Taitaiga i le Faigamalaga
Afiafi ma se Pulega Aoao
Aso Lulu, 05 Fepuari, 2020
Ua ma fiafia lava e faatasi ma outou i le afiafi nei. Na ma faaaluina ma Jill le fa tausaga i tofiga faatasi ai ma tagata matagofie o Europa, ma sa ma tete’i tele ma fiafia ina ua talosagaina i ma’ua e Peresitene Nelson e toe foi mai i le OAE. Ua pei lava o le foi mai i le aiga e maua ni fesootaiga vavalalata ma outou o e ua tuuto atu ni taumafaiga se tele ma le loto e fesoasoani i tagata talavou ia aoao ma ola i le talalelei a Iesu Keriso.
O le maitauina o femilosaiga ma liliuga i a tatou faigamalaga ma faigamalaga a isi i le olaga, ua ou mafaufau ai e uiga i le faigamalaga o loo tatou i ai e agai atu i le ola faavavau. Mo i tatou ua talia Iesu Keriso ma Lana Togiola, ua talitutusa lava le mamanu o o tatou olaga. Tatou te faaali le faatuatua i le Faaola ma mulimuli ia te Ia e ui lava i luitau. Tatou te salamo i a tatou agasala, maua sauniga alagatatau, ma tumau seia oo i le iuga. Peitai, e matuai eseese lava faamatalaga auiliili o olaga taitasi, ma o luitau foi tatou te feagai e eseese lava mai lea tagata i lea tagata.
Mafaufau i le faigamalaga a le aiga o Liae i le nuu folafolaina. O le latou malaga tulaga ese, e mafai ona aumaia ai nisi o malamalamaaga i a tatou lava faigamalaga. Sa latou iloaina sa latou agai atu i se nuu folafolaina, ae latou te le’i iloaina mea uma e uiga i le taunuuga po o le auala tonu foi e oo atu ai iina. Sa latou fetaiai ma ni luitau ogaoga i le aluga o le ala. E oo ia Nifae, o le sa le’i muimui, na faamatala mai sa latou “mafatia i puapuaga e tele ma faigata e tele, ioe, sa matua tele lava e le mafai ona matou tusia uma.”1
Sa latou maua le taialaga i le ala. O le mea moni, sa ta’u atu ia Liae i le po e faapea, “e tatau ia te ia ona alu lana malaga i le vao i le aso na sosoo ai.”2 O le taeao na sosoo ai sa ia maua ai le Liahona i le faitotoa o lona faleie, lea na tuuina mai ai le taitaiga faalelagi i la latou malaga. Peitai o le i ai o le Liahona sa le’i suia le faatulagaga faanatura i le va o i latou ma lo latou nuu folafolaina. Sa le’i mimigi ai le Penisula o Arapi po o sami ia na manaomia ona latou sopoia. Sa tatau pea ona latou agai i luma i le fetaiai ai ma luitau na o mai faatasi lava ma la latou malaga umi ma faigata. Ae sa taiala lava i latou e le Liahona “i vaega aupito sili ona lafulemu o le vao,”3 ma pe afai sa latou le paie, na fesoasoani ia i latou e ui ai i se ala sa’o.4
Sa muimui Lamana ma Lemuelu ona o faigata na latou fetaiai i le malaga. O nisi o na faigata sa mafua ona o i laua lava. Peitai, e oo lava i taimi sa la mulimuli ai i le taitaiga ma malaga faalelei, sa la feagai lava ma taumafataga o aano mata o manufasi ma aso o le aasa ma le mutinitini o le la. E talitutusa ma le aafiaga a Lamana ma Lemuelu, e manatu tagata i nisi taimi e latou te lē feagai lava ma luitau, ma afai o latou faia le mea sa’o, o le a faigofie mea uma. E le o le tulaga lena. E le faapea e mafai ona faamalolosia ma taialaina i tatou, ae o le a le mafai ai ona tatou fetaiai ma ni luitau.
E ui ina sa latou malaga o se vaega, ae sa latou o foi i se malaga a le tagata lava ia. E tusa lava pe aumaia e le latou malaga i latou i le nofoaga faaletino e tasi, ae o a latou ala taitoatasi e faavavau, sa matuai eseese lava ma sa iloiloina e ala i a latou faaiuga ma faatinoga patino i le aluga o le ala.
Ua tofu i tatou ma se malaga a le tagata lava ia ma patino i lenei olaga, ae tatou te fefaasoaai foi ma isi i vaega o lena malaga. Mo se faataitaiga, o loo ua tatou i ai i se malaga faifaatasi i a tatou taumafaiga i le Seminare ma Inisitituti ma aoga a le Ekalesia. Ua i ai se tatou faamoemoega; ua tatou iloa uma le mea o loo tatou agai atu i ai, ae tatou te le iloa maagao uma po o faamatalaga auiliili uma o le ala e tau atu ai iina.
E filifili i tatou taitoatasi uma i le ala o le a tatou malaga faatasi ai ma le vaega. E mafai ona tatou muimui. E mafai ona tatou olioli. E mafai ona tatou lotofaafetai e oo lava i le lotolotoi o o latou luitau. Mo ni isi, o suiga i aiaiga po o faiga faavae o le Ekalesia e mafai ona luitauina. Sa matuai o’u fiafia lava e vaai i le ala o loo tali mai ai le S&I i suiga musuia ua faamamafaina ai le aoaoina o le talalelei e faatotonugalemu i le aiga ma lagolagoina e le Ekalesia.
O le a, ma tatou, feagai ma luitau. O le mulimuli i le taitaiga a le Alii, e mafai ona tatou faatoilalo ma aoao ai mai nei luitau. Na saunoa mai le Perofeta, “Na matua manino ona faamaonia na tuuina mai e le Alii ia i tatou le mana e fuafua i le galuega e ao ona faia, ma le malosi e tusa ai ma le tausinioga ua taatia mai i o tatou luma, ma le alofa tunoa ma le fesoasoaniga e pei ona tatou manaomia.”5
Tatou te maua taitaiga e fesoasoani ia tatou uia ai le ala aupito tuusa’o ma ui atu ai i vaega aupito sili ona lafulemu o le vao i la tatou faigamalaga. Ua tatou maua taitaiga mai perofeta. Ou te iloa o loo taitaia i tatou e perofeta, tagatavaai, ma talifaaaliga. O se faamanuiaga! O loo taitaia i tatou e le Ofisa o Aoga a le Ekalesia, ma ua ia i tatou foi ia Uso Webb, lana vaega, ma isi taitai musuia. Ma le isi, o i tatou taitoatasi ua agavaa mo le taitaiga patino a o tatou feagai ma faafitauli e fitoitonu i a tatou tofiga taitasi.
E fono faalemasina le Au Faatonu o Aoga a le Ekalesia ma le komiti faapitoa o lena Au Faatonu. I nei fonotaga matou te maua ai taitaiga ma fautuaga. Ua tatou maua foi le faamanuiaga faaletausaga o se “Afiafi ma se Pulega Aoao,” ma i le aluga o tausaga ua tatou maua ai taitaiga sili ona aoga ma patino e fesoasoani ia i tatou i la tatou malaga—i le avea ai o se faalapotopotoga ma taitoatasi.
Ou te tatalo ia tatou nofouta i taitaiga ma faatonuga mai le Alii. Ou te iloa o loo soifua o Ia ma o le a fesoasoani mai ma taiala i tatou.
I le suafa, o Iesu Keriso, amene.