2:3

O Iesu Keriso o le Tali

Elder Ronald A. Rasband

O Le Korama a Aposetolo e Toasefululua

Afiafi ma se Pulega Aoao • 8 Fepuari 2019 • Tapeneko i le Aai o Sate Leki

Uso e ma tuafafine, o outou o loo i ai iinei i le Tapeneko i le Lotoa o le Malumalu ma i latou o loo potopoto mai i le lalolagi atoa, ua faamamaluina lava a’u i le faatasi ai ma outou. Ou te tepa i tua i faatosinaga a o’u faiaoga seminare ma le inisitituti na suia ai lo’u olaga. E oo lava i nei aso o loo ou vaaia ai pea faatosinaga a o’u faiaoga i le auala ou te suesue ai tusitusiga paia, aemaise lava le tele o lo’u fiafia i le Tusi a Mamona.

Ou te faatauaina foi le aafiaga faaagafesootai o le i ai i se nofoaga saogalemu ma a’u uo, o e olioli i le faatasitasi i se faatulagaga faaletalalelei. Sa matou tafafao i le fale seminare i le aoga maualuga ma le inisitituti i le kolisi. Sa faapitoa lava lo’u tulimatai atu e ave Melanie Twitchell i siva a le inisitituti. O Melanie ua avea nei ma o’u toalua lelei tele.

I le avea ai ma faiaoga seminare ma le inisitituti, e te galue mo itula uumi i le aumaia o agaga ia Iesu Keriso. E te tatalo mo au tamaiti aoga; e te suesue ina ia mafai ona e tali a latou fesili; e te saunia oe lava ia faaleagaga e aoao atu e ala i le Agaga; e te siitia ma faaauai ma faamalamalama atu upumoni o le talalelei.

A saili e le Alii i latou e mafai ona fesoasoani atu i se tamaitiiti aoga o loo tauivi, o se talavou ua lamatiaina lona faatuatua, o se tasi o Ana fanau faapelepele ua faavaivaia le molimau ma le malamalama, ua Ia saunia oe e laa atu i luma e galulue faatasi ma matua ma taitai o le Ekalesia. E te tu i luma o au tamaiti aoga ma toe faamautu atu le upumoni e faapea o loo soifua Iesu Keriso, e alofa lo tatou Tama i le Lagi ia i tatou taitoatasi, ma o loo i ai so tatou nofoaga i Lana fuafuaga e faavavau. Ae o le mea silisili, e te talitonu i ai.

E pei ona saunoa soo mai ai Elder Jeffrey R. Holland, “O oe o se faiaoga e sau mai le Atua.”¹

“E toafia … ua aumai … e pesea le alofa togiola, ma ua tupu mai lenei mea ona o le mana o lana afioga ua i totonu o [outou], o lea, po ua le i ai ea ia te [outou] se pogai tele … e olioli ai?

“Ioe, ua ia [te outou] se pogai e viia ai o ia e faavavau, ona o ia o le Atua Silisili Ese.”²

Ae e i ai taimi, o le mamafatu o le siitiaina, aoaoina, ma le uunaiaina o le autalavou e toetoe lava a le mafai ona tou lavātia. Ua silafia e le Alii lenei galuega o le aumaiga o agaga ia te Ia e ono faigata. Sa ou aoaoina lena mea o se peresitene o se misiona i le Aai o Niu Ioka ina ua fitoitonu lelei lenei mau i le Alema ma lo’u loto: “O lenei ina ua vaivai o tatou loto, ma toetoe a tatou toe foi i tua, faauta, sa faamafanafanaina i tatou e le Alii, ma fetalai mai: O atu i totonu o o outou uso, … ma tauave ma le onosai ou puapuaga, ma o le a ou tuu atu ia te outou le manuia.”³

E le o faamalieina le fili i mea le lelei o loo ia faatosinaina ai le malo o le Atua i le lalolagi i lenei taimi. E manao o ia i nisi mea leaga atu. E faataumaoi o ia ma matautia. O loo ia taulai mai ia i latou o i lau tausiga; o loo tatou vaaia i nisi, o o latou “[loto ua faatoilaloina ai i latou] i le matata’u.”⁴

O nisi tamaiti e o ese mai poloaiga, ae faatasi ma le Agaga o le Alii, e mafai ai ona e fesoasoani e toe faafoi i latou i luga o le ala. Manatua upu a Paulo: “Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano.”⁵

Aisea?

Aua o le galuega a Keriso ua valaauliaina i tatou i lenei folafolaga e faavavau: “Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”⁶

Ua fetalai mai le Alii: “O le mea lea, ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou; ma o le a outou molimau atu Aʼu, o Iesu Keriso lava, o Aʼu o le Atalii o le Atua soifua, ma sa Ou i ai, ma o loo Ou i ai, ma o le a Ou alu atu.”⁷

E le mafai ona tatou maua le “fiafia”⁸ae lofituina i le fefe. O le lua lea—fiafia ma le fefe—e le mafai ona tuufaatasia. Ma a tatou mulimuli i poloaiga a le Alii—afai tatou te fiafia—o le a tatou saunia e molimau atu e uiga ia te Ia, le Faaola o le lalolagi. O le a tatou iloa o Ia i Lona tagata moni ma iloa le matafaioi tutasi ua ia te Ia i le siitiaina o i tatou i luga a’e ma tala atu o faafitauli o le lalolagi.

O le mauaina o le fiafia, o le faatuatuaina lea o Ia pe a le sologa lelei ni mea e pei ona tatou fuafuaina. O lona uiga ia tumau pea pe a ave i tatou e ni faafitauli i se itu sa le’i faamoemoeina, pe a lafotuina e faalavelave ma faigata a tatou miti. Ae ua faamanatu mai e le Alii ia i tatou, “E lē atoatoa lo outou olioli i le lalolagi lenei, ae o aʼu e atoatoa ai lo outou olioli.”⁹

Tou te iloaina lava i tou vasega po o ai tamaiti a’oga o opomauina le “fiafia.” O loo ia i latou pea ni luitau ma faafitauli, ae o loo latou faafetaia’ia i le faatuatua ma le faalagolago i le Atua. Latou te nonofo i lalo i le vasega, naunau e tali i fesili, faamoemoe ia iloa upumoni o loo aoaoina, ma toafimalie i tagata e i ai i latou. Mo i latou, “O a’u o se atalii o le Atua”¹⁰o le malamalama ma le puipuiga uma, e le na o se mea e manatuaina mo se taimi umi o le pepese ai i le Peraimeri. Latou te o mai e saili ni aafiaga faaleagaga, malamalamaaga, ma anotusi o le a fesoasoani ia i latou e faavasega a latou fesili. Latou te mananao e faamalosia lo latou faamoemoe a o latou feoai i se lalolagi fefinauai, ma e ui i le lotolotoi o le tele o avega ua mamafatu ia i latou, a’o le malamalama i o latou mata e faatoilaloina vaivaiga o le olaga i lea aso ma lea aso.

I o’u aso i le seminare ma le inisitituti—e foliga mai ua leva lava, ou te fia faapea atu—sa o mai tamaiti aoga i le vasega ma le talitonu. Sa le’ifesoua’iinai latou e mea latou te maua i luga o le initoneti, ona sa leai se initoneti. Sa latou le’i tauaveina solo i a latou ato faafafa ni popolega e tau’ai atu e le lalolagi ia i latou e uiga i tapuaiga, faaaliga, perofeta, po o talitonuga i le Atua.

Ae a latou i le laina pito i tua o loo momoe i luga o a latou api? Po o le teine faato’a sele poo lava lona ulu ma ua le fia tilotilo atu ia te oe? O le toalua sa masani ona savavali atu i le vasega ma talanoa ae ua seasea nei toe talanoa i le tasi ma le isi? Ae a le tamaitiiti lauiloa ua foliga mai ua le toe fiafia i talanoaga o le talalelei ma ua misia o ia e sili atu i lo le auai mai? Ae a foliga le fia auai o nisi, ua na o le sioa lava ma ua le fia taumafai foi e aoao? O nisi tamaiti aoga e o mai i le vasega, nonofo i lalo, ona toe nimo ese atu lea, e aunoa ma se mea na aoaoina—e oo lava i le Agaga. O le atuatuvale, fefe, faaosoosoga, faalavelave, ma le le fiafia ua puleaina o latou olaga faapelepele.

o se alii talavou o loo lagonaina le faanoanoa

Na e fesili ea ia te oe lava ia, “O le a le mea o tupu i i? Ioe!

Fefe ma le atuatuvale: o le mea lena o loo tupu. Fefe ina ne’i le taliaina e uo. Fefe i faatinoga faaleatamai, avega mamafa, ma faafitauli i le fale e le o mafai ona latou foiaina. Fefe ua le mafai ona faatuatuaina se tasi ma e leai foi se tasi e faatuatuaina i latou. Fefe i le tuuatoatasi, ma le fefe i le auai i ni vaega. Fefe ne’i avea i latou ma se avega i isi. Fefe i se tapuaiga faatulagaina po o soo se tapuaiga. Fefe i le leai o se vaifofo po o se toomaga i o latou tiga. E faaosofia e le fefe le lotovaivai ma le faanoanoa, atuatuvale ma le le fiafia; e faatupu e le fefe le lofituina lea e leai sona taunuuga lelei. E talitonu le fefe e leai ma se tasi o le a malamalama ma, o le mea leaga, e leai ma se tasi e fesli, “O le a le mea o tupu?”

O le mea e leaga ai, o le fefe i le tele o ona foliga e faailoa mai i taunuuga sili ona leaga—le pule i le ola.

Ina ua faatuina e le kovana o Iuta se vaega i le tausaga ua te’a e taumafai e foia le faatupulaia o le pule i le ola o tupulaga talavou, sa ia talosagaina Peresitene Russell M. Nelson e tofia se taitai o le Ekalesia i lena auaunaga. Sa tofia e Peresitene Nelson a’u i lea tiutetauave taua. Ua ou iloa ai e leai se tasi e puipuia mai ai. O le pule i le ola o tupulaga talavou o se faalavelave o loo tupu i le lalolagi atoa. O faamaumauga faafuainumera ua faaalia ai o le pule i le ola ua i ai nei i mafuaaga taulamua e tolu o le maliu i talavou o le vaitausaga 15 i le 24. Ma le mea lenei: “O le taumafai e pule i le ola e faa- 20 e sili atu ai le tupu soo nai lo le pule i le ola ma maliliu ai.”¹¹O fuainumera ogaoga na, ou uso e ma tuafafine pele.

E tatau ona tatou faafesagai ma lenei faafitauli. I le avea ai ma tagata O Le Ekalesia a Iesu Keriso o le Au Paia o Aso e Gata Ai, e tatau ona tatou tuuto atu i le faia o mea uma tatou te mafaia e toefaasa’o ai le manatu o le pule i le ola o le tali lea, o se tali e taua le iloiloina. E tatau ona tatou talanoa atu i tupulaga talavou e uiga i le pule i le ola ma alolofa ia i latou ina ia latou le mafaufau o le pule i le ola o se tali i o latou tiga. O le soifuaga o Peresitene Thomas S. Monson o se faataitaiga o le fuaitau “i le laveai.” E manaomia ona tatou faia lena mea ma a tatou poloaiga.

O le mea lena na faia e le Faaola mo i tatou uma. Na afio mai o Ia e laveai i tatou i le Togiola, ma o loo faaauau pea ona Ia faailoa mai le alofa loloto e ala i le faamaloloina o i tatou, faamalosiau mai ia i tatou, ma le aumaia ia i tatou o le filemu pe afai o le a tatou liliu atu ia te Ia.

E mafai ona tatou faailoa atu le alofa pe afai o le mea lena o loo manaomia e le autalavou, saili se uo mo latou, faalogo atu ia i latou, ma saili atu i latou i upu po o taga agalelei. Atonu e manaomia ona tatou galulue faatasi ma o latou matua ma epikopo e saili ni tautua faufautua mo e o tauivi, lofituina, po o se isi ma’i faalemafaufau. E mafai ona tatou faia se eseesega i o tatou olaga. E patino le lamatia i le pule i le ola o talavou ma talavou nofofua matutua o loo tauivi ma faafitauli tau itupa. E manaomia ona siomia i latou i aao o lo latou Faaola ma iloa e alofaina i latou. E tele lava ina valaau mai le Alii ia i tatou; Ua Ia faamoemoeina i tatou ina ia avea ma Ona aao alofa e talileleia i latou. E manaomia ona tatou uunaia a latou uo ia faia lea mea e tasi.

O le pule i le ola ua matua fesootai lava ma le tiga o fesili e le taliina, faanoanoaga, faavauvauga, o fesili, ae a pe afai ma le, o le a nei la. O le maumau o nei ola o ni faalavelave matua matautia lea e tatau ai ia i tatou o se nuu ona aapa atu i ni auala fou ma sili ona mataalia e fautua atu, faaali atu le alofa ma le popole, ma faalatalata atu ma lagolago a tatou talavou. Taumafai e tau na ona ta’u le suafa o “Iesu Keriso” i se tulaga faigata faatasi ma lē ua leai se faamoemoe. O le valaau atu ia te Ia i Lona suafa, ma le migao, e mafai ona faia ai se eseesega i se taimi faigata.

O nisi nuu o loo feagai ma se mea ua latou ta’ua o le pule i le ola “faavaega”, lea e faia ai e se talavou se toatasi sea faiga ogaoga ma vaai i ai isi o se filifiliga ma pule ai foi i o latou ola.

Se’i o’u faasoa atua ia te outou le tala i se talavou Peretania sa faasalalauina i luga o le BBC News ia Aperila 2018. O le tala sa faatatau i se tamaitai talavou 16 tausaga, Hati Sparey-South, o le “sa taumafai muamua e fasioti o ia. Ma semanu na te toe taumafai foi ma atonu e ono maliu ai pe ana le seanoa ma lana faiaoga na matauina ona foliga le fiafia sa i ai.” E toatolu ana uo ua uma ona pule i o latou ola. Sa mafatia o ia mai le faanoanoa tele mo le lua tausaga.

Sa fai mai Haiti, “Sa ou matua faanoanoa i le tele o taimi. Ma sa le mafai ona ou moe.” Na faaauau le pogisa. Sa tete’a ona matua, ma sa feaveai solo lona tina i le falemai i le tele o faaletonu o lona soifua maloloina. Faatasi ma le gauaiga atoa i lona tina, sa leai ma se tasi na matauina le pogisa i fofoga o Hati E leai ma se tasi na fesili, “O a mai oe? O a mai ou lagona?

Sa ia savali atu i le vasega i se tasi o aso sa ofu i se mitiafu taufaamatau, ma faatoa uma ona oti lona ulu. Sa fesili atu lona faiaoga, “Suga, o seki oe? O a mai?

Sa tali atu Hati i le, “OK.” Ae na te lei taofi ai iina. Sa matauina o ia e se tasi. “Ou te lagona lava le leaga,” sa ia fai atu ai. “Ou te faanoanoa lava. Ma ou te tagi pea.”

Ona ia tagi lea ma tagi ai lava, ma tafe ifo ana valimata i ona foliga. Ae sa le afaina lea ona sa aapa atu se tasi ia te ia.

Sa fai atu e lenei faiaoga se fesili faigofie na te fesiligia ai le tele o tamaiti. Ae o le auina atu o se faailoilo e popole o ia, sa uu ai e Hati le laina-mo-le-ola. Ma sa maua ai e Hati le fesoasoaniga.

Sa ia faamatala mulimuli ane, “E foliga mai o se mea faatauvaa ae le matalitonuina le mamana pe a e fai atu i se tamaitiiti, ‘O a mai oe?’ pe a latou o mai i le potuaoga, ma e te iloa, e tusa lava pe latou te fai mai, ‘Seki,’ o le a latou faalogo lava ia te oe.”¹²

Na saunoa mai lou uso pele o Jeffrey R. Holland, “Po o a lava ou luitau, o’u uso e ma tuafafine—faalemafaufau pe faalelagona pe faaletino po o le a lava—aua e te filifili e faasaga i le taua tele o le ola e ala i le faamutaina! Faalagolago i le Atua. Taofimau i Lona alofa. Ia iloa o le a i ai le aso e susulu mai ai se malamalama ma mou atu ai le pogisa o tiga faaletino. E ui lava atonu tatou te lagonaina ‘peiseai [o i tatou o] se ipu ua nutililii,’ e pei ona fai mai ai le fai Salamo, ae e tatau ona tatou manatua, o lena ipu o loo i ai i aao o le tufuga faalelagi.”¹³

E leai se auala faigofie e iloa ai po o ai ua lamatia. O nei talavou e ili pu, pepese i le aufaipese, taaalo i au soka, pe faatau oloa pe a tuua le aoga. Latou te o mai i le lotu, o nisi o i latou—o i latou o uo a ē o loo o mai i a outou vasega, e ui o nisi ua leva e le’i toe o lava i se lotu. Ae o loo i ai ni mea e laugatasia ai: lē fiafia, se suega e le pasi, se faigauo ua faauma, o le tele o le faasaua ma le faapalopalo, atuvalega faaakatemia, ma le mea tatou te ono ta’ua o le faanoanoaga faaletalavou.

E mamafa tele i le Ekalesia le pule i le ola o tupulaga talavou, ua fatuina ai se uepisaite e i ai faamatalaga, vitio i luga o le initoneti, o fesoasoaniga mo i latou e lagonaina le tuuatoatasi, laina fesoasoani, ma se lisi o faailoilo o lapataiga lea e pei o Hati, o se valaau mo se fesoasoani.

Ia faamasani i nei punaoa ma o le a e faataunuu atili ai lou valaauga o se “aoao ua maliu mai le Atua.”¹⁴

E mafai faapefea ona tatou fesootai atu i le o loo mafatia e faapea o loo silafia e le Alii [ona] lagona? Ua Ia tauaveina ou lava luitau patino ma measese i Ona luga. O loo Ia tauaveina mo oe ina ia i ai ia te oe Lē o le a auauna atu ma le malamalama atoatoa i le vaega o loo e tiga ai ma pe aisea.

O se malamalama tele atu ia Iesu Keriso o le a fesoasoani ia i latou ua fai ifo i lalo le faamoemoe. O Lona alofa mo i latou ma le nofoaga taua tele ma le faaeaina ua Ia saunia mo i latou i faavavau o se savali o le faamoemoe. E alofa o Ia ia i latou. E manaomia ona latou iloa lena mea. Ua ta’ua i tusitusiga paia, “O Aʼu o le Alii ua Ou faatasi ma outou, ma o le a tu i tafatafa o outou.”¹⁵O Lana folafolaga ina ia i ai iina e le o se folafolaga pepelo pe mo na o i latou e leai ni faafitauli po o ni sui foi o le aufono a le seminare. O le a tu o Ia i talaane o tamaiti taitasi—o a tatou talavou, ma i tatou taitoatasi mo lena vaega—i o tatou taimi sili ona faigata. O le mana lena o le Togiola, ma e manaomia ona tatou aoao atu ma le malosi ia pa’i atu ai ia i latou o loo mafatia.

O loo faamalolo e Iesu Keriso se fafine.

Fesoasoani i tamaiti aoga ia iloa se “mau e puipuia ai,” o se mau latou te manatua pe a latou oo i se tulaga faigata pe manaomia ai foi le malosi e laa ese ai. “Ia fiafia, ma aua le fefefe, aua o Aʼu o le Alii ua Ou faatasi ma outou”¹⁶o se mau lelei.

O le olaga e tumu i taimi uma i luitau. E leai se tasi e puipuia mai ai. E le o oe, e le o au, ma e le o i latou. E mafatia nisi talavou ona latou te manatu e na o i latou o loo i ai faafitauli. O isi tagata uma e foliga mai o loo lelei mea uma. Latou te talitonu sese i le manatu e faapea a e suesue i tusitusiga paia ma tausi i poloaiga ma tatalo i aso uma, o le a le oo atu ia te oe le lototiga, faafitauli, lē lauiloa, ma faalavelave. E le faapena le auala e fai ai. E oo mai tofotofoga ia i tatou uma.

O faafitauli, luitau, tofotofoga, mea leaga, faigata, faanoanoaga—pule a oe i le ta’uga e ta’u ai—o se vaega o lenei aafiaga faaletino ia tatou malolosi ai. O le faamanuiaga e ala i le Togiola a Iesu Keriso e mafai ai ona tatou “fiafia.”¹⁷

Aua ne’i faatagaina mea manaomia faaakatemia o aoaoga o le talalelei ia sili atu le taua ia te oe nai lo le mana o le Agaga e pa’i atu ma uunaia ai au tamaiti aoga. Ia saunia i latou ia maua musumusuga ma faatino. Ia saunia i latou e maua faaaliga faaletagata lava ia e pei ona faamamafa mai e Peresitene Nelson.¹⁸

A latou saunia, o le a latou vaaia vavega o le taitaiga ma le taiala a le Alii, o se ituaiga moni o Lona alofa.

Aisea ua ou filifili ai e talanoa atu e uiga i le pule i le ola ma ana soātau ia o le—fefe, tuuatoatasi, faanoanoa, atuatuvale, ma le tiga—i se faatulagaga migao e pei o lenei? Ona ua outou i ai i le vaega, ou uso ma tuafafine pele, o “tagata e muamua tali atu,” ma afai e leai, ou te valaaulia outou ina ia avea ai. O le pule i le ola ma ana soatau leaga, e moni. O loo faateteleina i a tatou talavou i se fetuu o loo faatosina ai e oo lava i e ua filifilia o e o talavou ma faatumulia i le folafolaga i le talitonuina o le olaga e leai sona faamoemoega mo i latou. E leai se mea o toe mamao mai le upumoni.

O le olaga e maaleale. Tatou te le iloa po o le a le taimi o le a tupu ai se mea i se tasi lea tatou te matua tetei ai. Tatou te lagona le le saunia ma le le iloa o le mea e fai. Ae afai latou te o mai mai se aiga o tatalo faaleaiga, suesueina o tusitusiga paia, ma afiafi faaleaiga, o lona uiga la o meafaigaluega mo le “pipiimau” o loo mausali ma malolosi atili. Peitai, aua ne’i faia le measese e faapea atonu e le o i ai se tasi o a tatou talavou i se tulaga lamatia e tusa lava po o mausali nei mea uma. Sa tali mai se tasi o alii talavou i se gaoioiga o se afiafi faaleaiga lea sa talosagaina ai tagata taitasi o le aiga e tusi i lalo se mea se tasi sa taua ia i latou. Sa tusia e le tamaitiiti 14 tausaga le matua lea sa foliga mai na ia te ia mea uma na ia manaomia, “Ia iloa o loo i ai se tasi iina mo au.”

E i ai sa’u uo mamae sa le’i auai i le seminare seia oo i le tausaga faaiu i le aoga maualuga. Sa le’i auai o ia i le lotu; sa le’i alu talu mai lona 13. I le avea ai ma se tagata pese, sa tonu ai ia te ia e taumafai mo le aufaipese a le seminare, ma sa faamanuiaina o ia. (E faamanuiaina tagata uma i le aufaipese a le seminare!) Na te le manatuaina se lesona se tasi i le vasega. Peitai, o taimi uma latou te pepese ai, sa faatumulia le potu i le Agaga, ma sa ia iloa sa ese lenei mea mai le aufaipese a le aoga sa pese ai o ia i le isi pito auala. Sa ia lagonaina se mea na te lei lagonaina muamua. Na ia lagonaina le Agaga. O le sau mai se aiga malepelepe sa leai se aoaoga faaletalalelei, sa le masani ai o ia i le Agaga. Sa amata ona ia faamemelo i ai ma faalagolago i ai. Sa mausali o ia i le talalelei a Iesu Keriso ona “sa i ai se tasi iina mo ia.” O le taimi nei, i ni tausaga mulimuli ane, o loo ia talanoa pea ma lana faiaoga seminare, o le sa avea ma “aoao na maliu mai le Atua.”¹⁹

Mo i latou e te aoaoina e leai sa latou lagolago faavaega, lena malosiaga i le aiga, o au aoaoga e oo ina taua i lo latou tulaga manuia. Atonu o i latou ia e fesili faalilolilo i se fesili tau ina ia auai ai i se talanoaga atili o le talalelei ona na o le pau lea o le taimi latou te maua ai lena fesootaiga faaleagaga i lo latou aso. Ia faapelepele, faamolemole, i na avanoa, ma fai se taimi mo i latou.

O le faamalologa e sau mai le Faaola, o lē na “afio ifo … i lalo o mea uma”²⁰ina ia mafai ona Ia silafia “e tusa ai ma la le tino, le ala e fesoasoani ai i ona tagata, e tusa ma o latou vaivaiga.”²¹

Mafaufau i le taimi na fafaga ai e Iesu le lima afe i ni nai i’a ma nai areto mai se meaai a se tamaitiiti ona afio atu lea i luga i le mauga e tatalo ai na o Ia. Sa malaga atu Ona soo i le sami o Kalilaia, ma a o gasolo le po sa afio atu Iesu ia i latou ma savali i luga o le vai. I le vaai atu ia te Ia, sa latou “uio ai lea i le matatau,”²²ona ia tali atu lea, “Ia outou loto tetele; o a’u lava, aua tou te matatau.”²³

Ina ua oso atu ma le lototoa Peteru i le itu o le vaa i lena po i le valaaulia a le Alii ma amata ona savali i luga o le vai, sa tumu o ia i le lototele seia oo ina ia tepa i lalo ma vaai atu i le sami sousou ma galuā. Ona ia uio ai lea i le matau.

Sa aapa atu Iesu ia te ia e le i le ita ae i le agaalofa. Sa faamatala e Moronae o tatou lava faaletonu i le “Ia sii ae oe i luga e Keriso, ma talosia ia mau e faavavau i lou mafaufau ona mafatiaga ma lona maliu, … ma lona alofa mutimutivale ma le tali-tiga, ma le faamoemoe o lona mamalu ma le ola faavavau.”²⁴

Sa talanoa mai o Ia ia i tatou ona o i tatou uma o loo i ai i luga o le vai.

I se isi faatulagaga mai le Feagaiga Fou, sa potopoto ai se vaega faataamilo i se tamaloa ma’i “supa, ua taoto i le moega.”²⁵Sa silasila atu le Alii o Iesu Keriso i le tamaloa ma’i ma lagona le faatuatua o i latou na siomia o ia ma fetalai atu, “Ina faalototele ia oe.”²⁶

I lenei tisipenisione mulimuli sa fetalai ai Iesu Keriso e ala mai ia Iosefa Samita i Ana auauna o e na o atu i misiona ma feagai ma mea matautia ma faalavelave, ua faapea atu, “Ia fiafia, le fanau iti e; ona ua Ou i ai i lo outou lotolotoi.”²⁷

Sa vaai Iosefa Samita i se faaaliga i Aposetolo i a latou misiona i Egelani “ua tutu faatasi i se lio, ma le vaivai tele, ma o latou lavalava masaesae ma vae fulafula, ma mata o loo tetepa ifo i lalo, ma sa i ai Iesu i lo latou totonugalemu, ae latou te lei vaai ia te Ia. Sa silasila ifo le Faaola ia i latou ona tutulu ai lea.”²⁸

O e vaai i le mamanu? O le mana gafatia o Keriso ua faailoa i le ala faigofie o loo i ai o Ia iina mo i tatou. Po o a lava mea e oo mai, o le a faatasi o Ia ma i tatou, o le a Ia faamafanafana i tatou, ma o le a Ia faamalolo i tatou pe afai tatou te o mai ia te Ia ma utuvai i Lona mana e laveai ai i tatou. E tele lava ona Ia faamalolo i le loto manua. E faapefea ona tupu, tatou te fesili ai? E ala i le mana o le Togiola e faaaogaina i o tatou olaga i le taimi nei, e le o le faaiuga a o lei faia le faamasinoga mulimuli, ae o aso uma pe a tatou saili atu ia avea e pei o Ia, ia fiafia i mea e fiafia i ai o Ia, ia mulimuli i Ana perofeta filifilia.

A ou suesueina le Togiola, ou te taumafai lava e vaai faalemafaufau i le tulaga matautia o mea a o tootuli ai le Faaola i le Faatoaga o Ketesemane. Ma sa Ia tatalo, “ua faapea atu, Lo’u Tama e, a e finagalo i ai, ia e aveese lenei ipu ia te au: a e aua le faia lo’u loto, a o lou finagalo.”²⁹Sa Ia fetalai e uiga i Ona puapuaga: “O le ā le tetele o le tiga e te le iloa, o le ā le malosi e te le iloa, ioe, o le ā le faigata ona onosaia e te le iloa.”³⁰E ao ona malamalama a tatou talavou i lena faamatalaga loloto.

faamafanafana e agelu Iesu Keriso i Ketesemane

“Ona faaali mai ai lea ia te ia o le agelu mai le lagi, ua faamalosi ia te ia.”³¹

I Ona mafatiaga, i le tauaveina o le mamafa o a tatou agasala uma i Ona luga, o o tatou aso leaga, o tatou vaivaiga ma ni le fiafia, sa faaali mai ai se agelu ma faamafanafana ia te Ia. I o outou mafatiaga matuia, uso e ma tuafafine, ua saunia e le Alii “[agelu e] si’o faataamilo outou …, e sapasapai outou i luga.”³²Faiaoga pele, atonu o oe o lena agelu.

I le Tausamaaga Mulimuli sa tuuina atu ai e le Faaola le manino o Lana misiona ma folafola atu le filemu e faapea, “E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”³³I Lona mautinoa tele o mea o loo taoto i luma atu, i Lona mautinoa tele o Lana vaega i le faataunuuina o le fuafuaga sili o le faaolataga lea na Ia uunaia ai Ona soo, “Ia outou loto tetele” [ma fiafia].”

Sa matauina e Elder Neal A. Maxwell: “O le tiga e le mafaufauina i Ketesemane o le a oo ifo i luga o Iesu; o le faalataina e Iuta o le a oo ane. Ona oo mai lea o le moliaina ma le faamasinoga o Iesu; o le faataapeapeina o le Toasefululua e pei o mamoe; o le sauaina matautia o le Faaola; o le faamasinoga le tonu; o le alalaga atu o le motu o tagata mo Parapa nai lo Iesu; ma le faasatauroga matautia i Kalevaria. O le a le mea sa i ai iina e fiafia i ai? E pei lava ona fetalai Iesu: Ua Ia manumalo i le lalolagi! O le Togiola o le a avea ma mea moni. O le toetutu o tagata uma sa faamautinoa mai. O le oti lea o le a faatoilaloina—ua le mafai e Satani ona taofi le Togiola.”³⁴

E mafai ona tatou aoao atu le upumoni lea na ta’ua e Peresitene Russell M. Nelson: “A aunoa ma le Togiola le i’u a lo tatou Faaola, e leai ma se tasi o i tatou e maua le faamoemoe e toefoi atu i lo tatou Tama Faalelagi. Ana le seanoa ma Lona Toetu, o le oti lava la le mutaaga. O le Togiola a lo tatou Faaola ua mafai ai ona maua le ola e faavavau ma avea ai le tino ola pea o se mea moni mo tagata uma.”³⁵

Mafaufau loloto pe mafai faapefea ona e faaulufiaina loto o au tamaiti aoga i le malosiaga o le Faaola, le alofa mo i tatou uma, ma le faaaloalo mo le mamanu paia a le Tama. Tatalo ia fesoasoani atu ia i latou ia iloa le Togiola a Iesu Keriso e mo i latou ma le uiga o lena mea i o latou olaga lavelave.

Uunaia auaunaga i totonu o le malo o le Atua lea e aumai ai faatasi ma le Agaga o le Atua.

I le auauna ai ma taitai i le Matagaluega o Malumalu a le Ekalesia mo ni tausaga, ou te fiafia lava i le auai ai i le malumalu ma vaaia laina—o alii ma tamaitai talavou—o ulufale atu i le malumalu e fai papatisoga mo e ua maliliu. A o outou faamamafaina le mana o le malumalu i a outou aoaoga, tou te toefaamalosia lenei avanoa e tatau ai ona latou iloa Iesu Keriso, ia iloa o Ia o le puna o lo latou “fiafia” [ma le lototele].

Ou te talisapaia le faatupulaia o le numera o talavou matutua faato’a maua faaeega paia o loo auauna atu o ni tagata faigaluega o le malumalu. E laei papae uma, i se nofoaga toafimalie ma filemu, latou te tutu i luga o eleele paia ma molimau atu ia te Ia, sa Ia, o loo Ia, ma o le a afio mai o Ia.³⁶O la tatou auaunaga i le Alii i totonu o le malumalu o se auala moni e tasi e lagona ai le latalata mai o le Faaola.

Ia uunaia au tamaiti aoga ia umia i taimi uma se pepa faataga o le malumalu—e faatapulaa le aoga pe o se pepa masani e faalagolago i le tausaga ma tulaga—ona faasoa atu lea o o latou lagona e uiga i le i ai i totonu o le malumalu, o se faaaliga ma se musumusuga e oo atu a o latou aapa atu i tala atu o lenei olaga “mo mea o se lalolagi sili atu ona lelei”³⁷i le auauna atu ia i latou e le mafai ona faia sauniga mo i latou lava.

Sa saunoa mai Peresitene Nelson pele, “Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”³⁸

Ina ua faauuina a’u o se Aposetolo, sa saunoa mai Peresitene Monson o le a avea a’u ma se molimau faapitoa o le suafa o Iesu Keriso i le lalolagi atoa. Sa le’i mama ia te a’u lena poloaiga. Sa ou matua suesueina tusitusiga paia ia iloa le Alii i Ona suafa ma faalagiga. O nei suafa uma o le a ou faasoa atu ia te outou e mai fuaiupu o tusitusiga paia ua faamanatu mai ai ia i tatou lo tatou faamoemoe o loo ia te Ia. O Ia o le:

Faamoemoe o Isaraelu.³⁹
Fetu Ao Pupula.⁴⁰
Leoleo Mamoe Lelei.⁴¹
Faipule.⁴²
Aloalii o le Filemu.⁴³
Faaola.⁴⁴
Malamalama o le Lalolagi.⁴⁵
Faitaulaga Sili o mea lelei atali.⁴⁶
Malosi e faaola.⁴⁷
O Le ua i ai le mana uma.⁴⁸

O le faatosinaga ma le aafiaga o Keriso e maoae. E i ai o Ia iina pe a tatou vaivai ma tauivi e agai i luma. Ma afai tatou te pauu, o Lona “malamalama ua susulu i le pouliuli”⁴⁹—o le isi Ona suafa lea—e pupula atu nai lo se isi lava taimi muamua. E alofa o Ia ia i tatou i o tatou taimi lelei ma taimi faigata.

O le avea ma se soo o Iesu Keriso, e le o se mea e tau matemate. O Lona ala ua faailoga lelei i Ona tulagaaao. Pe a tatou mulimuli ia te Ia, o le a tatou fiafia i mea e fiafia i ai o Ia. A o tatou faafouina a tatou feagaiga ma Ia i vaiaso taitasi i le aai i le faamanatuga paia, tatou te tuputupu ae i le malamalama ia te Ia o le Togiola o le Lalolagi,⁵⁰le Agaga o le Upumoni,⁵¹o le Afioga.⁵²

Aoao atu le mana o le faamanatuga i au tamaiti aoga, aemaise lava i latou e masalosalo ma i latou e manatu mama i lenei sauniga taua. Ia avea le faamanuiaga o le faamanatuga, ia “maua pea Lona Agaga e faatasi ma i tatou,”⁵³o se mea e te talanoa i ai ina ia avea le utuvai mai le mana faamalolo o Iesu Keriso, e ala i Lana Togiola, o se mea moni.

Ma le isi, na faasino atu le Faaola ia te Ia lava e ala i saunoaga na faaalia ai uma Lona natura paia ma Ana matafaioi e faavavau:

“Ia filemu ma iloa o A’u o le Atua.”⁵⁴
“E mafai ona Ou faia outou ia paia.”⁵⁵
“Ou te faia [le] finagalo [o le Tama].”⁵⁶
“O Au, le Alii, … [e] fiafia e faamamalu i latou o e e auauna mai ia te a’u.”⁵⁷
“Ua lava lo’u alofa tunoa mo outou.”⁵⁸
“O le a e maua le filemu ia te a’u.”⁵⁹
“Aua le matata’u … aua e a a’u lava outou.”⁶⁰

Uo pele, uso e ma tuafafine, o le Faaola lena ou te iloaina, ou te alofa ma faaaloalo i ai ma lou loto atoa. Mai le taele o lo’u agaga ou te molimau atu ia te Ia ma Lona agalelei ma le alofa mutimutivale. Na Ia folafola mai, “Ona o outou o aʼu uo, ma o le a outou maua se tofi faatasi ma aʼu.”⁶¹

I le mea moni lava, uso e ma tuafafine, o Iesu Keriso o le tali lava lea i taimi uma. O le malamalama ai i Lana misiona ma Lana talalelei, o lo tatou alofa mo Ia, ma lo tatou talitonuga ma le faalagolago ia te Ia, tatou te maua ai le malosi.

Sa faamatala lelei e Helamana: “Ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”⁶²

Ou te tuu atu la’u faamanuiaga ia outou lagonaina le alofa o le Alii i o outou olaga ma ia outou fesoasoani i a outou tamaiti aoga ia lagona foi lea mea e tasi. Ou te faamanuia ia te outou ina ia i ai le faamoemoe ma le “fiafia” ina ia mafuta le Agaga o le Alii ma outou, musuia, ma siitia outou. Ou te faamanuia ia te outou ia faalogo i o outou tamaiti aoga, ia lagona mea latou te le ta’u maia faapea ai ma mea latou te faailoa maia, ma ia maua le musumusuga e iloa ai mea e finagalo le Alii e te faia. Ou te faamanuia i o outou aiga, o a outou ava ma a outou tane. Tau ina ia outou iloa le faaaloalo, faalagolago, ma le alofa o o’u uso i le usoga ma au nei mo outou ma le galuega taua o loo outou faia i le aumaiga o agaga ia Keriso. Ma ia outou lagonaina le Alii o tu i o outou talaane a o outou molimau atu e uiga ia te Ia, le Faaola o le lalolagi. O Iesu Keriso o le tali lava lea i taimi uma.

I le suafa, o Iesu Keriso, amene.