Ang Bunyag ug Kompirmasyon Gikinahanglan
Ang ikaupat nga Artikulo sa hugot nga Pagtuo namahayag nga ang unang mga baroganan ug mga ordinansa sa ebanghelyo ni Jesukristo mao ang “bunyag pinaagi sa pagpaunlod alang sa kapasayloan sa mga sala” ug ang “pagpandong sa mga kamot alang sa mga gasa sa Espiritu Santo.” Si Jesus nagtudlo nga ang bunyag ug kompirmasyon gikinahanglan alang sa tanan nga gustong mosunod Kaniya ug mobalik ngadto sa atong Langitnong Amahan human niini nga kinabuhi. Sa ingon ang bunyag mao ang ganghaan ngadto sa dalan sa pakigsaad nga mosangpot sa pagkadawat sa tanang mga panalangin nga gustong ihatag sa Langitnong Amahan ngari kanato. Mao usab kini ang dalan ngadto sa ganghaan sa pagkahimong “hingpit diha ni Kristo” (Moroni 10:32-33) samtang hingpit natong hangopon ang Iyang ebanghelyo.
Sa sinugdanan sa Iyang pagpangalagad, si Jesus mibiyahe gikan sa Galilea ngadto sa Suba sa Jordan sa Judea. Didto si Juan Bautista, nagtudlo sa katawhan sa paghinulsol ug pagpabunyag. Mihangyo si Jesus nga magpabunyag, apan nagduhaduha si Juan kay nasayod siya nga si Jesus walay sala. Ang Manluluwas mipasabot nga kinahanglan Siya nga mabunyagan aron sa “pagtuman sa tibuok pagkamatarong” (Mateo 3:15) ug pagsunod sa mga sugo sa atong Langitnong Amahan. Sa ingon nagpakita si Jesukristo sa panig-ingnan alang kanatong tanan sa dihang miadto Siya sa tubig ug gibunyagan Siya ni Juan (tan-awa sa 2 Nephi 31:5). Si Juan nakadawat usab og personal nga pagpamtuod niadtong sagrado nga kasinatian:
“Human gayod sa pagbunyag kang Jesus, mikawas siya sa tubig. Unya naabli ang langit ug nakita niya ang Espiritu sa Dios nga mipaubos daw salampati ug mitugdon kaniya:
“Ug unya may tingog gikan sa langit nga nag-ingon, “Kini mao ang pinangga kong Anak nga nakalipay kanako pag-ayo” (Mateo 3:16–17).
Unya, may pangulo sa mga Judeo nga ginganlan og Nicodemo nga miduol kang Jesus pagkagabii. Nahibalo siya nga si Jesus “usa ka magtutudlo nga pinadala sa Dios” (Juan 3:2), ug gusto siya nga makakat-on pa og daghan. Gitudloan siya ni Jesus nga ang bunyag ug ang pagdawat sa Espiritu Santo pinaagi sa kompirmasyon gikinahanglan alang sa kaluwasan:
“Sa pagkatinuod, sa pagkatinuod, magaingon ako kanimo, Gawas kon ang tawo igaanak sa tubig ug sa Espiritu, dili siya makasulod sa gingharian sa Dios.” (Juan 3:5).
Ang igaanak sa tubig nagpasabot sa bunyag. Ang igaanak sa Espiritu nagpasabot sa pagdawat sa gasa sa Espiritu Santo (gitawag usab nga Balaang Espiritu) pinaagi sa kompirmasyon. Kini nga mga ordinansa sagrado, ug mohimo kita og ligdong nga mga pakigsaad dihang madawat nato kini. Mosaad kita nga matinguhaon kita nga modala sa ngalan ni Jesukristo ngari kanato, kanunay nga mohinumdom Kaniya, ug motuman sa mga sugo sa Dios. Samtang atong tumanon kini nga mga saad, atong mapakita ang atong hugot nga pagtuo kang Jesukristo ug ang atong pagkamatinguhaon sa pagsunod Kaniya.
Human sa Iyang Pagkabanhaw, ang Manluluwas mitudlo pag-usab sa pagkamahinungdanon sa bunyag. Iyang gipadala ang mga Apostol aron mosangyaw sa Iyang ebanghelyo ngadto sa tanang katawhan, nga nag-ingon, “Ang motuo ug magpabunyag maluwas” (Marcos 16:16).
Sa dihang gipahiuli sa Manluluwas ang Iyang Simbahan pinaagi ni Propeta Joseph Smith, gitudlo na usab Niya nga ang bunyag gikinahanglan gihapon (Doktrina ug mga Pakigsaad 22:4). Iya usab nga gipadayag ang tukmang pamaagi sa bunyag. Giklaro Niya nga ang bunyag kinahanglan nga himoon pinaagi sa pagpaunlod sa tubig ug pinaagi sa tukmang awtoridad sa pagkapari (Doktrina ug mga Pakigsaad 20: 73–74).
Ang Ginoo Nahigugma sa tanan Niyang mga Anak
Ang matag tawo anak sa Dios. Ang tanan bililhon ngadto Kaniya. Siya nakaila kanila ug Naghigugma kanila. Siya namahayag, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39). Siya mihatag og pamaagi alang sa Iyang tanang mga anak nga makabalik ngadto Kaniya human niini nga kinabuhi. Kana nga paagi mao ang ebanghelyo ni Jesukristo.
Daghang mga tawo adunay kahigayonan nga modawat sa ebanghelyo ug mabunyagan samtang ania pa niining kinabuhia. Apan unsay mahitabo niadtong namatay nga wala mabunyagi o gani wala masayod bahin ni Jesus? Unsaon man usab nila pagkaluwas? Ang Dios wala makalimot kanila!
Ang kamatayon dili mao ang kataposan sa kinabuhi, apan hinuon usa ka lakang sa atong panaw balik ngadto sa Dios. Kon kita mamatay, ang atong mga espiritu temporaryo nga mobulag sa atong mga lawas. Mosulod kita sa kalibotan sa espiritu ug makig-uban sa mga sakop sa pamilya ug sa uban kinsa usab namatay na. Didto mangandam kita alang nianang maanindot nga adlaw dihang mabanhaw kita ug ang atong mga espiritu mahiusa sa atong nahingpit nga lawas. Dayon mahimo kitang gawasnon gikan sa balatian, sakit, ug sa tanang mga kakulang sa abilidad ug kakulangan nga ato karong gilahutay. Sa kalibotan sa espiritu, kadtong namatay nga walay kahigayonan sa pagkat-on mahitungod sa ebanghelyo niining kinabuhia pagatudloan mahitungod sa plano sa kaluwasan (1 Pedro 3:18–20; Doktrina ug mga Pakigsaad 138:16–19). Sila dayon makapili sa pagdawat sa ebanghelyo ug maghinulsol. Apan dili sila mahimong bunyagan didto kay wala man kanila ang ilang pisikal nga mga lawas. Ang mabination nga Langitnong Amahan nag-andam og laing paagi alang kanila aron makadawat sa bunyag.
Sa templo, mahimo kitang mabunyagan ug makompirmahan alang sa mga katigulangan nga namatay nga wala makaangkon niana nga oportunidad. Sa laing pagkasulti, mahimo kitang morepresentar kanila ug molihok para kanila. Ang mga ordinansa nga himoon para sa uban mao ang gitawag nga puli nga mga ordinansa (o mga ordinansa nga dawaton para sa laing tawo). Ang Apostol nga si Pablo nagtudlo sa mga Taga-Corinto nga ang bunyag alang sa patay gihimo kaniadto tungod kay ang tanang tawo mabanhaw pinaagi sa pag-ula ni Jesukristo (1 Mga Taga-Corinto 15:29, 55–57).
Ang doktrina sa pagdawat sa mga ordinansa para sa laing tawo dugay na nga kabahin sa ebanghelyo ni Jesukristo. Sa pagkatinuod, ang Iyang pag-ula mao ang labing dakong buhat sa pagsinati para sa laing tawo sa kasaysayan sa kalibotan. Pinaagi sa Iyang sakripisyo, Iyang gibuhat para sa tanang tawo ang dili nato mahimo sa atong kaugalingon. Tungod Kaniya, ang tanang tawo mabanhaw. Ang tanan makadungog sa ebanghelyo, ug ang tanan makabaton og kahigayonan sa pagbalik ngadto sa atong Langitnong mga Ginikanan.
Ang mga bunyag ug mga kompirmasyon sa templo nga gihimo alang niadtong namatay na, mga gasa nga gitanyag uban sa gugma. Ug kay nagatuo man kami nga ang kinabuhi magpadayon human sa kamatayon, nagatuo usab kami nga kadtong namatay na nahibalo sa mga ordinansa. Makapili sila kon ila ba kining dawaton o dili.
Makaserbisyo kamo sa Uban diha sa Templo
Ang matag templo adunay dapit para sa bunyag diha sa sulod niini nga adunay dakong bunyaganan. Ang bunyaganan nagpatong sa mga buko-buko sa dose ka laki nga baka nga nagrepresentar sa dose ka tribo sa Israel. Nagsunod kini sa tradisyon nga nagsugod pa sa mga panahon sa templo ni Solomon diha sa Daang Tugon (tan-awa sa 2 Cronicas 4:2–4). Ang laki nga baka nagrepresentar sa kusog ug gahom sa ebanghelyo ni Jesukristo.
Ang matinud-anong mga miyembro sa Simbahan makaangkon og rekomend sa templo aron mopahigayon og mga bunyag ug mga kompirmasyon sugod sa Enero sa tuig nga mag-edad sila og 12. Aron makaangkon og rekomend sa templo, pag-eskedyul og “interbyo alang sa rekomend sa templo” uban sa imong bishop o branch president. Makaadto ka sa templo aron mabunyagan ug makompirmahan alang niadtong namatay na.
Sama sa imong kaugalingong bunyag, aduna kay pribado nga dapit nga ilisanan og sinina diin mag-ilis ka og puti nga sinina aron magpabunyag alang niadtong namatay na. Human sa mga pagbunyag, mobalik ka didto sa ilisanan nga dapit ug mag-ilis og uga nga sinina. Moadto dayon ka sa lahi nga lawak alang a kompirmasyon sulod sa dapit para sa bunyag. Ang mga naghupot sa pagkapari mopandong sa ilang mga kamot sa imong ulo ug mohatag kanimo sa gasa sa Espiritu Santo alang niadtong mga namatay na. Human mahimo kini nga mga ordinansa, makadesider sila kon ganahan sila nga modawat niini. Ang puli nga mga bunyag ug kompirmasyon ipahigayon sa sulod sa mga templo lamang.
Sa sulod sa templo, makaangkon usab ikaw og espesyal nga kahigayonan sa pagpabunyag alang sa imong kaugalingong mga sakop sa pamilya nga namatay na. Samtang magsiksik ka sa imong kasaysayan sa pamilya, makaplagan nimo ang imong mga katigulangan. Ang pag-adto sa templo ug mabunyagan ug makompirmahan para nila mahimong usa ka maanindot kaayo nga personal nga kasinatian.
Makahatag ka niini nga serbisyo alang sa mga ginikanan, mga igsuon, mga iyaan, mga uyoan, mga ig-agaw, ug uban pa. Ang mga pamilya mapalig-on pinaagi niining mabination nga buhat. Makabati ka og mas lawom nga koneksyon ngadto sa imong pamilya ug mas masuod sa Dios. Ang pabati nga nahisakop makahatag kanimo og kalig-on, direksiyon, ug pagsalig ug mopanalangin kanimo sa dili maihap nga mga paagi. Makakaplag ka og kalinaw ug panabot alang sa imong kaugalingong kinabuhi samang imong pangitaon ug serbisyohan ang imong mga katigulangan. Makasabot ka ug mas makaila sa Manluluwas samtang mobuhat usab ikaw para sa uban sa unsay dili nila mahimo sa ilang kaugalingon.
Usa ka Espesyal nga Saad alang Kanimo
Si Elder Bednar miingon: “Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na. … Kon motuman mo niini nga pagdapit uban sa hugot nga pagtuo, ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. … Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensiya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi” (“Ang mga Kasingkasing sa mga Anak Mobati,” Liahona, Nob. 2011, 26–27).
