Fekauʻaki mo e ʻEnitaumeni Temipalé

Ko Hoʻo Meʻaʻofa Fakataautaha mei he ʻOtuá

Naʻe fakamanatu mai ʻe Palesiteni Lāsolo M. Nalesoni ko e “ʻekitivitī, lēsoni, mo e meʻa kotoa pē ʻoku tau fai ʻi he Siasí, ʻoku fakataumuʻa ia ki he ʻEikí mo Hono fale māʻoniʻoní. Ko ʻetau ngaahi ngāue ke malangaʻi ʻa e ongoongoleleí, fakahaohaoaʻi ʻa e Kāingalotú, mo huhuʻi ʻa e kau pekiá ʻoku fakataumuʻa kotoa ia ki he temipalé. ʻOku hoko ʻa e temipale māʻoniʻoni takitaha ko ha fakaʻilonga ʻo ʻetau kau ki he Siasí, ko ha fakaʻilonga ʻo ʻetau tui ki he moʻui hili ʻa e maté, pea mo ha sitepu toputapu ki he nāunau taʻengatá maʻatautolu mo hotau ngaahi fāmilí” (“Personal Preparation for Temple Blessings,” Ensign, May 2001, 32; Liahona, July 2001, 37).

Ko e temipalé pē te tau lava ai ʻo fakahoko ʻa e ngaahi fuakava toputapu ʻoku kau ai ʻa e talaʻofa ʻo e moʻui taʻengata ʻi he puleʻanga ʻo e ʻOtuá, ʻa ia ko e “mahuʻinga taha ʻi he ngaahi meʻaʻofa kotoa pē ʻa e ʻOtuá” (Tokāteline mo e Ngaahi Fuakava 14:7). Kuo hoko maʻu pē ʻa e ngaahi ouau mo e ngaahi fuakava fakatemipalé ko ha konga ʻo e ongoongolelei ʻo Sīsū Kalaisí. ʻOku tokoni ia ke fakamālohia ha vā fetuʻutaki fakalangi mo tokoni ke tau tokanga taha ki he Fakamoʻuí, ko ʻEne Fakaleleí, pea mo ʻetau tukupā ke muimui ʻiate Iá.

Ko hono maʻu ho ʻenitaumeni temipalé ko ha aʻusia mātuʻaki fakataautaha ia. ʻE toe mahuʻingamālie ange ia ʻi hoʻo teuteu ki aí. ʻOku maʻu ʻe he kāingalotu tokolahi ʻo e Siasí honau ʻenitaumení kimuʻa pea nau ngāue fakafaifekau pe mali. Ko e niʻihi kehé ʻoku nau maʻu pē ha loto-holi mālohi ke laka ki muʻa ʻi he hala ʻo e fuakavá. ʻOku totonu ke fakalotolahiʻi pea fealēleaʻaki ʻa e kau pīsopé mo e kau palesiteni fakakoló mo e kau mēmipa kakai lalahi ʻoku nau loto ke maʻu honau ʻenitaumení. ʻOku mahuʻinga ke ʻiloʻi ko ho ʻenitaumení ʻoku ope atu ia ʻi ha sitepu pē ʻe taha; ko ha konga mahuʻinga mo nāunauʻia ia ʻo hoʻo fononga taʻengatá.

Ko e ʻenitaumení ko ha “meʻaʻofa” moʻoni ia. ʻI he tūkungá ni, ʻoku hoko ʻa e ʻenitaumeni temipalé ko ha meʻaʻofa ia ʻo e ngaahi tāpuaki toputapu mei he ʻOtuá kiate kitautolu takitaha. ʻE toki maʻu pē ʻa e ʻenitaumeni ko ʻení ʻi Heʻene foungá pea ʻi Hono temipale māʻoniʻoní. ʻOku kau ʻi ha niʻihi ʻo e ngaahi meʻaʻofa ʻokú ke maʻu ʻi he ʻenitaumeni fakatemipalé ʻa e:

1. ʻIlo lahi ange ki he ngaahi taumuʻa mo e ngaahi akonaki ʻa e ʻEikí.

2. Mālohi ke fai ʻa e meʻa kotoa ʻoku finangalo ʻa e ʻOtuá ke tau faí.

3. Fakahinohino mo e maluʻi fakalangi ʻi heʻetau tokoni ki he ʻEikí, ki hotau ngaahi fāmilí, mo e niʻihi kehé.

4. ʻAmanaki lelei, fiemālie, mo e melino lahi ange.

5. Ngaahi tāpuaki kuo talaʻofa mai ʻi he taimí ni mo e taʻengatá.

ʻE lava ʻa e kāingalotu ʻo e Siasí ʻoku nau taʻu 18 pe lahi angé (pea ʻikai toe ako ʻi he ako māʻolungá pe ngaahi kolisí) ʻo maʻu honau ʻenitaumeni temipalé kapau ʻoku nau faivelenga mo mateuteu. Koeʻuhí ʻoku toputapu ʻa e ngaahi ouau mo e ngaahi fuakava fakatemipalé pea ʻi ai honau mahuʻinga taʻengata, kuo fokotuʻu ai ʻe he ʻEikí ha ngaahi tuʻunga moʻui māʻolunga maʻanautolu ʻoku loto ke maʻu iá. Kuo pau foki ke malava ʻo mahino ki he kāingalotú ʻa e ngaahi fatongia molumalu te nau tali ʻi heʻenau fakahoko ʻa e ngaahi fuakava mo e ʻOtuá.

ʻE kau ʻi he teuteu ke maʻu ho ʻenitaumení, ʻa e muimui ʻi he ngaahi akonaki ʻa Sīsū Kalaisí mo fāifeinga ke tauhi ʻa e ngaahi fuakava naʻá ke fakahoko ʻi he papitaisó. ʻOkú ke fakafoʻou hoʻo ngaahi fuakavá ʻi he taimi kotoa pē ʻokú ke maʻu ai ʻa e sākalamēnití. Te ke maʻu ʻa e faingamālie ke talanoa mo hoʻo pīsopé pea hoko atu ki hoʻo palesiteni fakasiteikí ki ha ʻinitaviu lekomeni temipale. ʻE aleaʻi ʻa e ngaahi tuʻunga moʻui māʻolunga ki he hū ki he fale ʻo e ʻEikí lolotonga ʻa e ʻinitaviú. Te na fakahoko atu ha ngaahi fehuʻi ʻe fakaʻatā ai ke ke vahevahe hoʻo fakamoʻoni ki he ongoongolelei ʻo Sīsū Kalaisí, ko ʻEne kau palōfita moʻuí, mo Hono Siasi kuo fakafoki maí. ʻE fakapapauʻi ʻi hoʻo ngaahi talí ʻokú ke fāifeinga ke tauhi ʻa e ngaahi fekau ʻa e ʻOtuá mo muimui kia Sīsū Kalaisi. ʻE lava leva ho palesiteni fakasiteikí ʻo foaki atu ha lekomeni temipale ʻa ia ʻe fakaʻatā ai koe ke ke hū ki he temipalé pea maʻu ho ʻenitaumení.

Ko ha Vakai Fakalūkufua ki he ʻEnitaumení

ʻI he taimi naʻá ke kau ai ki he Siasí, naʻá ke maʻu ʻa e ouau ʻe ua—ko e papitaisó mo e hilifakinimá. ʻOku faitatau pē, ʻoku maʻu foki mo e ʻenitaumeni fakatemipalé ʻi ha konga ʻe ua.

ʻI he konga ʻuluakí, te ke maʻu fakafoʻituitui ai ʻi he lilo ʻa e meʻa ʻoku ui ko e ngaahi ouau ʻinisitolí. ʻOku kau ʻi he ngaahi ouau ko ʻení ʻa e ngaahi tāpuaki makehe fekauʻaki mo ho tofiʻa mo e tuʻunga malava fakalangí. Ko e konga ʻo e ngaahi ouau ko ʻení, ʻe fakamafaiʻi foki koe ke ke tui ʻa e kāmeni temipale toputapú mo fakahinohinoʻi koe ke tui ia ʻi he kotoa hoʻo moʻuí.

ʻI he konga hono uá, te ke maʻu ʻa e toenga ho ʻenitaumení ʻi ha kulupu. ʻOku fakahoko ʻeni ʻi ha loki fakahinohino fakataha mo e niʻihi kehe ʻoku omi ki he temipalé. ʻOku fakahoko ha konga ʻo e ʻenitaumení ʻo fakafou ʻi ha fakaʻaliʻali fakavitiō pea ko e konga ʻoku fakahoko ia ʻe he kau faiouau ʻi he temipalé. Lolotonga ʻa e ouaú, ʻoku fakaʻaliʻali ha ngaahi meʻa naʻe hoko ʻa ia ko e konga ʻo e palani ʻo e fakamoʻuí. ʻOku kau ai ʻa e Fakatupu ʻo e māmaní, ko e Hinga ʻa ʻĀtama mo ʻIví, ko e Fakalelei ʻa Sīsū Kalaisí, ko e Hē mei he Moʻoní, pea mo e Fakafoki Mai ʻo e Ongoongoleleí. Te ke ako lahi ange foki ai fekauʻaki mo e founga ʻe lava ai ʻa e kakai kotoa pē ʻo toe foki ki he ʻao ʻo e ʻEikí.

Lolotonga ʻa e ouau ʻenitaumení, ʻe fakaafeʻi koe ke ke fakahoko ha ngaahi fuakava pau mo e ʻOtuá. Ko e ngaahi fuakava ko ʻení ko e:

• Fono ʻo e Talangofuá, ʻa ia ʻoku kau ai ʻa e fāifeinga ke tauhi ʻa e ngaahi fekau ʻa e ʻOtuá.

• Fono ʻo e Feilaulaú, ʻa ia ko hono ʻuhingá ke fai ʻa e meʻa kotoa te tau lavá ke tokoni ki he ngāue ʻa e ‘Eikí pea fakatomala ʻi he loto-mafesifesi mo e laumālie fakatomala.

• Fono ‘o e Ongoongoleleí, ʻa ia ko e fono māʻolunga angé naʻá Ne ako‘i ʻi he lolotonga ʻEne ‘i māmaní.

• Fono ʻo e Angama‘á, ʻa ia ko e ʻuhingá ke tau toki fetuʻutaki fakasekisuale pē mo e tokotaha ʻoku tau mali mo ia ʻi he founga totonu mo fakalao ʻo fakatatau mo e fono ʻa e ʻOtuá.

• Fono ʻo e Fakatapuí, ‘a ia ʻoku ʻuhinga ki hono fakatapui hotau taimí, ngaahi talēnití mo e meʻa kotoa pē kuo tāpuekina ʻaki kitautolu ʻe he ‘Eikí ki hono langa hake ʻa e Siasi ‘o Sīsū Kalaisí ʻi he māmaní.

ʻOku fakataumuʻa ʻa e fuakava kotoa pē mo e ʻOtuá ke tau haʻisia ki ai. ʻI hoʻo tauhi ho ngaahi fuakavá mo fakatomala mei hoʻo ngaahi tōnounoú, ʻoku fakamālohia ai ho vā fetuʻutaki mo Iá pea te Ne tāpuekina kakato ange koe. ʻOku vāofi foki mo ʻuhingamālie ange ho vā fetuʻutaki mo e Fakamoʻuí. ʻOku maʻu lahi ange ʻe he kau tauhi fuakavá ʻa e mālohi ʻo e ʻOtuá pea mo e ʻofa, nonga, fiemālie, mo e fiefia tuʻuloá. ʻOku talaʻofa ʻe he ʻOtuá ko kinautolu ko ia ʻoku tauhi ʻenau ngaahi fuakavá te nau maʻu ʻa e faingamālie ke toe foki ʻo nofo mo Ia ʻo taʻengata.

ʻOku pehē ʻe Palesiteni Lāsolo M. Nalesoni “ʻOku liliu hotau vā fetuʻutaki mo e ʻOtuá ʻo taʻengata ʻi heʻetau fakahoko ha fuakava mo Iá. ʻOkú ne tāpuekina kitautolu ʻaki ha ʻofa mo e ʻaloʻofa lahi ange. ʻOku tokoni ki hotau tuʻunga totonú mo e founga ʻe tokoniʻi ai kitautolu ʻe he ʻOtuá ke tau aʻusia e tuʻunga te tau lava ʻo aʻusiá.” Koeʻuhí ko e angaʻofa ʻa e ʻOtuá kiate kinautolu kuo nau fakahoko ha fuakava mo Iá, “te Ne ʻofa ʻiate kinautolu. ʻE hokohoko atu ʻene ngāue mo kinautolú mo ʻoange ha ngaahi faingamālie ke nau liliu ai. Te Ne fakamolemoleʻi kinautolu ʻi he taimi te nau fakatomala aí. Pea kapau te nau hē, te Ne tokoniʻi kinautolu ke nau ʻilo honau hala ke foki ai kiate Iá” “(Ko e Fuakava Taʻengatá,” Liahona, ʻOkatopa 2022).

ʻI he fakaʻosinga ʻo e ʻenitaumení, ʻoku fakataipe ʻa e foki ʻa kinautolu ʻoku kau ki aí ki he ʻao ʻo e ʻEikí, ʻi heʻenau hū ki he loki silesitialé. Te ke lava ʻo fakaʻaongaʻi ai ha taimi ke fakalaulauloto, lotu, lau ʻa e folofolá pe vahevahe leʻosiʻi hoʻo ngaahi fakakaukaú mo ho fāmilí mo e kaungāmeʻá. Ko ha feituʻu ia ʻo e nonga, ʻa ia te ke lava foki ʻo maʻu ai ʻa e fiemālié mo e fakahinohino fakalangí.

ʻOku poupouʻi ʻa kinautolu kotoa pē ʻoku kau ki he ouau ʻenitaumení ke nau tokanga ki he meʻa ʻoku akoʻí. ʻE mahuʻingamālie ange hoʻo aʻusiá ʻi hoʻo ʻalu mo e taumuʻa ke akoʻi koe ʻe he Laumālie Māʻoniʻoní. ʻOua ʻe hohaʻa ki hono manatuʻi pe mahino ʻa e meʻa kotoa pē ʻi he fuofua taimí. ʻE ʻi ai maʻu pē ha kau ngāue temipale ke nau tokoniʻi koe. ʻOku ʻikai ko ha sivi ia, ka ko ha faingamālie ke ke ongoʻi ofi ange ai ki he Tamai Hēvaní mo Sīsū Kalaisi. Tokanga taha ki he fiefia ʻo e nofo ʻi he fale ʻo e ʻEikí mo e ngaahi fakakaukau fakalaumālie ʻokú ke maʻú.

ʻUnu Ofi Ange ki he ʻEikí

Ko e ʻenitaumeni temipalé ko ha sitepu mahuʻinga ia ki he fakamoʻuí pea mo e toe foki ki he Tamai Hēvaní. Ko ha taimi foki ia ke haʻu ke ofi ange ai kia Sīsū Kalaisi—ke ʻiloʻi lelei ange Ia mo muimui ki Heʻene sīpingá. Ko hono moʻoní, ko e ngaahi tāpuaki kotoa pē ʻo e ʻenitaumení kuo talaʻofa maí, ʻoku makatuʻunga ia ʻi heʻetau faivelengá.

Hili hoʻo maʻu ho ʻenitaumení, toe foki ki he temipalé ʻi he lahi taha te ke lavá. ʻI hoʻo fai iá, te ke lava ai ʻo kau ki he ngaahi ouau ʻinisitolí mo e ʻenitaumeni maʻá e ngaahi kuí mo e niʻihi kehe kuo nau mamaʻo atú. Hangē pē ko e ngaahi ouau kehe kotoa ʻoku fakahoko ʻi he temipalé, ʻoku ʻilo ʻe kinautolu kuo pekiá hoʻo ngāue tokoní pea te nau lava ʻo fili pe te nau tali pe ʻikai ʻa e meʻa kuó ke fakahoko maʻanautolú.

ʻOku ʻoatu foki ʻi hoʻo kau ki aí ʻa e faingamālie ke toe fanongo ki he ngaahi tāpuakí, ngaahi fakahinohinó, mo e ngaahi fuakavá. ʻI hoʻo ʻalu ki he temipalé, te ke fakatokangaʻi ha ngaahi founga lahi ange ʻoku felāveʻi ai ʻa e ʻenitaumení ki he palani ʻo e fakamoʻuí mo tāpuekina hoʻo moʻuí. ʻE mahino mo toe mahuʻinga ange kiate koe ʻa e meʻa ʻokú ke ako mo ongoʻí ʻi he fakalau ʻa e taimí. ʻI hoʻo ʻaʻahi ki aí, te ke ongoʻi ai e ʻofa ʻa e ʻOtuá mo fakamanatu atu ʻa e meʻa ʻoku mahuʻinga tahá.