Vakai Fakalūkufua maʻá e Toʻu Tupú

ʻOku kamata hono ako ʻo e ongoongoleleí ʻi ʻapi pea ʻoku poupouʻi ia ʻe he Siasí. ʻI ʻapí, ʻoku ako, mahino, pea moʻui ʻaki ʻe he toʻu tupú ʻa e ongoongolelei ʻo Sīsū Kalaisí ko ha konga ʻo ʻenau moʻui fakaʻahó. ʻOku nau kau ʻi he ako folofolá, akoʻi ʻa e ngaahi lēsoní, lotu fakataha, fokotuʻutuʻu ʻa e ngaahi efiafi fakafāmili ʻi ʻapí, mo e ngaahi meʻa peheé. ʻOku tokoni ʻa e kau taki kakai lalahi ʻi he lotú ke akoʻi e ngaahi kalasi ʻoku fakatefito ʻi he ongoongoleleí mo tokoniʻi ʻa e toʻu tupú ʻi hono palani ʻo e ngaahi ʻekitivitī ki hono ako ʻo e ongoongoleleí ki heʻenau ngaahi kalasí mo e ngaahi kōlomú. ʻOku toe ʻomi foki ʻe he ngaahi kalasi seminelí ha poupou lelei mei he Siasí ki hono ako ʻo e ongoongoleleí.

• Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí
• Haʻu, ʻo Muimui ʻIate Au—Maʻá e Lautohi Faka-Sāpaté
• Haʻu, ʻo Muimui ʻIate Au—Maʻá e Ngaahi Kōlomu ʻo e Lakanga Taulaʻeiki Faka-ʻĒloné mo e Ngaahi Kalasi ʻa e Kau Finemuí

ʻE lava ke tokoni ʻa e ngāue tokoní mo e ngaahi ʻekitivitií ke tupulaki ʻa e toʻu tupú, fokotuʻu ha ngaahi ʻulungaanga māʻoniʻoni fakaʻaho, langaki ʻa e ngaahi vā fetuʻutaki fakafāmilí, ako e ngaahi taukei ʻo e moʻuí, mo fakatupulaki ʻa e ngaahi ʻulungaanga faka-Kalaisí. ʻOku lava ke tukutaha e tokanga ʻa e ngāue tokoni fakafāmilí mo e ngaahi ʻekitivitií ʻi he ngaahi fiemaʻu fakafoʻituitui mo fakafāmilí mo e ngaahi faingamālie ke fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi he ngaahi aʻusia fakaʻahó.

ʻOku ʻomi ʻe he ngāue tokoní—kau ai e ngāue ʻa e kau maʻu Lakanga Taulaʻeiki Faka-ʻĒloné ʻi he ouau ʻo e sākalamēnití—mo e ngaahi ʻekitivitī angamahení ha ngaahi faingamālie ke nau fakatahataha mai ai, ako ha ngaahi pōtoʻi ngāue foʻou, lavaʻi ha ngaahi ngāue faingataʻa, mo langaki hake ai ha ngaahi vā fetuʻutaki mo honau ngaahi kaungāmeʻá mo e kau takí ʻa ia ʻoku fakatefito ʻi he ongoongoleleí. ʻOku tokoni ʻa e ngaahi faingamālie ko ʻení ki he toʻu tupú ke nau tupulaki ʻo hangē ko e Fakamoʻuí mo fai ha tokoni mahuʻingamālie ki he niʻihi kehé.

ʻI he tokoni ʻa e kau taki kakai lalahí, ʻoku palani ʻe he kau palesitenisī fakakōlomú mo fakakalasí ʻa e ngāue tokoní mo e ngaahi ʻekitivitií. ʻOku totonu ke fakafiefia mo fakamānako ʻa e ngaahi ʻekitivitī ko ʻení pea langaki ai ʻa e fakamoʻoní, fakamālohia ʻa e ngaahi fāmilí, mo ohi mai ʻa e tupulaki fakatāutahá. ʻOku totonu foki ke potupotu tatau e ngaahi tafaʻaki ʻe fā ʻo e tupulakí (fakalaumālie, fakasōsiale, fakatuʻasino mo fakaʻatamai).

ʻOku kau ʻi he ngaahi ʻekitivitī ʻaho lahi maʻá e toʻu tupú ʻa e ngaahi konifelenisi Ki hono Fakamālohia ʻo e Toʻu Tupú (KFT), ngaahi konifelenisi ‘a e toʻu tupú, kemí, mo ha ngaahi fakatahaʻanga kehe. ʻE lava ke tokoni e ngaahi ʻekitivitī ko ʻení ke fakamālohia ʻa e holi ʻa e toʻu tupú ke muimui ki he Fakamoʻuí, ʻomai kinautolu mei heʻenau taimi-tēpile angamahení, pea tokoniʻi ke nau ʻilo ko e konga kinautolu ʻo ha kulupu lahi ange ʻo e toʻu tupú ʻa ia ʻoku nau vahevahe ha ngaahi taumuʻa māʻoniʻoni.

Vakai ki he ngaahi meʻá ni ki ha ngaahi fakakaukau lahi ange ki he ngāue tokoní mo e ʻekitivitií:

• ChildrenandYouth.ChurchofJesusChrist.org
• Gospel Living app

ʻE lava ʻe he kau pīsopelikí ʻo ui pea ʻe lava ke fakaongoongoleleiʻi atu ʻe he palesitenisī ʻo e Kau Finemuí ha kau ʻetivaisa mo ha kau mataotao ki heʻenau ngaahi kōlomú mo e kalasí. ʻE lava ke kau ʻa e kau pīsopelikí mo e kau palesitenisī ʻo e Kau Finemuí mo ʻenau kau ʻetivaisá mo e kau mataotaó ʻi he ngaahi ʻekitivitī ʻa e toʻu tupú. ʻOku ʻi ai maʻu pē ha ongo taki kakai lalahi ʻe toko ua ʻi he ʻekitivitī kotoa pē. Kuo pau ke fakakakato ʻe he kau takí ʻa e ako ʻi he ProtectingChildren.ChurchofJesusChrist.org.

ʻOku ʻiloʻi, palani, ngāue, mo fakakaukauʻi ʻe he toʻu tupú ʻenau ngaahi palani fakafoʻituitui ki he tupulaki fakatāutahá (fakalaumālie, fakasōsiale, fakatuʻasino, mo fakaʻatamai). ʻE lava ke tokoni ʻa e mātuʻá ki he toʻu tupú ke nau fakatokangaʻi ʻa e founga ʻoku nau ʻosi tupulaki aí mo e tafaʻaki te nau ala fie maʻu ke fakaleleiʻí. ʻE lava ke tokoni e ʻekitivitī kotoa, kau ai e lotú, sipotí, ʻātí, ngāué, mo e ngaahi meʻa mahuʻinga kehé, ke muimui ʻa e fānaú mo e toʻu tupú ʻia Sīsū Kalaisi.

ʻOku poupouʻi ʻa e toʻu tupú ke nau nofo taha ʻi ha taumuʻa ʻe ua pe lahi ange ʻi he ngaahi tafaʻakí ʻe fā ʻi he taʻu kotoa pē. ʻOku fakakaukauʻi ʻe he toʻu tupú ʻa e founga ʻoku nau fie fokotuʻu mo muimuiʻi ʻaki ʻenau fakalakalaká. ʻE fakaʻamu ha niʻihi ke fakaʻaongaʻi ʻa e Fakalakalaka Fakatāutahá:Tohi Fakahinohino ʻa e Toʻu Tupú pe Gospel Living app ke fili mo lekooti ʻa e ngaahi taumuʻá.

ʻOku maʻu ʻa e ngaahi fakakaukau ki he taumuʻá ʻi he tohi fakahinohinó, ʻi he ChildrenandYouth.ChurchofJesusChrist.org, pea ʻi he Gospel Living app.