“Gamita ang Inyong Kasingkasing aron sa Pagsabut”

Elder Kim B. Clark

Sa Seventy

Gabii uban sa usa ka General Authority • Pebrero 8, 2019 • Tabernakulo sa Siyudad sa Salt Lake

Minahal kong mga kaigsoonan, makapalipay ang makaserbisyo uban kaninyo niining dakong buhat. Akong ipadayag nganha kaninyo ang akong gugma ug pasalamat sa tanang talagsaong buhat nga inyong gihimo sa pagtabang sa nagtubo nga henerasyon sa kabatan-unan ug mga batan-ong hingkod aron mas makat-on pa sa ebanghelyo ni Jesukristo.

Kon lawom ang pagkat-on sa ebanghelyo, ang atong mga estudyante molambo diha sa (1) kahibalo ug salabutan, (2) sa kapasidad sa epektibong aksyon, ug (3) mas mahisama sa Manluluwas.

Ang pagsabut sa ebanghelyo mao ang kritikal nga sumpay tali sa kahibalo sa ebanghelyo ug sa epektibong aksyon sa katarung. Gusto kong mopaambit kaninyo karong gabhiuna og mga mugbo nga mga hunahuna mahitungod sa unsay atong mahimo aron matabangan ang atong mga estudyante nga molambo diha sa ilang pagsabut sa ebanghelyo ni Jesukristo.

Magsugod ko nianang talagsaon nga mga pulong nga gigamit ni Abinadi sa pagbadlong sa mga pari ni Haring Noah: “Kamo wala mogamit sa inyong mga kasingkasing aron sa pagsabut; busa, kamo wala magmaalamon.”¹

Ang mga pari adunay mga kasulatan, ug sila nasayud mahitungod sa balaod ug sa mga propeta, apan sila wala mogamit sa ilang mga kasingkasing sa pagsabut. Ang kasingkasing mao ang simbolo nga sentro sa atong kabubut-on, sa atong mga tinguha, sa atong mga pasalig, sa atong mga bili, mga prayoridad, sa atong mga pagbati ug sa atong mga pagpamatuod sa kamatuoran.²

Ang pagsabut sa ebanghelyo labaw pa kay sa usa ka pagsinati sa panghunahuna.³Usa kini ka espirituhanong kasinatian diin ang Espiritu Santo nagsaksi sa kamatuoran, modan-ag sa atong mga hunahuna, ug makausab sa atong kasingkasing.⁴Ang pagsabut sa kasingkasing usa ka gasa sa Espiritu.

Kon ang usa sa imong mga estudyante magtinguha sa paggamit sa iyang kasingkasing sa pagsabut sa baruganan sa ebanghelyo sama sa hugot nga pagtuo diha ni Jesukristo, kinahanglang siya mogamit sa iyang kabubut-on sa pagpili ni Jesukristo ug sa pagsunod niana nga baruganan. Ang iyang kasinatian sa baruganan mao ang ganghaan sa pag-impluwensya sa iyang kasingkasing. Iyang aksyon nagtugot sa Espiritu Santo sa pagpamatuod, paglamdag, ug pag-usab sa iyang kasingkasing sa iyang pagdawat sa Ginoo ug niana nga baruganan.⁵Sa iyang pagpadayon sa pagsunod sa baruganan, mamalandong sa iyang kasinatian, ug mopamatuod sa unsay iyang nahibaloan nga tinuod, ang iyang pagsabut sa hugot nga pagtuo molambo, ug ang ilang kasingkasing mausab:

• Iyang kabubut-on, mga tinguha, ug prayoridad mahitungod sa paglihok uban sa hugot nga pagtuo diha sa Manluluwas mas mahiuyon sa Iyang kabubut-on.

• Ang iyang mga pakigsaad sa Ginoo mas makahuluganon sa pasalig sa iyang kasingkasing aron molihok uban sa hugot nga pagtuo diha Kaniya.

• Iyang mga pagbati og gugma, debosyon, hingpit nga kalipay ug hugot nga pagtuo sa Ginoo mas mapalawman ug mas lig-on.

• Ang iyang personal nga pagpamatuod sa kamatuoran sa hugot nga pagtuo kang Jesukristo ug sa gahum sa Ginoo ug gugma motubo.⁶

Unsay mahimo ninyo ug nako isip mga magtutudlo sa ebanghelyo aron matabangan ang atong mga estudyante sa paggamit sa ilang mga kasingkasing sa pagsabut sa doktrina ni Jesukristo? Tugoti nga akong ipaambit ninyo ang usa ka estorya nga sa akong pagtuo dunay pagtulun-an alang kanato.

Ang usa ka magtutudlo mipundok sa grupo sa grade 4 ug sa pipila ka minuto gisultihan sila kabahin ni Martin Luther, ang German nga pari sa Katoliko kinsa importanting tawo sa protestanting Reformation sa Europe.⁷Mihatag dayon siya sa mga bata og mubo nga pasulit. Hinoon, ang mga estudyante, mitubag sa mga pangutana nga daw natudloan kabahin ni Martin Luther King Jr., ang lider sa American civil rights; walay pangutana nga ilang natubag nga husto.

Ang magtutudlo mipundok dayon sa ikaduha nga grupo sa grade 4. Hinoon, ning higayuna gisugdan niya sa pangutana nga: “pila kaninyo nakaila ni Martin Luther King Jr.?” Ang tanan mga kamot mipataas. Kadto nga mga bata daghan og nasayran kabahin ni Martin Luther King Jr. Ang magtutudlo nangutana dayon, “Nasayud ba mo kon nganong ang ginikanan ni Martin Luther King Jr. mihingalan niya og Martin Luther—King?” Walay nasayud. Dayon miingon siya, “sultihan ko kamo kon ngano.” Gitudloan dayon niya sila mahitungod kang Martin Luther, gamit ang eksaktong impormasyon nga iyang gigamit sa unang grupo. Sa dihang gihatagan niya sila sa samang mubo nga pasulit, ang ikaduha nga grupo nakatubag sa tanang pangutana nga husto.

Ang unang grupo sa mga estudyante wala gayuy nakat-unan kabahin ni Martin Luther.⁸Apan ang ikaduhang grupo gikonektar sa magtutudlo si Martin Luther ngadto ni Martin Luther King Jr., usa ka tawo nga nahibaloan kaayo sa mga estudyante ug dunay dakong pagbati.

Ang mga pangutana ug diskusyon sa magtutudlo uban nila nakalamdag sa mga hunahuna ug mga pagbati sa mga estudyante ngadto sa bag-ong impormasyon ug bag-ong mga pagbati. Dili lang sila basta nakat-on kabahin ni Martin Luther, apan kana nga pagkat-on nakadugang usab sa ilang panabut ni Martin Luther King Jr.

Ang istorya adunay implikasyon sa pagmugna og mga kasinatian nga makatabang sa atong estudyante sa paggamit sa ilang mga kasingkasing sa pagsabut sa mga baruganan sa ebanghelyo. Duha ang naglabaw:

1. Adunay dakong gahum sa pagkonektar sa baruganan ngadto sa ilang kaugalingong mga kasinatian ug ngadto sa unsay ilang nahibaloan ug nasabtan nang daan. Ang personal nga kasinatian mao ang ganghaan sa pag-impluwensya ngadto sa ilang kasingkasing.

2. Mahinungdanon kaayo ang paggamit og mga pangutana—saatonggipangutana ug sa mga gipangutana samga estudyante. Amg mga pangutana makaimpluwensya sa ilang mga hunahuna ug sa ilang mga kasingkasing.

Kini mga gamhanang mga ideya. Dapiton ko kamo sa paggamit niini dungan sa lain pang duha:

3. Tinuyo nga proseso sa pagtudlo. Ang paggamit sa kasingkasing sa pagsabut usa ka espirituhanong proseso; ang pagsabut sa kasingkasing usa ka espirituhanong gasa. Palihug tudloi ang mga estudyante kon unsaon kini. Tabangi sila nga mabati ang ilang responsibilidad sa paggamit sa ilang kabubut-on sa pagpili sa Ginoo ug mosunod sa mga baruganan. Tudlui sila sa pagpamalandong sa unsay ilang nasinati ug mopaambit unsay ilang nakat-unan ug mopamatuod sa kamatuoran. Ang grasya ni Jesukristo motabang kanila samtang sila magtudlo sa usag usa.⁹

4. Tutukan ang kabahin sa Manluluwas. Kini Iyang doktrina ug ang Iyang kahayag ug gugma, ug gahum nga ilang gikinahanglan; ang tanang mga butang maghiusa diha Kaniya. Kon kita mopamatuod Kaniya ug ikonektar ang mga baruganan ngadto Kaniya, ang Espiritu Santo mosaksi sa kamatuoran, motudlo ug molamdag.

Samtang buhaton ninyo kining mga butanga ug daghan pa, ang Espiritu Santo mosaksi sa kamatuoran, ilabi na nga si Jesus mao ang Kristo. Siya motudlo og tagsatagsa sa inyong mga estudyante. Siya mousab sa ilang mga kasingkasing, ug sila motubo sa ilang mga salabutan sa ebanghelyo ni Jesukristo. Nasayud ko nga kini tinuod. Akong ibilin kaninyo ang akong gugma ug sa akong pagsaksi, dihsa sa ngalan ni Jesukristo, amen.

© 2019 pinaagi sa Intellectual Reserve, Inc. Tanang mga katungod gigahin. Bersyon: 11/18. Hubad sa “Apply Your Hearts to Understanding.” Cebuano. PD60007796 853

Mubo nga mga Sulat

1. Mosiah 12:27.

2. Tan-awa sa Merriam-Webster.com Dictionary, “Heart,”merriam-webster.com.

3. Alang sa usa ka gilugwayan nga diskusyon sa relasyon tali sa mga kasingkasing ug panabut sa ebanghelyo, tan-awa sa: David A. Bednar,Increase in Learning(2011), 66–70.

4. Dayag lang, nga ang atong mga hunahuna usa ka importanting bahin niining proseso. Apan kon gamiton lang nato ang atong mga hunahuna, ug dili “mogamit sa [atong] mga kasingkasing sa pagsabut” (Mga Proverbio 2:2), kita dili gayud makasabut sa baruganan. Masayud kita mahitungod niini, apan dili gayud kita makasabut niini sa paagi nga gusto sa Ginoo. Dugang pa, kon maghisgot kita sa pagdugang sa panabut sa atong mga kasingkasing, nagpasabut kita sa pag-usab sa atong mga kasingkasing.

5. Elder Richard G. Scott (1928–2015) sa Korum sa Napulog Duha ka mga Apostoles mitudlo niini nga baruganan: “Ang Ginoo dili mopugos kaninyo nga makat-on. Kinahanglan kamong mogamit sa inyong kabubut-on sa pagtugot sa Espiritu nga motudlo kaninyo. Sa pagbuhat ninyo niini nga usa ka naandan diha sa inyong kinabuhi, kamo mahimong mas mahunahunaon sa mga pagbati nga moabut uban sa espirituhanong giya”(“Aron Makabaton og Espirituhanong Giya,”Liahona,Nob. 2009, 8; tan-awa usab sa 9).

6. Adunay usa ka importante kaayo ug gamhanang baruganan nga naglihok dinhi. Sa tanang butang gayud, si Jesus mipakita kanato sa dalan. Si Jesus adunay hingpit nga kasayuran sa atong mga kahuyang ug sa atong mga kakulangan, ug ganii mipili Siya nga antuson kini diha sa unod (tan-awa saAlma 7:11). Mihimo Siya niini nga Siya makapaubos sa tanang mga butang ug masabut ang tanang butang diha sa Iyang kasingkasing, nga Siya unta mapuno uban sa kalooy ug hingpit nga pagsabut ug ang sa gahum nga makatubos, makapalig-on, ug pagtabang kanato. Kini nga ideya—nga Iyang gipili nga modala nganha Kaniya sa atong mga kakulangan sa Iyang unod, si Jesus milambo sa pagsabut lapas pa sa unsay Iyang intelektwal nga kahibalo—nindot kaayong gipahayag diha sa pagkigpulong ni Elder Neal A. Maxwell, “Willing to Submit” (Ensign,Mayo 1985, 70–73).

   Sa kaulahian, sa Getsemani, pinaagi sa Iyang pag-antus si Jesus misugod sa pagbati og “[ka]kulba” (Marcos 14:33),o sa Gresyanhon,“makahadlok” ug “makahingangha.” Hunahunaa, si Jehova, ang Tiglalang niini ug sa ubang kalibutan, “nahingangha!” Sa hunahuna nahibalo si Jesus unsay Iyang buhaton, apan dili sa kasinatian. Wala pa gayud Siya masayud sukad sa grabeng kasakit ug hingpit nga proseso sa pag-ula. Mao nga, dihang ang hingpit nga paghingutas miabut, kini sobra pa, sobra pa gayud kaayo kay sa Iyang nahunahuna bisan pa sa Iyang talagsaon nga salabutan! Dili ikatingala nga usa ka anghel mipakita sa paglig-on kaniya (tan-awa saLucas 22:43)!

   Adunay daghan nga mga kasulatan nga naghimo og katin-awan nga kita makadawat og mga panalangin (sama sa espirituhanong mga gasa sa pagsabut sa baruganan sa ebanghelyo) human lamang nga buhaton ang pagsunod sa baruganan (tan-awa saJuan 7:17Juan 8:31–32Mga Taga-Efeso 1:17–21Mosiah 12:27Alma 32: 28Ether 12:6Doktrina ug mga Pakigsaad 88:4130:10–11).

7. Kini nga asoy gibase sa James E. Zull,The Art of Changing the Brain: Enriching the Practice of Teaching by Exploring the Biology of Learning(2002), 124–25.

8. Ang mga estudyante diha sa unang grupo misabut sa tanan nilang nadunggan pinaagi sa na-establisar na nga ilang kahibalo mahitungod ni Martin Luther King Jr. Dihang nadungog nila ang mga pulong nga “Martin Luther”, ilang gikonektar kadtong mga pulong sa “King” ug gigamit ang ilang dakong kasayuran. Sa literal nga paagi wala gyud silay nasabtan mahitungod ni Martin Luther.

9. Tan-awa saDoktrina ug mga Pakigsaad 88:77–88.