Gikan pa sa karaang mga panahon, ang mga lalaki ug mga babaye migamit og sagradong musika, lahi nga mga paagi sa pag-ampo, relihiyoso nga simbolokanhong mga sapot, mga lihok, ug mga seremonya aron sa pagpadayag sa ilang tulukibon nga mga pagbati og debosyon ngadto sa Dios.
Ang nagkadaiya niini nga mga paagi sa pagpahayag ingon ka lapad ug kadaghan sa pamilya sa tawo. Bisan pa, ang tanan adunay sama nga kataposang katuyoan: sa pagkonektar sa tumutuo ngadto sa gihalaran sa ilang debosyon diha sa labing personal nga paagi—sa pagpaduol ngadto sa Dios.
Niadtong anaa sa gawas sa piho nga tinuohan, ang mga seremonya ug panapot tingali daw dili pamilyar. Apan alang sa mga partisipante, kini makakutaw sa labing lawom nga mga pagbati sa kalag, modasig kanila sa pagbuhat og maayo, ug gani mohulma sa dagan sa tibuok kinabuhi nga pagserbisyo.
Ang sinina sa madre. Ang sutana sa pari. Ang kupo gamiton sa pag-ampo sa Judio. Ang skullcap sa Muslim. Ang safron nga mga kupo sa Buddhist nga monghi. Ang tanan kabahin sa kabuhong sa nagkadaiyang konektado nga aspeto sa debosyon sa tawo ngadto sa Dios.
Dili tanang sama nga relihiyoso nga mga sapot anaa ipakita sa publiko. Ang ubang sinina makita lamang sa espesyal nga mga dapit sa pagsimba. Sama pananglit, ang mga kupo sa tempo sa Ang Simbahan ni Jesukristo sa mga Santos sa Ulahing mga Adlaw, nailhan nga ang mga kupo sa balaan nga pagkapari, isul-ob lamang sa sulod sa mga templo sa mga Santos sa Ulahing mga Adlaw ug gireserba alang sa labing sagrado nga mga seremonya sa ilang tinuhoan. Ang yano nga puti nga sinina nagsimbolo sa kaputli ug kaangayan. Ang labing senior nga lider ug ang labing bag-o nga miyembro sa Simbahan dili mailhan kon nagsinina sa sama nga paagi. Ang kalalakin-an ug kababayen-an nagsul-ob og sama nga sinina, nga nagpakita og relihiyoso nga simbolismo nga nagpahinumdom sa mga gimbuhaton sa templo nga gihulagway diha sa Daan nga Tugon.
Diha sa Ang Simbahan ni Jesukristo sa mga Santos sa Ulahing mga Adlaw, walay espesyal nga panggawas nga relihiyoso nga sinina diha sa regular nga mga serbisyo sa pagsimba sa Dominggo.
Hinoon, daghang tumutuo sa Mga Santos sa Ulahing mga Adlaw nagsul-ob og garment ilawom sa ilang sinina nga anaay lawom nga relihiyoso nga kaimportante. Kining ligdong nga pang-ilawom nga sinina duha ka piraso ug sa kasagaran gitawag og “garment sa templo.”
Ang ubang mga tawo sayop nga magtawag sa mga garment sa templo nga mahikanhon o isip “mahikanhon nga sinina nga pang-ilalom.” Kini nga mga pulong dili lamang dili tukma, apan makapasilo usab sa mga miyembro sa Ang Simbahan ni Jesukristo sa mga Santos sa Ulahing mga Adlaw. Walay mahikanhon o misteryoso bahin sa mga garment sa templo, ug ang mga miyembro sa Simbahan naghangyo alang sa sama nga ang-ang sa respeto ug kasensitibo nga gitanyag ngadto sa bisan unsang lain nga tinuohan gikan sa mga tawo nga adunay maayong katuyoan.
Ang mga garment sa templo gisul-ob sa hamtong nga mga miyembro sa Simbahan kinsa mihimo og sagrado nga mga saad diha sa templo sa pagtuman sa mga sugo sa Dios ug magpuyo sa ebanghelyo ni Jesukristo.
Ngadto sa mga miyembro sa Simbahan, ang ligdong nga garment sa templo nga isul-ob ilawom sa normal nga sinina ug ang simbolikanhon nga mga kupo nga isul-ob atol sa pagsimba diha sa templo nagrepresentar og usa ka sagrado ug personal nga aspeto sa ilang relasyon uban sa Dios ug sa ilang pasalig sa pagpuyo og maayo, halangdon nga mga kinabuhi.
