Magpasalamat kami Kanimo sa gasa sa Imong Hinigugma nga Anak, nga mianhi sa kalibutan sumala sa Imong balaan nga plano sa pagpakita namo sa Iyang ehemplo unsaon namo sa pagpakabuhi. Among ipadayag ang among dakong pasalamat sa walay kinutuban nga gugma nga gipakita sa Iyang maulaong sakripisyo samtang Iyang gihatag ang Iyang Kaugalingon nga bayad alang sa tanang katawhan, nagbugto sa mga gapos sa kamatayon ug nagbukas sa mga ganghaan sa kaluwasan. Among gidayeg ang Iyang balaang ngalan, among Manunubos ug among Ginoo.
Ang among kasingkasing napuno sa pasalamat Kanimo alang sa kahayag sa Imong walay katapusan nga ebanghelyo, nga gipahiuli sa kalibutan niining, dispensasyon sa kahingpitan sa mga panahon, pinaagi sa instrumento ni Propeta Joseph Smith. Mapasalamaton kami nga Imong gipahiuli, pinaagi sa langitnong mga mensahero, ang Aaronic ug Melchizedek priesthood ug dayon ang tanang mga yawe sa priesthood nga gihuptan sa Imong mga propeta gikan sa panahon ni Adan ngadto ni Abraham ug Moises ngadto ni Malaquias.
Mapasalamaton kami sa hugot nga pagtuo niadtong, dul-an sa katunga sa siglo ang milabay, unang miabut sa Pilipinas isip mga misyonaryo sa Imong Simbahan. Magpasalamat usab kami Kanimo, sa dako ug matinud-anong serbisyo sa liboan ka mga misyonaryo nga misunod sa ilang mga lakang, sa pagpakigbahin sa Imong mensahe niadtong andam nga maminaw ug modawat sa ebanghelyo.
Magpasalamat kami Kanimo sa saad nga anaa sa Basahon ni Mormon nga sa ulahing mga adlaw nga Imong hinumduman ang Imong mga anak sa mga isla sa dagat. Kami ania sa nasud nga daghan og mga isla, kansang mga katawhan nahigugma sa kamatuoran ug kansang mga kasingkasing bukas ngadto sa mensahe sa mahangturong ebanghelyo. Magpasalamat kami Kanimo sa ilang hugot nga pagtuo. Magpasalamat kami Kanimo sa ilang espiritu sa sakripisyo. Panalangini sila nga sila ni ang ilang mga henerasyon nga mosunod dili gutumon o walay kapuy-an gikan sa mga unos nga mohampak kanila.
“Mapasalamaton kami sa pagkahuman niining Balaan nga Balay. Panalangini kadtong matinud-anong mga miyembro dinhi ug sa tibuok kalibutan kinsa mihatag sa ilang ikapulo nga maoy nakapatukod niining talagsaon nga edipisyo alang sa pagpasidungog ug himaya sa Imong pangalan ug alang sa mga panalangin sa tanan nga mosulod niini.
Mohangyo kami sa pagpanalangin sa tanang naglakaw sa pagkamatarung ug hugot nga pagtuon ug pagkamasulundon sa mga kasugoan nga Imong gihatag. Hatagi sila og kahupayan kon sila mag-atubang og kalisdanan. Hinaut nga Imo silang paluyohan ug lig-unon kon ang mga hangin sa oposisyon makigbatok kanila. Hinaut nga Imong hatagan sila og kalipay ug kalinaw sa ilang mga kasingkasing ug sa kasiguroan sa Imong walay katapusan nga gugma.
Amahan sa Langit panalangini, nag-ampo kami Kanimo, kadtong gitawag sa pagpangulo sa Imong Simbahan dinhi sa kalibutan, nga sila unta makabaton sa Imong magiyahon nga impluwensya ug inspirasyon. Hinaut nga sila adunay kalagsik, kaalam, ug pagkaespirituhanon nga gikinahanglan sa pagtuman sa Imong mga katuyoan.
Panalangini ang presidente sa templo ug ang iyang mga magtatambag, uban sa ilang mga asawa, ug sa tanan kinsa motabang sa pagpadagan niini nga templo.
Tabangi ang kabatan-onan sa Imong simbahan nga mobarug nga lig-on alang sa kamatuoran ug pagkamatarung. Ablihi og dako ngadto kanila ang mga ganghaan sa pagkat-on, sa pagsabut ug sa pagserbisyo sa Imong gingharian. Hatagi sila og kalig-on sa pagpakigbatok sa mga tintasyon sa kalibutan. Hatagi sila sa kadasig sa paglakaw diha sa hiyas ug hugot nga pagtuo, nga magmainampoon ug sa pagtan-aw Kanimo isip ilang kanunay nga gabayan.
Karon, among Hinigugma nga Amahan, akting sa awtoridad sa Balaan nga Priesthood nga gikan Kanimo, ug sa pangalan sa Imong Hinigugma nga Anak, ang among Ginoo si Jesukristo, among ipahinungod kining, Cebu City Philippines Temple sa Ang Simbahan ni Jesukristo sa mga Santos sa Ulahing mga Adlaw, isip Imong balay ug balay sa Imong Anak. Ipahinungod namo kini alang sa pagpangalagad niadtong mga ordinansa ug mga pakigsaad nga mahangturon ug walay katapusan. Ipahinungod namo kini alang sa pagpahigayon sa sagrado nga pagserbisyo alang sa buhi ug sa mga patay. Ipahinungod namo ang bunyaganan, ang mga pasilidad nga gamiton alang sa mga ordinansa sa initiatory , ang mga endowment room, ang mga sealing room, ug ang mga altar nga anaa niini. Ipahinungod namo kining matahum nga celestial room, ug sa tanang laing pasilidad niining, Imong balaan nga balay.
Hinaut nga Imong pagabantayan kining matahum nga templo, nga kini mahimong balaan ngadto sa tanan kinsa mosulod niini. Hinaut nga kalimtan niadtong mosulod sa pagserbisyo dinhi ang kalibutan ug mamalandong sa mga butang sa kahangturan. Hinaut nga walay dili takus ang mosulod niining, Imong balay. Hinaut nga ang pagkabalaan niini dili gayud malapas niadtong dili limpyo o adunay dautan og tuyo. Mag-ampo kami nga walay mobabag sa bisan unsa nga paagi sa sagrado nga buhat nga maong gitukod kini nga estraktura.
Ipahinungod namo ubang mga building ug ang yuta nga gibarugan niini nga templo. Ipahinungod namo kining matahum nga estraktura, gikan sa dili makita nga mga pundasyon ngadto sa harianong estatuwa ni Moroni nga nagkorona sa kinatas-an.
Hinaut nga kini nga Balay makahatag sa espiritu sa kalinaw sa tanan nga mosunod sa katalagsaon niini, ug ilabi na niadtong mosulod alang sa ilang kaugalingong sagrado nga mga ordinansa ug sa pagpahigayon sa buhat alang niadtong mga namatay. Ipabati nila ang Imong balaan nga gugma ug kalooy.
Sa among pagpahinungod niining sagrado nga edipisyo, among ipahinungod pag-usab ang among mga kinabuhi nganha Kanimo ug sa Imong buhat.
Ug karon ipahinungod namo kini nga templo isip kapuy-an Nimo ug sa Imong Anak. Ipasanag ang Imong mahimayaong kahayag niini. Hinaut nga Imong ibutang ang Imong silyo sa pagdawat niining tulumanon sa pagpahinungod ug sa among tanang nabuhat ug buhaton niining, Imong Balaan nga Balay, nga karon among ipresentar Kanimo.
Hinaut nga kami, ang Imong mga anak, makadawat sa Imong daghang mga panalangin ug sa Imong mabinatayong pag-amuma, kami nag-ampo, sa pangalan sa Imong Hinigugma nga Anak, bisan sa pangalan ni Jesukristo ang Ginoo, amen.