2:3

« Fa’a’ohipa i tō ’outou ’ā’au ’ia roa’a te ’ite »

Elder Kim B. Clark

Nō te Hitu ’Ahuru

’Āru’i ’e te hō’ē hui mana fa’atere rahi • 8 nō Fepuare 2019 • Fare Menemene nō Roto Miti

E au mau taea’e, e au mau tuahine, e mea ’oa’oa ’ia tāvini ’e o ’outou i roto i teie ’ohipa rahi. Te fa’atae atu nei au ia ’outou na i tō’u here ’e tō’u māuruuru nō te mau ’ohipa fa’ahiahia ato’a tā ’outou e rave nei nō te tāuturu i te u’i ’āpī o te feiā ’āpī ’e te feiā ’āpī pa’ari ia ’apo hōhonu i roto i te ’evanelia a Iesu Mesia.

Mai te mea ē, e hōhonu te ’apora’a i te ’evanelia, e tupu tā tātou mau pīahi i te rahi, (1) i roto i te ’ite ’e te hāro’aro’ara’a, (2) i roto i te ’aravihi nō te ’ohipa parau ti’a maita’i, ’e (3) i roto i te rirora’a hau atu mai te Fa’aora.

E riro te hāro’aro’ara’a i te ’evanelia ei tā’amura’a faufa’a roa i rotopu i te ’ite i te ’evanelia ’e te ’ohipa parau ti’a maita’i. Te hina’aro nei au e fa’a’ite atu ia ’outou i teie pō i te tahi mau mana’o poto nō ni’a i te ’ohipa tā tātou e nehenehe e rave nō te tauturu i tā tātou mau piahi ia tupu i te rahi i roto i te hāro’aro’ara’a i te ’evanelia a Iesu Mesia;

E ha’amata vau nā ni’a i te parau nehenehe tā Abinadi i fa’ahiti nō te tā’iri i te mau tahu’a a te Ari’i Noa: « ’Aita ’outou i fa’a’ohipa i tō ’outou ’ā’au ’ia roa’a te ’ite; nō reira ’aore ’outou i pa’ari ». ¹

Tei te mau tahu’a ra te mau pāpa’ira’a, ’e ’ua ’ite rātou i te ture ’e te mau peropheta, ’aita rā rātou i fa’a’ohipa i to rātou ’ā’au ia roa’a te ’ite. Te ’ā’au, ’o te pū ïa o tō tātou hina’aro, tō tātou mau hina’aro, tā tātou mau fafaura’a, tā tātou mau faufa’a ’e te mau fā mātāmua, tō tātou mau mana’o o te ’ā’au, ’e te ’itera’a pāpū o te parau mau.²

Te hāro’aro’ara’a i te ’evanelia, ’ua hau atu ïa i te parau nō te fāri’ira’a i te ’ite.³ ’O te hō’ē ïa ’itera’a pae vārua i reira te Vārua Maita’i e fa’a’ite ai i te parau mau, e ha’amāramarama ai i tō tātou ferurira’a, ’e e taui ai i tō tātou ’ā’au.⁴ Te hāro’aro’ara’a o te ’ā’au, e hōro’a ïa nā e Vārua.

’Ia hina’aro ana’e te hō’ē o tā ’outou mau piahi e fa’a’ohipa i tōna ’ā’au nō te hāro’aro’a i te hō’ē parau tumu o te ’ēvanelia, mai te fa’aro’o ia Iesu Mesia, tītauhia iāna ’ia fa’a’ohipa i tōna ti’amāra’a nō te mā’iti ia Iesu Mesia ’e ’ia ora i te reira parau tumu. Te ’itera’a i roa’a iāna nō ni’a i te reira parau tumu, o te ’ē’a ïa e tae atu ai i tōna ra ’ā’au. E hōro’a tāna ’ohipa i te parau fa’ati’a i te Vārua Maita’i nō te fa’a’ite pāpū, nō te ha’amāramarama, ’e nō te taui i te huru o te fāri’ira’a tōna ’ā’au i te Fatu, ’e i te reira parau tumu.⁵Mai te mea ē, e tāmau noa ’oia i te ha’apa’o i te reira parau tumu, ma te feruri i tāna ’itera’a, ’e e fa’a’ite pāpū i te mea tāna e i ’ite ē, e parau mau, e tupu i te rahi tōna hāro’aro’ara’a i te fa’aro’o, ’e e taui tōna ’ā’au:

Tōna hina’aro, tōna mau hina’aro, ’e tāna mau fā mātāmua nō ni’a i te ha’ara’a ma te fa’aro’o i roto i te Fa’aora, e fātata atu ïa i te hina’aro o te Fa’aora.
E fa’ata’a rahi atu tāna mau fafaura’a i te Fatu i te fafaura’a i roto i tōna ’ā’au ’ia ha’a ma te fa’aro’o Iāna.
Tōna mau mana’o here, te ha’apa’o, te ’oa’oa e te fa’aro’o i te Fatu, e rahi atu ïa te hōhonu ’e te pūai.
E tupu i te rahi tōna ’itera’a pāpū nō ni’a i te parau mau o te fa’aro’o i roto ia Iesu Mesia, e nō ni’a i te mana o te Fatu ’e Tōna here.⁶

Ei mau ’orometua ha’api’i i te ’evanelia, e aha tā ’outou e tā’u nei e nehenehe e rave nō te tauturu i te mau piahi ’ia fa’a’ohipa i to rātou ’ā’au nō te hāro’aro’a i te parau ha’api’ira’a a Iesu Mesia? Te hina’aro nei au e fa’a’ite atu ia ’outou i te hō’ē ’a’amu tā’u e ti’aturi nei ē, te vai ra i reira te mau ha’api’ira’a faufa’a nō tātou.

’Ua ha’aputuputu te hō’ē ’orometua ha’api’i i te hō’ē pupu piahi nō te maha o te matahiti ’e i roto i tau minuti ’ua paraparau atu ’oia ia rātou nō ni’a ia Martin Luther, e tahu’a katorika nō Helemani tei riro ei ta’ata faufa’a roa i roto i te parau nō te reforomatio porotetani i Europa.⁷I muri iho ’ua hōro’a ’oia ia rātou i te hō’ē uiuira’a poto. ’Ua pāhono rā te mau piahi i te mau uira’a mai te huru ra ē, ’ua ha’api’ihia rātou nō ni’a ia Martin Luther King Jr., te fa’atere no te mau ti’ara’a tivira nō Marite; ’aita rātou i pāhono tano i te hō’ē a’e uira’a.

I muri iho, ’ua ha’aputuputu te ’orometua ha’api’i i te piti o te pupu piahi nō te maha o te matahiti. Terā rā, i teie taime, ’ua ha’amata ’oia nā ni’a i te hō’ē uira’a: « e hia rahira’a ’outou tei ’ite o vai o Martin Luther King Jr.? » Pauroa te rima i te mara’ara’a i ni’a. ’Ua ’ite teie mau tamari’i e rave rahi mau mea nō ni’a ia Martin Luther King Jr. I muri iho, ’ua ani atura te ’orometua ē, « ’Ua ’ite anei ’outou ē, nō te aha te mau metua o Martin Luther King Jr.’s i pi’i ai iāna ē, Martin Luther—King? » ’Aita hō’ē ta’ata i ’ite. Nā ō atura ’oia ē, « e fa’a’ite atu vau ia ’outou ē, nō te aha ». I muri iho, ’ua paraparau atura ’oia ia rātou nō ni’a ia Martin Luther, ma te fa’a’ohipa i te hō’ē ā ha’amāramaramara’a tāna i fa’a’ohipa i ni’a i te pupu mātāmua. I tōna hōro’ara’a ia rātou i tāua nei ā uiuira’a, ’ua pāhono maira te piti o te puppu ma te tano i te mau uira’a ato’a.

’Aita tō te mau piahi nō te pupu mātāmua hō’ē a’e ’itera’a nō ni’a ia Martin Luther.⁸Terā rā i roto i te pupu piti ’ua fa’atu’ati te ’orometua ia Martin Luther i ni’a ia Martin Luther King Jr., te hō’ē ta’ata tā te mau piahi i ’ite maita’i, ’e e mana’o pāpū tō rātou nō ni’a iāna.

Nā roto i te mau uira’a a te ’orometua ’e tāna ’āparaura’a ia rātou, ’ua matara te ferurira’a e te ’ā’au o te mau piahi nō te fāri’i i te mau ha’amāramaramara’a ’āpī e te mau mana’o ’āpī. E’ita rātou e ’apo noa nō ni’a ia Martin Luther, e fa’arahi ato’a rā tāua ’apora’a ra i tō rātou hāro’aro’ara’a nō ni’a ia Martin Luther King Jr.

E mau hōpe’ara’a tō te ’a’amu nō te fa’atupu i te mau ’itera’a o te tauturu i tā tātou mau piahi ia fa’a’ohipa i tō rātou ’ā’au ia hāro’aro’a i te mau parau tumu o te ’evanelia. E piti o te ’ite-pāpū-hia:

E mana rahi tō roto i te fa’atū’atira’a i te parau tumu i to rātou iho mau ’itera’a ’e i te mea tā rātou i ’ite ’e i māramarama a’e na. E riro mau te ’itera’a o te ta’ata iho ei ’ē’a nō te tomo i roto i to rātou ’ā’au.
E mea faufa’a rahi roa ia fa’a’ohipa i te mau uira’atā tātoue ui ’e te mau uira’a tāte mau piahie ui. E ’īriti te mau uira’a i to rātou ferurira’a ’e i to rātou ’ā’au.

E mau mana’o pūai rahi teie. Te ani nei au ia ’outou ’ia fa’a’ohipa i te reira ma te ’āpiti atu i te tahi atu nā mana’o e piti:

A ōpua ia ha’api’i i te fa’anahora’a. Te fa’a’ohipara’a i te ’ā’au nō te hāro’aro’a, e fa’anahora’a vārua te reira; te hāro’aro’ara’a o te vārua, o te hō’ē ïa hōro’a o te vārua. A ha’api’i i te mau piahi nāhea te terera’a o te fa’anahora’a. A tauturu ia rātou ’ia ’ite i tā rātou hōpoi’a o te fa’a’ohipara’a i tō rātou ti’amāra’a nō te mā’iti i te Fatu ’e ’ia ora i te mau parau tumu. ’A ha’api’i ia rātou ’ia feruri i ni’a i te mea tā rātou i ’ite ’e ’ia fa’a’ite i te mea tā rātou i ’apo mai, ’e ’ia fa’a’ite i te ’itera’a pāpū nō te parau mau. E ’āpiti mai te aroha o Iesu Mesia ia rātou a ha’api’i ai rātou te tahi i te tahi.⁹
Tūtonu i ni’a i te mau mea mure ’ore ’O Tāna parau ha’api’ira’a ’e Tōna māramarama, e te here ’e te mana tā rātou e hina’aro; e ’āmuihia te mau mea ato’a i roto Iāna ra. Ia fa’a’ite ana’e tātou i te ’itera’a pāpū nō ni’a Iāna ’e ia fa’atū’ati i te mau parau tumu i ni’a Iāna, e fa’a’ite te Vārua Maita’i i te parau mau, e ha’api’i, ’e e ha’amāramarama.

Mai te mea ē, e rave ’outou i teie mau mea, ’e e rave rahi atu ā, e fa’a’ite pāpū te Vārua Maita’i i te parau mau, i te parau ta’a’ē iho ā rā ē, o Iesu te Mesia. E ha’api’i hō’ē hō’ē ’oia i tā ’outou mau piahi. E taui ’oia i tō rātou ’ā’au, ’e e tupu rātou i te rahi i roto i tō rātou hāro’aro’ara’a i te ’evanelia a Iesu Mesia. ’Ua ’ite au e parau mau te reira. Te vaiiho atu nei au i tō’u here ’e tō’u ’itera’a ia ’outou na, nā roto i te i‘oa o Iesu Mesia, amene.