Si Jesukristo Mao ang Tubag

Elder Ronald A. Rasband

Sa Korum sa Napulog Duha ka mga Apostoles

Gabii uban sa usa ka General Authority • Pebrero 8, 2019 • Salt Lake City Tabernacle

Minahal nga kaigsoonan, kamo nga anaa dinhi sa Tabernacle sa Temple Square ug kamo nga nagpundok sa tibuok kalibutan, dako namong dungog ni Sister Rasband nga makig-uban kaninyo. Naghunahuna ko sa makapausab sa kinabuhi nga impluwensya sa mga magtutudlo sa seminary ug institute ngari kanako. Bisan karon makita nako ang impluwensya sa akong mga magtutudlo sa paagi sa akong pagtuon sa mga kasulatan ug, ilabi na, kon unsa nako kamahal ang Basahon ni Mormon.

Bililhon usab kanako ang sosyal nga kasinatian nga maanaa sa luwas nga dapit uban sa akong mga higala nga ganahang makig-uban sa sitwasyon nga konektado sa ebanghelyo. Magkuyog kami sa seminary building sa high school ug sa institute sa kolehiyo. Labi nakong gikahinaman ang pagdala kang Melanie Twitchell sa mga sayaw sa institute. Si Melanie karon mao ang akong matahum, dalaygon nga asawa.

Isip mga magtutudlo sa seminary ug institute, nagtrabaho kamo og maayo aron sa pagdala og mga kalag ngadto ni Jesukristo. Nag-ampo kamo alang sa inyong mga estudyante; nagtuon kamo aron makatubag sa ilang mga pangutana; giandam ninyo ang inyong kaugalingon sa espiritwal nga paagi aron makatudlo pinaagi sa Espiritu; kamo nagdasig ug nagpaapil ug nagpadan-ag sa mga kamatuoran sa ebanghelyo.

Kon ang Ginoo mangita niadtong makatabang sa usa ka estudyante nga nanlimbasug, usa ka batan-on nga nagduhaduha sa iyang pagpamatuod, usa sa Iyang bililhong mga anak nga nagkakunhod ang pagpamatuod ug pagsabut, miandam Siya kaninyo sa pagtabang uban sa pakigtambayayong sa mga ginikanan ug mga lider sa Simbahan. Mobarug kamo atubangan sa inyong mga estudyante ug momatuod pag-usab sa kamatuoran nga si Jesukristo buhi, nga ang atong Amahan sa Langit nagmahal sa matag usa kanato, ug nga kita adunay luna diha sa Iyang mahangturong plano. Ug labaw sa tanan, nagtuo gayud kamo niini.

Kamo, sama sa gisulti ni Elder Jeffrey R. Holland kanunay, “magtutudlo nga gikan sa Dios.”¹

“Pila … [ang] gidala sa pag-awit sa matubsanon nga gugma, ug kini tungod sa gahum sa iyang pulong nga ania [kaninyo], busa [kamo] wala bay dako nga katarungan sa paglipay?

“Oo, [kamo] adunay katarungan sa pagdayeg kaniya sa kahangturan, kay siya mao ang Labing Halangdon nga Dios.”²

Apan usahay ang gibug-aton sa pagdasig, pagtudlo, ug pag-awhag sa kabatan-onan daw sobra pa kay sa inyong masarangan. Ang Ginoo nasayud nga kini nga buhat sa pagdala og mga kalag ngadto Kaniya mahimong lisud. Nasayran ko kana isip presidente sa misyon sa New York City sa dihang kini nga kasulatan sa Alma mihaum gayud kanako: “Karon sa diha nga ang atong mga kasingkasing nasubo, kita hapit na unta mobalik, tan-awa, ang Ginoo mihupay kanato, ug miingon: Lakaw taliwala sa inyong mga kaigsoonan … ug antusa uban sa pailub ang inyong mga kasakit, ug Ako mohatag nganha kaninyo sa kalampusan.”³

Ang kaaway dili kontento sa negatibong impluwensya nga iyang nahimo diha sa gingharian sa Dios dinhi sa yuta sa pagkakaron. Gusto niya og dugang pa. Agresibo siya ug bangis. Gipunting niya kadtong anaa sa inyong pag-amuma; atong makita sa uban nga sila “panguyapan sa kalisang.”⁴

Imahe

batan-ong babaye nga naghunahuna

Ang ubang mga estudyante mahisalaag, apan uban sa Espiritu sa Ginoo, makatabang kamo sa pagpabalik kanila sa dalan. Hinumdumi ang mga pulong ni Pablo, “Kami ginasakit sa tanang paagi, apan wala manghiubos; nangalibog, apan wala kawad-i sa paglaum; ginalutos, apan wala ikapanugyan; gipamunalan hangtud sa pagkapukan, apan wala mangalaglag.”⁵

Ngano man?

Tungod kay ang buhat ni Kristo nagdapit kanato uban sa mahangturong saad: “Umari kanako, kamong tanan nga nabudlay ug nabug-atan, ug papahulayon ko kamo.”⁶

Ang Ginoo miingon: “Busa, paglipay, ug ayaw kahadlok, kay Ako ang Ginoo anaa uban kaninyo, ug mobarug diha kaninyo; ug kamo magpamatuod kanako, gani si Jesukristo, nga Ako ang Anak sa buhi nga Dios, nga Ako mao kaniadto, nga Ako mao karon, ug nga Ako mao ang moabut.”⁷

Dili kita makahimo sa “paglipay”⁸ug mapundo diha sa kahadlok. Ang duha—kalipay ug kahadlok—dili mahimong magdungan sulod kanato sa samang higayon. Ug kon mosunod kita sa sugo sa Ginoo—kon kita maglipay—mahimo kitang andam sa pagpamatuod Kaniya, ang Manluluwas sa kalibutan. Makaila kita Kaniya kon si kinsa Siya ug mahibalo sa Iyang importanting tahas sa pagtabang kanato nga makabuntog sa mga problema sa kalibutan.

Ang paglipay mao ang pagsalig Kaniya kon dili mahitabo ang mga butang sumala sa atong giplano. Nagpasabut kini nga mopadayon kon ang lisud nga mga buluhaton ug mga sitwasyon mousab sa atong kinabuhi, kon ang mga pagsulay moguba sa atong mga damgo. Apan ang Ginoo mipahinumdom kanato, “dinhi niini nga kalibutan ang imong kalipay dili hingpit, apan kanako hingpit ang imong kalipay.”⁹

Makaila kamo diha sa inyong klase kinsa nga mga estudyante ang nagpuyo nga “[n]aglipay.” Aduna gihapon silay mga hagit ug mga problema, apan giatubang nila kini uban sa hugot nga pagtuo ug pagsalig sa Dios. Molingkod sila sa klase, matinguhaong motubag sa mga pangutana, malaumon nga masayud sa mga kamatuoran nga gitudlo, ug masaligon kon si kinsa sila. Alang kanila, ang “Ako anak sa Dios,”¹⁰ usa ka kahibalo ug kasiguroan, dili lang dugay nang gihambin nga panumduman sa pagkanta diha sa Primary. Mitambong sila nga nagtinguha og espirituhanong mga kasinatian, ideya, ug panabut nga makatabang kanila sa pagpangita og mga tubag sa ilang mga pangutana. Gusto nilang malig-on ang ilang paglaum samtang nagnabigar sila sa mabingkilong kalibutan, ug bisan pa sa ilang daghang kalisdanan, ang kahayag sa ilang mga mata mobuntog sa kakapoy sa inadlaw-adlaw nga pagpakabuhi.

Sa dihang anaa pa ako sa seminary ug institute—nga morag dugay na kaayo to—ang mga estudyante motambong sa klase nga nagtuo, o maoy akong pagsabut. Wala sila matay-og sa unsay ilang nakit-an sa internet, tungod kay wala pay internet. Wala silay sama nga mga kabalaka nga gihatag sa kalibutan kanila mahitungod sa relihiyon, pagpadayag, mga propeta, o pagtuo sa Dios.

Ug unsa na man ang mga estudyante sa luyo nga gihimong unlan ang ilang mga libro? O ang babaye nga bag-o lang giputlan ang tanan niyang buhok ug dili motan-aw ninyo sa mata? Ang duha nga kanunayng mag-istoryahanay sa pagsulod sa klase ug karon hapit dili na makigsulti sa usag usa? Unsaon man ang maayo kaayong estudyante nga daw nawad-an na og interes sa diskusyon sa ebanghelyo ug panagsa na lang motambong? Unsaon man ang blangko nga tinan-awan sa pipila, walay kaikag sa ilang mga mata, ug sa ilang mga paningkamot usab? Ang ubang estudyante mosulod sa klase, molingkod, ug dayon mogawas sa pultahan, walay nakuha nga bisan unsa—bisan na lang ang Espiritu. Ang mga kapig-ut, kahadlok, tintasyon, kalisud, ug kasagmuyo misanap sa ilang bililhong kinabuhi.

Imahe

batan-ong lalaki nga nawad-an og kadasig

Nakapangutana ba kamo sukad sa inyong kaugalingon, “Unsa na man ni ang nahitabo?” Nakapangutana ko!

Kahadlok ug kawalay paglaum: mao kana ang nahitabo. Kahadlok nga dili dawaton sa mga higala. Kahadlok sa akademik nga buluhaton, mga pagpamugos, ug mga problema sa balay nga dili nila masulbad. Kahadlok nga wala silay masaligan ug walay mosalig kanila. Kahadlok nga mag-inusara, ug kahadlok nga maanaa sa mga grupo. Kahadlok nga nagpabug-at sila sa uban. Kahadlok sa organisado nga relihiyon o sa bisan unsang relihiyon. Kahadlok nga walay solusyon o kahupayan sa ilang kasakit. Ang kahadlok moaghat og kasagmuyo ug kawalay paglaum, kabalaka ug depresyon; ang kahadlok momugna og mga kahigawad nga walay maayong sangputanan. Ang kahadlok nagtuo nga walay usa nga makasabut ug, mas grabe pa, nga walay usa nga mangutana, “Unsay problema?”

Ang kahadlok sa daghang matang niini walay swerte nga mapakita diha sa labing sakit nga mga sangputanan—paghikog.

Sa dihang ang gobernador sa Utah mihimo og espesyal nga grupo aron mosulbad sa pagsulbong sa paghikog sa mga batan-on, gihangyo niya si Presidente Russell M. Nelson sa pagtudlo og usa ka lider sa Simbahan nga mahimong kabahin niana nga grupo. Gisangunan ako ni Presidente Nelson nianang importante nga responsibilidad. Akong nakat-unan nga walay usa nga dili maapektuhan niini. Ang paghikog sa mga batan-on maoy usa ka krisis nga nagpanghitabo sa tibuok kalibutan. Ang mga datos nagpakita nga ang paghikog maoy usa karon sa tulo ka nag-unang hinungdan sa kamatayon tali sa kabatan-onan nga nag-edad og 15 hangtud 24. Ug kini: “Ang mga pagsulay sa paghikog mga 20 ka pilo ang gidaghanon kay sa nakompleto nga mga paghikog.”¹¹Kana, minahal nga kaigsoonan, sakit nga mga datos.

Kinahanglang atubangon nato kini nga isyu. Isip mga miyembro sa Ang Simbahan ni Jesukristo sa mga Santos sa Ulahing mga Adlaw kinahanglang mopasalig kita sa pagbuhat sa tanan natong mahimo aron mausab ang panghunahuna nga ang paghikog usa ka solusyon, gani usa ka tubag nga makasulbad sa ilang problema. Kinahanglang makigsulti kita sa mga batan-on mahitungod sa paghikog ug higugmaon sila aron dili sila mokonsiderar niini isip usa ka solusyon sa ilang kasakit. Ang kinabuhi ni Presidente Thomas S. Monson usa ka maayong ehemplo sa mga pulong nga “motabang sa pagluwas.” Kinahanglang dawaton nato kana isip atong responsibilidad.

Mao kana ang gibuhat sa Manluluwas alang kanatong tanan. Mianhi Siya sa pagluwas kanato pinaagi sa Pag-ula, ug mipadayon Siya sa pagpadayag sa ingon ka lawom nga gugma pinaagi sa pag-ayo kanato, pag-awhag kanato, ug paghatag kanato og kalinaw kon modangup lamang kita Kaniya.

Imahe

mga batan-ong babaye nga naggunitay og mga kamot

Makapadayag kita og gugma kon mao kana ang gikinahanglan sa kabatan-onan, pangitaan sila og higala, maminaw kanila, ug pangitaon sila uban sa mabination nga pulong o lihok. Tingali kinahanglang makigtambayayong kita sa ilang mga ginikanan ug mga bishop aron sa pagkuha og mga serbisyo sa pagpanambag alang sa mga panlimbasug, depresyon, o laing sakit sa pangisip. Makatabang kita sa ilang kinabuhi. Ang labing talandugon sa paghikog mao kadtong kabatan-onan ug mga batan-ong single adult kinsa nanlimbasug sa mga isyu sa sekso. Kinahanglan silang magakos sa mga bukton sa ilang Manluluwas ug masayud nga gipangga sila. Kanunay nga ang Ginoo nagtawag kanato; naglaum Siya nga mahimo kita nga Iyang mahinangpon, mahigugmaong mga bukton. Kinahanglang awhagon nato ang ilang mga higala sa pagbuhat sa ingon.

Ang paghikog konektado kaayo sa kasakit sa wala matubag nga mga pangutana, mga kasubo, kahigawad, mga pangutana kon unsa unta ang nahitabo, ug unsa ang buhaton karon. Kini nga mga pagkawala sa kinabuhi maoy mga trahedya nga terible kaayo nga kita isip katawhan kinahanglang motabang sa bag-o ug mas epektibong mga paagi sa pagtambag, pagpakita og pagpakabana, ug sa pagpaduol ug pagsuporta sa atong kabatan-onan. Sulayi ang pagsulti lamang sa ngalang “Jesukristo” sa makuyaw nga sitwasyon ngadto sa tawo nga nawad-an og paglaum. Ang pagsangpit lamang Kaniya pinaagi sa ngalan, uban sa pagtahud, makatabang sa lisud nga higayon.

Ang pipila ka mga komunidad nag-atubang sa unsay ilang gitawag nga “mga tapok” sa paghikog, diin ang usa ka tin-edyer mohimo og grabe kaayo nga buhat ug ang uban motan-aw niini isip usa ka opsyon ug mosunod.

Tuguti kong ipaambit kaninyo ang istorya sa usa ka British nga tin-edyer nga gisibya sa BBC News niadtong Abril 2018. Ang istorya mahitungod sa usa ka 16 anyos, si Hati Sparey-South, kinsa “misulay na sa pagpatay sa iyang kaugalingon. Ug mosulay na pud unta siya ug tingali nagmalampuson kon dili pa sa usa ka magtutudlo nga nakabantay unsa ka magul-anon siyang tan-awon.” Tulo sa iyang mga higala mikutlo na sa ilang kinabuhi. Nag-antus siya og lawom nga depresyon sulod sa duha ka tuig.

Miingon si Hati, “Kasagaran nga hilabihan ang akong kaguol. Ug dili ko makatulog.” Mipadayon ang kangitngit. Nagbulag ang iyang mga ginikanan, ug sulod-gawas ang iyang inahan sa ospital tungod sa nagsunod-sunod nga mga problema sa panglawas. Tungod kay ang tanang pagtagad anaa sa iyang inahan, walay nakabantay sa magul-anong pagbati ni Hati. Walay usa nga nangutana, “Giunsa man nimo pagsagubang kining tanan? Unsa man ang imong gibati?”

Misulod siya sa klase usa ka adlaw nga nagsul-ob og ngil-ad nga T-shirt, ug bag-o lang niyang gipaputlan ang tanan niyang buhok. Nangutana ang iyang magtutudlo, “Oy, ok ra ka? Kumusta man?”

Mitubag si Hati og, “OK ra.” Apan dili lang kana ang iyang nasulti. Dunay tawo nga nakamatikod kaniya. “Sa tinud-anay dili maayo ang akong gibati,” miingon siya. “Naguol kaayo ko. Ug kanunay ko nga naghilak.”

Ug dayon mihilak og maayo si Hati, ug mikampat ang makeup sa iyang nawong. Apan dili na kini importante karon tungod kay dunay tawo nga nakigsulti kaniya.

Kini nga magtutudlo nangutana og yanong pangutana nga gipangutana niya sa daghang mga bata. Apan sa iyang pagpakita nga nagpakabana siya, gidawat ni Hati ang iyang tabang. Ug nakadawat si Hati og tabang.

Wala madugay mipasabut siya, “Mora og gamay ra kaayo kini nga butang apan hilabihan kini ka gamhanan kon moingon kamo sa usa ka bata, ‘Kumusta man ka?’ sa ilang pagsulod sa klasehanan, ug nakahibalo mo, bisan kon moingon sila, ‘Ok ra,’ nakadungog sila ninyo.”¹²

Ang akong gipanggang igsoon nga si Jeffrey R. Holland miingon, “Bisan unsa pa ang inyong panlimbasug, akong mga kaigsoonan—mental o emosyonal o pisikal o bisan unsa pa—ayaw ibaliwala ang kabililhon sa kinabuhi pinaagi sa pagtapos niini. Salig sa Dios. Hupti ang Iyang gugma. Sayri nga moabut ang adlaw nga ang mga kasakit sa mortalidad mawala. Bisan tuod mobati kita nga ‘sama sa usa ka sudlanan nga nabuak,’ sama sa giingon sa Salmista, atong hinumduman, nga ang sudlanan anaa sa mga kamot sa balaanong tiglalang sa sudlanan.”¹³

Walay sayon nga paagi sa pag-ila niadtong nameligro. Kini nga mga batan-on motukar sa trombone, mokanta sa choir, modula sa mga soccer team, o mamutos og mga grocery human sa klase. Mosimba sila, ang pipila kanila—mga higala sila niadtong magtambungan sa inyong mga klase, bisan og ang uban wala na moapil og relihiyon sa dugay nang panahon. Apan kasagaran nga adunay mga komon kanila: nasagmuyo, nahagbong sa eksamin, nagkabulag sa uyab, daghang higayon nga gidaug-daog, kalisud sa akademik, ug ang unsay mahimo natong tawagon nga kaguol sa pagkabatan-on.

Seryusong giatubang sa Simbahan ang paghikog sa mga tin-edyer, mimugna og website nga adunay mga impormasyon, mga online video, mga tabang alang niadtong mobati nga nag-inusara, mga linya nga katawagan alang sa tabang, ug lista sa mga timailhan nga, sama ni Hati, usa ka pagtawag og tabang.

Palihug ipamilyar ang inyong kaugalingon niini nga mga kapanguhaan, ug mas matuman ninyo ang inyong tawag isip “magtutudlo nga gikan sa Dios.”¹⁴

Unsaon nato sa pagsulti sa tawo nga nag-antus nga ang Ginoo nasayud sa unsay inyong gibati? Gikuha Niya ang inyong personal kaayo nga mga hagit ug mga sayop nganha Kaniya. Gidala Niya kini alang kaninyo aron kamo adunay Usa nga mangalagad nga adunay hingpit nga panabut kon asa ang nagsakit ug ngano.

Ang mas dakong pagsabut kang Jesukristo makatabang niadtong nawad-an og paglaum. Ang Iyang gugma alang kanila ug ang mahinungdanon ug nahimaya nga dapit nga Iyang giandam alang kanila sa kahangturan maoy usa ka mensahe sa paglaum. Gimahal Niya sila. Kinahanglan silang mahibalo niana. Ang kasulatan namahayag, “Ako ang Ginoo anaa uban kaninyo, ug mobarug diha kaninyo.”¹⁵Ang Iyang saad nga maanaa wala lamang gitagana niadtong walay mga problema o kinsa mga sakop sa konseho sa seminary. Mosuporta Siya sa matag usa sa atong kabatan-onan—gani sa matag usa kanato—sa labing lisud nato nga mga panahon. Mao kana ang gahum sa Pag-ula, ug kinahanglang maayo gayud nato kana nga pagkatudlo nga moabut kana niadtong mga nag-antus.

Imahe

Si Jesukristo nga nag-ayo sa usa ka babaye

Tabangi ang mga estudyante sa pag-ila og “pangpanalipud nga kasulatan,” kanang ilang mahinumduman kon anaa sila sa makuyaw nga sitwasyon o nagkinahanglan og kalig-on aron mopalayo. Ang “Paglipay, ug ayaw kahadlok, kay Ako ang Ginoo anaa uban kaninyo”¹⁶ usa ka maayong kasulatan.

Ang kinabuhi kanunayng puno sa mga hagit. Walay usa nga dili makasinati niini. Dili kamo, dili ako, ug dili sila. Ang ubang batan-on nag-antus tungod kay nagtuo sila nga sila lang ang adunay mga problema. Ang tanang tawo gawas kanila walay mga problema. Nasayop sila sa pagtuo nga kon magtuon kamo sa kasulatan, mosunod sa mga sugo, ug mag-ampo kada adlaw, ang mga kaguol, kasamok, pagkadili inila, ug mga aksidente dili angay nga kabalak-an. Dili kini mahitabo sa ingon niana nga paagi. Ang mga pagsulay moabut kanatong tanan.

Ang mga problema, mga hagit, mga pagsulay, mga kasakit, mga kalisdanan, mga kaguol—bisan unsa ang inyong itawag nila—mga parte niining mortal nga kasinatian aron sa paglig-on kanato ug pagpalambo kanato. Ang panalangin mao nga pinaagi sa Pag-ula ni Jesukristo makahimo gihapon kita sa “paglipay.”¹⁷

Ayaw tuguti ang akademik nga kinahanglanon sa pagtudlo sa ebanghelyo nga mahimong mas importante kaninyo kay sa gahum sa Espiritu sa pagtandog ug pag-awhag sa inyong mga estudyante. Andama sila sa pagdawat og inspirasyon ug sa pagsunod niini. Andama sila sa pagdawat og personal nga pagpadayag sama sa gipanghimug-atan ni Presidente Nelson.¹⁸

Kon buhaton nila, makasinati sila sa milagro sa direksyon ug giya sa Ginoo, usa ka tinuod kaayo nga matang sa Iyang gugma.

Nganong mipili man ko sa pagpamulong mahitungod sa paghikog ug sa mga kauban niini—kahadlok, kamingaw, kawalay paglaum, kabalaka, ug kasakit—sa maligdong nga sitwasyon nga sama karon? Tungod kay kamo, minahal nga kaigsoonan, anaa sa grupo sa “unang tigresponde”, ug kon dili, dapiton ko kamo sa pag-apil. Ang paghikog ug ang makaminghoy nga mga kauban niini tinuod. Nagkadaghan kini sa atong kabatan-onan sa usa ka hampak nga modani bisan sa batan-on ug puno sa saad nga labing pinili ngadto sa pagtuo nga ang kinabuhi walay tumong alang kanila. Wala nay mas layo pa sa kamatuoran.

Imahe

mga batan-on nga naggunitay og mga kamot sa usa ka sirkulo

Ang kinabuhi talandugon. Wala kita masayud kon kanus-a nga adunay mahitabo sa usa ka tawo nga makapasurprisa kaayo kanato. Mobati kita nga dili andam ug wala masayud kon unsay buhaton. Apan kon gikan sila sa usa ka panimalay nga mag-ampo isip pamilya, magtuon sa kasulatan, ug mag-family home evening, nan ang mga himan alang sa “pagpanghupot” mas lig-ong napahimutang. Hinoon, ayaw saypi nga ang usa sa atong kabatan-onan dili mameligro bisan kon nagbuhat sila niining tanan. Usa ka batan-ong lalaki mitubag sa usa ka kalihokan sa family home evening nga nangutana sa matag sakop sa pagsulat og usa ka butang nga importante kanila. Ang 14 anyos, kinsa daw anaa sa tanan niyang gikinahanglan, misulat niini, “Ang masayud nga adunay tawo nga anaa alang kanako.”

Aduna akoy suod nga higala kinsa wala motambong sa seminary hangtud sa iyang senior nga tuig sa high school. Wala na siya motambong sa simbahan; sukad pa sa iyang pagka 13 anyos. Isip mag-aawit, nakahukom siya nga sulayan ang choir sa seminary, ug gani nadawat siya. (Ang tanan maapil gayud sa seminary choir!) Dili siya makahinumdom sa mga leksyon sa klase. Hinoon, sa matag higayon nga manganta sila, ang Espiritu mipuno sa kwarto, ug nasayud siya nga lahi kini sa chorus sa eskwelahan nga gikantahan niya tabok sa dalan. Aduna siyay gibati nga wala niya mabati sukad. Gibati niya ang Espiritu. Naggikan sa nabungkag nga panimalay nga walay instruksyon sa ebanghelyo, dili siya pamilyar sa Espiritu. Nakat-on siya sa pagmahal niini ug sa pagsalig niini. Aduna siyay lig-ong pagpamatuod sa ebanghelyo ni Jesukristo tungod kay “adunay tawo nga anaa alang kaniya.” Ug karon, paglabay sa katuigan, kanunay gihapon siyang makigsulti sa iyang magtutudlo sa seminary, kinsa usa ka “magtutudlo nga gikan sa Dios.”¹⁹

Alang niadtong inyong gitudloan nga walay grupo nga makasuporta, kanang kalig-on diha sa panimalay, ang inyong mga pagtulun-an importante sa ilang kaayohan. Mahimong sila ang mga estudyante nga pribadong mangutana aron lang adunay dugang nga diskusyon sa ebanghelyo tungod kay kini lang ang bugtong panahon nga makabaton sila nianang espirituhanong koneksyon sa ilang adlaw. Mahala, palihug, kana nga mga oportunidad, ug gahini sila og panahon.

Ang pagkaayo moabut pinaagi sa Manluluwas, kinsa “nakatugkad sa tanan nga mga butang”²⁰ aron nga Siya masayud “sumala sa unod unsaon pagtabang ang iyang mga katawhan sumala sa ilang mga kahuyang.”²¹

Ikonsiderar ang panahon sa dihang si Jesus mipakaon sa lima ka libo gamit ang pipila ka isda ug tinapay gikan sa paniudto sa usa ka batan-on ug dayon nag-inusarang miadto sa bukid aron mag-ampo. Ang Iyang mga disipulo mitabok sa dagat sa Galilea, ug sa nagkalawom na ang gabii, miadto si Jesus kanila nga naglakaw sa tubig. Pagkakita Kaniya, “naniyagit sila sa kalisang,”²² ug Siya mitubag, “Salig kamo, ako kini; ayaw kamo kalisang.”²³

Sa dihang si Pedro maisugong milukso sa kilid sa sakayan nianang gabhiona tungod sa pagdapit sa Ginoo ug misugod paglakaw sa tubig, napuno siya sa pagsalig hangtud nga miduko siya ug nakita ang nagliyok-liyok, baluron nga dagat. Dayon misiyagit siya sa kalisang.

Mikab-ut si Jesus kaniya dili uban sa kasuko apan uban sa kalooy. Gihulagway ni Moroni ang atong kaugalingong pagduhaduha niini: “Hinaut unta nga si Kristo mobayaw kanimo, ug unta ang iyang mga pag-antus ug kamatayon, … ug [ang] iyang kalooy ug pagkamainantuson, ug ang paglaum sa iyang himaya ug kinabuhi nga dayon, moabut sa imong salabutan sa kahangturan.”²⁴

Nakigsulti siya kanato tungod kay kitang tanan, mga kaigsoonan, anaa sa tubig.

Sa laing sitwasyon sa Bag-ong tugon, usa ka grupo nagtapok libut sa tawo nga “paralitiko nga naghay-ad sa duyan.”²⁵Si Ginoong Jesus mitan-aw sa nagkasakit nga tawo ug mibati sa pagtuo niadtong naglibut kaniya ug miingon, “Salig.”²⁶

Niining katapusang dispensasyon si Jesukristo namulong pinaagi ni Joseph Smith ngadto sa Iyang mga sulugoon kinsa nanagmisyon ug nag-atubang og kakuyaw ug mga kalamidad, nag-ingon, “Pagmalipayon, mga bata; kay Ako anaa sa inyong taliwala.”²⁷

Nakita ni Joseph Smith sa panan-awon ang mga Apostoles nga anaa sa ilang misyon sa England nga “kaubang nanagbarug sa usa ka sirkulo nga gikapoy pag-ayo, gisi ang mga saput ug nanghubag ang mga tiil, ang ilang mga mata nagtan-aw paubos, ug si Jesus nagbarug sa ilang taliwala, ug wala sila makakita Kaniya. Ang Manluluwas mitan-aw kanila ug mihilak.”²⁸

Makakita ba kamo sa sundanan? Ang makaabag nga gahum ni Kristo gipakita diha sa kayano nga anaa Siya alang kanato—sa kanunay. Bisan unsa ang mahitabo, magauban Siya kanato, mohupay Siya kanato, ug moayo Siya kanato kon moduol kita Kaniya ug mopahimulos sa Iyang gahum sa pagluwas kanato. Kasagaran nga Iyang ayohon ang samaran nga kasingkasing. Sa unsang paagi kini mahitabo, mangutana ta? Pinaagi sa gahum sa Pag-ula nga gigamit sa atong kinabuhi karon, dili sa katapusan sa dayon na ang katapusang paghukom, apan sa matag adlaw samtang magtinguha kita nga mahimong sama Kaniya, mohigugma sa Iyang gihigugma, mosunod sa Iyang pinili nga mga propeta.

Sa dihang gitun-an nako ang Pag-ula, gisulayan nako paghanduraw ang teribleng kahimtang sa sitwasyon libut sa Manluluwas samtang miluhod Siya sa Tanaman sa Getsemani. Ug nag-ampo Siya, “nag-ingon, Amahan, kon buot ka, kuhaa kining kopa gikan kanako: hinoon dili ang akong pagbuot maoy matuman kondili ang imo.”²⁹ Miingon Siya kalabut sa Iyang kaugalingong pag-antus: “Unsa ka sakit ikaw wala masayud, unsa ka hilabihan [ka sakit] ikaw wala masayud, oo, unsa kalisud sa pag-antus ikaw wala masayud.”³⁰ Ang atong kabatan-onan kinahanglang makasabut nianang tulukibon nga pamahayag.

Imahe

ang anghel naghupay ni Jesus sa Getsemani

“Ug dihay manolunda nga mitungha kaniya gikan sa langit sa pagpalig-on kaniya.”³¹

Sa Iyang panginahanglan, mikuha sa gibug-aton sa tanan natong mga sala diha Kaniya, ang atong ngil-ad kaayo nga mga adlaw, ang atong mga kahuyang ug kasagmuyo, usa ka anghel mipakita aron sa paghupay Kaniya. Sa inyong mga pagsulay, mga kaigsoonan, ang Ginoo mihatag og “mga anghel anaa libut kaninyo, aron sa pagtabang kaninyo.”³² Minahal nga mga magtutudlo, mahimong kamo kana nga anghel.

Ang Manluluwas diha sa Katapusang Panihapon mihatag og katin-awan sa Iyang misyon ug gisaad nga kalinaw nga nag-ingon: “Dinhi sa kalibutan aduna kamoy kagul-anan: apan sumalig kamo, gidaug ko na ang kalibutan.”³³Sigurado kaayo siya sa unsay mahitabo, sigurado kaayo Siya sa Iyang bahin sa pagpatuman sa mahinungdanong plano sa kaluwasan, nga Iyang giawhag ang iyang mga disipulo, “Sumalig kamo.”

Si Elder Neal A. Maxwell nakaobserbar: “Ang dili matugkad nga kasakit sa Getsemani hapit na moabut kang Jesus; ang pagbuhdi ni Judas hapit na mahitabo. Dayon moabut ang pagdakop kang Jesus ug paghusay; ang pagkatibulaag sa Napulog Duha sama sa karnero; ang makalilisang nga pagdagmal sa Manluluwas; ang dili makiangayon nga husay; ang alingugngog nga siyagit sa mga manggugubot alang ni Barrabas imbis ni Jesus; ug dayon ang makalilisang nga paglansang sa krus didto sa Kalbaryo. Unsay angay nga lipayan niana? Sama lang sa gisulti ni Jesus: Nabuntog Niya ang kalibutan! Ang Pag-ula mahimo na nga reyalidad. Ang pagkabanhaw sa tanang katawhan nasiguro na. Ang kamatayon mabuntog na—pakyas si Satanas sa pagpahunong sa Pag-ula.”³⁴

Atong matudlo ang kamatuoran nga gipahayag ni Presidente Russell M. Nelson: “Kon wala pa ang walay kinutuban nga Pag-ula sa atong Manunubos, walay bisan usa kanato ang makalaum nga makabalik pa sa atong Langitnong Amahan. Kon wala pa ang Iyang Pagkabanhaw, ang kamatayon mao na ang katapusan. Ang Pag-ula sa atong Manluluwas naghimong posible sa kinabuhing dayon ug sa reyalidad sa pagka-imortal alang sa tanan.”³⁵

Pamalandungi kon unsaon ninyo pagtabang ang inyong mga estudyante nga makasabut sa kalig-on sa Manluluwas, sa Iyang gugma alang kanatong tanan ug respeto alang sa balaang plano sa Amahan. Pag-ampo aron matabangan sila nga mahibalo nga ang Pag-ula ni Jesukristo alang kanila ug unsa ang kahulugan niini diha sa ilang komplikado kaayo nga kinabuhi.

Awhaga ang pagserbisyo sa gingharian sa Dios nga nagdala uban niini sa Espiritu sa Dios.

Tungod kay nakaserbisyo ug nangulo ko sa Temple Department sa Simbahan sa dugayng panahon, malipay ko nga motambong sa templo ug makakita og mga linya sa kabatan-onan—mga batan-ong lalaki ug mga babaye—nga moadto sa templo aron mopahigayon og mga bunyag alang sa mga patay. Samtang inyong hatagag gibug-aton ang gahum sa templo diha sa inyong pagtudlo, inyong malig-on kining dako nga kahigayunan nga kinahanglan gayud silang makaila ni Jesukristo, masayud nga Siya ang tinubdan sa ilang “paglipay.”

Nagpasalamat ko sa nagtubo nga gidaghanon sa atong bag-ong natugahan [endowed] nga mga young adult nga nagserbisyo isip mga temple worker. Tanan nagsul-ob og puti, sa hilum ug malinawon nga sitwasyon, nagbarug sila sa balaang dapit nga nagpamatuod Kaniya, nga Siya mao kaniadto, nga Siya mao karon, ug nga Siya moabut.³⁶ Ang atong pagserbisyo sa Ginoo diha sa templo usa gayud ka talagsaong paagi aron mabati nga duol ang Manluluwas.

Awhaga ang inyong mga estudyante nga kanunayng maghupot og magamit nga rekomend sa templo—limited-use o regular depende sa ilang edad ug kahimtang—ug dayon sa pagpaambit sa ilang mga pagbati nga maanaa sa templo, sa pagpadayag ug inspirasyon nga moabut kon sila mokab-ut lapas niining kinabuhia alang sa “mga butang nga maayo,”³⁷magserbisyo niadtong kinsa dili makahimo sa mga ordinansa alang sa ilang kaugalingon.

Si minahal nga Presidente Nelson miingon, “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”³⁸

Sa dihang giordinahan ko nga usa ka Apostol, si minahal nga Presidente Monson miingon nga kinahanglan akong mahimong linain nga saksi sa ngalan ni Jesukristo sa tibuok kalibutan. Wala nako gipakasayon kana nga responsibilidad. Gitun-an nako pag-ayo ang mga kasulatan, miila sa Ginoo pinaagi sa Iyang mga ngalan ug mga titulo. Kining tanan nga akong ipaambit kaninyo gikan sa mga bersikulo sa kasulatan nga nagpahinumdom kanato sa atong paglaum nga anaa Kaniya. Siya mao ang:

Kalauman sa Israel.³⁹
Masidlak nga Bitoon sa Kabuntagon.⁴⁰
Maayo nga Magbalantay.⁴¹
Magtatambag.⁴²
Prinsipe sa Kalinaw.⁴³
Manluluwas.⁴⁴
Kahayag alang sa Kalibutan.⁴⁵
Labawng Sacerdote sa mga maayong butang nga nanagpangabut.⁴⁶
Gamhanan sa pagluwas.⁴⁷
Ang Usa nga aduna sa tanan nga gahum.⁴⁸

Ang impluwensya ni Kristo masangkaron. Anaa Siya kon kita manlimbasug ug maningkamot sa pagpadayon. Ug kon kita masayop, ang Iyang “kahayag nga nagdan-ag sa kangitngit”⁴⁹—usa sa Iyang mga ngalan—mas labaw nga nagdan-ag. Gimahal kita Niya sa atong labing nindot ug sa atong labing lisud nga panahon.

Ang pagkahimong disipulo ni Jesukristo dili pagtag-an-tag-an sa unsay gusto Niya nga atong buhaton. Ang iyang dalan klarong gimarkahan sa Iyang mga lakang. Samtang mosunod kita Kaniya, makapalambo kita og gugma sa unsay Iyang gihigugma. Samtang atong bag-ohon ang atong mga pakigsaad Kaniya matag semana sa pag-ambit sa balaan nga sakrament, molambo ang atong pagsabut Kaniya isip ang Manunubos sa Kalibutan,⁵⁰ ang Espiritu sa Kamatuoran,⁵¹ ang Pulong.⁵²

Itudlo ang gahum sa sakrament ngadto sa inyong mga estudyante, ilabi na niadtong nagduhaduha ug kadtong wala makasabut sa kaimportante niining bililhon nga ordinansa. Himoa ang panalangin sa sakrament, nga “sa kanunay makabaton sa Iyang Espiritu uban [kanato],”⁵³nga maoy inyong maistoryahan aron ang paggamit sa makaayo nga gahum ni Jesukristo, pinaagi sa Iyang Pag-ula, matinuod.

Agig dugang, ang Manluluwas mipasabut sa iyang Kaugalingon pinaagi sa mga pamahayag nga mipadayag sa Iyang diosnong kinaiya ug sa Iyang mahangturong mga tahas sama niini:

“Pagmalinawon ug hibaloi nga Ako mao ang Dios.”⁵⁴
“Ako adunay katakus sa paghimo kaninyo nga balaan.”⁵⁵
“Ako magbuhat sa … kabubut-on [sa Amahan].”⁵⁶
“Ako, ang Ginoo … mahimuot sa pagpasidungog niadto kinsa nag-alagad kanako.”⁵⁷
“Ang akong grasya igo alang kaninyo.”⁵⁸
“[Kamo] makabaton og kalinaw ngari kanako.”⁵⁹
“Ayaw kahadlok … kay kamo akò.”⁶⁰

Minahal nga mga higala, mga kaigsoonan, mao kana ang Manluluwas nga akong nailhan, nga akong gimahal ug gitahud sa tibuok nakong kasingkasing. Gikan sa kinahiladman sa akong kalag mopamatuod ako Kaniya ug sa Iyang kaayo ug kalooy. Siya misaad, “Kay kamo akong mga higala, ug kamo adunay kabilin uban kanako.”⁶¹

Sa pagkatinuod, mga kaigsoonan, si Jesukristo mao kanunay ang tubag. Sa pagsabut sa Iyang misyon ug sa Iyang ebanghelyo, ang atong gugma alang Kaniya ug ang atong pagtuo ug pagsalig diha Kaniya mohatag kanato og kalig-on.

Maayo kining pagkahulagway ni Helaman: “Hinumdumi nga kini diha sa lig-on nga sukaranan sa atong Manunubos, kinsa mao si Kristo, ang Anak sa Dios, nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan.”⁶²

Imahe

Si Jesus naggunit og nati nga karnero

Akong ibilin ang akong panalangin nga inyong mabati ang gugma sa Ginoo diha sa inyong kinabuhi ug makatabang kamo sa inyong mga estudyante nga mobati usab niini. Mopanalanginan ako kaninyo nga mahimong magmalaumon ug “maglipay” nga ang Espiritu sa Ginoo mag-uban kaninyo, modasig kaninyo, ug mobayaw kaninyo. Mopanalangin ako kaninyo sa pagpaminaw sa inyong mga estudyante, nga makasabut sa unsay wala nila isulti ingon man sa unsay ilang ipahayag, ug makabaton og inspirasyon aron mahibalo unsay gusto sa Ginoo nga inyong buhaton. Mopanalangin ko sa inyong mga pamilya, sa inyong mga asawa ug mga bana. Hinaut nga masayud kamong tanan sa pagtahud, pagsalig, ug gugma nga ang akong kaubang kaigsoonan ug ako aduna alang kaninyo ug sa importante nga buhat nga inyong gihimo aron sa pagdala og mga kalag ngadto kang Jesukristo. Ug hinaut nga inyong mabati ang Ginoo nga nagbarug tupad kaninyo samtang kamo mopamatuod mahitungod Kaniya, ang Manluluwas sa kalibutan. Si Jesukristo mao kanunay ang tubag.

Sa pangalan ni Jesukristo, amen.