Matou te faafetai mo Lou Alo Pele o Iesu Keriso, ma le talalelei toefuataiina. Matou te faafetai atu i Lau Afio mo le Perofeta o Iosefa Samita, o lē na faaali i ai e Lau Afio mataupu faavae e faavavau o le talalelei ma faiga masani, e aofia ai sauniga o Lou maota paia. Matou te faafetai atu i Lau Afio mo lo matou Perofeta pele, Peresitene Russell M. Nelson, i lalo o lana taitaiga faatasi ai ma le pule o le Perisitua Mekisateko ua matou galulue ai i aso nei.
Matou te faamamaluina ma avatu le faafetai mo auga tupulaga o au paia faatuatua o ē na muamua atu i lenei galuega paia; mo a latou osigataulaga, lototele, ma le faatuatua ma mo i latou uma o loo atia’eina Lau galuega ma le malo i nei aso. Ma e matou te talosagaina se faamanuiaga mo le toatele na mafai ai ona faia lenei aso olioli.
Matou te ōle atu i Lau Afio ia pa’i atu i soifuaga o tagata o loo alala i totonu o tuaoi e oo atu i ai le aapa a lenei maota paia ina ia latalata atu o latou loto i Lau Afio. Faamanuia i latou i se manao e saili atu i le savali o le talalelei toefuataiina ma le Ekalesia a Iesu Keriso.
Le Atua e, na E auina maia Lau perofeta o Elia, ia liliu loto o tamā i fanau ma loto o fanau i o latou tamā. Ua tatala e lenei malumalu paia ia faitotoa i le faavavau ina ia faataunuu ai nei faamoemoega.
Matou te ōle atu i Lau Afio ia faamalolosia aiga ma soifuaga o tagata taitoatasi. Faamafanafana ma faamanuia i latou i o latou tulaga uiga ese; ia faatutusaina i latou i lu’itau o lenei tupulaga. Faamanuia i latou i le lototele, lotomaualalo, ma le alofa mamā. Faamanuia i latou i le manao ia faia o latou aiga ma nofoaga o le faapotopotoga ma sulufaiga o le filemu, faaleagaga, alofa, ma le lotogatasi.
Le Tamā Pele, faamagalo i matou i le tele o o matou faaletonu. Ia faamalosia lo matou faatuatua ma faamausali i matou e tetee atu i vaivaiga. Tuu mai ia i matou le mana e tetee atu ai i le taufaasese o le fili. Tau ina ia tupu pea i o matou loto le alofa mo Lau Afio ma Lou Alo, ma ia faailoa i lo matou alofa mo Lau Afio, lo matou alofa mo le tasi ma le isi, ma tauivi ia tausi pea i Au poloaiga.
Ma i lenei taimi, e tusa ma le pule o le perisitua e faavavau, ma i le avea ai ma Au auauna faatauvaa, matou te faapaia ai i Lau Afio ma Lou Alo Pele le Malumalu o Hamilitone Niu Sila o Le Ekalesia a Iesu Keriso o le Au Paia o Aso e Gata Ai. I lenei taimi faasolopito, matou te faaaofia ai i lenei tatalo o le faapaiaga ia faamanuiaga uma, ma folafolaga na fofogaina i le taimi o le uluai faapaiaga e Peresitene Tavita O. MaKei i le 1958.
Matou te faapaiaina le eleele faatasi ai ma ona togalaau matagofie. Matou te faapaiaina fale ma nofoaga uma i luga o lenei fanua ma le malumalu mai le faavae e oo atu i le pito a luga o lona tumutumu. Matou te faapaiaina le fausaga o le malumalu ina ia mafai ona tu mausali e tetee atu i afā o le natura ma vaavaai atu i ai ma le migao ma le faaaloalo. O totonu, o le vai papatiso, potu o faaeega paia, potu selesitila, potu o faamauga faatasi ma o latou fata faitaulaga paia, ma isi uma vaega o lenei maota matagofie.
Sei E talia lenei maota paia e fai ma meaalofa o o matou loto ma lima. Se’i E faamamaluina i Lou afio ai. Ia afio ai Lou Agaga Paia iinei e le aunoa ma ia lagonaina e i latou uma o ē o mai i ai e tapuai atu i Lau Afio. Tau ina ia oo mai se tiute o le paia i luga o lenei maota paia. Tau ina ia tu o se sulu o le upumoni ma le malamalama e faavavau ma avea o se valaaulia e o mai i Lau Afio. Se’i e puipuia lenei malumalu mai soo se mea e afaina pe faaleagaina ai.
Ia mafai e tagata uma ona ulufale mai i ai ma le agavaa. Se’i e faamaufaailogaina i o latou luga se faaeega o le amiotonu lea o le a avea ma se puipuiga i o latou olaga atoa.
Ia faamanuia le autalavou o Lau Ekalesia ina ia latou mauaina se malamalamaaga o le faavavau ma le paia o Lau galuega. Tau ina ia latou o mai soo i lenei malumalu ma ia tumau ma faamaoni i a latou feagaiga e ala i upu ma galuega.
Faamanuia i latou uma e auai mai i lenei malumalu, ina ia latou iloa o i latou o Lou nuu o le feagaiga ma o le auaunaga e tuu atu i isi o le auaunaga lava lea i Lau Afio ma Ou faamoemoega.
Matou te tatalo mo le peresitene o le malumalu ma le faatina ma i latou uma o ē o le a auauna iinei i soo se itu. Faamanuia i latou i le olioli i o latou loto a o latou fesoasoani ai i Lau galuega paia.
Matou te faafetai atu i Lau Afio mo ē totogi faamaoni le sefuluai, o a latou taulaga faapaiaina ua mafai ai ona fausia lenei malumalu ma isi malumalu. Se’i E tatalaina pupuni o le lagi ma liligi mai faamanuiaga i o latou luga.
Tau ina ia lagona e tagata o Lau Ekalesia Lou alofa ma Ou aao o le alofa mutimutivale o loo siomia ai i latou. Faalautele i latou. Faauluuluola i latou. Faamanuia i latou i mea ua na’o Lau Afio e silafiaina o loo latou manaomiaina. Faamanuia i nuu tuaoi i le afio filemu ai o Lou agaga.
Lo matou Tama i le Lagi, matou te alolofa i Lau Afio ma Lou Alo Pele. Matou te faafetai i Lau Afio mo Lana taulaga togiola. E maeu le mamalu ma le atoatoa o Lau fuafuaga mo le faaolataga ma le faaeaga o Lau fanau.
Le Atua e lo matou Tama Faalelagi, ua tumu o matou loto i le alofa ma le faafetai a o matou toe faapaiaina ai nei ma tuu atu lenei maota faapelepele i Lau Afio, i le suafa o lo matou Togiola, le Faaola o le lalolagi, Lou lava Alo pele, lo matou Alii ma le Matai, o Iesu Keriso, amene.