Saunia oe lava ia faaleagaga

O a auala ua faamanuiaina ai lou olaga e le perisitua? O a nisi o aafiaga taua ua e maua i le perisitua e mafai ona e faasoa atu i alii talavou?

O le a se mea e mafai ona e faia ao lei amataina le fonotaga faalekorama ia iloa ai po o a mea e iloa e alii talavou taitasi e uiga i le perisitua? O a ni aafiaga na latou maua i le faaaogaina o le perisitua? E faapefea ona uunaia ai oe i mea o le a e filifilia e aoao atu?

A o e sauniuni, suesue ma le agaga tatalo mau ma punaoa nei. O a mea ua uunaia oe e faasoa atu i le korama?

Mataio 3:1–6; 28:19; Ioane 15:16 (O e umia le perisitua e talai le talalelei)

Galuega 3:1–8; Iakopo 5:14–15 (O e umia le perisitua e tuuina atu faamanuiaga e faamalolo ai e mamai ma mafatia)

Eperu 5:4 (O e umia le perisitua ua valaauina e le Atua)

3 Nifae 11:12; 18:1–5; MF&F 107:20 (O e umia le perisitua e faatinoina sauniga)

MF&F 20:38–67 (Tiute o e umia le perisitua)

MF&F 65:2; 124:123 (O e umia le perisitua e fesoasoani e pulea le Ekalesia)

MF&F 121:34–46 (O le mana ma le pule o le perisitua e na o mataupu faavae o le amiotonu e faagaoioi ai)

Henry B. Eyring, “‘Savavali faatasi ma A’u’,” Ensign po o le Liahona, Me 2017, 82–85

Thomas S. Monson, “O Le Perisitua—o se Meaalofa Paia,”Ensign po o le Liahona, Me 2015, 88-90.

M. Russell Ballard, “O La’u Galuega ma Lo’u Mamalu Lenei,” Ensign po o le Liahona, Me 2013, 18–21

“Perisitua,” Faamaoni i le Faatuatua (2004), 133–40

Vitio: “Faamanuiaga o le Perisitua e Maua e Tagata Uma,” “Mana o le Atua,” “O Faamanuiaga o le Perisitua”

2:23

3:25

3:4

Aoao atu i le ala a le Faaola

Na faatuatuaina e le Faaola Ona soo, saunia i latou, ma tuu atu ia i latou tiutetauave taua e aoao atu, faamanuia, ma auauna atu i isi. E faapefea ona e fesoasoani i alii talavou ia liua i aoaoga faavae o le perisitua ina ia avea le auauna atu i isi o se vaega o o latou olaga?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i se alii talavou ia sau i le fonotaga a le korama ua saunia e faasoa mai mea na ia aoaoina i le lesona o le vaiaso ua tea. Fautuaina o ia e faasoa mai ona lagona ma lana molimau.
Valaaulia alii talavou e faatino se talanoaga o loo fesili mai ai se uo o se isi lotu, “O le a le perisitua?” E faapefea ona latou faamatalaina le perisitua? O a aafiaga e mafai ona latou faasoa mai? Faasoa i alii talavou le uiga o le perisitua o loo tuuina mai i le amataga o lenei otootoga po o le vitio “Faamanuiaga o le Perisitua e Maua e Tagata Uma” ma fesili ia i latou poo a ni upumoni faaopoopo ua latou aoaoina e uiga i le perisitua.

2:23

Aoao faatasi

O gaoioiga nei taitasi o le a fesoasoani i uso o le korama e malamalama ai i le perisitua. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

I lana lauga “‘Savavali faatasi ma A’u’,” Sa faasoa mai e Peresitene Henry B. Eyring nisi mau lea sa ia ta’ua e mafai ona “faalolotoina ai lo tatou lagona o le maofa e faatatau i le perisitua paia” (Ensign po o le Liahona, Me 2017, 82–83). Fai atu i alii talavou taitasi e suesue i nei mau ona faamatala lea i le vasega mea na ia aoaoina e uiga i le perisitua. Tuu atu i alii talavou nisi minute e mafaufau loloto ai i fesili na fesili ai Peresitene Eyring i le parakarafa lea e amata i le “O le tasi ala e tali atu ai i se faamatalaga ofoofogia ma musuia.” E faapefea ona musuia e nei fesili i latou?”
Vaevae le korama i ni vaega ma atofaina ia vaega taitasi e faitau se tasi o tala mai le saunoaga a Peresitene Thomas S. Monson “O Le Perisitua—o se Meaalofa Paia.” Fai atu i vaega taitasi e aotele mai le tala mo le korama ma faasoa mai le mea na aoaoina e Peresitene Monson e uiga i le perisitua mai ona aafiaga. O a aafiaga na maua e alii talavou na faamalolosia ai a latou molimau i le perisitua?
Valaaulia se uso o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua e aoao mai ai ma aoao atu e uiga i le perisitua ma ki o le perisitua (tagai “Malamalama i le Aoaoga Faavae,” itulau 18, 42, po o le 66).
Vaevae le korama i ni vaega laiti. Atofa ia tofu vaega taitasi ma se mau se tasi pe sili atu ua fautuaina mai i lenei otootoga, ma fai atu ia i latou e vaavaai i na mau mo tiute o i latou o umia le perisitua. Valaaulia i latou e sue i le Tusi Ata o le Talalelei ia maua ai ni ata o tagata taitasi o loo faia tiute o le perisitua, ma fai atu ia i latou e faamatala mai pe ua faapefea ona faamanuiaina isi e ala atu i lenei auaunaga. Valaaulia alii talavou e faasoa mai o latou aafiaga i le faataunuuina o o latou tiute o le perisitua ma faamatala mai pe na faapefea ona aafia isi ia latou auaunaga.
Tusi i le laupapa “O a faamanuiaga ua oo mai i lou olaga ona o le perisitua?” Valaaulia alii talavou e mafaufau loloto i lenei fesili ma faasoa mai a latou tali.Faaali se tasi o vitio o loo lisiina i lenei otootoga, po o le faitau faatasi ia parakalafa muamua e iva o le saunoaga a Elder M. Russell Ballard “O Lau Galuega Lenei ma Lou Mamalu.” Valaaulia ia alii talavou e vaavaai mo tali i fesili e pei o le “O le a le perisitua?” ma “E faapefea ona faamanuiaina i tatou e le perisitua?” Valaaulia ia alii talavou e faamaumau ni tala e uiga i le auala na faamanuia ai e le perisitua o latou aiga i totonu o a latou tusi o talaaga po o tamaitusi o le O Lou Aiga . E mafai ona latou talosagaina o latou matua po o tagata o le aiga e fesoasoani atu.

Fai atu i alii talavou e faasoa mai mea na latou aoaoina i le aso. Pe ua latou malamalama atili ea i le perisitua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

E faaiuina e le uso o le au peresitene o le korama lea o loo taitaia le fonotaga. E mafai ona ia:

Faasoa mai ona lagona e uiga i le perisitua ma lona taua i lona olaga.
Lu’i uso o le korama e faasoa i se tagata o le aiga po o se uo mea na latou aoaoina ma lagonaina e uiga i le perisitua i levasega i le aso.