Vakai Fakalūkufua maʻá e Fānaú

ʻOku kamata hono ako ʻo e ongoongoleleí ʻi ʻapi pea ʻoku poupouʻi ia ʻe he Siasí. ʻI ʻapí, ʻoku ako, mahino, pea moʻui ʻaki ʻe he fānaú ʻa e ongoongolelei ʻo Sīsū Kalaisí ko ha konga ʻo ʻenau moʻui fakaʻahó. ʻOku nau kau ʻi he ako folofolá, akoʻi ʻa e ngaahi lēsoní, lotu fakataha, fokotuʻutuʻu ʻa e ngaahi efiafi fakafāmili ʻi ʻapí, mo e ngaahi meʻa peheé. ʻOku akoʻi ʻe he kau takí ʻi he lotú ʻa e ngaahi kalasi ʻoku fakatefito ʻi he ongoongoleleí mo palani ʻa e ngaahi ʻekitivitī ako ʻo e ongoongoleleí maʻá e fānaú.

ʻOku ongoʻi ʻe he fānaú ʻoku nau kau fiefia atu ʻi he taimi ʻoku nau tokoniʻi ai ʻa e kakaí mo kau fakataha ʻi he ngaahi ʻekitivitií. ʻI apí, ʻoku ako ʻe he fānaú ʻa e founga ke fakaʻaongaʻi ʻenau ngaahi meʻa-foakí mo e talēnití ke tāpuekina mo tokonia e niʻihi kehé. ʻI he lotú, ʻoku kau ʻa e fānaú ʻi he ngāue tokoní mo e ngaahi ʻekitivitií.

Ko e ngāue tokoní pe ngaahi ʻekitivitī ʻa e Palaimelí ʻoku meimei ke fakahoko tuʻo taha ki he tuʻo fā ʻi he māhina, ʻo fakatatau mo e ngaahi tūkunga fakalotofonuá. Hangē ko ʻení, ko e vāmamaʻó, fakamolé, taimí, malú, pe ngaahi tūkunga kehé, ʻe lava ke ʻikai malava ai ke fakataha tuʻo taha he māhina.

ʻE lava ke kole ʻe he kau pīsopelikí ʻa e kau palesitenisī ʻo e Palaimelí ke nau fakaongoongoleleiʻi ha kau faiako Palaimeli pe ko ha kāingalotu kehe ʻo e uōtí ke ui ko ha kau taki ʻekitivitī ʻa e Palaimelí. Kuo pau ke toko ua pe tokolahi ange ʻa e kau taki ʻi he ʻekitivitī takitaha. ʻE lava ke hoko ha ongo fafine, ongo tangata pe ongomeʻa mali ko ha kau taki. Kuo pau ke fakakakato ʻe he kau takí ʻa e ako “Ko Hono Maluʻi ʻo e Fānaú mo e Toʻu Tupú” kimuʻa pea kau atu ki he ngaahi ʻekitivitií: ProtectingChildren.ChurchofJesusChrist.org.

ʻOku palani ʻe he kau taki ʻekitivitī ʻa e Palaimelí ha ngaahi ngāue tokoni mo ha ngaahi ʻekitivitī ʻoku nofotaha ʻi he ngaahi tafaʻaki ʻe fā ʻo e tupulakí: fakalaumālie, fakasōsiale, fakatuʻasino, mo fakaʻatamai.

ʻOku ʻikai fakahoko ha nofo kemi pō kakato maʻá e fānaú. Ka neongo ia, ʻe lava ʻe he kau taki fakalotofonuá ʻo fili ke fakahoko ha nofo kemi lolotonga e ʻahó maʻá e fānau ʻoku kau ki he Fānaú mo e Toʻu Tupú.

Vakai ki he ngaahi meʻá ni ki ha ngaahi fakakaukau lahi ange ki he ngāue tokoní mo e ʻekitivitií:

• ChildrenandYouth.ChurchofJesusChrist.org
• Gospel Living app

ʻOku tokoni ʻa e Fānaú mo e Toʻu Tupú ki he fānaú ke nau tupulaki ʻi he ngaahi tafaʻaki ʻe fā ne tupulaki ai ʻa Sīsuú (vakai, Luke 2:52). Te nau ako ke ʻiloʻi ʻenau ngaahi meʻa-foakí mo honau ngaahi talēnití ʻi he lotu pea faʻu ha palani ke fakatupulaki e ngaahi meʻa-foaki ko iá. ʻE poupouʻi ʻe he mātuʻá mo e kau takí ʻa e fānaú ke nau tokanga taha ki ha taumuʻa ʻe taha ʻi he ngaahi kulupu takitaha ʻe faá (fakalaumālie, fakasōsiale, fakatuʻasino mo fakaʻatamai) ʻi he taʻu kotoa pē.

ʻO ka fie maʻu, ʻe lava ke tokoni ʻa e mātuʻá mo e kau takí ki he fānaú ke nau ʻiloʻi ʻa e founga ʻoku nau fie maʻu ke fokotuʻu mo muimuiʻi ʻaki ʻenau ngaahi ʻekitivitií, taumuʻá, pe meʻa ʻoku nau manako aí. Mahalo ʻe fie fakaʻaongaʻi ʻe he fānau ʻe niʻihi ʻa e Fakalakalaka Fakatāutahá: Tohi Fakahinohino ʻa e Fānaú.

ʻOku maʻu atu ʻa e ngaahi fakakaukau ki he fakalakalaká ʻi he ChildrenandYouth.ChurchofJesusChrist.org pea ʻi he Gospel Living app.