Ua suitulaga Tamaiti ma le Autalavou i se vaega o tagata i le lalolagi atoa o loo tauivi ia avea atili e faapei o Iesu Keriso. I le avea ai ma sui o lena lotogatasi, o le a maua ai e tamaiti ma le autalavou ni faatusa i lo latou taimi i le Peraimeri, korama a le Perisitua Arona, ma vasega a Tamaitai Talavou. E mafai foi ona latou maua faatusa o le ausiaga e latalata i le faamae’aina o o latou taimi i korama o le Perisitua Arona ma vasega a Tamaitai Talavou.
O le tausaga e atoa i ai lo latou ta’i 8, o le a maua ai e tamaiti se mama ma se ata o le malumalu i lo latou itulagi o le malumalu.
E faapefea ona maua e tamaiti nei faatusa?
O nei faatusa uma e lua o le a tuuina atu i tamaiti e le epikopo, o le e mafai ona asiasi i la latou vasega Peraimeri i le amataga o le tausaga e atoa i ai lo latou ta’i 8.
O le tausaga e atoa i ai lo latou ta’i 12, o le a maua ai e le autalavou se tama’i pepa faavaa e tuu i ai le pepa faataga o le malumalu. O le a maua foi e alii talavou se mama, ma o le a maua foi e tamaitai talavou se asoa o le pine ma se maa taua.
E faapefea ona maua e le autalavou nei faatusa?
O le a maua e alii talavou se mama mai i lo latou au peresitene o le korama. O le a maua e tamaitai talavou se asoa o le pine ma se maa taua mai i lo latou au peresitene o le vasega. E faaopoopo i ai, i le taimi o le faatalanoaga, o le a tuu atu ai e le epikopo i autalavou taitasi se tama’i pepa faavaa e tuu i ai le pepa faataga o le malumalu.
I le amataga o le tausaga e atoa ai le latou 18 tausaga, o le a maua e alii talavou se fagu suā’u’u e mafai ona latou faaaogaina pe a mae’a ona faauuina i latou i le Perisitua Mekisateko. O le a mauaina e tamaitai talavou se pine lea e mafai ona faaopoopo i le filifili o le latou asoa [medallion].
E faapefea ona maua e le autalavou nei faatusa?
O le a tuuina atu le fagu sua’u’u po o le pine i le autalavou e lo latou au peresitene o le korama po o le vasega e latalata i le amataga o le tausaga e atoa i ai lo latou ta’i 18 tausaga.
I le aluga o le tausaga e atoa ai le 18 tausaga o se alii talavou po o se tamaitai talavou, o le a maua e ia (faatasi ai ma matua pe a manaomia) le avanoa e feiloai ai ma le epikopo e talanoaina lona alualu i luma. I lenei faatulagaga, o le a tuuina atu e le epikopo se tusi faamaonia mai le Au Peresitene Sili, faapea foi ma le ma’a taua a Tamaiti ma le Autalavou. Na te tuuina atu nei faatusa o le ausiaga i le autalavou o loo taumafai ina ia avea atili e pei o le Faaola e ala i le tauivi e:
- Suesue i tusitusiga paia ma tatalo i aso uma.
- Ia agavaa mo se pepa faataga o le malumalu e faatapulaa le faaaogaina.
- Auai i sauniga o le Sapati, galuega a korama po o vasega, ma le seminare.
- Galue i sini i vaega taitasi o le tuputupu a’e.
- Auauna atu i isi i se auala taua faaletagata lava ia, lea e mafai ona aofia ai se galuega faatino.
E mafai foi ona maua e tagata fou liliu mai, o i latou e lē malolosi le auai i le Tamaiti ma le Autalavou po o le Ekalesia, ma i latou e lē o ni tagata o le Ekalesia ia faatusa o le ausiaga i le tausaga e atoa ai lo latou 18 tausaga pe afai, i le taimi o lo latou faatalanoaga, o loo latou galulue malolosi e atiae nei mamanu o le avea ma so’o.
O faailoga mo le Tauivi ia Avea o loo maua mo mea e tutupu ma gaoioiga i le lotoifale.
Aseta o le Tauivi ia Avea mo Konafesi ma Tolauapiga a le Autalavou