ʻOku mau fakafetaʻi ki Hoʻo ʻAfió na ʻi hono fakahā Hoʻo ʻAfió mo Ho ʻAló kiate iá, pea hoko mai ai mo e ngaahi ʻaʻahi mai ʻa e niʻihi kehe ke ʻomi e mafai fakalangí. ʻOku mau fakafetaʻi atu ʻi hono ʻomai ʻo e Tohi ʻa Molomoná mo hono lekooti ʻo ʻo e ngaahi kui ʻo e kakai ʻo Tongá. ʻOku mau fakafetaʻi ʻi he mālohi ʻo Hoʻo ngāue ʻi he ngaahi motu angaʻofá ni. ʻOku mau fakafetaʻi ki he ʻAfioná koeʻuhí ko e kau faifekau kuo nau omi ʻi he ngaahi taʻu lahi ki heni ke ʻomai e ongoongo fakafiefia ʻo e ongoonoglelei kuo fakafoki maí. ʻOku mau fakafetaʻi ki he ʻAfioná koeʻuhí ko ʻenau tuí, ʻenau moʻui fakatāpuí, mo ʻenau loto fiemālie ke fehangahangai mo e ngaahi faingataʻa ʻo e tahí mo e mavahe fuoloa mei honau ngaahi ʻapí ke hoko ko Hoʻo kau talafekau ki Ho kakaí. ʻOku mau fakafetaʻi atu ki hoʻo ʻAfioná koeʻuhi ko Ho ngaahi foha mo e ngaahi ʻofefine Tonga tokolahi kuo nau fakahoko e ngāue tatau ʻi he fuʻu loto ʻaufuatō moʻoni.
ʻOku mau fakafetaʻi ʻi hono ueʻi ʻe he ʻAfioná e loto ʻo ha tokolahi ʻaki e mālohi ʻo Ho Laumālié pea nau tali ai e moʻoní mo ʻaʻeva faivelenga ai. ʻOku mau fakafetaʻi ki he ʻAfioná koeʻuhi ko Ho kāingalotu tuitala ʻi he ngaahi ʻotumotu fakaʻofoʻofá ni mo kolea Hoʻo ngaahi tāpuakí maʻanautolu ke lava ʻo tāpuekina kinautolu ʻaki ʻa e ʻofa mo e nonga ʻi honau ngaahi ʻapí, ke moʻui honau kelekelé, ke nau tuʻumālie ʻi heʻenau ngaahi ngāue māʻoniʻoní, ke maluʻi kinautolu mei he ngaahi matangi mālohi ʻo natulá pea mei he ngaahi fekainaki ʻa e tangatá kapau te nau ʻaʻeva ʻo talangofua ki Hoʻo ngaahi fekaú.
ʻE Tamai, kuo mau lōnuku mai, ʻi he meʻa nāunauʻia taha he hisitōlia lōloa ʻo Hoʻo ngāue ʻi he ʻotumotu fakaʻofoʻofá ni, ke fakatapui ki hoʻo ʻAfió pea mo Ho ʻAló ʻa e temipale toputapú ni. ʻI he huafa ʻo e ʻEiki ko Sīsū Kalaisí, pea ʻi he mafai ʻo e lakanga fakataulaʻeiki māʻoniʻoni ʻoku ʻiate kimautolú, pea ʻi he fekau meiate ia kuo Ke fokotuʻu ko Hoʻo palōfita he kounga ní, ʻa Palesiteni Sipenisā W. Kimipolo, ʻoku mau fakatapui atu ʻa e Temipale Tonga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, fakataha mo hono alanga falé, ngaahi nāunaú, meʻangāué mo e ngaahi nāunau falé, kelekele ʻoku tuʻu aí pea mo e ngaahi fale kehe ʻoku fekauʻaki mo iá.
ʻOku mau tautapa atu ke Ke tali muʻa ʻa e temipalé ni ko ha meʻaʻofa ʻo Ho kakaí, ʻoku foaki ki he ʻAfioná ʻi he ʻofa ke fakahoko ʻaki Hoʻo ngaahi taumuʻa māʻoniʻoní, ki Hoʻo fānaú. Ko Ho fale ia. Ko e fale ia ʻo Ho ʻAló. ʻOku mau lotua ke ke fakamāʻoniʻoniʻi muʻa ia ʻaki e mālohi ʻo Ho Laumālie Māʻoniʻoní pea ke ʻafio ki ai hoʻo ʻAfió mo hooifua ki ai pea mo ʻaʻahi ki ai ʻo fakatatau ki he finangalo fakalangi hoʻo ʻAfioná.
ʻOfa ke ʻaʻapa maʻu pē ki ai Ho kakaí. ʻOfa ke nau lau ia ko e potu māʻoniʻoni taha ki hono fakahoko ʻo e ngaahi ouau fakalangi ʻoku toki fakahoko pē ʻi he ngaahi fale māʻoniʻoní ʻi he mafai ʻo e lakanga fakataulaʻeiki taʻengatá. ʻOfa ke taau ʻa kinautolu kotoa ʻe ōmai ki heni, ke nau hū ʻi he potú ni, ke maʻu e ngaahi tāpuaki maʻongoʻongá pea fakahoko honau fufulú mo e paní ke nau maʻa mei he ngaahi angahala ʻo e toʻutangatá ni, mo e ʻenitaumeni toputapu te nau fakahoko ai e ngaahi fuakava taʻengata mo Hoʻo ʻAfió, honau silaʻí ke lava ʻo fakatahaʻi kinautolu ko e husepāniti mo e uaifi, ko e fānau mo e ngaahi mātuʻa, ʻaki e mafai ʻokú ne fakamaʻu ʻi he langí ʻo hangē ko hono fakamaʻu ʻi he māmaní.
Tamai, ʻofa ke tokangaekina ʻe he ʻAfioná ʻa e fale toputapú ni. ʻOfa ke maluʻi ʻa e kelekelé pea mo e alanga falé ʻe he mālohi ʻo e ʻAfioná pea ke fakahooifua maʻu pē ki Ho ʻaó pea mo fakaʻofoʻofa ʻi he vakai ʻa kinautolu kotoa te nau mamata ki he fale toputapú ni mo hono ʻātakaí.
ʻE Tamai, fakatauange ke nofoʻia ʻeni ʻe he Laumālie Māʻoniʻoni ʻo e ʻAfioná pea ʻofa ke malama atu mei he hūfangaʻangá ni pea mo ongoʻi hono ivi tākiekiná ʻi he mālohi lahi, pea naʻa mo kinautolu ʻe fakalaka mai hení ke nau lau ia ko ha potu makehe mo māʻoniʻoni.
ʻOku mau kolea Hoʻo ngaahi tāpuakí maʻa Hoʻo tamaioʻeiki ko Palesiteni Sipenisā W. Kimipoló, ʻa ia ʻoku ʻikai ke na lava ʻo ʻi heni mo kimautolu ʻi he ouau toputapú ni, ka ʻi he mafai ʻo e lakanga fakataulaʻeiki ʻokú ne maʻu ko e palōfitá, naʻá ne tāpuakiʻi ʻa e kelekele ki he fale ko ʻení. ʻAloʻofa muʻa ʻo tāpuakiʻi ia mo fakalōloa siʻene moʻuí ʻo fakatatau mo Hoʻo palani taʻengatá. Āfeitaulalo muʻa ʻo tāpuakiʻi kinautolu ʻoku fengāueʻaki mo ia he Kau Palesitenisī ʻUluakí, Fakataha Alēlea ʻo e Kau ʻAposetolo ʻe Toko Hongofulu Mā Uá, Kōlomu ʻUluaki ʻo e Kau Fitungofulú, mo e Kau Pīsopeliki Pulé. ʻOku mau kolea Hoʻo ngaahi tāpuakí maʻá e kau palesitenisī ʻo e temipalé, te nau ngāue ʻi hení, pea mo e kau ngāue kotoa ʻe fengāueʻaki mo kinautolú. ʻOku mau kolea hoʻo ʻofá ke ʻi he kau fakafofonga fakavahelahí, kau palesitenisī ʻo e ngaahi siteikí mo e ngaahi misioná, kau pīsopelikí, kau faifekaú, pea mo kinautolu kotoa ʻoku ʻi ai hanau fatongia ʻi he ngāue ʻa e ʻAfioná he ʻotumotú ni.
ʻOku mau kole Hoʻo ngaahi tāpuakí ki he tuʻi mo e kuini ʻo Tongá, pea mo e puleʻanga ʻo e puleʻanga fakatuʻi ʻo Tongá pea mo kinautolu ʻoku ngāue aí, ke nau ʻofa maʻu pē ʻi he kakaí ʻo e ʻAfioná mo faitokonia kinautolu ʻi hono fakahoko e ngaahi taumuʻa kuo tuku ʻe hoʻo ʻAfioná ki honau ʻaó, ke akoʻi ʻa e ongoongoleleí ki hono kotoa Hoʻo fānaú pea mo langa Ho Siasí ke tāpuekina Ho ngaahi fohá mo Ho ngaahi ʻofefiné.
ʻE Tamai ʻofeina, tali muʻa siʻemau fakamāloó pea ke ongona siʻemau lotú, ʻi heʻemau fakatapui atu ʻa e falé ni ki he ʻAfioná pea mo toe fakatapui kimautolu ki he ngāue ʻa e ʻAfioná.
Ko Homau ʻOtuá ʻa Hoʻo ʻAfió. ʻOku mau ʻofa mo falala atu ki he ʻAfioná. Ko Ho ʻAlo ʻOfaʻangá ʻa homau Huhuʻi mo e tupuʻanga ʻo homau fakamoʻuí. Hosana ki he ʻOtuá pea mo e Lamí, ʻi he taimí ni pea taʻengata. ʻOku mau fakahīkihikiʻi hoʻo ʻAfió. ʻOku mau hū ki Hoʻo ʻAfió ʻi he laumālie mo e moʻoni. Āfeitaulalo muʻa ʻo ʻaloʻofa mo ʻofa ʻiate kimautolu ko Hoʻo fānau. Fakalahi muʻa ʻemau tuí. Fakalahi ʻemau ʻilo ki he ngaahi meʻa fakalangí. ʻAi muʻa ke mau ʻaonga ʻi he ngāue ʻa e ʻAfioná, pea ʻoku mau fai ʻeni ʻi he loto fakatōkilalo ʻi he huafa ʻo e Huhuʻi e faʻahinga ʻo e tangatá, ko e ʻEiki ko Sīsū Kalaisí, ʻēmeni.