Mwakoro 111
Kaotioti ae kaotaki rinanon Iotebwa Timiti te Burabeti, i Salem, i Massachusetts, n Aokati 6, 1836. N te tai aei taan kairiiri n te Ekaretia a rangi ni korakora aia tarau ibukin aia mwakuri ni ibuobuoki. Ibukina bwa a ongo bwa e na tauraoi te mwane ae bubura i Salem, te Burabeti, Sidney Rigdon, Hyrum Smith, ao Oliver Cowdery a mwananga nako iai mai Kirtland, Ohio ni kakaea rongorongon te taeka aei, ao n tataekina naba te euangkerio. Taari aikai a karaoi naba mwakurin te Ekaretia ao ni karaoa tabeua te kabwarabwara. Ngke e a bon ataaki bwa akea te mwane are na reke nakoia, a oki nako Kirtland. A mwaiti bwaai aika a mataata n te tai anne ae a kaotaki n taekan te kaotioti aei.
1–5, Te Uea e tarai kainanoia Ana taan mwakuri n te maiu n rabwata; 6–11, E na karaoia ma te nanoanga ma Tion ao ni bairei bwaai ni kabane ibukin kabwaiaia Ana taan mwakuri.
1 Ngai, te Uea ae Atuami, I aki nanobuaka ni karaoan mwanangami aei, n aki tabe ma ami mwakuri aika nanobaba.
2 E mwaiti kaubwaiu n te kaawa aei ibukimi, ibukin kabwaian Tion, ao a mwaiti aomata n te kaawa aei, ake N na bobotiia ni kaotinakoia n te tai ae riai ibukin kabwaian Tion, rinanon ami mwakuri.
3 Mangaia are, e riai bwa kam na karaoa te ikikina ma aomata n te kaawa aei, n aron ae kam na kairaki, ao n aron ae e na anganaki nakoimi.
4 Ao e na koro bukina n te tai ae riai bwa N na anga te kaawa aei nako nanon baimi, bwa kam na karekea te mwaaka i aona, ngkana a teimatoa n aki ataa ami bwai aika raba; ao kaubwaina n te koora ao te tirewa a na riki bwa ami bwai.
5 Tai katabeingkami ma ami taarau, bwa N na anganingkami te mwaaka ni kabwarai.
6 Tai katabeingkami ma Tion, bwa N na nanoangaia.
7 Tiku n te tabo aei, ao n taabo nako ake a uakaan;
8 Ao te tabo are I tangiria bwa kam na tiku iai, n angiin te tai, e na kaotaki nakoimi n raun ao mwaakan Tamneiu, ae e na waanako nakoimi.
9 Te tabo aei kam kona ni karekea man kabwakaan te mwane. Ao ni botumwaaka n ukouke ni kaineti ma kaaina rimoa ake a katea te kaawa aei;
10 Bwa a mwaiti riki nakon teuana bwaai aika kakaawaki ibukimi n te kaawa aei.
11 Mangaia are, kam na wanawana n ai aroia naeta ma n akea te bure; ao N na bairei bwaai ni kabane ibukin kabwaiami, n te tai ae tawe n aron ae kam kona ni karekei. Amen.