耶穌基督就是答案
與總會持有權柄人員一夕談•2019年2月 8日•鹽湖城大會堂
親愛嘅兄弟姊妹，所有喺聖殿廣場大會堂現場嘅人，以及世界各地聚集喺一齊嘅人，羅斯本姊妹同我好榮幸能同大家喺埋一齊。我諗起我嘅福音進修班及研究所教師，佢哋對我嘅影響改變咗我嘅人生。甚至到咗今日，我仍然可以睇到我嘅教師對於我研讀經文嘅方式，尤其係我對摩爾門經嘅熱愛所產生深刻嘅影響。
我亦珍惜能夠同朋友身處喺一個安全嘅地方，喺福音環境入面快樂咁聚埋一齊嘅社交經驗。我哋高中嘅時候會聚喺福音進修班大樓，而大學嘅時候會聚喺福音研究所。我特別期待帶住美樂妮·特威切爾去參加福音研究所嘅舞會。美樂妮而家係我好靚又美好嘅太太。
身為福音進修班及研究所嘅教師，你哋長時間咁工作去帶領靈魂歸向耶穌基督。你哋為學生祈禱；你哋研讀，使自己能夠回答學生嘅問題；你哋喺靈性上準備好，使自己能藉住聖靈教導；你哋提升學生同埋好投入咁闡明福音真理。
當主喺揾人幫助陷入困難嘅學生，處於危險邊緣嘅青少年，以及見證同理解力日益衰退嘅寶貴兒女嗰時，佢已經準備咗你哋企出嚟同父母以及教會領袖並肩合作。你哋企喺學生嘅面前，再次重申以下嘅真理，即係耶穌基督活著，天父愛我哋每一個人，以及我哋喺佢嘅永恆計畫入面有一席之地。最重要嘅係，你哋真係相信呢啲事情。
你哋就好似傑佛瑞·賀倫長老成日講嘅，係「由神那裏來作師傅的。」1
「有多少人......被引領而歌頌救贖之愛？這都是因為祂在〔你〕裡面的話語的力量，所以〔你〕難道沒有好理由高興嗎？
「是的，〔你〕有理由永遠讚美祂，因為祂是至高之神。」2
但係有時候提升、教導同鼓勵青少年呢項重擔，幾乎超出你哋所能承受嘅。主知道，呢項帶領靈魂歸向佢嘅事工可能會好艱難。我喺紐約市擔任傳道部會長嗰時學到呢件事，嗰時阿爾瑪書嘅呢節經文同我我嘅靈魂產生共鳴：「當我們心情沮喪，而我們在回去，看啊，主安慰我們，並說：到你們的弟兄......那裡去，耐心忍受你們的痛苦，我必賜你們成功。」3
撒但對於目前為止佢對神喺世上嘅國度入面所造成嘅負面影響，並唔感到滿足。佢想要更多。佢野心勃勃又無情。佢想得到你負責照顧嘅嗰班人，我哋喺某啲人身上睇到，佢哋「嚇得魂不附體。」4
有啲學生偏離咗正道，但係藉住主嘅靈，你可以幫助佢哋番返去正軌。要記住保羅嘅話：「我們四面受敵，卻不被困住；心裏作難，卻不致失望遭逼迫，卻不被丟棄；打倒了，卻不致死亡。」5
點解？
因為基督嘅偉業帶住呢項永恆嘅應許向我哋招手，佢話：「凡勞苦擔重擔的人可以到我這裡來，我就使你們得安息。」6
主話：「因此，放心吧，不要害怕，因為我，主，與你們同在，會站在你們身邊；你們要為我，即耶穌基督作見證，見證我是活神的兒子，昔在今在，以後永在。」7
我哋唔可能又「放心」8，又同時處喺害怕入面。放心同害怕呢兩者係唔能夠並存嘅。如果我哋遵從主嘅命令——如果我哋放心——我哋就會從容沉著咁為佢——呢個世界嘅救主——作見證。我哋會知道佢係邊個，並認出佢喺提升我哋超越世界嘅各種變化無常嗰時，所扮演嘅獨特角色。
若果要做到放心，就要喺事情唔及我哋嘅預期嗰時信賴佢。佢嘅意思係指當艱難嘅人生曲折令我哋走上意料之外嘅方向，當悲劇同苦難粉碎我哋嘅夢想嗰時，仍然堅持落去。不過主提醒我哋，「在今世你們的快樂不完全，但是在我裡面你們的快樂是完全的。」9
你可以喺課堂上睇得出嚟，邊啲學生已經做到「放心」去過生活。佢哋仍然有挑戰同問題，但佢哋懷住信心同對神嘅信賴去面對。佢哋坐喺課堂上，熱切咁想去回答問題，希望能夠知道所教導嘅真理，並對自己嘅身份有自信。對佢哋嚟講，「我是神的孩子」10既係一種知識，亦係一種安全，而唔單只係好耐以前喺初級會唱歌嘅記憶。佢哋嚟上堂去尋求靈性嘅經驗、見解同背景，幫助佢哋釐清自己嘅疑問。當佢哋行走喺呢個充滿爭論嘅世界嗰時，佢哋希望自己嘅盼望會得到強化；並且喺面臨好多嘅壓力，佢哋眼中嘅光芒會戰勝日常生活嘅辛勞。
我喺福音進修班及研究所嘅日子——呢個似乎係好耐以前嘅事——嗰時學生懷住信心嚟上課，或者對我嚟講係咁。佢哋唔會受互聯網上發現嘅事所苦惱，因為嗰時冇互聯網。佢哋嘅背囊入面唔會裝住世界丟俾佢哋嘅種種關於宗教、啟示、先知或對神嘅信心嘅疑慮。
咁對於嗰啲坐喺最後一排將塊面埋喺書入面瞓覺嘅人呢？或者對於嗰位最近剪咗頭髮，唔會正眼望你嘅女仔呢？對於嗰兩個以往會談笑風生咁行入課室，但而家就幾乎冇對話嘅嗰兩個人呢？對於嗰位似乎對討論福音唔感興趣，缺席次數比出席多嘅明星學生呢？對於嗰啲面無表情、眼神空洞同一啲都唔努力學習嘅人呢？有啲學生嚟上課，坐低......，然後靜雞雞走出去，冇帶走任何嘢——甚至連聖靈都冇。壓力、恐懼、誘惑、危機同失望佔據咗佢哋寶貴嘅生活。
你係咪曾經問過自己：「發生咗咩事？」我問過！
害怕同絕望就係而家嘅情況。驚唔被朋友接納。驚學業表現、壓力，以及無法解決嘅家庭問題。驚唔能夠信賴任何人，亦驚冇人信賴佢哋。驚孤獨，亦驚喺群體入面。驚自己係別人嘅負擔。驚有組織嘅宗教或係任何宗教。驚自己嘅痛苦冇解決之道或係無辦法舒緩。恐懼會引發沮喪同絕望、焦慮同憂鬱；害怕會助長挫折感，做出唔好嘅結論。恐懼會令人相信，冇人會了解，更慘嘅係，甚至冇人會問「發生咗咩事？」
好不幸嘅係，好多種形式嘅恐懼以最殘忍嘅方式收場——亦即係自殺。
猶他州州長喺上年組織咗一個工作小組嚟解決青少年自殺攀升嘅問題，佢請羅素 ·納爾遜會長指派一位教會領袖嚟參與呢項服務。納爾遜會長指派我擔起呢項重責大任。我學習到冇人能夠倖免。青少年自殺係遍及世界各地嘅一項危機。統計數據顯示，自殺而家係 15歲到24歲青少年死亡嘅三大主因之一。「企圖自殺的件數是超過順利自殺的20倍。」11我親愛嘅弟兄姊妹，呢啲都係殘酷嘅統計數據。
我哋必須要面對呢項議題。身為耶穌基督後期聖徒教會嘅成員，我哋必須下定決心會盡一切所能，去改變自殺就係答案呢種思維，呢種回應方式值得我哋深思。我哋必須同青少年談論自殺，並且愛佢哋，使佢哋唔會想用自殺嚟解決痛苦。多馬·孟蓀會長嘅一生體現出「去救援」呢句說話，我哋需要將呢件事當做係我哋嘅責任。
而呢啲正係神為我哋每一個人所做嘅。佢前嚟藉住贖罪拯救我哋，只要我哋願意歸向佢，佢會不斷表達呢種深厚嘅愛嚟醫治我哋、鼓勵我哋，為我哋帶嚟平安。
如果嗰啲就係青少年所需要嘅，我哋可以表達愛，幫助佢哋結識朋友，聆聽佢哋，用仁慈嘅言語或舉動揾出佢哋。我哋可能需要同佢哋嘅父母同主教攜手合作，針對內心掙扎、憂鬱或其他心理疾病獲尋求諮詢服務。我哋可以為佢哋嘅生命帶嚟改變。尤其係對性別議題感到掙扎嘅青少年同年輕單身成人，佢哋特別脆弱，容易自殺。佢哋需要被救主嘅臂膀環抱，並知道佢哋係被愛嘅。所以主成日要我哋採取行動；佢期望我哋成為佢友善、充滿愛心嘅雙臂。我哋需要鼓勵呢啲人嘅朋友亦去咁樣做。
自殺同問題冇得到解答而感到痛苦、憂傷、悲傷、揣測以及不知所措息息相關。呢啲生命嘅喪失都係可怕嘅悲劇，所以我哋呢群人必須用嶄新同更有效嘅方式嚟商議，表達關心同關懷，去親近同支持我哋嘅青少年。當你同一個已經失去希望嘅人處喺危險嘅環境入面時，試下講出「耶穌基督」呢個名。只要以虔敬嘅態度用呢個名字呼求佢，就能夠喺艱困嘅時刻起好大嘅作用。
有啲社區正面臨所謂嘅自殺「群集效應」，亦即係一位青少年採取咁劇烈嘅舉動，而其他人睇到亦跟住模仿。
請俾我同各位分享2018年4月BBC新聞轉播嘅一個英國青少年嘅故事。呢個故事係關於16歲嘅海蒂·史帕納索斯，佢「曾經企圖自殺。如果唔係一位老師注意到她睇起嚟好唔開心，佢原本會再度嘗試，而且可能會自殺成功。」佢嘅三個朋友已經了結咗自己嘅生命，佢呢兩年一直受嚴重嘅抑鬱所苦。
海蒂話：「我大部分時間都非常悲傷，冇辦法入睡。」咁樣嘅黑暗持續籠罩。佢嘅父母分開咗，而佢嘅媽媽由於一連串健康上嘅問題而多次進出醫院。當所有人將注意力集中喺佢嘅媽媽嘅時候，冇人注意到海蒂越嚟越感到絕望。冇人問佢：「你好嗎？你覺得點呀？」
有一日佢著咗一件好難睇嘅T恤行入課室，佢啱啱仲剪咗頭髮。佢嘅老師問：「嗨，你還好嗎？最近過得好嗎？」
海蒂答，「還可以。」但係海蒂冇就咁就停。有人注意到佢。佢話：「其實我覺得好差，我真係好唔開心。我一直喺度喊。」
跟住佢係咁喊，佢面上嘅妝都溶咗。但係咁樣並唔重要，因為有人向佢伸出援手。
呢位教師問咗一個佢問過好多小朋友嘅簡單問題，但係喺送出佢關心嘅訊號嗰時，海蒂捉住咗呢條救生索。海蒂得到咗幫助。
海蒂後來解釋話：「嗰件睇起嚟似乎係件小事，但係卻具有不可思議嘅力量，你喺學生入教室時，對某個小朋友講：『你好嗎？』，就算佢哋答，『還可以，』佢哋已經聽到你嘅關心喇。」12
我親愛嘅傑佛瑞 ·賀倫長老曾經講過：「我的兄弟姊妹們，不論你的困難是什麼——是精神上、身體上或是其他方面的問題——不要對寶貴的生命投下反對票，不要結束自己的生命！要信賴神。相信祂的愛。要知道有一天黎明會破曉、大放光明，今生的所有陰影都會消逝不見。雖然我們可能覺得自己好像是詩篇作者所說的『破碎的器皿』，我們卻一定要記得，這個器皿是在那位神聖窯匠的手中。」13
冇一個樣板會俾你知邊個喺目前處於危險狀況。呢啲青少年會吹樂器、喺唱詩班裡面唱歌，參加足球隊，或係喺放學後負責裝貨品入袋嘅職員。佢哋嚟到教會，有啲係你班上學生嘅朋友，不過佢哋有啲人好早以前就將宗教放喺一邊。但係有啲常見嘅線索：失望，考試成績差，情侶分手，多次被欺凌、學業壓力，以及我哋所謂嘅青少年不幸事件。
教會好認真咁看待青少年自殺，製作咗一個網站提供資訊、線上影片、俾感到孤單者嘅建議、求助專線同預警訊息清單，就好似海蒂所發出嚟嘅求救訊號一樣。
要熟悉呢啲資源，會讓你更進一步咁履行身為「由神那裏來作師傅的」14呢項召喚。
我們要點樣同某個正喺到受苦嘅人溝通，令佢明白主知道佢嘅感受？主已經將你個人嘅挑戰同過錯承擔喺佢身上。佢已經為你扛起呢啲擔子，好讓你有一個能夠完全了解你嘅痛苦情形同原因嘅人嚟施助。
更加認識耶穌基督，會幫助嗰啲正向下墜落嘅人。基督對佢哋嘅愛，以及佢喺永恆世界已經為佢哋準備好美妙絕倫、超升嘅處所，就係帶嚟希望嘅信息。主愛佢哋。佢哋需要知道呢一點。經文記載：「我，主，與你們同在，會站在你們身邊。」15主會喺我哋身旁嘅呢項應許並唔係空談，或只保留俾嗰啲品行完美無瑕或坐喺福音進修班議會席位嘅人。喺最艱困嘅時刻，主會企喺我哋每一個青少年身邊，同我哋每個人身邊。呢個就係贖罪嘅力量，我哋需要有力咁教導呢啲事，使呢種力量能傳達到去嗰啲正喺度受苦嘅人。
要幫助學生揾出一節「保護的經文」，一節當佢哋處喺危險情況或需要跨出去嘅力量嗰時，能夠喺腦海入面諗起嚟嘅經文。「放心吧，不要害怕，因為我，主，與你們同在，會站在你們身邊」16就係一節好好嘅經文。
人生始終充滿挑戰，冇人能夠倖免。你唔會，我唔會，佢哋都唔會。有啲青少年受苦，係因為佢哋認為自己係唯一有煩惱嘅人。其他人似乎擁有一切。佢哋有咁樣嘅諗法，認為如果你每日研讀經文、遵守誡命同祈禱，咁樣心痛、混亂、唔受人歡迎同意外事故就唔會臨到你。事情並唔係咁樣嘅。考驗會臨到每個人。
問題、挑戰、考驗、苦難、艱困、不幸——無論你點樣稱呼呢啲嘢——都係塵世經驗嘅一部分，能夠使我哋堅強，增進我哋。而嗰個祝福係，透過耶穌基督嘅贖罪，我哋仍然可以「放心。」17
唔好俾福音教導方面嚴格嘅學術要求，比令聖靈嘅力量感動同鼓勵你嘅學生更重要。要幫助佢哋準備好獲得靈感同採取行動。要幫助佢哋準備好接受個人啟示，就好似納爾遜會長所強調嘅。18
當佢哋咁樣做嘅時候，佢哋就會體驗到獲得主嘅指示同指引嘅奇蹟，而嗰啲係佢嘅愛嘅一種真實表現。
喺呢啲咁虔敬嘅場合，點解我會選擇談論自殺同相關嘅感受，例如害怕、孤單、絕望、焦慮同痛苦？因為親愛嘅弟兄姊妹，你哋係屬於「急救先鋒」部隊，如果唔係，我要邀請你哋加入。自殺同相關嘅黑暗感受確實係存在嘅。呢啲嘢正喺我哋嘅青少年中間造成越嚟越多嘅災難，甚至誘騙有大好前途嘅神嘅年輕精選子民，相信人生對佢哋係毫無目的嘅。呢啲絕對唔係事實。
生命係脆弱嘅，我哋唔知道幾時會有咩事發生喺某個人身上，完全出乎我哋嘅意料之外。我哋覺得冇準備好，不知所措。但係如果佢哋係嚟自會舉行家庭祈禱、研讀經文同家人家庭晚會嘅家庭，咁樣呢啲能夠讓人「持守下去」嘅工具就已經穩固咁準備好喇。但係請唔好錯誤咁認為，如果佢哋都喺度做呢啲事情，青少年就唔可能有危險。有位男青年喺家人家庭晚會嘅一項活動，寫低佢嘅回答。每個人都要寫低對佢哋嚟講好重要嘅的一件事。呢位似乎擁有所需嘅一切嘅十四歲男仔寫道：「就係知道有人關心我。」
我有一位好嘅朋友，喺佢高中最後一年之前都冇去參加福音進修班。。佢由 13歲開始就一直冇番教會。由於佢鍾意唱歌，佢決定試試加入福音進修班嘅唱詩班，佢被錄取咗。（所有人都會被錄取！）佢唔記得上堂教過嘅嘢。但係每次佢哋唱歌嗰時，聖靈充滿咗成間房，佢知道呢個同佢喺對面街嘅學校唱詩班唔一樣。佢感覺到一啲從來未有過嘅感受。佢感受到聖靈。佢嚟自冇福音教導嘅破碎家庭，所以佢唔了解聖靈。佢開始珍惜同仰賴聖靈。佢對耶穌基督嘅福音有穩固嘅見證，因為「有人關心佢。」而家好多年後，佢仍然好多時同佢嘅福音進修班教師傾偈，呢位教師係「由神那裏來作師傅的。」19
對於嗰啲你所教導而冇支持網絡，喺屋企冇鞏固力量嘅人，你嘅教導對佢哋嘅福祉而言就變得極為重要。佢哋可能係會為咗能有更進一步嘅福音討論而私下提出問題，，因為嗰啲係佢哋喺生活裡面唯一能夠有嗰種靈性連結嘅時刻。請珍惜呢啲機會，並為佢哋撥出時間。
救主帶嚟醫治，佢曾「降至萬物之下」，20因此佢「因肉身，了解如何依照祂人民的軟弱來救助他們。」21
思考一下，當耶穌用一位少年嘅午餐，裡面有幾條魚同麵包嚟餵飽5千人，然後佢獨自上山祈禱嘅時刻。佢嘅門徒坐船渡過加利利海，嗰晚，耶穌喺水面上行走去見佢哋。佢哋見到耶穌，「便害怕，喊叫起來」，22佢回答話：「你們放心，是我，不要怕！」23
彼得回應主嘅邀請，喺嗰個夜晚勇敢咁從船嘅一邊跳出去，開始喺水面上行走，佢好放心，直到佢向下望，見到猛烈、翻騰嘅海浪。佢就好驚咁大嗌。
耶穌伸手拉住佢，唔係帶住嘲笑，而是懷住憐憫。摩羅乃用「願基督提升你，願祂的受難和死亡……祂的慈悲和恆久忍耐，以及對祂的榮耀和對永生的希望，永遠都留在你心裡」24呢段話，嚟描述我哋嘅搖晃不定。
佢係對我哋講話，因為兄弟姊妹，我哋每個人都好似行走喺水面上。
喺新約嘅另一個場景，有一群人圍繞住一位「〔躺在〕褥子〔上的〕癱子。」25主耶穌睇住呢個病人，感受到佢周圍嘅人嘅信心，就話：「放心喇！」26
喺呢個最後福音期，耶穌基督透過約瑟·斯密對佢出去傳教、面臨危險同災難嘅僕人話：「孩子們，放心吧；因為我在你們中間。」27
約瑟·斯密睇到一個異象，喺英國傳教嘅使徒「站在一起，圍成圓圈，顯出極度疲憊，他們的衣裳破舊和雙腳浮腫。他們的眼睛向下看，耶穌站在他們中間，而他們沒有看見祂。救主看著他們而流淚。」28
你睇唔睇到嗰個模式？基督會喺我哋身邊，佢簡單咁顯明佢呢種使人加添能力嘅力量。無論發生咩事，佢都會喺我哋身邊，佢會安慰我哋，醫治我哋，只要我哋前去佢嗰度，並汲取佢嘅力量去拯救我哋。好多時候佢會醫治受傷嘅心。我哋會問：係點樣做到？藉住喺我哋今日嘅生活運用贖罪嘅力量，而唔係喺最後審判之前嘅尾段，喺每一日我哋都尋求變得更似佢，去愛佢所愛嘅，去跟從佢所揀選嘅先知。
我喺研讀贖罪嘅時候，會試下想像當時救主喺客西馬尼園跪低，佢周圍嘅事都悲苦嘅景況。佢祈禱，「講道：『父啊！你若願意，就把這杯撤去；然而，不要成就我的意思，只要成就你的意思。』」29佢講到佢自身嘅痛苦：「多麼劇烈你不知道，多麼深切你不知道，是的，多麼難以忍受你也不知道。」30我哋嘅青少年需要了解呢句刻骨銘心嘅話。
「有一位天使從天上顯現，加添他的力量。」31
喺救主需要嘅時候，當佢背負住我哋所有嘅罪喺佢身上，我哋唔如意嘅日子、我哋嘅軟弱同失望，有位天使顯現並安慰佢。各位兄弟姊妹，喺你哋最困難嘅時候，主已經派咗「天使必在你們四周，托著你們。」32親愛嘅教師，你可能就係嗰位天使。
救主喺最後嘅晚餐之前清晰咁闡述佢嘅使命並應許平安，佢話：「在世上，你們有苦難；但你們可以放心，我已經勝了世界。」33佢好確定自己即將面對嘅事，都好確定自己喺執行偉大救恩計畫嘅任務，因此佢鼓勵佢嘅門徒「要放心」。
尼爾· 麥士維長老觀察到：「客西馬尼園裡難以想像的痛苦即將降臨耶穌身上；猶大的背叛一觸即發。接著耶穌將被逮捕並指控；十二使徒像羊般被分散；救主被可怕地鞭打，不公平的審判；暴徒尖銳的叫囂聲要求釋放巴巴拉而非耶穌；最後在骷髏山十字架上被殘酷釘死。當中有什麼好放心的呢？正如耶穌說：祂已經克服全世界！贖罪即將成為事實。全人類的復活將獲得保證。「死亡將被克服——撒但無法阻撓贖罪。」34
我哋可以教導羅素·納爾遜會長闡述嘅真理：「若果沒有我們救贖主的無限贖罪，就沒有人能對回到天父身邊懷抱任何希望。沒有祂的復活，死亡就成為終點。我們救主的贖罪讓所有人有機會獲得永生，讓不死得以成真。」35
沉思一下你可以點樣將救主嘅力量、佢對我哋所有人嘅愛，以及佢對父神聖計畫嘅敬畏，注入喺你哋學生嘅心入面。祈禱幫助佢哋明白耶穌基督嘅贖罪係為佢哋而做嘅，並對佢哋複雜嘅生活有咩意義。
鼓勵喺神嘅國度裡面服務，咁做會將神嘅靈帶入嚟。
我喺教會嘅聖殿部門服務咗幾年，我好開心去到聖殿，睇到年青嘅男女去到聖殿為死人受洗。當你喺你嘅教導入面強調聖殿嘅力量嘅時候，你就係營造良好嘅機會，令佢哋前嚟認識耶穌基督，知道佢係佢哋「放心」嘅源頭。
我感激越嚟越多新接受恩道門嘅年輕單成嚟到做聖殿工作者。佢哋都著住白色衣服，喺寧靜平安嘅環境下，佢哋企喺聖地上，見證基督，佢係過去、現在、將來都存在嘅，而且佢將會嚟到。36我哋喺聖殿入面為主服務，確實係感受到同救主接近嘅一個獨特方式。
按照年紀同情況，鼓勵你哋嘅學生要一直持有限制用途或一般嘅聖殿推薦書，然後分享佢哋喺聖殿入面嘅感受，仲有分享當佢哋跨越今生，「追求一個較好世界的事」37，為嗰啲無法自己接受教儀嘅人服務嘅時候，所獲得嘅啟示同靈感。
納爾遜會長講過：「我們若將生活的重心放在……神的救恩計畫，以及耶穌基督和祂的福音上，那麼，無論發生什麼——或沒有發生什麼——我們都會感到喜樂。」38
當我蒙召喚為十二使徒嘅時候，孟蓀會長指出我需要為全世界作耶穌基督嘅特別證人。我冇輕率對待呢個囑咐。我搏命翻開經文揾出主嘅名稱同銜頭。我即將同大家分享嘅呢啲稱號都係嚟自經文，提醒我哋可以喺佢嗰到揾到希望。佢係：
基督嘅影響力，足印可以遍及全世界。當我哋搖晃、想努力向前嘅時候，佢會嚟到。而如果我哋滑倒，佢係「黑暗中照耀的光」49——呢個係佢另一個稱號，佢嘅光勝過一切。佢喺最光明同最黑暗嘅時候同樣愛我哋。
成為耶穌基督嘅門徒並唔需要猜測要點做。佢親自行過佢要我哋行嘅道路當我哋跟從佢，我哋就會愛佢所愛嘅嘢。當我哋每星期重新同佢訂立嘅聖約，領授聖餐嘅時候，我哋會逐漸明白佢就係世界嘅救贖主50、真理之靈51，道。52
教導你嘅學生聖餐嘅力量，特別係嗰啲搖擺不定同埋認為呢項珍貴教儀係理所當然嘅人。讓聖餐嘅祝福，使「〔我〕們一直有祂的靈與〔我〕們同在」53呢句說話成為你談話嘅話題，使得透過佢嘅贖罪去汲取耶穌基督醫治嘅力量成真。
另外，救主喺一啲陳述度稱呼自已嘅時候亦顯明咗佢神聖嘅特質以及佢永恆嘅角色，好似係：
-
「要靜下來，要知道我是神」54
-
「我能使你們聖潔。」55
-
「我照〔父〕的旨意做。」56
-
「我，主，……樂於推崇……事奉我……的人。」57
-
「我對你們的恩典是充分的。」58
-
「你必在我裡面得到平安。」59
-
「不要怕，……因為你們是我的。」60
親愛嘅朋友，弟兄姊妹，呢個係我全心全意所認識、所愛、同所敬畏嘅救主。我發自靈魂深處為佢同佢嘅良善同慈悲作見證。佢已應許：「因為你們是我的朋友，你們將和我一起擁有繼承產業。」61
弟兄姊妹，事實上，耶穌基督一直係答案。當我哋明白佢嘅使命同福音、我哋對佢嘅愛、我哋對佢嘅信賴同倚靠嘅時候，會賜俾我哋力量。
希拉曼描述得好好：「我兒，記住啊！記住！你們要在神的兒子基督，我們救贖主這塊磐石上建立根基，這樣，當魔鬼颳起他的強風，是的，在旋風中射出他的箭，是的，當他所有的冰雹和強烈風暴打在你們身上時，都沒有力量控制你們，將你們拉進那悲慘與無盡災禍的深淵中，因為你們建立於其上的磐石是穩固的根基，只要人建立在這根基上，就不會倒塌。」62
我留低我嘅祝福，你將感受到主喺你生活上對你嘅愛，而你會幫助你嘅學生有同樣感受。我祝福你懷有希望同會「放心」，主嘅靈會與你哋同在，啟發同提升你。我祝福你會聆聽你學生嘅聲音，去感受佢哋有講出聲或係冇講出聲嘅嘢，並且有靈感知道主會想你點做。我祝福你嘅家庭、你嘅太太同丈夫。願你知道我哋同工嘅兄弟對你哋嘅尊敬、信賴同愛，你哋正做緊重要嘅事工去帶領靈魂歸向基督。當你為佢，世界嘅救主作見證嘅時候，亦願你感受到主就企喺你身邊。耶穌基督一直係答案。
奉耶穌基督嘅名，阿們。
© 2019 by Intellectual Reserve, Inc.版權所有。版本：11/18。「Jesus Christ Is the Answer」譯文Chinese。PD60007796 267