Pangkalahatang Ideya para sa mga Bata

Ang pag-aaral ng ebanghelyo ay nagsisimula sa tahanan at sinusuportahan ng Simbahan. Sa tahanan, natututuhan, nauunawaan, at ipinamumuhay ng mga bata ang ebanghelyo ni Jesucristo bilang bahagi ng kanilang pang-araw-araw na buhay. Sila ay nakikibahagi sa pag-aaral ng mga banal na kasulatan, nagtuturo ng mga aralin, sama-samang nagdarasal, nag-oorganisa ng mga home evening, at iba pa. Sa simbahan, nagtuturo ang mga lider ng mga klase na nakatuon sa ebanghelyo at nagpaplano ng mga aktibidad sa pag-aaral ng ebanghelyo para sa mga bata.

Nadarama ng mga bata na kabilang sila kapag naglilingkod sila sa mga tao at sama-samang nakikibahagi sa mga aktibidad. Sa tahanan, natututuhan ng mga bata kung paano gamitin ang kanilang mga kaloob at talento para pagpalain at paglingkuran ang iba. Sa simbahan, nakikibahagi ang mga bata sa mga gawaing-paglilingkod at aktibidad.

Ang mga gawaing-paglilingkod o aktibidad sa Primary ay karaniwang idinaraos nang isa hanggang apat na beses kada buwan, depende sa mga lokal na sitwasyon. Halimbawa, ang distansya, gastos, oras, kaligtasan, o iba pang mga sitwasyon ay maaaring maging dahilan para maging hindi praktikal na magkaroon ng mga aktibidad nang mahigit isang beses sa isang buwan.

Maaaring hilingin ng bishopric sa Primary presidency na magrekomenda ng mga guro sa Primary o iba pang mga miyembro ng ward na tatawagin bilang mga Primary activity leader. Dapat mayroong hindi bababa sa dalawang lider ang dadalo sa bawat aktibidad. Ang mga lider ay maaaring dalawang babae, dalawang lalaki, o mag-asawa. Dapat kumpletuhin ng mga lider ang training na “Protecting Children and Youth” bago sila makibahagi sa mga aktibidad: ProtectingChildren.ChurchofJesusChrist.org.

Ang mga Primary activity leader ay nagpaplano ng mga gawaing-paglilingkod at aktibidad na nakatuon sa apat na aspeto ng pag-unlad: espirituwal, pakikipagkapwa, pisikal, at intelektuwal.

Ang magdamag na mga kamping ay hindi ginaganap para sa mga bata. Gayunman, maaaring piliin ng mga lokal na lider na magdaos ng mga day camp para sa mga bata sa Primary na nakikilahok sa Mga Bata at Kabataan.

Tingnan ang sumusunod para sa karagdagang mga ideya sa mga gawaing-paglilingkod at aktibidad:

• ChildrenandYouth.ChurchofJesusChrist.org
• Gospel Living app

Ang Mga Bata at Kabataan ay tumutulong sa mga bata na umunlad sa apat na aspeto tulad ni Jesus (tingnan sa Lucas 2:52). Matututuhan nilang tuklasin ang kanilang mga kaloob at talento sa pamamagitan ng pananalangin at paggawa ng plano para paunlarin ang mga kaloob na iyon. Hinihikayat ng mga magulang at lider ang mga bata na magtuon sa kahit isang mithiin sa bawat isa sa apat na kategorya (espirituwal, pakikipagkapwa, pisikal, at intelektuwal) bawat taon.

Kapag kailangan, maaaring tulungan ng mga magulang at lider ang mga bata na matukoy kung paano nila gustong itakda at subaybayan ang kanilang mga aktibidad, mithiin, o interes. Maaaring naisin ng ilang mga bata na gamitin ang Pansariling Pag-unlad: Gabay na Aklat para sa mga Bata.

Ang mga ideya sa pag-unlad ay makukuha sa ChildrenandYouth.ChurchofJesusChrist.org at sa Gospel Living app.