2:3

« ផ្ចង់ចិត្តអ្នកឲ្យបានយល់ » ។

អែលឌើរ គីម ប៊ី ក្លាក

នៃពួកចិតសិបនាក់

ជំនួបពេលល្ងាចជាមួយនឹងពួកអ្នកមានសិទ្ធិអំណាចទូទៅ ថ្ងៃទី ៨ ខែកុម្ភៈ ឆ្នាំ ២០១៩•រោងឧបោសថ ទីក្រុង សលត៍ លេក

បងប្អូនប្រុសស្រីជាទីស្រឡាញ់ខ្ញុំអើយ វាជាអំណរមួយដើម្បីបម្រើជាមួយនឹងបងប្អូននៅក្នុងកិច្ចការដ៏មហិមានេះ ។ ខ្ញុំសូមសម្ដែងក្ដីស្រឡាញ់ និងការដឹងគុណចំពោះកិច្ចការដ៏អស្ចារ្យទាំងអស់ដែលបងប្អូនបានធ្វើដើម្បីជួយដល់ជំនាន់ដែលកំពុងពេញវ័យ និងយុវមជ្ឈិមវ័យឲ្យរៀនកាន់តែជ្រៅជ្រះនៅក្នុងដំណឹងល្អនៃព្រះយេស៊ូវគ្រីស្ទ ។

នៅពេលការរៀនដំណឹងល្អមានភាពជ្រៅជ្រះ នោះសិស្សរបស់យើងរីកចម្រើននៅក្នុង ៖ (១) ចំណេះដឹង និងការយល់ដឹង (២) សមត្ថភាពដើម្បីធ្វើសកម្មភាពសុចរិតដោយមានប្រសិទ្ធភាព និង (៣) ប្រែក្លាយកាន់តែដូចជាព្រះអង្គសង្គ្រោះ និងព្រះវរបិតាសួគ៌របស់យើង ។

ការយល់ដឹងពីដំណឹងល្អគឺជាបណ្ដាញដ៏សំខាន់មួយរវាងចំណេះដឹងនៃដំណឹងល្អ និងសកម្មភាពសុចរិតដ៏មានប្រសិទ្ធភាព ។ ខ្ញុំចង់ចែកចាយនឹងបងប្អូននាយប់នេះនូវគំនិតសង្ខេបខ្លះៗអំពីអ្វីដែលយើងចង់ធ្វើដើម្បីជួយសិស្សរបស់យើងរីកចម្រើននៅក្នុងការយល់ដឹងរបស់ពួកគេអំពីដំណឹងល្អនៃព្រះយេស៊ូវគ្រីស្ទ ។

ខ្ញុំចាប់ផ្ដើមជាមួយនឹងឃ្លាដ៏អស្ចារ្យដែលអ័ប៊ីណាដៃបានប្រើវាយផ្ចាលទៅពួកសង្ឃរបស់ស្ដេចណូអេ ៖ « អ្នករាល់គ្នាពុំបានតាំងចិត្តរៀនឲ្យយល់ ហេតុដូច្នេះហើយ អ្នករាល់គ្នាពុំមានប្រាជ្ញាទេ » ។ ^១

ពួកសង្ឃមានបទគម្ពីរ ហើយពួកគេបានដឹងអំពីច្បាប់ និងពួកព្យាការី ប៉ុន្តែពួកគេពុំផ្ចង់ចិត្តពួកគេឲ្យបានយល់ទេ ។ ដួងចិត្តគឺជានិមិត្តរូបសំខាន់នៃឆន្ទៈរបស់យើង បំណងប្រាថ្នា ការតាំងចិត្ត គុណតម្លៃ អាទិភាព អារម្មណ៍ និងទីបន្ទាល់អំពីសេចក្ដីពិតរបស់យើង ។ ^២

ការយល់ពីដំណឹងល្អគឺមានលើសពីការគ្រាន់តែជាបទពិសោធន៍ខាងអារម្មណ៍ ។ ^៣ វាជាបទពិសោធន៍ខាងវិញ្ញាណមួយដែលព្រះវិញ្ញាណបរិសុទ្ធធ្វើជាសាក្សីអំពីសេចក្ដីពិត បំភ្លឺគំនិតរបស់យើង ហើយផ្លាស់ប្ដូរដួងចិត្តរបស់យើង ។ ^៤ ការយល់ក្នុងដួងចិត្ត គឺជាអំណោយទានខាងវិញ្ញាណមួយ ។

នៅពេលសិស្សម្នាក់របស់បងប្អូនមានបំណងដើម្បីផ្ចង់ចិត្តឲ្យបានយល់គោលការណ៍ដំណឹងល្អ ដូចជាមានសេចក្ដីជំនឿទៅលើព្រះយេស៊ូវគ្រីស្ទ នោះនាងត្រូវអនុវត្តសិទ្ធិសេរីភាពរបស់នាង ដើម្បីជ្រើសរើសព្រះយេស៊ូវគ្រីស្ទ ហើយរស់នៅតាមគោលការណ៍នោះ ។ បទពិសោធន៍របស់នាងជាមួយនឹងគោលការណ៍នេះ គឺជាច្រកទ្វារទៅកាន់ដួងចិត្តនាង ។ សកម្មភាពរបស់នាងអនុញ្ញាតឲ្យព្រះវិញ្ញាណបរិសុទ្ធថ្លែងទីបន្ទាល់ បំភ្លឺ និងផ្លាស់ប្ដូររបៀបដែលដួងចិត្តនាងឱបក្រសោបយកព្រះអម្ចាស់ និងគោលការណ៍នោះ ។ ^៥ នៅពេលនាងបន្ដរស់នៅតាមគោលការណ៍ ឆ្លុះបញ្ចាំងទៅលើបទពិសោធន៍របស់នាង ហើយថ្លែងទីបន្ទាល់អំពីអ្វីដែលនាងដឹងជាការពិត នោះការយល់ដឹងអំពីសេចក្ដីជំនឿរបស់នាងនឹងរីកចម្រើន ហើយដួងចិត្តនាងនឹងផ្លាស់ប្ដូរ ៖

ឆន្ទៈ បំណងប្រាថ្នា និងអាទិភាពរបស់នាងអំពីការធ្វើសកម្មភាពដោយសេចក្ដីជំនឿទៅលើព្រះអង្គសង្គ្រោះកាន់តែស្របទៅនឹងព្រះឆន្ទៈរបស់ទ្រង់ ។
សេចក្ដីសញ្ញារបស់នាងជាមួយព្រះអម្ចាស់កំណត់ពីការតាំងចិត្តកាន់តែខ្លាំងនៅក្នុងដួងចិត្តនាងដើម្បីធ្វើសកម្មភាពដោយសេចក្ដីជំនឿនៅក្នុងទ្រង់ ។
អារម្មណ៍នៃក្ដីស្រឡាញ់ ការលះបង់ អំណរ និងជំនឿទៅលើព្រះអម្ចាស់របស់នាង កាន់តែជ្រៅជ្រះ និងកាន់តែខ្លាំងឡើងៗ ។
ទីបន្ទាល់ផ្ទាល់ខ្លួនរបស់នាងអំពីសេចក្ដីពិតនៃសេចក្ដីជំនឿទៅលើព្រះយេស៊ូវ គ្រីស្ទ និងព្រះចេស្ដា និងក្ដីស្រឡាញ់របស់ទ្រង់នឹងរីកចម្រើន ។ ^៦

តើបងប្អូន និងខ្ញុំអាចធ្វើអ្វីខ្លះ ក្នុងនាមជាគ្រូបង្រៀននៃដំណឹងល្អ ដើម្បីជួយសិស្សរបស់យើងឲ្យផ្ចង់ចិត្តរបស់ពួកគេឲ្យបានយល់គោលលទ្ធិនៃព្រះយេស៊ូវគ្រីស្ទ ? ខ្ញុំសូមចែកចាយនឹងបងប្អូននូវរឿងមួយដែលខ្ញុំជឿ ដែលមានយោបល់ដ៏សំខាន់ចំពោះយើង ។

គ្រូបង្រៀនម្នាក់ប្រមូលសិស្សថ្នាក់ទីបួនមួយក្រុមមក ហើយបាននិយាយពីរបីនាទីប្រាប់សិស្សអំពី ម៉ាទីន លូធើរ ជាសង្ឃកាតូលិកអាល្លឺម៉ង់ម្នាក់ ដែលជាមនុស្សសំខាន់នៅក្នុងការស្ដារនិកាយប្រូតេស្ដង់នៅទ្វីបអើរ៉ុប ។ ^៧ បន្ទាប់មកគាត់បានឲ្យក្មេងៗធ្វើលំហាត់ខ្លីមួយ ។ ទោះជាយ៉ាងណាក៏ដោយ សិស្សបានឆ្លើយសំណួរដូចជាពួកគេត្រូវបានបង្រៀនអំពីស្ដេច ម៉ាទីន លូធើរ ជុញ្ញ័រ ជាអ្នកដឹកនាំសិទ្ធិស៊ីវិលអាមេរិកកាំងអញ្ចឹង ពួកគេពុំបានឆ្លើយសំណួរណាត្រឹមត្រូវទេ ។

បន្ទាប់មក គ្រូបង្រៀនបានប្រមូលក្រុមទីពីរនៃសិស្សថ្នាក់ទីបួនមក ។ ទោះជាយ៉ាងណា លើកនេះ គាត់បានចាប់ផ្ដើមដោយមានសំណួរថា ៖ « តើប្អូនៗប៉ុន្មាននាក់ស្គាល់ស្ដេច ម៉ាទីន លូធើរ ជុញ្ញ័រជានរណាទេ ? ដៃទាំងអស់បានលើកឡើង ។ កុមារទាំងនេះបានស្គាល់ច្រើនអំពីស្ដេច ម៉ាទីន លូធើរ ជុញ្ញ័រ ។ បន្ទាប់មកគ្រូបង្រៀនបានសួរថា « តើអ្នកដឹងថាហេតុអ្វីបានជាឪពុកម្ដាយរបស់ស្ដេចម៉ាទីន លូធើរ ជុញ្ញ័រ បានដាក់ឈ្មោះគាត់ថាជាម៉ាធីន លូធើរ—ជាស្ដេចឬទេ ? គ្មាននរណាម្នាក់ដឹងទេ ។ បន្ទាប់មកគាត់ប្រាប់ថា « ខ្ញុំនឹងប្រាប់ប្អូនៗថាហេតុអ្វី » ។ បន្ទាប់មកគាត់បានបង្រៀនពួកគេអំពីម៉ាទីន លូធើរ ដោយប្រើព័ត៌មានដូចគ្នាបេះបិទដែលគាត់បានប្រាប់ក្រុមទីមួយ ។ នៅពេលគាត់ឲ្យលំហាត់ដូចគ្នានោះទៅពួកគេ ក្រុមទីពីរបានឆ្លើយសំណួរទាំងអស់បានត្រឹមត្រូវ ។

សិស្សក្រុមទីមួយពុំបានរៀនអ្វីសោះអំពីម៉ាទីន លូធើរ ។^៨ ប៉ុន្តែក្រុមទីពីរ គ្រូបង្រៀនបានភ្ជាប់ម៉ាទីន លូធើរ ទៅនឹងស្ដេចម៉ាទីន លូធើរ ជុញ្ញ័រ ជាមនុស្សម្នាក់ដែលសិស្សបានដឹងយ៉ាងច្រើន ហើយចូលចិត្តខ្លាំងនោះ ។

សំណួររបស់គ្រូបង្រៀន និងការពិភាក្សារបស់គាត់ជាមួយពួកគេបើកគំនិត និងដួងចិត្តសិស្សឲ្យទទួលព័ត៌មាន និងអារម្មណ៍ថ្មី ។ ពួកគេពុំគ្រាន់តែរៀនអំពីម៉ាទីន លូធើរ ប៉ុន្តែការរៀននោះបានចម្រើនការយល់ដឹងរបស់ពួកគេអំពីស្ដេច ម៉ាទីន លូធើរ ជុញ្ញ័រ ផងដែរ ។

រឿងនេះបង្រៀនយើងឲ្យចេះបង្កើតបទពិសោធន៍ដែលនឹងជួយសិស្សរបស់យើងផ្ចង់ចិត្តពួកគេឲ្យយល់គោលការណ៍ដំណឹងល្អ ។ មានមេរៀនពីរសំខាន់ចំពោះខ្ញុំ ។

មានអំណាចដ៏មហិមានៅក្នុងការភ្ជាប់គោលការណ៍ទៅនឹងបទពិសោធន៍ពួកគេផ្ទាល់ និងអ្វីដែលពួកគេបានដឹង និងយល់រួចហើយ ។ បទពិសោធន៍ផ្ទាល់ខ្លួន គឺពិតជាច្រកទ្វារទៅកាន់ដួងចិត្តរបស់ពួកគេ ។
វាសំខាន់យ៉ាងខ្លាំងដើម្បីប្រើ ទាំងសំណួរ ដែល យើងសួរ និងសំណួរ ដែល សិស្សសួរ ។ សំណួរចាក់សោបើកគំនិត និងដួងចិត្តរបស់ពួកគេ ។

ទាំងនេះគឺជាគំនិតដ៏មានអានុភាព ។ ខ្ញុំសូមអញ្ជើញបងប្អូនឲ្យប្រើវាភ្ជាប់ជាមួយនឹងដំណើរពីរផ្សេងទៀត ៖

បង្រៀនអំពីដំណើរការដោយយកចិត្តទុកដាក់ ។ ការផ្ចង់ចិត្តដើម្បីឲ្យបានយល់គឺជាដំណើរការខាងវិញ្ញាណមួយ ឯការយល់ក្នុងដួងចិត្តគឺជាអំណោយទានខាងវិញ្ញាណមួយ ។ សូមបង្រៀនសិស្សអំពីរបៀបដែលដំណើរការធ្វើការ ។ សូមជួយពួកគេឲ្យយល់អំពីការទទួលខុសត្រូវរបស់ពួកគេក្នុងការប្រើសិទ្ធិសេរីភាពរបស់ពួកគេដើម្បីជ្រើសរើសព្រះអម្ចាស់ ហើយរស់នៅតាមគោលការណ៍នានា ។ បង្រៀនពួកគេឲ្យនឹកគិតអំពីបទពិសោធន៍របស់ពួកគេ ហើយចែកចាយអ្វីដែលពួកគេបានរៀន ហើយថ្លែងទីបន្ទាល់អំពីសេចក្ដីពិត ។ ព្រះគុណនៃព្រះយេស៊ូវគ្រីស្ទ នឹងនៅជាមួយពួកគេ នៅពេលពួកគេបង្រៀនគ្នាទៅវិញទៅមក ។ ^៩
ផ្ដោតទៅលើព្រះអង្គសង្គ្រោះ ។ គឺជាគោលលទ្ធិ និងពន្លឺ និងសេចក្ដីស្រឡាញ់ និងអំណាចរបស់ទ្រង់ដែលពួកគេត្រូវការអ្វីគ្រប់យ៉ាងមករួមគ្នានៅក្នុងទ្រង់ ។ នៅពេលយើងថ្លែងជាសាក្សីអំពីទ្រង់ ហើយភ្ជាប់គោលការណ៍ទៅនឹងទ្រង់ នោះព្រះវិញ្ញាណបរិសុទ្ធនឹងថ្លែងជាសាក្សីអំពីសេចក្ដីពិត បង្រៀន និងបំភ្លឺគំនិត ។

នៅពេលបងប្អូនធ្វើរឿងទាំងនេះ និងអ្វីៗជាច្រើនទៀត នោះព្រះវិញ្ញាណបរិសុទ្ធនឹងធ្វើជាសាក្សីអំពីសេចក្ដីពិត ជាពិសេស ព្រះយេស៊ូវ គឺជាព្រះគ្រីស្ទ ។ ទ្រង់នឹងបង្រៀនសិស្សរបស់បងប្អូនម្ដងម្នាក់ៗ ។ ទ្រង់នឹងផ្លាស់ប្ដូរដួងចិត្តពួកគេ ហើយពួកគេនឹងរីកចម្រើននៅក្នុងការយល់ដឹងអំពីដំណឹងល្អនៃព្រះយេស៊ូវគ្រីស្ទ ។ ខ្ញុំដឹងថារឿងនេះពិត ។ ខ្ញុំបន្សល់ទុកនូវក្ដីស្រឡាញ់ និងសាក្សីរបស់ខ្ញុំ ក្នុងព្រះនាមនៃព្រះយេស៊ូវគ្រីស្ទ អាម៉ែន ។