對青少年和年輕成人教導宗教——專題小組座談會
第二部分討論——鄔克司會長，查德·韋伯，亞當·斯密
達林·鄔克司會長：韋伯弟兄，好高興能夠同你哋一齊。斯密弟兄，我哋進入下個部分啦。
查德·韋伯弟兄：多謝你，好高興能夠同你哋一齊，都好多謝你美好嘅信息。事實上，聆聽你嘅忠告會啟發出一啲我哋想討論嘅問題。咁我哋由呢題開始，你講到對學生嘅愛，以及愛學生嘅一部分就係教導佢哋福音，幫助佢哋了解最有價值嘅事。我哋要點樣確定，喺所有可以教導嘅事物中，我哋將對學生最有價值嘅事列為優先呢？
鄔克司會長：教會教育機構嘅獨特之處，就係我哋研讀經文嗰陣嘅責任唔單止係藉著研讀，同時亦要藉著信心嚟尋求學識。
亞當·斯密弟兄：當我諗到可以教導學生最有價值嘅事，我想分享艾寧會長嘅教導，呢篇講道一直都引領住我。艾寧會長講過：「這個經文段落中可以強調的所有真理當中，哪些會幫助我的學生與天父和救主更接近，並引領他們得到救恩？」艾寧會長接住話：「在準備課程的時候，你需要找出使人歸信的原則。……使人歸信的原則就是能引領人順服神旨意的原則。」1我從艾寧會長嘅呢項偉大教導中學到，嗰啲對我哋學生最有價值嘅事，會以個人同深刻嘅方式將佢哋與天父同耶穌基督連結埋一齊。我哋需要教導嗰啲能夠幫助學生感受同了解福音真理嘅事，特別係有關耶穌基督嘅真理、佢嘅贖罪同復活嘅事實——並幫助佢哋喺實際生活中能夠感受到，耶穌基督有能力醫治、幫助、安慰同潔淨佢哋。我認為呢樣係我哋所能夠專注中最重要嘅事。
鄔克司會長：非常有力且真實。
韋伯弟兄：多謝你。咁樣同確保佢哋藉著信心學習呢個概念，有好深厚嘅連結——佢哋憑信心行動，然後從聖靈獲得證實，知道佢哋所學習同應用喺生活上嘅事情確實源自我哋嘅天父，多謝你。會長，你都提到聖靈喺我哋教導時所扮演嘅角色，所以我想問下，仲有啲咩係你可以同我哋分享，關於聖靈以及佢喺我哋課堂上嘅影響力同角色嘅真理？
鄔克司會長：我認為領受聖餐係獲得聖靈靈感嘅關鍵。因為我哋領受聖餐時所立嘅聖約中有一項應許，就係我哋會「一直有祂的靈〔與我們〕同在」。呢樣係最根本嘅。
韋伯弟兄：我好鍾意你嘅分享。佢提醒咗我，當我仲係一個年輕教師嗰陣，我花咗幾個月嚟研究邀請聖靈嘅原則。我覺得呢個係一個好好嘅機會，我哋每個人都必須繼續學習呢點。但係我發現最重要嘅一件事，就係你剛才所講：聖餐祈禱文提到，如果我哋一直記得祂，就能夠一直有佢嘅靈與我哋同在。唔單只係喺聖餐儀式中或星期日，而係一直同在——包括喺我哋嘅教室入面。如果我哋專注喺救主——當我哋記得佢係奉行福音嘅榜樣，並汲取佢嘅能力同教導——只要我哋記得祂，就係邀請緊聖靈參與我哋嘅學習經驗。我諗聖靈嘅主要責任或角色，係見證我哋慈愛嘅天父同耶穌基督為天父計畫中嘅核心人物。所以如果我哋想邀請聖靈嚟到我哋嘅班級，就要專注喺神可以作見證嘅事情上，我好鍾意呢點！多謝。
鄔克司會長：納爾遜會長曾經講過以下說話嚟證實呢一點嘅重要性。佢話：「在未來的日子，如果沒有聖靈持續的指引、指示和安慰的影響力，我們不可能在靈性上存活。」2
韋伯弟兄：多謝你。我真係好感謝剛才嘅分享，引導咗我要問以下嘅問題：我哋已經討論過教師要以咩方式排定優先順序，嚟邀請聖靈。我哋要點樣幫助學生為生活中最重要嘅事情排優先順序呢？
鄔克司會長：喺呢個時代，我哋同學生周圍都充滿住好多世俗嘅影響，我諗我哋需要記住，世上嘅事物——世人所重視嘅事物，不論佢哋係啲咩——都只係得短暫嘅價值。隨住歲月增長，呢啲事物絕對唔會比學習有關今生嘅目的同永恆嘅目標，呢兩項必要原則嚟得重要。斯密弟兄，你有冇補充？
斯密弟兄：鄔克司會長，當你教導嗰陣，有一節經文浮現喺我嘅腦海。喺救主進入客西馬尼園之前，佢作出神聖嘅祈禱。救主話：「認識你——獨一的真神，並且認識你所差來的耶穌基督，這就是永生。」3我諗如果我哋幫助學生了解，佢哋需要去決定將時間放喺邊度同專注喺咩地方，咁會唔會幫助佢哋認識並愛天父同耶穌基督？仲有另一個諗法，就係你喺最近一次總會大會上教導我哋要問嘅問題：「這樣會導致什麼結果？」然後再問：「這件事是否會讓我更接近天父和耶穌基督？這件事是否符合我神聖的身分或會幫助我達成神聖的目的？」我諗咁樣會幫助到我哋每個人篩選出應該做嘅事。亦可以幫助學生了解篩選嘅準則，嚟選擇佢哋要將時間花喺邊度，以及佢哋要睇、聽、或者望啲咩野。佢哋必須自己作出選擇，但係我哋可以幫助佢哋問自己：「這樣會導致什麼結果？這是否會讓我更接近天父和耶穌基督？」
鄔克司會長：噢，係好重要啊，如果我哋所有學生都了解呢項原則，會幾咁美好。
韋伯弟兄：教師要強調呢點，為呢啲事情作見證，並邀請聖靈證實其重要性——唔單止係呢啲原則嘅真實性，仲有呢啲原則喺佢哋生活中嘅重要性。如果可以嘅話，我都想補充下相關嘅概念。我哋可以邀請學生搵出呢啲原則同佢哋嘅生活有啲咩關聯。有時我哋講起要同時間或者注意力競賽嗰陣，會提到呢啲原則。有時，我哋必須要將最有價值嘅事排優先順序。但係我諗，我哋同時都可以幫助佢哋了解，福音點樣喺佢哋嘅日常生活當中發揮作用。舉個例，我喺學生時期中學到，如果我守安息日為聖，如果我喺學習之前研讀經文，我其實會表現得更好，而唔係嘗試將呢啲事情分開，然後講：「我會花時間喺屬靈嘅事物先，然後我再會花時間喺屬世嘅事物上。」喺我生活嘅每個層面，只要我有天父——只要我邀請佢嘅靈幫助我——即使係一啲學生覺得比較屬世嘅事物，佢哋都會見到福音同佢哋喺生活中努力想完成嘅事之間嘅關聯。屬靈同屬世嘅事物唔會互相競爭時間，反而係相輔相成。
鄔克司會長：我記得主教導過我哋，佢從未賜予任何屬世嘅誡命。主所有嘅誡命同指引都係屬靈嘅。
斯密弟兄：我腦海中浮現咗另一個想法，你所提到嘅——至少對我哋嘅福音進修班學生嚟講——就係教會嘅兒童和青少年計畫。呢個係一個有力嘅方法，能夠使福音同我哋嘅生活息息相關，並訂立實際目標，應用福音嚟幫助我哋生活中嘅任何層面，並努力變得更像救主。
鄔克司會長：的確係咁。而家，我要問兩位專業宗教教師問題：各位弟兄同工，喺我哋所經歷嘅疫情期間，教導耶穌基督嘅福音學到啲咩呢？
斯密弟兄：首先，我哋學到——或者係疫情提醒咗我哋，讓我哋注意到——我哋嘅教師係幾咁美好，佢哋真正愛神、愛學生，佢哋嘅表現超乎預期，我哋十分感激。我都認為疫情幫助強調福音教導所蘊含嘅施助要素。我哋更善於聆聽學生、分辨並滿足佢哋嘅需求同能力。我哋愛佢哋而家嘅模樣，以及搵出有創意嘅方式嚟幫助佢哋更接近天父同耶穌基督。我同時諗到，疫情期間發生好多困難嘅時候，我哋見到神幫助嗰啲努力愛神、愛學生，並竭盡所能嘅教師。
韋伯弟兄：講得好好。我只係想講多謝，同表達我嘅感激。你知道嘛，我哋有教師努力去做面對面嘅教學，同時亦學習點樣去做線上教學。佢哋戴住口罩，有時候都幾唔舒服。佢哋有時都將自己置身於危險當中，但佢哋懷住對學生同天父極大嘅愛，加上極大嘅決心去完成呢件事。我只係想感謝各位喺呢段艱難時期所付出嘅一切犧牲同努力。
鄔克司會長：我代表總會會長團感謝你剛才所感謝嘅一切。我哋愛呢班喺福音進修班同研究所，以及大學同學院宗教課程中授課嘅兄弟姊妹。
韋伯弟兄：多謝你哋；的確好意義重大。我一直好想問你另一條問題，因為你喺其他場合中教導過：我哋教嘅係原則而唔係規則，點解呢點係咁重要呢？
鄔克司會長：我好高興你問呢條問題，係我其中一個最鍾意嘅問題。我哋嘅前總會主日學會長塔德·克利斯特喺教會新聞嘅一個有名專欄中，曾經針對呢個問題講過：「第一，規則往往只侷限於一個或幾個特定的情況，而原則一般而言，有更廣泛的應用。第二，原則創造出一個空間，讓我們有更多的選擇權，而規則往往會限制選擇權，有時甚至會主宰我們的選擇。」我要補充一點，救主以基督更高嘅律法，以原則為導向嘅律法，取代摩西律法，亦即係以規則為導向嘅律法。克利斯特弟兄詳細闡述咗呢項原則，佢話：「原則與更高的律法相容，規則與較小的律法相容。我哋應該經常專注在教導教義原則，為什麼呢？因為原則最能提升我們到高榮高度，而最終，原則——而非規則——會用在高榮國度的管理。」4以上就係引文嘅結尾。
韋伯弟兄：衷心感謝剛才嘅分享，仲有另一個好處。最近我同一班教師一齊，佢哋話我知，班級中似乎存在更多——佢哋用「紛爭」呢個詞，因為學生開始問更多嘅問題，對事情亦有住不同嘅看法同觀點。我好鍾意你嘅教導。剛才嘅對話使我了解到，你所用嘅教導方法，唔係教點樣去應用，唔係讓佢哋針對自己嘅情況同應用福音嘅方式去進行辯論，而係教導福音原則。應該要先教導救恩計畫、基督嘅教義、福音原則，讓佢哋自己尋求聖靈嘅幫助去作個人應用。
鄔克司長老：講得好。
韋伯弟兄：會長，我覺得上述真係好實用，對我哋正喺度努力緊嘅人好有幫助，多謝。斯密弟兄，你有冇補充？
斯密弟兄：嗯，韋伯弟兄，我諗同你所強調嘅好類似。藉由教導原則而非應用嘅方式，我哋就係邀請緊學生喺學習、成長嘅過程中運用自己嘅選擇權——咁樣，佢哋就能夠為原則尋求個人啟示，更仔細咁自己去探究呢啲原則，並決定以邊種最好嘅方式將原則應用喺個人嘅情況上。
韋伯弟兄：多謝你。一個好自然嘅後續問題就係：「而家有咁多嘅影響力——世界上有好多嘅聲音——我哋要點樣幫助學生喺社會咁多嘅影響力中，搵出通往真理嘅道路？」
鄔克司會長：我哋需要了解魔鬼就係謊言之父——經文話「他從太初就是說謊者」5。佢最聰明嘅方式，就係將謊言同真理混淆埋一齊。透過真理同謊言嘅融合，吸引同影響尋求真理嘅好人。所以，我哋喺今生可以努力學習嘅最寶貴事物之一，就係聖靈嘅教導，讓我哋能夠好警覺咁辨識真理。
斯密弟兄：以類似嘅方式，混合真理同謊言，魔鬼將真理從永恆嘅脈絡同神嘅計畫中移除。咁樣會增加真理被誤用或者被誤解嘅可能性。舉個例，喺幾分鐘前，鄔克司會長，你美好咁教導我哋愛嘅原則，以及愛喺神計畫中嘅地位——愛神同愛鄰人嘅重要性——呢種愛確實係天父渴望我哋準備好以獲得永生背後嘅動力，我哋知道呢樣係神一切恩賜中最大嘅。我哋對神嘅愛亦係讓我哋無私咁去愛人同為人服務嘅動力。如果魔鬼成功將愛嘅原則從整個脈絡中移除，愛就好容易被扭曲。一個對愛有誤解嘅人，可能會因為錯誤嘅原因而將事情堆積埋一齊。佢哋甚至可能發現自己同神嘅律法以及佢嘅先知對立，因為將真理從永恆嘅脈絡中移除，會導致虛假或者非脈絡方式嘅理解。魔鬼用咁嘅方式嚟扭曲好多原則。
鄔克司會長：喺呢個世界同我哋嘅周圍，已經見到好多呢方面嘅證據，唔係咩？韋伯弟兄，身為教師嘅你，點樣以最好嘅方式回應學生目前心中嘅疑慮，例如：擾人嘅教會歷史議題、LGBT議題、點樣喺政府控制疫情嘅政策下生活，以及更多嘅問題？呢啲問題係無止境嘅。你會點樣喺我哋嘅宗教課程中，好好回應呢啲問題？
韋伯弟兄：係好好嘅問題，教師亦經常遇到呢啲問題。我首先要分享，我好鍾意使徒保羅嘅教導，指示我哋要用愛嚟教導或者講真理。我哋當然需要教導福音，我哋需要教導經文同近代先知嘅教導，我哋需要教導真理，教導唔真實嘅事並唔會對任何人有任何幫助；咁樣唔會帶嚟幸福。但另一部分——我覺得好重要嘅係：當保羅講要用愛去行動嗰陣，就好似你今晚再次提到嘅，我認為需要從人與人嘅關係中著手。有好多研究都清楚咁顯示：學生嘅學習，取決於你哋嘅關係。對我嚟講，呢啲關係始於願意聆聽嘅教師——願意真正了解學生同佢哋嘅情況，並懷住同理心去試著了解佢哋嘅需求。另外，我認為，要知道每個人都能夠有所貢獻係好重要，我哋重視每一個人——我哋需要彼此，以及彼此嘅經驗，從中汲取同學習。關於呢個問題，有好多野可以分享，我好鍾意呢個問題。對我嚟講，要懷著愛心宣揚真理，咁意味住呢段關係，可以幫助人信賴彼此、一齊學習，並邀請聖靈一齊參與呢個經驗。
鄔克司會長：承如你啱啱所分享嘅，關於呢個議題，讓我諗起最近讀到總會男青年會長倫兆勳喺楊百翰大學婦女大會中嘅美好演講。佢描述——關係就係可以鼓舞人嘅影響力，讓我哋能夠影響嗰啲喺度尋找榜樣同良師嘅人嘅生活。佢話，我哋嘅研究人員發現，後期聖徒青少年嘅靈性發展係好大程度上取決於佢哋關係嘅品質，包括與父母、同儕、同老師嘅關係。而佢哋同領袖嘅關係，最能夠喺福音進修班、主日學、同定額組嘅班級中培養出嚟，佢哋會喺嗰度學到尊重同愛佢哋嘅領袖同其他聖徒。6以上就係引文嘅結尾。總括嚟講，所有嘅呢一切都足以講明教師用愛嚟幫助學生嘅重要性。以呢種方式培養出嚟嘅信任，將會造就一種指導嘅影響力，能夠鞏固佢哋，使佢哋自己能夠回答棘手嘅問題。
韋伯弟兄：多謝你。係嘅，我諗呢個就係我哋正喺度努力達成嘅核心目標：建立關係。根據你剛才所同我哋分享嘅，我哋可以喺福音進修班做一啲事，嚟幫助佢哋鞏固其他關係。你提到青少年發展計畫，我哋可以引導佢哋去搵佢哋嘅青少年領袖、主教、同女青年領袖。我哋可以透過教導有關家庭嘅內容，幫助佢哋鞏固同父母之間嘅關係，並將佢哋嘅心轉向父母。我認為呢一切都好重要——唔只係同佢哋建立關係，更加需要鞏固佢哋同嗰啲會引導佢哋走向正道嘅人嘅關係。多謝你嘅分享。既然剛才提到，我哋可唔可以講多啲點樣能夠以一種唔冒犯，或者令年輕人遠離福音嘅方式嚟教導呢啲基本嘅真理。事實上，容許我好快咁分享一個例子，嚟說明我諗到嘅問題。喺上個星期，有位教師打電話俾我，話有位家長想佢個女退出福音進修班，因為教師教導咗一啲有關家庭同家庭重要性嘅原則。呢位母親因為之前嘅家庭變故而覺得受傷，所以唔希望孩子被教導以家庭為核心角色——就算家庭係救恩計畫中嘅一部份。教師因為失去呢位學生而非常難過，並問咗以下嘅問題：我要如何教導真理？我哋唔想讓世人遠離福音，但又唔可以教導學生唔純正嘅福音，對於呢啲事我哋應該點處理呢？
鄔克司會長：真係一個好例子。斯密弟兄，關於呢個主題，你有咩想法？
斯密弟兄：我再次諗到——我哋剛才所講嘅人際關係。但係我諗到，一個信任教師——並感受到教師嘅愛嘅學生——會向佢哋敞開心靡。如果我哋所教導嘅理想世界同學生嘅實際情況有好大落差，有時候的確會出現一道防禦牆。如果學生喜愛並信任佢哋嘅教師，呢道防禦牆就會被瓦解。所以，關係真係好重要。我要再次強調之前嗰條問題嘅建議——同學生建立關係。
鄔克司會長：的確係咁。重要嘅係，要了解其實我哋冇義務去同意放喺我哋面前嘅一切——無論係出自學生、學生嘅父母，或者係社會上嘅其他人。同意世上所有信念，並唔係我哋需要去做嘅事。我哋嘅責任係教導真理。但當我哋咁樣做嘅時候，必須要非常小心，唔好偏離救主賜俾我哋嘅責任，去愛我哋嘅鄰人。不論我哋做啲咩，都必須以愛為出發點，咁先能夠避免衝突。但同時我哋要堅持自己嘅教導，讓教導去糾正錯誤嘅觀念。百翰·楊嘅個性係好容易會同人起衝突，不過我最近喺百翰·楊嘅教導或者講道中，發現佢其實處理得好好。佢喺其中一次講道中咁樣講——我引述：「無論男女，我對他們的感覺，不會因為信仰和我是否相同而有所改變。我們是否能像鄰居一樣的相處呢？我是做得到的；你的信仰和我是否一樣，我並不特別在意。」7以上就係百翰·楊引文嘅結尾。我覺得係一個令人出乎意料嘅資源，如此啟發人心嘅聲明，比我哋知道對住嗰啲意見同我哋不同嘅人，我哋可以懷住愛心去同佢哋共處。
韋伯弟兄：係呀，恰好就係我哋教師現時所需要嘅。我諗，呢項係現今身為救主門徒最重要嘅特質之一：能夠表達不同意，但會繼續愛佢哋。儘管喺信念上意見不合，卻能夠與人保持真誠嘅關係。
鄔克司會長：另一樣我哋需要努力嘅部分，係愛同接納——甚至係饒恕——與我哋意見不同嘅人，但同時唔會被理解為我哋認可佢哋。係幾難做到嘅。我哋喺政治同公共傳播嘅領域上，從好多不同嘅來源都見到，呢點係好難做到。當我哋懷住愛心去對待某個人所做嘅事嗰陣，其他人似乎會認為我哋認同佢嘅行為。
韋伯弟兄：呢一切都係有關係嘅，係咪？又回到關係呢個議題；又回到傾聽同同理心。但同時都可以回到教導呢項原則。亦回到我哋點解相信自己所做嘅事，係根據救恩計畫同基督嘅教義，然後可以將呢啲事情連埋一齊，並努力去做。
鄔克司會長：我認為以上係同首要嘅誡命「愛神」有關，救主講過：「你們若愛我，就必遵守我的命令。」8然後第二條誡命就係要愛我哋嘅鄰人。我哋愛鄰人並唔代表我哋唔將神放喺第一位，唔遵守佢嘅誡命。
韋伯弟兄：多謝你。
斯密弟兄：我腦海中浮現出一個情境，就係教師以愛心講出真理，並勇敢捍衛基督嘅教義——但同時亦愛佢哋嘅學生，讓佢哋感到平安，而學生信任並愛佢哋嘅教師。如果有位學生不同意基督教義嘅一項要素——應該話係一項福音原則——佢哋都會照嚟上堂。佢哋會參加福音研究所或福音進修班，係因為佢哋感到平安，並且覺得自己可以喺嗰個環境當中建立對耶穌基督嘅信心。所以，我認為取得呢個平衡係非常重要：勇敢捍衛真理，並愛嗰啲可能唔同意真理嘅人，好讓課室、福音進修班或福音研究所能夠成為學生感到平安嘅地方。
鄔克司會長：我需要講嘅係，在座可能有福音研究所或者喺大學任教宗教課程嘅教師，你哋喺呢個議題上可能會面臨更大嘅挑戰。舉個例，相對於福音進修班嘅學生，比較成熟嘅學生會傾向為自己思考，亦比較好辯。但原則都係一樣嘅，應用方法或者會依個人情況同成熟度而有所不同，但原則同我哋一直所討論嘅係一樣。
韋伯弟兄：多謝你。
鄔克司會長：之後嘅問題稍微改變一下主題，但同我哋呢個時代息息相關：我哋要點樣說服學生喺我哋努力教導佢哋嘅時候，將手機放埋一邊呢？
韋伯弟兄：呢條其實係一條好好嘅問題，事實上呢樣野都同班級中嘅衝突或意見不合有關，因為有時候的確會造成衝突，係咪？斯密弟兄？
斯密弟兄：係呀，我認為喺學習嘅環境當中，肯定有啲時候會需要學生斷線，將手機收埋一邊。我認為最能夠幫助佢哋咁樣做嘅方法，就係引人入勝嘅教導。培勒長老——或者培勒會長——曾經告訴我哋，要確保我哋嘅教導能夠引人入勝。不過，我亦覺得有時候，我哋可以邀請學員使用佢哋嘅手機學習。有咗ChurchofJesusChrist.org同福音圖書館應用程式嘅資源，我哋有時都可以邀請學生喺手機上使用呢啲能夠幫助建立信心嘅內容嚟學習。我認為咁樣可能係一項祝福——喺課外時間能夠對佢哋產生正面嘅影響——令佢哋唔再只係將呢個裝置看待成遊戲或社群媒體裝置——或者對某啲人嚟講，係誘惑嘅來源。佢哋亦會漸漸知道，同樣嘅裝置可以用嚟建立對耶穌基督嘅信心。我諗呢樣會需要到教師嘅靈感——同平衡。不過我認為主會幫助我哋透過使用裝置，搵到建立信心嘅機會，然後亦了解到咩時候需要關掉裝置，將它擺埋一邊。
鄔克司會長：你建議我哋唔好對手機存有敵意，令我諗起我之前嘅一個經驗——我回顧10年或15年前——我探訪過一堂主日學課程，學生都係上福音進修班年紀嘅男女青年。我懷住對手機存有敵意嘅態度入去，但當我環顧全班大約十幾個學生嗰陣，我發現成個教室入面只係得一本紙本經文，每個人都用緊手機讀經文同跟上課程。就喺嗰時，我開始明白呢個唔係一個禁唔禁止嘅問題，而係有冇平衡嘅問題。
韋伯弟兄：講得好好，多謝你。會長，我哋好高興今日能夠同你喺埋一齊，感謝你今日所俾嘅忠告。我哋睇下可唔可以花一分鐘時間，斯密弟兄，請你先分享任何你想表達嘅見證？接住落嚟會由我作見證，並留低其餘嘅時間俾會長。
斯密弟兄：多謝你。當我諗到我哋有呢個神聖機會去教導教會青少年同年輕成人，以及教會教育機構內嘅學生，我諗起我哋親愛嘅先知羅素·納爾遜會長嘅教導。佢話：「〔神〕保留了祂最高貴的靈，也許……是祂最精良的團隊……被派遣來到世上，在這個時代……〔他們〕是主有史以來派到世上最優秀的一群。」9同埋我想分享我嘅信念，就係同我哋有機會互動嘅年輕人，正正就係神先知所提到嘅年輕人。我哋有幾咁神聖嘅殊榮，能夠向佢哋見證耶穌基督、佢嘅贖罪同復活都係真實嘅。我今日都見證，耶穌基督嘅贖罪同復活係真實嘅；呢間係佢嘅教會；我哋由神活著嘅先知、先見同啟示者帶領；而當我哋喺教導後期時代嘅青少年嗰陣，就係參與緊神嘅偉業。我向各位作以上嘅見證，奉耶穌基督嘅名，阿們。
韋伯弟兄：阿們。我都要見證我哋慈愛嘅天父，以及身為世界救主同救贖主嘅耶穌基督都係真實嘅——呢度係佢喺世上嘅教會同國度。我好感謝能夠每日為主作見證，並教導他人有關佢嘅福音。我好感謝嗰啲教導我，並因佢哋對救主嘅信心同見證而祝福我嘅人，我好感謝能夠同你哋一齊參與呢項事工，教導耶穌基督復興嘅福音。然後好快咁提一下，當我諗到天父嘅愛，我哋經常講起天父有幾咁愛我哋嘅學生。我只係想補充，我知道我哋嘅天父都愛你哋，佢非常感謝你哋願意用一生嘅時間嚟教導佢嘅兒女。天父愛你哋嘅家人，只要你哋繼續忠信咁服務，教導佢嘅兒女，只要你哋用教導、見證同榜樣嚟祝福佢嘅兒女，天父就會祝福你哋同你哋嘅家庭。所以，感謝你哋所做嘅事。感謝你哋所做嘅一切，奉耶穌基督嘅名，阿們。
鄔克司會長：阿們。我要喺主美好僕人嘅見證上加上我嘅見證，我藉著聖靈嘅力量為父與子見證，呢項係佢嘅事工，你哋係佢嘅僕人，係耶穌基督福音嘅教師。我祈求，當你哋事奉主，同家人一齊朝住神為佢配稱兒女訂立嘅目標前進嗰陣，天上嘅祝福：「永生」就會降臨到你哋身上。我咁講係奉耶穌基督嘅名，阿們。
全體：阿們。