Afiafi ma se Pulega Aoao: Mataina
Afiafi ma se Pulega Aoao
Aso Faraile, 7 Fepuari, 2020
Na faamanatu mai ai e Elder Bednar ia i tatou, o le aoao atu e le o le ta’u atu; e aofia ai le faalogo, maitau, ma iloatino. O loo aofia moni ai se valaaulia mo le Agaga Paia e aoao i tatou.
Fesili
Na aoao mai Peresitene Nelson lata mai nei e uiga i le taua o faaaliga patino faaletagata lava ia. O le a se mea e te aoao mai ia i tatou e uiga i le mauaina o faaaliga faaletagata lava ia?
Elder David A. Bednar
A o tatou faamamalu a tatou feagaiga, e mafai ona tatou maua le Agaga Paia e avea ma a tatou soa tumau. Ae tele ina tatou talanoa i ai ma faia e pei o le faalogo i le siufofoga o le Alii e ala i Lona Agaga o se mea e seasea tupu. E tatau ona tatou taulai sili atu ia iloa pe o a mea e mafua ai ona alu ese le Agaga. Afai o loo e faia ma ou faia le mea sili, ma tatou te le o faia ni agasala matuia, ona tatou mafai lea ona faalagolago i le Agaga Paia e taiala i tatou.
Toatele tagata e foliga e talitonu e faapea o musumusuga mai le Agaga Paia e malosi, tēlē, ma faafuasei. O le mea moni lava o le Agaga Paia e taialaina i le toamalie, itiiti, ma faaopoopoina i ala i le gasologa o le taimi. E tele ina o le a e lē iloa o loo e mauaina faaaliga i le taimi lea o loo e mauaina ai le faaaliga.
O Nifae le faataitaiga atoatoa lava o lenei mamanu. Sa alu o ia sa lē muaʼi iloa muamua mea e tatau ona [ia] faia.1 Sa ia fetaomi i luma a e sa le iloa i laasaga taitasi uma lea sa taitaia lava o ia. Ae tatau ona tatou maua le malamalama lea e faapea ai o le mea na tupu ia Nifae atonu o le ala lava lea e galueaiina ai faaaliga mo i tatou i le tele o taimi.
O tagata o le Ekalesia i ni isi taimi e matua fefefe o le a latou faia se mea sese, ona latou le fetaomi lea i luma. Ua Faia e Nifae ma ona uso se vili. E le’i lelei ona faatinoina lena. Pe o lena aafiaga mo Nifae o se mea sese? Leai. Na ia aoaoina se lesona tele. Ina ua latou taumafai e maua papatusi apamemea mai ia Lapana i le faaaogaina o la latou auro ma a latou meatotino uma, na aoaoina mai e Nifae se isi lesona e saunia ai o ia mo mea o loo taoto mai i le lumana’i.
E i ai mataupu faavae e faatatau i le mauaina o faaaliga. Mo se faataitaiga, sa faapea mai Peresitene Packer, “Sa aoao a’u e Harold B. Lee i se tasi taimi e faapea, e faigofie ona oo mai faaaliga pe a mafai ona e tu vae i luga o le nofoaga lea e ono manaomia ai. … Na sa’o lava Peresitene Lee!”2 E i ai le taua i le i ai lea i le nofoaga, mafaufau loloto, tatalo, ma saili atu mo se fesoasoani.
O lenei mataupu faavae e i ai se aafiaga tele e faatatau i auaunaga. O le toatele o loo i ai ni tofiga auauna atu, e manatu ua lava lava se tesi. E i ai tulaga e tatau ai ona e i ai i totonu o le maota ma e manaomia ona e tilotilo sa’o atu i fofoga o tagata. O le a e maua ni uunaiga ma musumusuga i le fale lea o le a e le mauaina i se isi lava ala.
Fesili
E te fia faaopoopo mai soo se mea i lo matou malamalamaaga e uiga i faaaliga na maua e Peresitene Nelson ma isi taitai o le Ekalesia?
Elder David A. Bednar
E toatele tagata o le Ekalesia o loo talanoa i le tele o faaaliga ua oo mai talu na avea Peresitene Nelson ma Peresitene o le Ekalesia. O fesuiaiga ia ua oo mai i le taimi nei, sa talanoaina, ma tatalo agai i ai i aufono mo le tele ma le fia sefulu o tausaga. I le tele o faataitaiga, o le faaaliga e le o le a le mea e fai, a e o afea e fai ai.
Fesili
E ese mai le mauaina o faaaliga i le o afea e fai ai, e i lava taimi o le a tatou maua ai faaaliga i le mea foi e fai, e sa’o?
Elder David A. Bednar
Aua le faia faapea e le mafai ona i ai le isi pe a o i ai le isi; e le o le tasi po o le isi. O le tele o taimi o le faaaliga i le mea e fai e manino lelei lava. A e o le taimi e tatau ai ona fai o le mea lea e tauivi ma le toatele o tagata. O lea, pe a manaomia, e mafai ona tatou maua faaaliga i mea e lua o le mea e fai ma o afea e fai ai, e le o le tasi po o le isi.
Fesili
I le avea ma faiaoga, tatou te saunia a tatou lesona ma tatalo mo tamaiti aoga. E faapefea ona tatou iloaina musumusuga mo i latou o e o loo tatou aoaoina ma auauna atu i ai?
Elder David A. Bednar
I taimi o outou sauniuniga ma tatalo, e tele taimi o le a faafuasei ona oo mai se mafaufauga, o se savili o musumusuga, ma o le a oo mai se igoa i lou mafaufau po o se foliga e te masani ai. Na faamatalaina e le Perofeta o Iosefa Samita e pei o se “savaili faafuasei o manatu.”3 Pe a oo mai faafuasei, e mafai ona e iloa ua e mauaina sa’o le mea o loo manaomia, ma o taimi na ua sili ona matagofie.
O se tasi o puna o malamalamaaga sili o le a e maua o fesili o le a fesili mai ai au tamaiti aoga. I le aluga o ni nai tausaga sa i ai sa’u masani o le taliina o fesili mai le faitau afe o talavou ma talavou matutua. Ona o le tele o le aofai i fonotaga, e tele ina ou faatagaina i latou e tesi mai a latou fesili ia te a’u i se ala faatulagaina. (Ou te le’o fautuaina outou ina ia outou faia lea i le ala lava e tasi.) O le faitauina o nei fesili e le iloa po o ai e sau ai o se tasi lea o se tasi lea o aafiaga maoae faaleaoaoga e mafai ona maua e se tagata, o loo galulue faatasi ma tagata talavou. E latou te fesili lava i mea o loo latou popole ai ma mea o loo latou manaomia ai le fesoasoani. E faapefea ona tatou iloa le tala e fai atu pe aoao atu seiiloga tatou te iloa le mea o i ai i latou?
Fesili
I le saili atu i faaaliga, e le tatau ona ia i tatou se lisi o faamalamalamaga---se lisi o mea e tatau ona tatou faia ma o afea e faia ai. E tatau ona faavae i mataupu faavae, e sa’o? A e ua ia i tatou faataitaiga a Nifae, Iosefa Samita, ma Iosefa F. Samita o faitauina tusituiga paia, faalogo atu i le perofeta, ma ona maua lea o faaaliga. O ni mataupu faavae la na, po o se mamanu lena mea?
Elder David A. Bednar
E tatou te taumamafa i le afioga a le Atua ina ia mafai ona tatou faalogo ma iloa le siufofoga o le Alii. Pe a tatou liliua le sailia o faaaliga i se lisi---fai mea ia ma o mea ia o le a tupu---ua tatou i ai lea i luga o se fanua lamatia. E tatau ona tatou faatalitali i le Alii, nofouta i, ma tali atu i Lana taimi---e tatou te le poloaia faaaliga e faavae i luga o lo tatou taimi.
Fesili
E faapefea ona tatou ola i o tatou olaga i se ala lea tatou te sauni ai i taimi uma mo faaaliga i soo se taimi ua saunia ai le Alii e liligi mai i o tatou luga?
Elder David A. Bednar
O le faaupuga saunia mo e taua. E tatau ona tatou ola pea lava e saunia mo faaaliga---lea ia tatou “maua pea lona Agaga e faatasi ma i [tatou].”4
Atonu e i ai ni isi e faia i se tulaga ogaoga; faamolemole ia faaaoga le faautauta.
Mafaufau i le ala na avea ai Oliva Kaotui ma tusiupu a Iosefa Samita. Na ia faalogo e uiga i papatusi auro, ia Iosefa Samita, ma na i ai le manao e alu e feiloai ia Iosefa. Na ia faatino e tusa ma lena manaoga.
Ua folafola atu e le Alii ia Oliva:
“Amuia oe ona o mea ua e faia; aua sa e ole mai ia te a’u, ma faauta, o le tele o taimi na e ole mai ai na e maua ai faatonuga mai lo’u Agaga. A na fai e le faapea, pe ua e le oo mai i le mea ua e i ai i le taimi nei.
Faauta, ua e iloa na e ole mai ia te aʼu ma sa Ou faapupulaina lou mafaufau.”5
O le fuaiupu e sosoo ai i le fuaiupu lenei, ia te a’u e sili ona malosi. Sa musuia Oliva, ae sa leai ma sona iloa sa musuia o ia. Sa ia maua faaaliga, ae na leai ma sona iloa sa ia maua faaaliga. O lea na oo mai ai se faaaliga e ui mai ia Iosefa ia Oliva e ta’u atu i ai na musuia o ia ma sa ia mauaina faaaliga.
“Ma o lenei ua Ou ta’u atu ia te oe nei mea ina ia mafai ona e iloa ai sa faapupulaina oe e le Agaga o le upumoni.”6
O le uiga lena o la’u tala e uiga i le maua pea Lona Agaga e faatasi ma i tatou.
Fesili
Sa e ta’ua e faapea sa faia e Nifae ma ona uso se vili ia mautu ai o ai e alu ma talosaga mo papatusi apamemea ma ona taumafai lea e faatau i auro ma siliva. Pe a tatau ona tatou faia se mea, e mafai faapefea ona tatou faamautinoa ia tatou faia i le taimi sa’o? E faapefea ona tatou iloa o loo sa’o ona tatou faia?
Elder David A. Bednar
E le’i faia e Nifae se mea sese pe le sa’o lana fuaina o le taimi. O se aafiaga faaleaoaoga, lea fuaitau i luga o lea fuaitau, ma lea mataupu i luga o lea mataupu. Sa sauniaina o ia i taumafaiga taitasi---”ma le lē muai iloaina o mea e tatau ona [ia] faia.”7
Afai o loo tatou faia le mea sili ma taumafai ia faapaiaina ma tuuto, o le a e le faaaafiaina isi i se tulaga le talafeagai. O loo pule le lagi i le galuega lenei, e le o oe ma a’u. I le avea ai ma se uso o Le Korama a Aposetolo e Toasefululua, e i ai o’u tofiga i taimi uma lea ou te iloa e matua ou le mafai lava ona ou faia na’o a’u. A o e faia le mea sili, e faateleina oe ma faalauteleina. O le a le iloaina faalelagona i taimi uma le taimi o le taimi ua sa’o. Tau lava o lou faia o le mea sili.
Sa tele ina aoao mai Peresitene Hinckley, “O le a lelei mea uma.” Ma sa ou talitonu i ai, a e sa ou manatu pea, “Se; e tele atu isi mea nai lo o lena.” O le faasolo lava ina ou matua, o le tele foi lea o lo’u malamalama ua na’o le pau lava lena o le tali. O le a le tuua toatasia oe e le Atua a o loo e taumafai e fesoasoani, faafailele, ma auauna atu i Ana fanau. Afai e te faia le mea sili, faatinoina i le amiotonu, o le a manuia. Ma o le a e aoaoina ni lesona i le gasologa o le ala.
Fesili
E faapefea ona tatou aoaoina tamaiti aoga atonu o loo lagonaina le le atoatoa a o tatau ona latou sauni mo faaaliga i taimi uma? Atonu e foliga mai o se faatinoga maoae mo i latou.
Elder David A. Bednar
Nai lo o le mafaufau, “O le a le mea o le a ou ta’u atu ia i latou?” o le taulaiga e tatau ona faapea, “O le a se mea o le a ou fesili atu ai ia i latou?” Ma e le na’o le “O le a se mea o le a ou fesili atu ai ia i latou?” ae faapea foi le “O le a se mea o le a ou valaaulia i latou e fai?”
O le faatinoga lava o le fesili atu o ni fesili o le valaaulia lava lea o i latou e faatino. Afai o le a tali lena tamaitiiti aoga, o le faailoaga lena o le faatuatua ia Keriso. O le faatuatua o se mataupu faavae o le faatinoga ma o le mana. A o tatou faatino e tusa ai ma aoaoga a Keriso, e faamanuiaina i tatou i Lona mana. O le mea tatou te mananao uma i ai muamua o le mana ia mafai ona tatou faatinoa ai. E le aoga lena mea.
O lo tatou naunautaiga loloto e le tatau ona faapea, “O le a se mea ou te ta’u atu ia i latou?” Nai lo lena, o fesili e fesili ai ia i tatou lava o, “O le a se mea e mafai ona ou valaaulia i latou e fai? O a fesili musuia e mafai ona ou fesiligia, lea, afai latou te naunau e tali mai, o le a amata valaaulia ai le Agaga Paia i totonu o o latou olaga?” O fesili e fesili atu ai e faigofie lava, e pei o “O le a se mea o loo e aoaoina? I le taliina o fesili , o loo valaauliaina e lena tagata le Agaga Paia e taitaiina ana tali. O la tatou matafaioi o le faia ia saogalemu e talanoaina ai na mea ma ia valaaulia i latou e faatino ina ia mafai ona aoao mai le Agaga Paia.
Afai e te alofa ia i latou, ma afai o loo e taumafai moni e fai le mea o loo manao ai le lagi, o le a faapea ona taialaina oe i auala e aupito sili ona faatauvaa. E le moomia ona faigata fesili. O loo e taumafai e su’e po o fea o i ai i latou i lo latou malamalamaaga ona e te popole moni.
E i ai lava le popolega talafeagai e uiga i tagata talavou o e pa’ū’ū ese. E toatele na’ua i latou o e e le’i valaaulia e aoao mo i latou lava, e latou te faalagolago i mea na ta’u atu e isi tagata ia i latou. “Afai na o le pau le mea e te iloa ma ou iloa e uiga ia Iesu Keriso ma Lana talalelei toefuataiina o mea e aoao mai e isi tagata pe ta’u mai ia i tatou, o lona uiga o le faavae o a tatou molimau ia te Ia … o loo fausia i luga o le oneone.”8 O le mafuaaga lena e fesoasoani ai le valaauliaina o i latou e faatino ma aoao mo i latou lava e fausia se faavae malosi atu.
Fesili
Ua faitau e se alii talavou le Tusi a Mamona mo le taimi muamua ma fai se faaiuga faapea e na te le’i lagonaina le Agaga. Atonu sa ia faatali mo agelu mai le lagi e folafola atu e moni. E mafai faapefea ona tatou fesoasoani atu i lenei ituaiga tulaga?
Elder David A. Bednar
O loo i ai le toatele o tagata faamaoni o le Ekalesia o e e le manatu e latou te ausia tulaga ona e latou te lei maua ni aafiaga e pei ona faamatalaina i ni isi o taimi i le sauniga anapogi ma molimau. O aafiaga maoae e le o le faatulagaga masani lea. Afai o e te faamamalua au feagaiga ma fetaomi i luma, o loo lelei oe ma o oe lava o le tagata masani. E le’i liua Saulo e ala i le malamalama. O Alema le Itiiti e le’i liua e ala i le agelu.
“Ia tuu le amiomamā e teuteuina ai ou mafaufauga e lē aunoa; ona solo malosi ai lea o lou lototele i luma o le Atua.”9 E le o le talitonu ia te oe---talitonu ia i Laua, e faia le mea e le mafai e se tasi o i tatou ona fai.
Uso Chad Webb
O le mea e faatauanauina i tatou e fai le lelei, ia talitonu ia Keriso, e a le Atua lea.10 Atonu e ono faateia tatou i le iloa i se aso e faapea o tatou mafaufauga sa tatou manatu na a tatou, ae o le mea moni sa mai le Agaga Paia. A o tatou taumafai e fai le lelei, o le a taialaina o tatou mafaufauga ma manaoga e le Agaga Paia.
I le saunoaga a Peresitene Nelson i faaaliga, na ia valaaulia ai i tatou e sasaa atu o tatou loto i le Tama Faalelagi, talanoa ia te Ia, ia faamaoni ia te Ia, ma ona faalogo lea. Sa ia talosaga mai ia i tatou e tusi i lalo lagona e oo mai ma faatino i latou. Ona ia faapea mai lea, “A o e faia lenei faatulagaga i lea aso ma lea aso, masina ma lea masina, tausaga ma lea tausaga, o le a e ‘ola ai i le mataupu faavae o faaaliga.’”11
O le tele o musumusuga ua oo mai ia te a’u faaletagata lava ia, e le’i o’o mai a o o’u tatalo. Ou te tatalo, ou te mafaufau loloto; ou te taumafai e tusi i lalo lagona e oo mai. A e a’o o’u faia, ona oo mai lea o musumusuga. I le gasologa o se lesona, pe a usuina se viiga, pe a talanoa atu i se tasi, po o totonu o isi nofoaga, e amata oo mai tali i talosaga.
Elder David A. Bednar
O se lapataiga: o ala po o le oo mai o faaaliga e mafai ona eseese mo tagata uma i le lalolagi atoa. Mo se faataitaiga, i Aferika, e tele ina oo i tagata moemitiga tulaga ese. E le o se mea e le masani ai mo faifeautalai e tau i se tagata i le auala, o le e fai mai, “Sa ou vaai ia oulua i se miti, ma o loo ia te oulua se savali mai le Atua. Ou te fia faalogo i le mea e te lua ta’u mai ia te a’u.” Ou te le maua ni miti faapei ona maua e ni isi o Au Paia faamaoni i Aferika.
E te le lava ina tatou aoao mai i o tatou lava aafiaga, lea e tatau ai ona tatou faaeteete ia aua nei o tatou uunaia malosi atu tatou mamanu o aafiaga i luga o isi. E le faapea la o la latou mamanu e itiiti se faamaoniga po o se aoga. Manatua e i ai ni ituaiga auala eseese e mafai e le Agaga o le Alii ona fesootai mai i le mafaufau ma le loto o se tagata.
Faamolemole ia e fetala’i i se vaega tele o mea e te ono valaaulia ma faatosina ai se tagata e faia faapea ina ia mafai ona latou faatino ma aoao mo i latou lava.
Fesili
E faapefea ona tatou faateleina lo tatou faatuatuaina lo tatou lava gafatia e maua faaaliga patino faaletagata lava ia ma aua le faalagolago i se faatulagaga atonu sa tatou faalogo ai pe faitau i ai mai se isi tagata?
Elder David A. Bednar
O se upusii mai ia Peresitene Iosefa F. Samita o se punaoa maoae mo se tasi o se ua amataina lana faigamalaga i le mauaina o le faatuatuaina i le mauaina o faaaliga.
“Faaali mai ia te a’u le Au Paia o Aso e Gata Ai o ē tatau ona fafagaina i vavega, faailoga ma faaaliga ina ia tumau mausali ai i le Ekalesia, ona ou faailoa atu lea o tagata o le au paia o ē lē o tulaga lelei i luma o le Atua, o ē foi o loo savavali i ala mase’ese’e. E le o faaaliga ofoofogia e tuuina mai ia i tatou, e faavaeina ai le upumoni, ae o le lotomaulalo ma le usiusitai faamaoni i poloaiga ma tulafono a le Atua. …
“A o o’u tamaitiiti … sa faalausosoo ona ou … fesili i le Alii e faasino mai ia te a’u ni mea ofoofogia ina ia ou maua ai se molimau. Peitai, sa taofia e le Alii ia mea ofoofogia mai ia te a’u, ma sa faaalia mai ia te a’u le upumoni, o lea fuaiupu ma lea fuaiupu, … seia oo ina ou iloa le upumoni mai lo’u tumuai e oo ifo i o’u alofivae, ma seia oo ina tafiesea uma mai ia te a’u le masalosalo ma le atuatuvale. Na te lei tau auina mai ia te au se agelu mai le lagi e faia lena mea, na te lei fetalai mai foi i se leo o se pu a se agelu. O musumusuga a le leo itiiti ma le filemu o le Agaga o le Atua soifua, na ia tuuina mai ai le molimau lea ua ou maua.
“O le mataupu faavae foi lenei ma le mana, o le a ia tuu atu ai i fanau uma a tagata se iloa o le upumoni o le a tumau ia i latou, ma o le a latou iloa ai le upumoni, e pei ona silafia ai e le Atua, ma faia le finagalo o le Tama e faapei ona faia ai e Keriso. Ma e leai lava ni faaaliga ofoofogia e tele o le a faataunuuina ai lenei mea.”12
Soo se tasi o i tatou o loo tauivi, e mafai ona faia laasaga muamua ma fai le mea na faia e Iosefa F. Samita.
O ni isi o tagata o le Ekalesia e mananao e vaai i se malamalama i le ala i Tamaseko, ona latou talitonu ai lea. Mo’i? Pe sa i ai Saulo i se tulaga e iloa ai le leo itiiti ma le filemu? Na tatau ona ia maua se valaau ala mai faaleagaga. Toatele e mananao e vaai i se agelu i le ala na vaaia ai e Alema le Itiiti. Mo’i? E le’i i ai Saulo i se tulaga e iloa ai le leo itiiti ma le filemu. Na tatau ona ia maua se valaau ala mai faaleagaga. Ma na molimau mai Peresitene Iosefa F. Samita e faapea e le o malamalama, e le o le agelu. O le iloaina o le leo itiiti ma le filemu e aumaia le talitonu. Tau o le alu ma fai.
A fai tatou te le o tausia poloaiga, o le a tatou le maua lena talitonu, ma tatou te le maua le mafutaga a le Agaga. O loo i ai tagata talavou o e tatau ona salamo, ma e i ai tagata talavou o loo matuai faatigaina ia i latou lava, latou te manatu e le o lava lo latou lelei. E te le tau atoatoa; na o le tatau ona e salamo faamaoni, ia e lelei, fai le mea sili e te mafaia, ma fetaomi i luma.
Fesili
Ua tele au saunoaga ma tusitusiga e uiga i le faatutotonu i tamaiti aoga ma taulai atu i o latou alualu i luma. Pe o i ai ni isi mea e te manao e aoao ai matou e uiga i le valaauliaina o le Agaga Paia i lena faatulagaga?
Elder David A. Bednar
“Tofi se faiaoga i totonu o outou lava, ma ia lē tuu atu i tagata uma e tāutala i le taimi e tasi; ae tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai o tagata uma, o le a faapea ona mafai ona faagaeetia ai o tagata uma, ma ina ia mafai ona maua ai e tagata taitoatasi le avanoa tutusa.”13 E le o tatou o faiaoga; a o le Agaga Paia. O se apoapoaiga lena e tofi le Agaga Paia e avea ma faiaoga. Ma o “se mamanu”---ae le na pau lea o le mamanu---o le tuu atu ia tasi le tagata e tautala i le taimi, ae faalogo tagata uma i lana faamatalaga. E ese le faigofie o lena faamatalaga, ma e ono foliga faigofie foi.
Afai e lagona e tagata le saogalemu, e latou te mafai ona faaleoina ni isi o a latou fesili ma mea o loo latou le mautinoa ai. E latou te le aoao mai i isi tagata o loo i le potu, a e o se mea e fai mai ai se tasi e ono faatagaina le Agaga Paia e aoao i latou taitoatasi. E latou te auai i se faailoaga tuufaatasi o le faatuatua i le Alii o Iesu Keriso ona o i latou uma o loo i ai i lena nofoaga o loo ole atu, saili, ma tuitui atu. Ma i lena faaalia taitoatasi ma tuufaatasi o le faatuatua, tatou te valaaulia ai. O le upu tofi e le faauigaina atofa. E le mafai ona tatou atofaina le Agaga Paia e avea ma faiaoga, ae e mafai ona tatou valaaulia ma faatosina le Agaga Paia e avea ma faiaoga.
I se fonotaga ma faifeautalai sa matou talanoaina ni faafitauli ma sa ou fesili atu i faifeautalai, “O le a se mea o loo tou faalogo i ai e le’i tautalagia?” O se faifeautalai e sefuluvalu tausaga le matua, o se ua i ai i le galuega mo le fa vaiaso, na tali mai, “Elder Bednar, afai ou te faalogo i se tali i totonu o lou leo po o totonu o le leo o se isi faifeautalai, o se savali lena mo tagata uma. Afai ou te lagona i totonu o lo’u loto pe i ai se mafaufauga i lo’u mafaufau, ua mai lena i le Atua, ma ua mo na’o a’u lava.” Pe ua faagaeetiaina outou i lena tali? O le a le umi o le a tautala atu ai i se tagata pe ia fatu ai se ituaiga o faatinoga po o isi aafiaga lea o le a i ai ai i se tagata e 18 tausaga le matua lena malamalama loloto faaleagaga?
O le valaaulia la o i latou e faatino---ia faaaoga le latou faatuatua---fesoasoani e faatosina mai le Agaga Paia e aoao i latou taitoatasi ma tagata uma faatasi.
O le taua ia o le avea ma sē taulai atu i le tagata o loo aoaoina ma valaaulia le Agaga Paia e avea ma faiaoga. E i ai sa tatou matafaioi e fai. E tatou te faatino le valaauliaina ma faananau mai ma taiala, ae ona taitaia lea e le Agaga Paia o mea i ni auala mataina.
Fesili
Sa fesili mai ia te a’u se tamaitai pe o o’u manatuaina lona aoaoina o ia i se mataupu faavae patino. Fai mai a ia, na suia ai lona olaga e faavavau. Ou te manatua le tulaga lea, ma ou te le’i aoaoina o ia i lena mea; sa ia misia atoa le mea sa ou taumafai e aoao atu. Sa aoaoina o ia e ala i le Agaga. E faapefea ona tatou fesoasoani i tamaiti aoga ia iloa o loo latou mauaina faaaliga ia mafai ai ona latou talitonu e saili atili ai mo i latou lava?
Elder David A. Bednar
O le a se mea atonu e te valaaulia o ia e fai ina ia i ai ni ona mata e vaai ai i mea na te le’i vaaia muamua?
O le Agaga Paia o le a faamanatu maia mea uma ia i tatou.4 Sa ona maua se aafiaga matagofie lea sa ia faalogo ai i se mea na manino lava sa le’i tautalagia. Fesoasoani ia te ia ia ona iloa lena. Fai atu ia te ia e mafaufau i lana aafiaga ma ia maua mai ni isi aafiaga e tasi pe lua faapena. Fesoasoani ia te ia ia maua se mamanu i na mea e lua pe tolu na tutupu, o le a le mea na mafua ai ma aumaia ai lena vaaiga faaleagaga.
O loo i ai le tele o le eseesega i o tatou tagata talavou, ma e ia i latou luitau ma faafitauli o ituaiga eseese. A e e tatau ona tatou manaomia mai ia i latou ia avea i latou ma e tatou te ta’u atu ia i latou. Ma e tatau ona tatou valaaulia i latou e faatino. Ma o le a e maofa lava i mea latou te tauina mai. Mafaufau muamua i le mea e valaaulia i latou e fai ina ia mafai ona latou aoao le mea e manaomia ona latou aoaoina.
Fesili
E mafai ona e fesoasoani ia i matou ia malamalama, pe atonu e aoao, e faapefea ona faalogo ma maitau sili atu?
Elder David A. Bednar
Ou te fautuaina ia maua sau kopi patua vaivai e le taugata o le Tusi a Mamona ma faitau i ai mai le amataga e tau i le faaiuga, vaai mo faataitaiga uma o “mata ia vaai ma taliga ia faalogo,” po o se faaupuga lata ane i ai. Ia vaai foi i le Mataupu Faavae ma Feagaiga ma le Feagaiga Fou. Alu i totonu o tusitusiga paia o se sui---ole atu, saili, ma tu’itu’i atu---ma lau fesili: “E faapefea ona ou vaaia mea e le masani ona ou vaaia? E faapefea ona ou lagona mea e le masani ona ou lagona?” A o e alu i totonu o tusitusiga paia faatasi ma na fesili, o le a faiaoga le Agaga Paia ma tuuina atu tali i au fesili. E le mafai ona ou tuuina atu ia te oe; o le Agaga Paia o le a aoaoina toatasi oe, faalilolilo, ma patino po o le a lena tali mo oe.
Sei ou faasoa atu se faataitaiga. O lo’u toalua, o Susana, sa avea pea lava o ia ma faiaoga asiasi faatuatua maoae. Ina ua faia le fetuunaiga i le auauna atu ma talosagaina e Peresitene Nelson le “maualuga atu ma paia atu”15 ala o le auauna atu, sa faalogo Susana ma manao e fia iloa po o le a lena mea. I le mavae ai o le mafaufau loloto ma tatalo, sa ia oo ai i se faaiuga tulagaese---ia fesili atu i ona uso o e sa ia auauna atu i ai, “O le a le uiga ia te oe o le maualuga atu ma paia atu i lau auauna atu?”
O le fesili sili na faigofie ma fetaui lena e mafai ona e fai atu, ae o tali mai a ona uso sa maoae. O se tasi tuafafine sa fai atu e o faatasi i le malumalu. O se isi tuafafine sa fai atu e faitau se lauga o le konafesi aoao ma ona o mai faatasi lea i se taumafataga o le aoauli e talanoaina po o a mea sa latou aoaoina. Sa manatunatu Susana pe sa ia faia se mea sese muamua. Na te le le’i faia se mea sese. Maualuga atu ma paia atu---ua pupula mata e vaai i ala e latou te lei vaaia muamua.
Fesili
I nai minute o loo totoe, sei e faasoa mai o a lava lagona e te fia faasoa mai faatasi ma lau molimau?
Elder David A. Bednar
Ou te alofa ia te oe. Ou te alofa i lou tagata, ma mea o loo outou taumafai e avea ai. Ou te fiafia i mea o loo outou faia. E mafai e i tatou uma ona faaleleia pea, a e tau ina ou faapea atu: “Faafetai.” Ou te faafetai atu e fai ai ma sui o le Au Peresitene Sili ma le Korama a Aposetolo e Toasefululua ma le Au Faatonu o Aoga a le Ekalesia.
O le ola ai i le lalolagi i lenei vaitau o le tisipenisione o le atoaga o taimi o se faamanuiaga i se olaga atoa. I nai tausaga ua tuanai, ta’u soo mai ai e Peresitene Gordon B. Hinckley ia te a’u, “Tavita, o le vaitau aupito maoae lenei i le talafaasolopito o le Ekalesia toefuataiina.” Ma na matua sao lava o ia.
Mafaufau i mea ua faamanuiaina i tatou e vaai i ai. Manatunatu o le tausaga lenei o le 200 tausaga o le Uluai Faaaliga Vaaia. Ua faalauina malumalu i Papua New Guinea ma i Phnom Penh, Cambodia. O loo i ai tatou faifeautalai i le Soviet Union ma atunuu sa muamua avea ma atunuu komenisi ma se malumalu i le Ukraine. O le taimi maoae lenei i le talafaasolopito o le Ekalesia toefuataiina.
Ma o loo i ai se tatou tiuetauave faapitoa i nei aso. Afai ua faasaosaoina i tatou mo lenei vaitaimi, e mafua ona e tele mea e tatau ona tatou faia, ma ua i ai sa tatou matafaioi i le fesoasoani lea i le tupulaga faia’e ina ia saunia. O le taimi maoae lenei i le talafaasolopito o le Ekalesia toefuataiina---o le tetee silisili ma le tele na’ua o avanoa. I lo tatou faatasi ai i nei aso, ua tatou maua lenei avanoa e tautua, e molimau atu, e auauna atu, ma ia fesoasoani atu.
Ou te tatalo o le a faatumu e le Agaga Paia le va o upu ou te faia ma le mea ou te momoo e momoli atu, Ou te molimau atu na faaali le Tama ma le Alo ia Iosefa Samita i le 200 tausaga ua mavae. Ou te molimau atu o le Tama o lo tatou Tama, o Ia o le mataisau o le fuafuaga o le fiafia. Ou te iloa, ou te molimau atu, ma ou te molimau o Iesu Keriso o le Alo Pele e Toatasi na Fanaua o le Atua le Tama e Faavavau. Ou te molimau atu o loo soifua o Ia. Ua toetu o Ia; ua avanoa le tuugamau. “E le o iinei o Ia: a ua toetu.”16
Ou te molimau atu, na ala mai i le Perofeta o Iosefa Samita, ua toefuataiina mai ai le pule ma ki o le perisitua i le lalolagi, ma o le faaali mai o le Tama ma le Alo na amatalia ai le Toefuataiga o le talalelei. Ou te molimau atu e faapea o Toefuataiga e faaauau pea.
Ou te tuuina atu ai lenei molimau, ma faailoa atu lo’u alofa ia te outou i le suafa paia o le Alii, o Iesu Keriso, amene.