Kinatibuk-ang Pagpasabot alang sa Kabatan-onan
Ang programa sa Kabataan ug Kabatan-onan makatabang sa kabatan-onan nga molambo sama sa ilang Manluluwas ug makapaambit sa ilang mga gasa ug mga talento ngadto sa uban. Magtingoha sila og pagpadayag aron mahibalo kon unsaon sa pag-ugmad og ilang mga talento, pagkahimong mas mahisama ni Jesukristo, ug mohimo sa ilang kaugalingon, sa ubang mga tawo, ug gani sa kalibotan nga mas momaayo.
Ang tulo ka area nga tutokan diha sa programa sa Kabataan ug Kabatan-onan mao ang:
- Pagkat-on sa ebanghelyo.
- Pagserbisyo ug mga kalihokan.
- Personal nga kalamboan.
Magkat-on pa og Dugang
Ang pagkat-on sa ebanghelyo magsugod sa panimalay ug gisuportahan sa Simbahan. Diha sa panimalay, ang kabatan-onan makakat-on, makasabot, ug magsunod sa ebanghelyo ni Jesukristo isip kabahin sa ilang inadlaw-adlaw nga kinabuhi. Moapil sila sa pagtuon sa kasulatan, pagtudlo sa mga leksiyon, dungan nga pag-ampo, pag-organisar og mga home evening, ug uban pa. Diha sa simbahan, ang mga lider nga hamtong motabang sa pagtudlo og mga klase nga nakatutok sa ebanghelyo ug motabang sa kabatan-onan nga makaplano og mga kalihokan sa pakat-on sa ebanghelyo alang sa ilang mga klase ug mga korum. Ang mga klase sa seminary makahatag usab og talagsaong suporta sa Simbahan alang sa pagkat-on sa ebanghelyo.
Ang pagserbisyo ug ang mga kalihokan makatabang sa kabatan-onan sa paglambo, sa pag-establisar og matarong inadlaw nga kinaiya, sa paglig-on sa mga relasyon sa pamilya, sa pagkat-on og mga kahanas sa kinabuhi, ug sa pagpalambo og mga kinaiya nga sama kang Kristo. Ang pagserbisyo ug ang mga kalihokan sa pamilya mahimong motutok sa mga panginahanglan sa indibidwal ug pamilya ug mohatag og mga oportunidad sa paggamit sa mga baroganan sa ebanghelyo diha sa inadlaw-adlaw nga mga kasinatian.
Ang pagserbisyo—lakip ang pagpahigayon sa ordinansa sa sakramento sa mga naghupot sa Aaronic nga Pagkapari—ug regular nga mga kalihokan makahatag og mga oportunidad sa pagpundok, pagkat-on og bag-ong mga kahanas, paghimo sa lisod nga mga buluhaton, ug pag-ugmad og mga relasyon sa mga higala ug mga lider nga nakasentro sa ebanghelyo. Kini nga mga oportunidad makatabang sa mga kabatan-onan nga mas molambo sama sa Manluluwas ug makahatag og makahuluganong serbisyo ngadto sa uban.
Uban sa tabang sa hamtong nga mga lider, ang mga kapangulohan sa korum ug sa klase moplano og serbisyo ug mga kalihokan. Kini nga mga kalihokan kinahanglan nga makalingaw ug makapaapil ug makalig-on sa mga pagpamatuod, makalig-on sa mga pamilya, ug makapasiugda og personal nga paglambo. Kinahanglang balanse usab kini diha sa upat ka area sa pagpalambo: espiritwal, sosyal, pisikal, ug intelektwal.
Ang molungtad og pipila ka adlaw nga mga kalihokan maglakip sa Alang sa Kalig-on sa mga Kabatan-onan (FSY) nga mga komperensiya, mga komperensiya sa kabatan-onan, mga kamping, ug uban pang panagpundok. Kini nga mga kalihokan makatabang sa kabatan-onan nga mapalig-on ang ilang tinguha nga mosunod sa Manluluwas, mopalayo kanila gikan sa naandan nila nga mga buhat, ug motabang kanila nga makasabot nga sila kabahin sa mas dakong pundok sa kabatan-onan kinsa adunay managsamang matarong nga mga tumong.
Tan-awa ang mosunod alang sa dugang pa nga mga ideya sa pagserbisyo ug sa kalihokan:
Ang bishopric motawag ug ang kapangulohan sa Young Women morekomendar og mga tigtambag [adviser] ug mga espesyalista alang sa ilang mga korum o mga klase. Ang bishopric ug ang kapangulohan sa Young Women ug ang ilang natawag nga mga tigtambag ug mga espesyalista mahimong motambong sa mga kalihokan sa kabatan-onan. Sa kanunay adunay labing minos duha ka lider nga hamtong sa matag kalihokan. Ang tanang hamtong nga mga lider kinahanglan nga makakompleto sa pagbansay diha sa ProtectingChildren.ChurchofJesusChrist.org.
Ang kabatan-onan modiskobre, moplano, molihok, ug mamalandong sa ilang indibidwal nga mga plano alang sa personal nga paglambo (espiritwal, sosyal, pisikal, ug intelektwal). Ang mga ginikanan makatabang sa kabatan-onan sa pag-ila kon sa unsang paagi sila naglambo ug kon asa nga dapit ang angay nilang palamboon. Ang tanang kalihokan, lakip sa simbahan, eskwelahan, panaghigalaay, mga dula, mga art, trabaho, ug ubang indibidwal nga mga interes makatabang sa kabataan ug kabatan-onan sa pagsunod kang Jesukristo.
Ang kabatan-onan giawhag nga magtutok labing minos sa duha ka tumong sa matag upat ka area matag tuig. Ang kabatan-onan motino kon unsay gusto nilang paagi sa pagmonitor sa ilang pag-uswag. Ang pipila manghinaot nga mogamit sa Personal nga Kalamboan: Giya nga Basahon sa Kabatan-onan o sa Gospel Living app aron sa pagpili ug pagrekord og mga tumong.
Ang mga ideya alang sa tumong anaa sa giya nga basahon, sa ChildrenandYouth.ChurchofJesusChrist.org, ug diha sa Gospel Living app.