Mahitungod sa Pagtuga diha sa Templo

Sa templo lamang nga kita makahimo og sagrado nga mga pakigsaad nga naglakip sa saad sa kinabuhing dayon sa gingharian sa Dios, nga mao “ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7). Ang mga ordinansa ug mga pakigsaad sa templo kanunay nga kabahin sa ebanghelyo ni Jesukristo. Kini mopalig-on sa balaan nga relasyon ug motabang nato nga motutok sa Manluluwas, sa Iyang Pag-ula, ug sa atong pasalig sa pagsunod Kaniya.

Ang pagdawat sa imong pagtuga diha sa templo mao ang personal kaayo nga kasinatian. Ang pag-andam alang niini makahimo niini nga mas makahuluganon. Daghang mga miyembro sa Simbahan modawat sa ilang pagtuga sa dili pa magmisyon o magminyo. Ang uban adunay dakong tinguha lamang nga mopadayon diha sa dalan sa pakigsaad. Ang mga bishop ug mga presidente sa branch kinahanglang moawhag ug motambag sa mga miyembro nga hamtong kinsa gusto nga modawat sa ilang pagtuga. Importante nga makahibalo nga ang imong pagtuga mas labaw pa kaysa laing lakang lamang; mahinungdanon ug mahimayaon kini nga bahin sa imong mahangtorong panaw.

Ang pagtuga sa literal nga paagi usa ka “gasa.” Niini nga konteksto, ang pagtuga diha sa templo mao ang usa ka gasa sa sagrado nga mga panalangin gikan sa Dios sa matag usa kanato. Ang pagtuga madawat lamang sa Iyang paagi ug diha sa Iyang balaang templo. Pipila sa mga gasa nga imong madawat pinaagi sa pagtuga diha sa templo naglakip sa:

1. Mas dako nga kahibalo sa mga katuyoan ug mga pagtulon-an sa Ginoo.

2. Gahom sa pagbuhat sa tanan nga gusto sa Dios nga atong buhaton.

3. Balaang paggiya ug panalipod samtang kita nagserbisyo sa Ginoo, sa atong pamilya, ug sa uban.

4. Dugang nga paglaom, kahupayan, ug kalinaw.

5. Gisaad nga mga panalangin karon ug sa kahangtoran.

Ang mga miyembro sa Simbahan kinsa dili mominos sa 18 ang edad (ug wala na moeskwela og high school o secondary school) mahimong modawat sa ilang pagtuga diha sa templo kon sila matinud-anon ug andam. Tungod kay ang mga ordinansa ug mga pakigsaad sa templo sagrado ug importante sa kahangtoran, ang Ginoo mihimo og mga sumbanan alang niadtong kinsa gusto nga modawat niini. Ang mga miyembro kinahanglan gayod nga makasabot sa ligdong nga mga katungdanan nga ilang dawaton samtang mohimo og mga pakigsaad uban sa Dios.

Ang pag-andam sa pagdawat sa imong pagtuga maglakip sa mosunod nga mga pagtulon-an ni Jesukristo ug pagpaningkamot sa pagtuman sa mga pakigsaad nga imong gihimo sa bunyag. Ikaw mobag-o sa imong mga pakigsaad sa matag panahon nga ikaw moambit sa sakramento. Ikaw adunay oportunidad sa pagpakigkita sa imong bishop ug dayon sa imong presidente sa stake alang sa usa ka interbiyo sa rekomend sa templo. Ang mga sumbanan alang sa pagsulod sa balay sa Ginoo hisgotan atol sa interbiyo. Mangutana sila nimo og mga pangutana nga motugot nimo sa pagpakigbahin sa imong pagpamatuod sa ebanghelyo ni Jesukristo, sa Iyang buhi nga mga propeta, ug sa Iyang gipahiuli nga Simbahan. Ang imong mga tubag mokompirma nga ikaw naningkamot sa pagtuman sa mga sugo sa Dios ug sa pagsunod ni Jesukristo. Ang imong presidente sa stake makahimo dayon sa paghatag nimo og rekomend sa templo nga motugot nimo sa pagsulod sa templo ug modawat sa imong pagtuga.

Kinatibuk-ang Pagpasabot sa Pagtuga

Dihang nagpasakop ka sa Simbahan, nakadawat ka og duha ka ordinansa—bunyag ug kompirma. Sa samang paagi ang pagtuga diha sa templo madawat usab sa duha ka bahin.

Sa unang bahin, ikaw sa pribado ug indibidwal nga makadawat sa unsay gitawag nga ang mga ordinansa sa initiatory. Kini nga mga ordinansa maglakip sa espesyal nga mga panalangin kabahin sa imong balaan nga kabilin ug potensiyal. Isip kabahin niini nga mga ordinansa, ikaw tugotan usab sa pagsul-ob sa sagrado nga garment sa templo ug tudloan sa pagsul-ob niini sa imong tibuok kinabuhi.

Sa ikaduhang bahin, ikaw makadawat sa nahibilin sa imong pagtuga kauban sa grupo. Kini mahitabo sa usa ka lawak sa panudlo kauban ang ubang tawo kinsa nagtambong sa templo. Ang ubang bahin sa pagtuga ipresentar pinaagi sa video ug ang uban pinaagi sa mga officiator sa templo. Atol sa ordinansa, ang mga panghitabo nga kabahin sa plano sa kaluwasan ipresentar. Kini naglakip sa Paglalang sa kalibotan, sa Pagkapukan ni Adan ug Eva, sa Pag-ula ni Jesukristo, sa Apostasiya, ug sa Pagpahiuli. Ikaw makat-on usab og dugang mahitungod sa paagi nga ang tanang tawo makabalik ngadto sa presensya sa Ginoo.

Atol sa ordinansa sa pagtuga, ikaw dapiton sa paghimo og piho nga mga pakigsaad uban sa Dios. Kini nga mga pakigsaad mao ang:

• Balaod sa Pagkamasulundon, nga naglakip sa pagpaningkamot sa pagtuman sa mga sugo sa Dios.

• Balaod sa Sakripisyo, nga nagpasabot sa pagbuhat sa tanan nato nga mahimo sa pagsuporta sa buhat sa Ginoo ug paghinulsol uban sa masulob-ong kasingkasing ug mahinulsolon nga espiritu.

• Balaod sa Ebanghelyo, nga mao ang mas labaw nga balaod nga Iyang gitudlo sa dihang Siya dinhi pa sa yuta.

• Balaod sa Kaputli, nga nagpasabot nga walay sekswal nga relasyon gawas niadtong kinsa kita sa legal ug pinasubay sa balaod gikasal sumala sa balaod sa Dios.

• Balaod sa Pagpahinungod, nga nagpasabot sa pagpahinungod sa atong panahon, mga talento, ug sa tanan nga gipanalangin sa Ginoo kanato sa paglig-on sa Simbahan ni Jesukristo dinhi sa yuta.

Ang tanang pakigsaad uban sa Dios gitumong nga ang tawo motuman sa mga gikinahanglan sa pakigsaad. Kon ikaw motuman sa imong mga pakigsaad ug maghinulsol sa imong pagkadili hingpit, ang imong relasyon uban Kaniya malig-on ug Siya mas mopanalangin kanimo sa hingpit. Ang imong relasyon uban sa Manluluwas mahimong mas suod ug mas makahuluganon usab. Ang mga tigtuman sa pakigsaad makaangkon og mas labaw nga kahigayonan sa gahom sa Dios ug sa malungtarong nga gugma, kalinaw, kahupayan, ug hingpit nga kalipay. Ang Dios misaad nga kadtong kinsa motuman sa ilang mga pakigsaad makabaton og oportunidad sa pagpuyo og balik uban Kaniya a kahangtoran.

Si Presidente Russell M. Nelson mipasabot nga ang “Ang paghimo og usa ka pakigsaad sa Dios mousab sa atong relasyon uban Kaniya hangtod sa kahangtoran. Kini mopanalangin kanato sa naghingapin nga gugma ug kaluoy. Kini makaapekto kon si kinsa kita karon ug sa unsang paagi ang Dios motabang kanato nga mamahimong unsa ang atong sangpotan.” Tungod kay ang Dios adunay gugma alang niadtong naghimo og pakigsaad Kaniya, Siya mohigugma kanila. Siya mopadayon sa pagpakigtambayayong kanila ug motanyag kanila og mga oportunidad sa pag-usab. Siya mopasaylo kanila kon sila maghinulsol. Ug kon mahisalaag man sila, Siya motabang kanila nga makatultol og balik ngadto Kaniya” (“Ang Walay Kataposan nga Pakigsaad,” Liahona, Oktubre 2022).

“Sa kataposan sa pagtuga, ang mga partisipante sa simbolokanhon nga paagi mosulod ngadto sa presensya sa Ginoo samtang mosulod sila sa lawak sa celestial. Didto ikaw makagahin og panahon sa pagpamalandong, pag-ampo, pagbasa sa mga kasulatan, o hilom nga maghisgot sa imong mga kasinatian uban sa pamilya ug mga higala. Dapit kini sa kalinaw, diin usab makakita kamo og kahupayan ug balaan nga giya.

Ang tanan kinsa moapil sa seremonya sa pagtuga giawhag nga maminaw pag-ayo sa unsay gitudlo. Ang imong kasinatian mas maanindot kon ikaw moadto uban sa tumong nga matudloan sa Espiritu Santo. Ayaw kabalaka mahitungod sa paghinumdom o pagsabot sa tanan sa unang higayon. Ang mga temple worker anaa kanunay sa pagtabang ug pag-abag kanimo. Dili kini usa ka eksamin, apan usa ka kahigayonan nga mas maduol ngadto sa Langitnong Amahan ug ni Jesukristo. Tutoki ang kalipay nga anaa sa balay sa Ginoo ug ang espirituwal nga mga impresyon nga imong nadawat.

Pagpaduol ngadto sa Manluluwas

Ang pagtuga diha sa templo usa ka gikinahanglan nga lakang ngadto sa kaluwasan ug sa pagbalik ngadto sa Langitnong Amahan. Panahon usab kini nga mas mahiduol ngadto ni Jesukristo—aron mas makaila Kaniya ug mosunod sa Iyang ehemplo. Dayag lang, ang tanan nga gisaad nga mga panalangin sa pagtuga mag-agad sa atong pagkamatinud-anon.

Human nimo madawat ang imong kaugalingon nga pagtuga, balik sa templo kutob sa imong mahimo. Kon imong buhaton, ikaw mahimong moapil sa ordinansa sa initiatory ug pagtuga alang sa mga katigulangan ug sa uban kinsa mitaliwan na. Sama sa ubang mga ordinansa nga gipahigayon sa templo, kadtong kinsa namatay makahibalo sa imong pagserbisyo ug makapili sa pagdawat o dili sa unsay imong gihimo alang kanila.

Ang imong pag-apil makatugot usab nimo sa kahigayonan sa pagpaminaw pag-usab sa mga panalangin, mga panudlo, ug mga pakigsaad. Samtang ikaw motambong sa templo, ikaw makamatikod og mas daghang paagi nga ang pagtuga may kalabotan sa plano sa kaluwasan ug sa mga panalangin sa imong kinabuhi. Unsay imong makat-onan ug mabati mas maklaro ug mas bililhon nganha kanimo sa paglabay sa panahon. Samtang ikaw mobosita, bation nimo ang gugma sa Dios ug mapahinumdoman unsay labing importante.