Ang mga Ordinansa Templo ug Dalan sa Pakigsaad
“Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom.” (Presidente Russell M. Nelson, “Ang Templo ug ang Inyong Espirituwal nga Pundasyon,” Kinatibuk-ang Komperensiya, Oktubre 2021)
Ang pagdawat og mga ordinansa sa templo ug pagtuman sa mga pakigsaad usa ka importante nga bahin sa imong pasalig sa pagsunod ni Jesukristo. Makatabang usab kini kanimo nga mag-andam nga mobalik sa umaabot ug mopuyo uban Kaniya ug sa atong Langitnong Amahan. Daghan ang imong mahimo aron sa pagseguro nga ikaw andam. Ang pagtuon sa ebanghelyo ni Jesukristo ug sa paggamit niadtong mga pagtulon-an sa imong kinabuhi kinahanglan nga iapil. Ang pagtuman sa mga pakigsaad nga imo nang nahimo mao ang importante nga paagi sa imong pagkaandam alang sa templo.
Si Jesus mitudlo “Kay masigpit ang pultahan ug hiktin ang dalan nga padulong sa kinabuhi, ug diyutay ra ang mga nakatultol niini.” (Mateo 7:14). Ang pultahan nga atong sudlan mao ang bunyag ug ang dalan nga atong subayon mao ang Iyang ebanghelyo. Ang bunyag mao ang unang ordinansa sa ebanghelyo ug gikinahanglan nga lakang subay sa dalan sa pakigsaad balik ngadto sa Dios.
Ang ubang mga ordinansa mogiya usab kanimo subay sa dalan. Kini naglakip sa pagdawat sa Espiritu Santo, pagka-orden ngadto sa Melchizedek nga Pagkapari (alang sa mga lalaki), pagdawat sa pagtuga diha sa templo, ug pagkaselyo diha sa templo. Kining sagrado nga mga ordinansa sa pagkapari mosangpot ngadto sa labing mahinungdanong mga panalangin nga gitanyag sa Langitnong Amahan ngadto sa Iyang mga Anak—ang kamaya sa pagpuyo uban Kaniya ug sa atong mga pamilya human sa niining yutan-ong kinabuhi.
Tingali mobati ka og walay kaseguroan o gani magkapuliki samtang mangandam kaalang sa templo. Sa dili pa ang imong unang pagbisita, normal ra nga maghunahuna kon unsa kaha ang masinati panahon sa mga seremonya sa templo. Ang ubang butang bag-o alang kanimo, apan kadaghanan sa unsay mahitabo diha sa templo bation nimo nga pamilyar na kaayo tungod kay kining tanan nagsentro sa ebanghelyo ni Jesukristo.
Dili kinahanglan nga mahibaloan o mahinumdoman nimo ang tanan kon moadto ka sa templo. Ang mga temple worker anaa kanunay aron motabang kanimo. Kini nga mga boluntaryo mahigugmaon ug buotan. Anaa sila diha sa pagtabang kanimo nga mobati nga gihangop ug komportable diha sa balay sa Ginoo.
Tungod kay nabunyagan ka, ikaw nakahibalo na og pipila ka butang mahitungod sa mga ordinansa ug mga pakigsaad. Ikaw nasayod nga kini adunay simbolo ug espirituwal nga mga kahulogan. Pananglitan, nakat-onan nimo nga ang bunyag nagsimbolo sa paglimpyo ug pagkatawo pag-usab. Magsul-ob ikaw og puti ug moubog sa tubig. Usa ka naghupot sa pagkapari mopataas sa iyang bukton ug mamulong sa mga pulong sa ordinansa. Dayon ikaw ilibong (ipaunlod) diha sa tubig ug mokawas isip usa ka bag-o nga tawo. Ikaw limpyo ug lunsay ug andam sa pagpuyo sa imong kinabuhi isip usa ka matinud-anon nga disipulo ni Jesukristo. Human ka mabunyagi, nadawat nimo ang gasa sa Espiritu Santo samtang gipatong ang mga kamot diha sa imong ulo.
Sa dihang ikaw gibunyagan, ikaw naghimo og usa ka pakigsaad uban sa Dios. Misaad ikaw nga andam ikaw sa pagdala diha sa imong kaugalingon sa ngalan ni Jesukristo, mahinumdom Kaniya kanunay, motuman sa Iyang mga sugo, ug moalagad Kaniya hangtod sa kataposan. Isip usa ka miyembro sa Iyang Simbahan, ikaw sa simbolokanhong nga paagi mobag-o sa imong pakigsaad sa bunyag ug sa tanang mga pakigsaad sa higayon nga imong dawaton ang sakramento.
Ang mga ordinansa sa templo nagsunod og susama nga sumbanan. Magsinina ikaw og puti, tudloan mahitungod sa plano sa Dios, ug moapil sa mga seremonya nga sagrado ug adunay simbolo. Saaran usab ikaw og mga panalangin samtang ikaw makigsaad nga mosunod sa mga pagtulon-an ug ehemplo ni Jesukristo.
Hinumdomi nga ang tanan sa templo nagtudlo nato ngadto sa Manluluwas ug sa atong Langitnong Amahan. Ang tanan gitumong nga mobayaw ug modasig.
Limpyo nga mga Kamot ug Putli nga Kasingksaing
Sa basahon sa Mga Salmo, gipangutana kita “Kinsa ang mosaka ngadto sa bungtod sa Ginoo? o kinsa ba ang motindog sa iyang dapit nga balaan? Siya nga limpyo og mga kamot, ug may usa ka putli nga kasingkasing” (Salmo 24:3–4). Ang bungtod sa Ginoo mao ang Iyang templo. Duha ka hiyas ang gihisgotan aron makasulod—limpyo nga mga kamot ug putli nga kasingkasing.
Naghisgot mahitungod niini nga tudling, si Elder David A. Bednar miingon: “Tugoti ako nga mosugyot nga ang mga kamot malimpyohan pinaagi sa proseso sa pagsalikway sa kinaiyanhong pagkatawo ug sa pagbuntog sa sala ug sa daotan nga mga impluwensya sa atong mga kinabuhi pinaagi sa Pag-ula sa Manluluwas. Ang mga kasingkasing maputli inig ka dawat nato sa Iyang makapalig-ong gahom sa pagbuhat og maayo ug pagkahimong mas maayo. Ang tanan natong mapuslanong mga tinguha ug maayong mga buhat, tinuod sila mahinungdanon, dili makahimo og limpyo nga mga kamot ug putli nga kasingkasing. Ang Pag-ula ni Jesukristo maoy naghatag og makalimpyo ug makatubos nga gahom nga makatabang kanato sa pagbuntog sa sala ug makaputli ug makapalig-ong gahom nga motabang kanato nga mahimong mas maayo kaysa atong mahimo nga magsalig lamang sa atong kaugalingon nga kusog. Ang walay kinutoban nga Pag-ula alang pareho sa makasasala ug sa pagkasantos sa matag usa kanato” (“Limpyo nga mga Kamot ug Putli nga Kasingkasing,” Liahona, Nob. 2007, 82).
Samtang mangandam ka alang sa templo, makigsulti ka sa imong bishop. Makigkita usab ikaw sa imong presidente sa stake, kon ikaw modawat sa imong kaugalingong pagtuga o iselyo. Mopahigayon sila og interbiyo sa rekomend sa templo. Makahimo ka sa pagpakigbahin sa imong mga hunahuna ug mga pagbati uban kanila, ug sila mohatag og makadasig nga tambag. Samtang tubagon nimo ang ilang mga pangutana, ikaw makapamatuod nga ikaw adunay “limpyo nga mga kamot ug putli nga kasingkasing.” Sa laing pagkasulti, ikaw mopahayag nga ikaw takos ug andam nga mosulod sa templo, moapil sa sagrado nga mga ordinansa, ug motuman sa imong mga pakigsaad.
Ang Sagrado nga mga Pakigsaad Personal ug Gamhanan
Samtang ikaw magpadayon subay sa dalan sa pakigsaad ngadto sa templo, magsugod ikaw nga mas magpasalamat sa mga panalangin sa sagrado nga mga pakigsaad sa imong kinabuhi. Aniay pipila ka butang nga hunahunaon mahitungod sa kaimportante sa mga pakigsaad:
1. Ang mga pakigsaad mopalig-on sa imong relasyon uban sa Langitnong Amahan ug ni Jesukristo.
Ang pakigsaad sa kasagaran gipasabot nga usa ka sagrado nga saad tali sa Dios ug sa Iyang mga anak. Samtang kini nga pagpasabot tukma, dili kini kompleto. Ang usa ka pakigsaad labaw pa sa usa ka kontrata. Usa kini ka personal nga pasalig nga nagpasabot ug nagpalig-on sa atong relasyon sa Dios. Ang pakigsaad mohulma og sagrado nga relasyon tali sa Dios ug sa Iyang mga anak. Kini mopabag-o sa atong mga espiritu, mousab sa atong mga kasingkasing, ug motabang nato nga mahiusa uban Kaniya. Kon ikaw magmatinud-anon sa imong mga pakigsaad, ang imong debosyon ngadto sa Langitnong Amahan ug ni Jesukristo molambo. Ang imong mga pagbati sa pasalamat molambo. Ang imong abilidad sa paghigugma ug pagserbisyo sa uban motubo. Ug ang mga panalangin nga gisaad sa templo modagayday sa imong kinabuhi.
2. Ang mga pakigsaad motabang nimo nga makatutok sa mga butang nga labing bililhon.
Sa panahon sa imong kinabuhi, ikaw mag-atubang og mga pagpili nga nagkinahanglan sa imong panahon, sa imong kusog, ug sa imong mga kapanguhaan. Daghang maayo nga mga pagpili makigkompetensiya sa uban nga mas bililhon pa. Unsaon nimo sa pagpili?
Si Presidente Dallin H. Oaks mitudlo: “Tungod lamang kay ang usa ka butang maayo dili kini igo nga rason sa pagbuhat niini. … Ang ubang mga butang labaw pa kay sa maayo, ug kini mao ang mga butang nga nagkinahanglan nga unang hatagan og pagtagad sa atong kinabuhi. … Ang uban nga paggamit sa indibidwal ug pamilya nga oras mas maayo, ug ang uban labing maayo. Kinahanglan atong ipalabay ang ubang maayo nga mga butang aron sa pagpili sa uban nga mas maayo o labing maayo tungod kay kini nag-ugmad og hugot nga pagtuo kang Ginoong Jesukristo ug naglig-on sa atong mga pamilya” (“Maayo, Mas Maayo, Labing Maayo,” Liahona, Nob. 2007, 104, 107).
Pinaagi sa mga pakigsaad, ang Dios motabang nato nga makasabot sa mga baroganan, naandan nga mga paagi, ug mga saad nga nahibaloan Niya nga labing maayo alang nato. Makaangkon kita og dugang nga panabot sa mga prayoridad ug makahimo og mas maalamon nga mga pagpili kon motutok kita niadtong sagrado nga mga pasalig nga atong gihimo uban sa Dios.
3. Ang mga ordinansa ug mga pakigsaad sa templo mopanalangin kanimo ug sa uban.
Kon ikaw modawat sa imong pagtuga o maselyo ngadto sa imong kapikas o pamilya, ikaw mobiya sa templo uban sa mga saad gikan sa Ginoo direkta nganha kanimo. Dili lang mga saad nga gihimo ngadto sa pipila ka karaang propeta o mga tawo, apan mga saad nga gihimo nganha kanimo. Kinahanglan nga paningkamotan nimo nga makasabot niini ug sa mga kahulogan niini sa imong kinabuhi.
Human nimo madawat ang mga ordinansa alang sa imong kaugalingon, makabalik ka ngadto sa templo aron modawat og mga ordinansa alang sa uban nga nangamatay. Ikaw adunay espesyal nga responsibilidad sa pagpangita sa imong mga katigulangan ug moseguro nga sila makadawat sa mga ordinansa sa templo. Ang imong serbisyo mopanalangin sa ilang mga kinabuhi ug mopahinumdom nimo sa imong kaugalingong mga saad ug mga panalangin.
Paningkamoti ang Paghinumdom ug ang Pagbalik
Samtang mangandam ka sa pag-apil sa mga ordinansa sa templo, hinumdomi nga ang Dios mao ang imong Mahangtorong Amahan ug si Jesukristo mao ang imong Manunubos. Sila nakaila kanimo sa personal nga paagi. Nahigugma sila kanimo sa hingpit. Kon imong tumanon ang imong mga pakigsaad, ikaw mapanalanginan niini nga kinabuhi ug sa sunod.
Makahinumdom ba ikaw og higayon sa dihang mibati ka nga suod kaayo sa Langitnong Amahan ug ni Jesukristo? Kadtong nga mga pagbati molambo pa didto sa templo. Ang templo gilain gikan sa mga makabalda, mga kabug-at, ug negatibo nga mga impluwensya sa kinabuhi. Niini nga balaan nga balay, ikaw gipahinumdoman nga ikaw ug ang imong mga minahal ania sa yuta alang sa mahinungdanon ug halangdon nga katuyoan. Makaplagan nimo ang mas dakong kalinaw, kahupayan ug giya, ug paglaom.
Makaplagan usab nimo nga ang mga panalangin sa templo mosulod sa imong kasingkasing ug mobayaw sa imong kalag. Balik sa templo kanunay kutob sa imong mahimo. Kon buhaton nimo, ikaw makasabot og dugang mahitungod sa gugma sa Dios ug ni Jesukristo alang kanimo ug sa tanang tawo. Bisan human ikaw mobiya sa templo, ang Espiritu Santo mopadayon sa pagtudlo kanimo. Siya mopahinumdom kanimo sa unsay imong nasinati, unsay imong gibati, ug unsaon sa pagpakabuhi sumala sa gusto sa Dios.
Samtang mangandam ka alang sa templo, hinumdomi nga ang Dios gusto nga ikaw Iyang masuod. Gihatag Niya ang Iyang templo isip usa ka espesyal nga dapit nga mas makapaduol ngadto Kaniya. Ang imong mahantorong kalipay mao usab ang Iyang kalipay. Siya mihatag nato sa mga panalangin sa templo sa paggiya nato balik ngadto Kaniya. Pangayo sa Iyang tabang samtang mag-andam ug mopakigbahin sa imong panaw uban Kaniya. Siya mogiya kanimo. Siya modasig kanimo. Ug Siya motabang kanimo subay sa dalan.
