Jej Rikōlaajrak kōn M̧ōņōņō eo Ad Make
Bisoprik eo ej Eutiej
Rikakpilōklōk eo Kein Kajuon ilo Bisoprik eo Eutiej
Ro jeiū im jatū rejitenbōro, jotenin Ij en̄jake utiej im jeram̧m̧an eļap n̄an wōr iien em̧m̧an n̄an kōnono n̄an kom̧. Eļap aō nōbar rūm̧m̧an ded ro an Kabun̄ in, im Ij lan̄lōn̄ ilo aō jolo̧k jidik iien ippāmi jotenin.
Elōn̄ Bukwi iami rej pād ilo tabernacle in eaiboojoj. Elon̄ ļo̧k iami Ij jab maron̄ loe rej koba ippān doon ilo bukwi im̧ōn kweilo̧k ko ipeļaakin laļ in. Ak Ijeļā kom̧ij itok limo im ikdelel in ekkatak. Men̄e kōta aitok emaron̄ kōjepel kōj, Ijeļā Jetōb Kwojarjar emaron̄ pād ijo jej pād ie. Jetōb Kwojarjar ej ejake juon iakwe ejeno̧lo̧k ikōtaad elapļo̧k jen an kadiwōjļo̧k in kōm̧m̧an. Ij jar bwe Enaaj pād ippād, bwe Enaaj katakin kōj, tōl kōj, im im̧we kōj jotenin.
Mour Eobrak kōn Menin Bwilōn̄ ko
Jej pād ilo juon ruum̧ eaiboojoj, juon kōkkale in bwebwenato ej kam̧ool kōn tōmak im jerbal an paineer ro, ro raar lo Salt Lake City. Iaar delo̧n̄e Tabernacle in jinoin tata ke Iaar 16. Eaar ilo tūreep eo aō kein kajuon n̄an United States of America. Jema eaar kajjitōk bwe In etal ippān ilo juon an pejnej ļo̧k n̄an California. Āinwōt juon eaar rūttoļo̧k ilo tūrōk in France, Iaar ekkāke kōn lan̄lōn̄ ilo kajjitōk in. Iaar maron̄ in lo America! Itok-limo eo aō eaar lapļo̧k kōn itinerary eo am̧ ekoba juon weekend ilo Salt Lake City n̄an kobaļo̧k ilo kweilo̧k eo eļap.
Ij kememej itaakļo̧k eo am̧ ilo Utah kōn Ford Mustag eo kōm̧ ar jaataki. Kōm̧ ar jolo̧k elōn̄ awa ilo iaļ ko, kijoone sno ko, āne jem̧aden ko ilo an māj maron̄ loe, canyons ko roran im aiboojoj, im toļ ko. Jekjek in American West n̄an eō, im Iaar dāpij wōt an māj ko meja peļļo̧k n̄an lo cowboy im riIndia ro ilo iaļ eo.
Raan eo juon, kōn juon eo m̧ōttam em̧m̧an, kōm̧ ar maron̄ in pād ilo Tabernacle eo ilo jia ko im̧aan—ijo, ilo tuanbwijmaron̄—n̄an pād ilo m̧wen̄an ko ilo kweilo̧k eo. Iaar lukkuun in bwilōn̄. Ilo aolepen kweilo̧k ko, Iaar kajjieon̄ in keron̄jake naan ko ilo kajin pelle. Iaar maron̄ in meļeļe. Ij kememej wōt kōnono eo an Būreejtōn Ezra Taft Benson—ejjab lukkuun naan ko an, ak im̧we eo em̧weilaļ eaar pād ilo būruwō āinwōt juon ļaddik edik. Iaar en̄jake āinwōt n̄e Ij ettōņak, ilo juon ito itak em̧m̧an.
Ilo iien eo, ekōjkan aō maron̄ pijaik ļo̧k ta eo enaaj kar itok jotenin? Imaron̄ ke pijaik ļo̧k aō kwaļo̧k juon katak ilo ejja tabernacle in im̧aan juon jarlepju? Lukkuun m̧ool iaar jab!
Mour eborak kōn menin bwilōn̄ ko, ejjab ke? Men̄e lalem iiō ko rem̧ootļo̧k Ij jamin kar kōtmene menin. Ilo iien eo baam̧le eo aō im N̄a kar jokwe ilo Paris, im mour eo am̧ eaar jino bōk jikin. Ajri ro lalem nejūm̧ raar aolep lo̧tak ilo ejja im̧ōn taktō eo epaake m̧weo im̧ōm̧. N̄an kōm̧, kōm̧ij jab maron̄ kōtmene mour ko reoktak ak jabdewōt jikin jen kapukjuknen in eaenōm̧m̧an ilo Paris, eo eaar jepo̧o̧l kōn ajri ro nejūm̧ im ajri ro jibum̧. Innām juon jotān, Būreejtōn Monson eaar kūr tok m̧weo im̧ōm̧ im mour ko am̧ raar oktak.
Innām jen tōre eo baam̧le eo aō im N̄a kar lo mour eo elan̄lōn̄ ilo Utah—bwebwenato eo an Kabun̄, taļļōn̄ e toļ ko, barbecue ilo backyard eo ilo an al tak, ijoļ i elōn̄ kain hamburger ko (enno im jab enno!), kāām in football ko an Cougar … im Utes. Im, eo juon jab jeļā kake, cowboy eo me kwoj loe ilju ilo iaļ eo me emaron̄ n̄a!
Ilju im Jekļaj eo Ejjeļo̧k kar Karōke
Ijjitōn̄ eo aō jotenin āinwōt juon uwaan Bisoprik eoEutiej ekam̧ōņōņō im eim̧we. Ijoke, en̄jake in elukkuun oktak jān karōk ko aō āinwōt juon jodikdik. Āinwōt juon ajri Iaar kōņaan bwe in juon archeologist. Jibū eaar bōk kijejetok ioon make n̄an lo bwe In bōk juon jeļāļo̧kjeņ em̧m̧an. Eaar letok n̄an eō juon bok kōn pharaoh kiiō ņaetan ej King Tut, im jān men eo Iaar kōļapļo̧k juon ekkatak kōn etto. Iaar jolo̧k elōn̄ weekend ko n̄an ejake jin̄a ko kōn tariņae ko etto, im ilo dipin ruum̧ eo aō kar pinej kōn pija kein. Eaar wōr aō ettōņak juon raan n̄an etal n̄an Egypt n̄an bōk kuņaō etali tampeļ ko an ri Egypt im lōb ko an pharaoh ro.
En̄oul iiō ko tok ālik, Ijjab de juon archeologist im āinwōt ijjamin naaj. Ijamin pād ilo Egypt, im jerbal eo aō āliktata bwe in erom juon Rutiej an Kabun̄ in kar ilo food distribution. Ejjeļo̧k iaer eaar āinwōt karōk eo ke Iaar juon ajri!
Jodikdik ej, ilo m̧ool, iien eo em̧m̧an n̄an kōm̧m̧ani karōk ko. Kajjojo iaad ewōr ad ememeļo̧kjeņ in ajri. Āinwōt rūm̧m̧an ded ro kom̧ij aikuj in ettōņak e ilju eo ami—kajjojo iami! Bōlen ej kōjatdikdik eo an juon rikkure n̄an tōpare, jerbal in ejaak eo an juon rijin̄a, ak kijejeto n̄an juon diploma ak jerbal ko rem̧m̧an kwoj pukoti n̄an bōke jān jerbal im kijenmej. Bōlen ewōr am juon kōtmene elap ilo kōļmenļo̧kjeņ eo ami kōn ļeo ak lieo ippām ilju im jekļaj, kōn paoktokin, kōn m̧wilin, kōļar in mejen ak bōran, im ajri ro reaiboojoj me renaaj kōjeram̧m̧an baam̧le eo am.
Ewōr jete iaan kōņaan ko ami renaaj kūrm̧ool? Mour eobrak kōn men ko rejjab alikkar. Bwilōn̄ renaaj waļo̧k ilo iaļen mour. Wōn ejeļā ta eo enaaj waļo̧k ilju, ia eo kwonaaj pād ie iiō kane tok, im ta eo kwonaaj kōm̧m̧ane? Mour ej āinwōt juon mour in kakum̧kum̧ ijo karōk epen n̄an jeļā.
Enaaj wōr iien ko raorōk n̄an eok bwe kwon maron̄ ukōt m̧ōkaj mour eo am. Emaron̄ juon iien ejejjet ejjeļo̧k bar lale, juon ekōnono, juon iien ejjeļo̧k kar karōke. Valérie im n̄a kōmij kememej wōt iien eo em̧m̧an kōmij en̄jake iakwe n̄an doon. Eaar ilo iien ekkatak al eo an rūm̧m̧ad ded ro ilo ward eo am ilo Paris. Eaar jab lukkuun in bōk jikin! Kōm̧ ar jeļā kajien doon jen ke kōm̧ ad ajri, im eaar jab wōr am en̄jake kōn doon. Ilo jotān eo Iaar kōjan̄jan̄ ilo piano eo im eaar al ilo choir eo. Kōm̧ ar kalimjek mejān doon im jet men raar waļo̧k. Juon indeeo eo ejjeļo̧k jem̧ļo̧kin!
Enaaj wōr iien ko rōm̧m̧an me renaaj kwaļo̧k er make ilo mour ko ami, āinwōt enaan eo ekāāl jān Būreejtōn Monson kōn iiō in jerbal an mijenede. Ālkin kōjjeļā in jān rikanaan eo, emaron̄ wōr taujin in ļaddik ro im jiron̄ ro ilo Kabun̄ in ilo iien in ro rej kōm̧m̧ani karōk ko aer n̄an etal n̄an jerbal e juon mijen.1
Jet iien, kooj ko rej oktak ilo mour ko ad jān apan̄ ko jab jeļā kaki ak ebbweer ko. Iaar jeļā kōn juon en̄jake me jej maron̄ kejparok e ilo jekjek ko ilo mour eo ad.
Aaet enan̄in aolep armej rejjab kōņaan eo ejjeļo̧k jeļā kake. Men eo ejjab alikkar an mour ej kōm̧m̧an ilo ejjeļo̧k lōke, mijak kōn ilju me ekwaļo̧k e make ilo wāween ko roktak. Jet kijejeto n̄an kōm̧m̧an wujlepļo̧k relikjab kōn mijak ko, aaet n̄e iien ko rem̧m̧an rej make waļo̧k. N̄an waanjon̄ak, remaron̄ karm̧wijļo̧k m̧are, jeļāļo̧kjeņ, jino juon baam̧le, ak ejake juon m̧akūtkūt eo epolel, āinwōt “pād waan” ak pād wōt ilo im̧oko rainem̧m̧an an ro jineer im jemāer.
Bar juon ļōmņak me enaaj dāpij kōj ej waļo̧k jen naan in: “Kanooj, idaak, im lan̄lōn̄, bwe ilju jej mej” (2 Nipai 28:7). Eoon in ej kwaļo̧k bwe jejjab jeļā ta enaaj waļo̧k ilju im jenaaj aolep mej, jej aikuj in etale kōj make ilo iien in. Naan in etale in kōn ļōmņak ilo m̧ōņōņō, ekkar kōn jekjek in ilju im jeklaj eo aer.
Ļoor Iaļ eo an M̧ōņōņō
Ro jeiū im jatū rejitenbōro, ennaan eo aō n̄an kom̧ rainin ej bwe ewōr juon iaļ eoktak jen mijak ko im pere ak jojolāār—juon iaļ me ej bōktok aenōm̧m̧an, lōke, im inem̧m̧an ilo mour. Kwojjab maron̄ dāpij aolep jekjek kein ilo mour eo am. Men ko, rem̧m̧an im rapan̄ jim̧or, naaj waļo̧k n̄an eok n̄an eok me kwaar jab kōtmene kaki. Ijoke, Ij kwaļo̧k bwe kwon kōjparok am make m̧ōņōņō. Kwoj rikōlaajrak eo an.
Ij kememej wōt naan kein rem̧m̧an kar kwaļo̧k jen Būreejtōn Dieter F. Uchtdorf ilo kweilo̧k eo eļap lo̧k:
“Mekarta ilo ad rūttoļo̧k, an ļapļo̧k ad kōņaan reilikļo̧k im bwilōn̄ kōn ewi jon̄an an lukkuun in kadu iaļ eo.
“… Jej kile m̧ōņōņō eo ad.”2
Jaab, m̧ōņōņō eo am̧ ejjab lukkuun tōprak in jekjek ko ilo mour eo am. Elapļo̧k tōprak ilo jetōb eo am im pedped ko kwoj kalōk mour eo am ie. Pedped kein renaaj bōktok m̧ōņōņō n̄an eok ekkar n̄an apan̄ ko rej waļo̧k im bwilōn̄ ko kwonaaj iooni ilo mour in am ioon laļ in.
Jotenin, Ikōņaan etale ippāmi jet iaan pedped kein raorōk.
1. Kile Aorōk eo Am Make
Pedped eo kein kajuon: Kile Aorōk eo Am Make.
Jōm̧ar in baam̧le eo aō im N̄a kar jolo̧k jidik iien raan in kakije ilo Provence, juon jikin eaiboojoj ilo France. Juon jota, ālkin an al tulo̧k im maron̄ lep eaar jino jepo̧o̧l jikin eo, Iaar ļōmņak in leļo̧k eō make ilo juon iien elūr babu likļo̧k ilo jea eo inam̧ōjin m̧weo. Aolep men raar lukkuun marok eaar pen aō jeļā jabdewōt men ipeļaakū. Meja eaar jino lo lan̄ ko. Ilo jinoin raar kilmeej. Āliktata, juon meram eaar romak ilo mejatoto, āinwōt juon ebbōl, innām ruo, innām jilu. Eaar wōnm̧aanļo̧k wōt, im meja eaar kile maroklep eo, Iaar lo aō make bwini iju ko. Ta eo Iaar ļōmņak e eaar juon mejatoto emarok eaar eukōt Milky Way.
Iaar ļōmņak: “Ej āinwōt jemjerā eo ad make ippān Anij. Ewōr jet armj rej tōmak bwe E ej pād ettoļo̧k ak ejako? Armej ro rej lo bwe mour elukkuun marok im kilmej. Rejjab bōk iien ak kōm̧m̧an em̧m̧anļo̧k n̄an kile lan̄ ko n̄an lo bwe E ej pād ijen, im epaake kōj.”
Ļōmņak eo aō eaar wōnm̧aanļo̧k. Iaar kōļmenļo̧kjen kake kōn laļ eo make kōn māj ko meja im kōn loļo̧kjeņ eo aō make ilo kanniek, im Iaar kajjitōkin eō make: “Kar ta jekjek im nememeiū m̧okta?” Juon eoon eaar itok n̄an kōļmenļo̧kjeņ eo aō. Ej juon eoon eiaboojoj, juon iaan al ko an David, eo jeje ko an aolep iien rej im̧we eō.
“Ke ij lale lan̄ ko Am̧, jerbal an addiōm̧; allōn̄ im iju ko kwaar kōm̧anm̧ani;
“Ta armej bwe Kwōn keememej e? Im nejin armej bwe Kwōn itok n̄an ippān?” (Sam ko 8:3–4).
Ālkin wōt emōkaj an itok eoon in kainōm̧m̧an in:
“Bwe Kwaar kōttāik e jidik jān enjeļ raņ, im im kapālpel e kōn aiboojoj im wuj” (Sam ko 8:5).
En̄in ej jinibo̧o̧r eo im kabwilōn̄lōn̄ eo an kōm̧anm̧an in. Lan̄ eo ekilep im jamin jem̧ļo̧k, aaet, ilo ejja iien in, kōj kajjojo ewōr ad iien eaorōk, aiboojoj im jam̧in jem̧ļo̧k ilo māj ko mejān ad rikōm̧anm̧an. Kōm̧m̧an bwe en waļo̧k ilo iien in, aaet aorōk eo aō make eļap tokjen n̄an Jemedwōj Ilan̄.
Būreejtōn Uchtdorf eaar kwaļo̧k:
“Jekdo̧o̧n ia eo kom̧ij pād ie, jekdo̧o̧n jekjek rōt ko kom̧ij maron̄ pād ie, jab meļo̧kļo̧k kom̧. Jekdo̧o̧n ewi jon̄an an maron̄ pen raan ko ami, jekdo̧o̧n ewi jon̄an en̄jake jarorōk, jekdo̧o̧n ta ewi jon̄an an maron̄ tinaad ļōmņak eo ami, Jememi Ilan̄ ejjan̄in meļo̧kļo̧k kom̧. Ilo m̧ool, E ej iakwe kom̧, kōn juon iakwe indeeo.
… Kar jeļā kajiemi im kar kememej kom̧ jān juon Armej eo eutiej bōtata, ekajoor, im aiboojoj ilo laļ in! Kar iakwe kom̧ jān Kiin̄ eo an jikin ejjeļo̧k jem̧ļo̧k in im iien indeeo!”3
Jeļā bwe Anij ejeļā kōj im eiakwe kōj kajjojo ej āinwōt juon meram me ej kōjadeik mour eo ad im letok meļeļein. Ij kememej juon jiron̄ em̧m̧an ded eo eaar itok n̄an eō ālkin juon jar in jota me Iaar pād ilo Rome, Italy. Ainikien eaar obrak kōn m̧ōņōņō, im eaar kōnono n̄an eō kōn sister eo an eo me eaar ioon apan̄ ko im ajimakeke. Innām leddik in eaar kajjitōk juon kajjitōk ippa: “Ewi wāween aō jipan̄ e jeļā bwe Jemedwōj Ilan̄ ej iakwe e?”
Ejjab ke juon kajjitōk eaorōk? Ekōjkan ad jeļā bwe Anij ej iakwe kōj? En̄jake eo ekkā an wōr ippād kōn aorōk eo ad make ej pedped wōt ioon iakwe im itok limo eo jej bōke jān ro ipeļaakid. Aaet jet iien iakwe in elikjab. Iakwe jān armej ekkā an jab weppān, likjab, ak m̧o̧n.
Ijoke, iakwe eo an Anij eweppān, dipieo, im ejjab m̧o̧n. Jekdo̧o̧n n̄a, men̄e ewōr ro m̧ōtta ak jab, men̄e ibun̄bun̄ ak jab, im n̄e Ij en̄jake jooļ ak ba ņae jen ro jet, ewōr aō jeļā bwe Jemedwōj Ilan̄ ej iakwe eō. Ejeļā aikuj ko aō; E meļeļe n̄ūrbōktak ko aō; E ej m̧ōņōņō in jipan̄ eō. Im kam̧oolol eo elap kōn iakwe eo An n̄an eō ej bwe An “yokwe laļ, Eaar letok juon wōt Nejin Ear keotak” (Jon 3:16). Eaar jab kōmakūt kap eo emeo an Rilo̧mo̧o̧r im lukkuun kar en̄taan kōn Emake āinwōt Eaar lale Nejin Emake n̄an en̄taan ilo Jikin Kallib Getsemane im ioon debwāāl. Kraist eaar en̄taan kōn jerawiwi ko an aolep armej, im m̧ōttan Pinmuur eo elap kar kōmeļeļeik n̄an eō im ej pād wōt ippa rainin. Menin letok in ekwojarjar, kwaļo̧k jen Jemen im Nejin, kapen ilo aō kōn aorōk ewōr ippa kōn Er.
Ro jeiū im jatū, pijaik ta meļeļein n̄an eok eļan̄n̄e kwon kar lo eok make āinwōt an Anij lo eok. Ta eļan̄n̄e kwoj lo eok make kōn ejja jouj, iakwe, im lōke me Anij ej lo? Pijaik men eo emaron̄ jelet mour eo am n̄an meļeļe aorōk eo am indeeo āinwōt an Anij meļeļe. Elan̄n̄e kwomaron̄ lo eok make ilo māj ko Mejen, ta im̧we eo en kar wōr ilo mour eo am?
Ij kam̧ool bwe E ej pād ijen. Pukot E! Pukot im ekkatak. Jar im kajjitōk. Ij kallim̧uri eok bwe Anij enaaj jilkintok kōkalle n̄an eok kōn jerbal eo An im iakwe eo An n̄an eok. Emaron̄ in ilo juon uwaak in jar, emaron̄ in ilo im̧we eo an Jetōb Kwojarjar ak kaenōm̧m̧an eok; emaron̄ in ilo juon im̧we eidin̄ ak juon kajoor ekāāl me kojjeļā ejjab itok jān eok; emaron̄ in ilo uwaan juon baam̧le, m̧ōttam̧, ak ritōl ilo priesthood eo ilo jikin im awa eo ejejjet n̄an kōjeram̧m̧an eok. Ilo juon wāween ak eo juon, ilo am etal n̄an E, Enaaj kōm̧m̧an bwe kwon jeļā bwe E ej pād ijen.
2. Erom Wōn ro rej Kom̧
Kiiō, kein karuo pedped an m̧ōņōņō:Erom wōn ro rej kom̧.
Naan in “erom wōn ro rej kom̧” ej kwaļo̧k n̄an Pindar, juon iaar rijeje boem eo ebun̄bun̄ jān Creek4Āinļo̧k wōt juon naan epen meļeļe. Ekōjkan aō maron̄ erom wōn eo em̧ōj kadede aō erom?
Inaaj kōmeļeļeik pedped kein n̄an juon bwebwenato. Jem̧aanļo̧k iaar lo juon pija ņaetan Age of Reason. Pija in ej kōnono kōn bwebwenato eo an Marguerite, juon ribaan̄ eo ej tōl juon mour ejej uwaan, eobrak kōn itok itak ko im kweilo̧k ko ilo kona ko emen ilo laļ in. Men̄e e rim̧are, eaar ba ejjeļo̧k an iien n̄an wōr nejin juon ajri.
Tōre liin eaar 40, eaar bōk juon leta me ej ba: “Jitenbōro n̄a, Rainin Ij jiljilimjuon iiō detta im Ij je leta in n̄an eok n̄an jipan̄ eok kememej kallim̧ur ko me Iaar kōm̧m̧ani ilo tōre ko rem̧m̧an, im barāinwōt bwe kwon kememej wōn eo ikōņaan erom.” Marguerite eaar kaju meļeļe bwe rijeje eo an leta eo eaar emake ke eaar jiljilimjuon an iiō. Peij kein tok laļ rej kōmeļeļe ko an leddik in edik kōn kōttōpar ko an ilo mour.
Marguerite eaar kile bwe armej eo eaar erom eaar ejjeļo̧k tokjen āinwōt ta eo eaar kōņaan ke eaar juon leddik em̧m̧an ded. Ilo an kar kālet n̄an bar bōk armej eo eaar lo ke eaar juon ajri, karōk eo an erreeo im ejaak in mour eo an dipieo in oktak. Liin eaar kile ippān baam̧le eo an im eaar jeke n̄an depdep wōt ilo aolepen mour eo an n̄an jipan̄ armej ilo aikuj.5
Ro jera rejitōn bōro, eļan̄n̄e kwoj kiiō bōk juon leta jān eo m̧ōttam̧, ta eo en kar ba? Ta eo lowaan leta eo kwon kar riiti n̄an eok make ilo raan in peptaij eo am ke kwar ralitōk iiō rūttom̧? Inaaj kar bōlen ro̧o̧likļo̧k. Eļan̄n̄e en kar ekkar bwe kwon bōk juon leta jen mour eo m̧okta, ta eo en kar ba? Ta jekjek in leta eo n̄e meļo̧kļo̧k ak lukkuun laļ eo em̧ool kwoj pād ie eļan̄n̄e kwon kar bōk e rainin?
Leta in emaron̄ jeje āinwōt in: “Iakwe eō, ij jeje n̄an kwe bwe kwonaaj keememej wōn eo ikōņaan erom. Iaar lamōj kōn lan̄lōn̄ ilo iien eo em̧m̧an n̄an diwōjļo̧k n̄an laļ in. Ijeļā bwe mour ioon laļ in ej juon iaļ eaorōk n̄an kōmaron̄ eō n̄an eddōkļo̧k n̄an kakūrm̧ool likio in tōprak eo aō im mour indeeo ippān Jemedwōj Ilan̄. Ij kōjatdikdik bwe kwonaaj keememej bwe kōņaan eo aō eļaptata ej n̄an erom joun rikaļoor an ad Rilo̧mo̧o̧r, Jisōs Kraist. Ij jipan̄ karōk eo An, im kiiō ke ij pād ioon laļ in ikōņaan in jipan̄ E ilo jerbal in lo̧mo̧or in An. Jouj barāinwōt keememej bwe ikōņaan erom m̧ōttan juon baam̧le eo enaaj pād ippān doon n̄an indeeo.”
Ļōmņak in āliktata ej kakeememej eō kōn juon al eaiboojoj ej waļo̧k ilo bok in al eo an Kabun̄ ilo French—juon eo me ejjab waļo̧k ilo bok in al an laļ ko jet. Ej taitōļ, ““Souviens-toi,” meļeļein ej “Keememej,” im ej kōm̧m̧an n̄an al jān New World Symphony jen Antonín Dvořák. Ej al eo kōn juon m̧am̧a im baba eo ej kwaļo̧k kōn juon nin̄nin̄ ej kab ļotak.
Kōtļo̧k aō riiti eoon jilu n̄an kom̧:
“Keememej, nejū: Ilo iien an tak al,
Kōm̧ ro raar m̧ōttā kar ikkure ilo kōto.
Innām juon raan, ilo lan̄lōn̄, kōm̧ kar kālōt
N̄an errā kōn karōk eo eļap an mour jān Irooj.
Joten eo, nejū, kōm̧ kar kalim̧m̧uri doon,
Jen iakwe, jen tōmak, n̄an bar koba ippān doon.6
“Keememej, nejū.” Juon iaan ito itak ko reļļap an mour ej n̄an pukōt wōn lukkuun kōj, ia eo jaar itok jāne, innām mour aolep iien ilo aenōm̧m̧an ippān kadkad eo ad im unin ad pād ijin.
Brigham Young eaar ba: “Katak eo eļap kwomaron̄ ekkatak ej n̄an jeļā wōn kwe. … Kwaar aikuj itok n̄an ijin n̄an ekkatak menin. … Ejjeļo̧k armej emaron̄ jeļā e make, ijjelo̧kin an meļeļe eļapļo̧k ak edikļo̧k men otemjej jen Anij; barāinwōt jabdewōt armej remaron̄ ekkatak im meļeļe men otemjej jen Anij ijjelo̧kin ejjab jeļā e make: ej aikuj in jeļā e make, ak ej jamin jeļā Anij”7
Jem̧aanļo̧k, leddik eo nejū eaar kwaļo̧k n̄an n̄a juon pija kōn pedped eo em̧m̧an loe ilo pija in The Lion King. Epepen eo am eaar rūttoļo̧k kōn ainikien ko im pija ko an pija in. Bolen kwomaron̄ keememej pija eo ijo Simba ej bōk juon lotok jān jemān, Mufasa, kiin̄ eo emej. Ālkin an jemān mej, Simba eaar ko ettoļo̧k jān aelōn̄ in kiin̄ eo kōnke eaar kile bōd kōn mej eo an jemān. Eaar kōņaan in ko jān eddo eo an āinwōt rijolet n̄an tūroon eo.
Jemān eaar waļo̧k n̄an e im kakkōl e: “Em̧ōj am meļo̧kļo̧k wōn kwe im kōn menin em̧ōj am meļo̧kļo̧k n̄a. Kalimjek lowaam̧, Simba. Em̧ōj am ļapļo̧k jān ta eo em̧ōj am erom. Kwoj aikuj bōk jikūm̧ ilo Laajrak in Mour.” Innām kūr in ej ālij jejjo alen: “Keememej wōn kwe. Keememej wōn kwe.”
Simba, eaar lukkuun udiddik jen en̄jake in, ļōmņak n̄an bōk mejān kajjik in an. Ej jiron̄ ļo̧k eo m̧ōttan, shaman man̄ke eo, en̄in “āinļo̧k wōt kōto ko rej oktak.”
Man̄ke eo ej uwaak, “Oktak em̧m̧an.”
Im Simba ej ba:“Ak menin ejjab pidodo. Ijeļā bwe ta eo ij aikuj in kōm̧m̧ane. Ak bar ro̧o̧l ej meļeļein bwe ij aikuj jelm̧ae tōre eo aō m̧okta. Eto aō kar ko jāne.”
“Kwoj etal n̄an ia?” man̄ke eo eaar kajjitōk ippān.
“Ij rool!” Simba eaar lamōj.8
Kōj aolep maron̄ bōk—ak kōrool—ijo jikid ilo laajrak in mour. Erom lukkuun wōn kōj. Am lan̄lōn̄ im maron̄ n̄an pukōt jokkun wōt juon ilo mour eo am enaaj waļo̧k n̄e kwoj loe, kile, im bōk lukkuun kadkadim āinwōt juon ajri nejin Jemedwōj Ilan̄ innām mour ekkar n̄an jeļāļo̧kjeņ in.
3. Lōke ilo Kallim̧ur ko an Anij
Ij kiiō kwaļo̧k ippāmi kein kajilu pedped in m̧ōņōņō: Lōke kalim̧m̧ur ko an Anij.
Em̧m̧an naan in kōbakkak kein an Būreejtōn Thomas S. Monson:” Ilju im jekļaj ej āinwōt meram āinwōt tōmak eo am”9. Tōprak eo ad im ad m̧ōņōņō ilo mour ej pedped wōt ioon m̧ōttan eo eļap ilo tōmak eo im lōke eo ippād, eo me Irooj enaaj tōlļo̧k im jineet kōj n̄an kakūrm̧ool mejān kajjik eo ad.
Emōj aō kile bwe em̧m̧aan ro im kōrā ro rej tōpar in m̧akūtkūt ko rekabwilōn̄lōn̄ ilo mour ekkā an wōr aer lōke ilo ilju im jekļaj eo aer jān iiō ko m̧okta ilo aer kar jodikdik. Juon waanjon̄ok āinwōt Winston Churchhill, em̧m̧aan in British eo ebun̄bun̄. Ke eaar juon likao eaar wōr ippān juon lōke ekijn̄en̄e kōn ilju im jekļaj eo an. Ke eaar jerbal ilo juon kumi ekilep ilo India ke ej 23 iiō dettan, eaar jeje n̄an jinen, “Ewōr aō tōmak ilo ilju im jekļaj eo aō, bwe ikōņaan in kōm̧m̧ane juon men n̄an laļ in.”10 Menin ekar juon kanaan em̧m̧an! E, ilo tōprakin, eaar pijaik an iten erom juon armej eo eaorōk ilo bwebwenato in laļ eo an, im eaar erom em̧m̧aan eo eaar tōl Great Britain n̄an anjo̧ ilo Pata eo an Laļ in Kein Karuo.
Ij tōmak bwe kajjojo iami membōr ro reddik an Kabun̄ eo an Jisōs Kraist elōn̄ ippāmi jen juon iju imejatoto n̄an tōl kom̧. Anij ej oņaake kom̧ im eaar kōm̧m̧an kalim̧m̧ur ko ippāmi.
Juon eoon jān bok in Malakai ej ilo būruwōn Jepļaaktok eo an gospel eo, im eaar jeje jen enjeļ Moronai ilo kajjojo iien lotok ko an n̄an ippān Joseph Smith. Enjeļ eo eaar ba, kouti jān Elija rikanaan eo: Im enaaj katōk ilo buruwōn ajri ro kallim̧ur ko kar kōm̧m̧ani n̄an ro jemāer, im būruwōn ajri ro naaj oktak n̄an ro jemāer (Joseph Smith—History 1:39).
Ro reddik jatū, kam̧oolol Jepļaaktok eo, kom̧ rej ajri in kalim̧m̧ur eo. Kom̧ naaj bōk juon jolet kar kalim̧m̧ur n̄an ro jemāmi. Kalim̧m̧ur kein jān Irooj rej kōm̧m̧an bwe kom̧in m̧ōttan juon epepen erooj.
Elōn̄ iaami ro ij kōnono im bwini paineer ro rerooj ilubwilijin rūtto ro jibūmi im jim̧aami etto, jetōb ko reļļap ro raar jipan̄ ejaake Kabun̄ in emōj an jepļaaktok jen aer peran im kaarmejete. Epepen ko an Rikwojarjar ro reperan raar etal im̧aami. Ro jet rej ron̄jake n̄a rainin rej paineer ro an baam̧le ko aer im ilo āne ko aer. Kom̧ij ekketaak eo kein kajuon ilo ta eo enaaj erom juon tomede ejjeļo̧k jem̧ļo̧kin. Jekdoon kain rot bwebwenato im m̧anit eo ami, āinwōt membōr ro an Kabun̄ eo kom̧ij ekketaak n̄an juon baam̧le ilo jetōb. Menmenbwij in jetōb eo ami ej kōm̧m̧an bwe kom̧ kajjojo rej juon bwijin ro jemād, āinwōt kar kwaļo̧k m̧okta jen rikanaan ro, im rijolet n̄an kalim̧m̧ur ko an Anij n̄an er.
Bar riiti kōjeram̧m̧an an petriak eo ami. Ilo kōjeram̧m̧an in Irooj ej kapene bwe kar likwōj n̄an kom̧ juon iaan bwij ko jon̄oulruo an Israel, im kōn menin, jen ami tiljek, kom̧ij erom juon rijolet n̄an kōjeram̧m̧an ko reļļap kar kalim̧m̧uri Abraham, Isaac, im Jekab. Anij eaar kalim̧m̧uri Abraham bwe ilo an elōn̄ bōk gospel eo naaj ņaetaer ālkin etan, im naaj kile ineen, im naaj kotak im kōjeram̧m̧an e āinwōt jemāer (laleAbraham 2:10).Ilo riiti kōjeram̧m̧an an petriak eo ami, leļo̧k ami n̄an kalim̧m̧ur ko Irooj eaar kōm̧m̧ani n̄an kom̧. Kejekļo̧kjeņ kōn kajjojo iaer. Ta meļeļeier n̄an kom̧?
Kalim̧m̧ur kein rej m̧ool. Eļan̄n̄e kom̧ij kōm̧m̧ane ijo koņaam̧i, Anij enaaj kōm̧m̧ane ijo Koņaan. Elukkuun em̧m̧an naan kein kar kōnono jen Alma ilo raan eo eaar būkļo̧k rekoot ko rekwojarjar n̄an ļaddik eo nejin Hilamōn:
“O kwōn kememej, nejū m̧aan Hilamōn.. …
“… Eļan̄n̄e kwōj kōjparok kien ko an Anij, im kōm̧m̧an kōn kein re kwojarjar ekkar n̄an men eo Irooj ej jiron̄ eok, … lo, ejjeļo̧k kajoor in laļ ak hell naaj būki jān eok, bwe Anij ej kajoor n̄an kakūrm̧ool aolep naan ko An.
“Bwe Enaaj kakūrm̧ool aolep kallim̧ur ko An ko Enaaj kōm̧m̧an n̄an eok, bwe Eaar kakūrm̧ool kallim̧ur ko An ko Eaar kōm̧m̧an n̄an ro jemād”” (Alma 37:13, 16–17).
Kūrm̧ool in kallim̧ur ko an Anij ej aolep iien ekkejel n̄an pokake n̄an kakien ko rej ekkejel ippāer. Irooj eaar ba Ej liāpe n̄e jej kōm̧m̧an ta eo Ej ba; ak n̄e jej jab kōm̧m̧an ta eo Ej ba, ejjeļo̧k ad kallim̧ur (laleD&C 82:10).
Ilo bar juon wāween, kallim̧ur kein rej jab pedped ioon men otemjej ko rej waļo̧k ilo mour ko ad renaaj ekkar n̄an kōtmene ko im kōņaan ko ad. Ijjelo̧kin, kallim̧ur ko an Anij rej kallim̧ur bwe ta eo ej waļo̧k n̄an kōj enaaj ilo karkan kōņaan eo An. Jet iien kapo ko ejjeļo̧k kōtmene kaki rej kwaļo̧k er make bwe jej aikuj anjo̧ ioer; jet iien kōjeram̧m̧an in kallim̧ur ko renaaj to̧rto̧r m̧aanļo̧k. Ak iien eo enaaj itok n̄e jenaaj jeļā bwe mālijjon̄ kein im men kein to̧rto̧ri m̧aanļo̧k raar n̄an em̧m̧anļo̧k eo ad im eddōk eo ad n̄an indeeo. Ta eo eļapļo̧k jemaron̄ in kajjitōk?
Men eo eļap jemaron̄ in kōņaan ilo mour ej n̄an kajim̧we an kilaad n̄an ankilaan Irooj, n̄an bōke pepe eo An n̄an mour ko ad. Ejeļā men otemjej jān jinoin, ewōr Ippān juon erreim̧aanļo̧k eo me ejjeļo̧k ippād, im iakwe kōj kōn juon iakwe eļap.
Kōm̧m̧an bwe in kōmeļeļeik pedped in jen juon aō make en̄jake. Ke iaar likao iaar pepe n̄an m̧aanjebpopo n̄an deļo̧n̄e idajon̄jon̄ n̄an jikuuļ in pejnej ko rem̧m̧an ilo France. M̧aanjebpopo in, eo eaar jem̧ļo̧k ilo juon iiō, eaar lukkuun apan̄ im kar aikuji jerbal eļap aolep raan. Ilo jinoin iiō eo, iaar pepe bwe jabdewōt jerbal eo eddo, ij jamin naaj kōm̧m̧an bwe ekkatak ko aō ren bōbrae eō jān pād ilo kweilo̧k ko aō ilo Jabōt ak jān bōk koņaan ilo juon institute class juon kōttan juon wiik. Iaar wōnm̧aanļo̧k errā n̄an jerbal āinwōt juon rijeje n̄an young adult ward eo aō, eo eaar aikuji eō ruo awa kajjojo wiik. Iaar lōke bwe Irooj enaaj kile aō tiljek im naaj maron̄ jipan̄ eō tōpar jibadbad ko aō.
Ilo jem̧ļo̧kin iiō eo, ke teej ko raar iten bōk jikin, iaar en̄jake bwe iaar kōm̧m̧ane ijo em̧m̧antata ippa. Aaet eaar ļapļo̧k aō kajoor ilo jar ko aō im jitlo̧k ko aō. Ke iaar itaakļo̧k jikin teej an jikuuļ eo em̧m̧antata, iaar lukkuun leke bwe Irooj enaaj uwaake kōņaan ko aō. Ilo m̧ool, m̧akūtkūt ko raar waļo̧k ilo juon jekjek elukkuun in oktak jān ta eo iaar kōjatdikdik kake. Teej in kōnono eo ilo jabjek ko aō rekajoor eaar juon jorrāān eo ejjeļo̧k kōtmene kake—Iaar bōk juon grade eo eaar bōbrae eō jān aō etal n̄an jikuuļ in eutiej. Iaar lukkuun inepata. Etke Irooj emaron̄ kar kōwaane eō ke iaar dāpdep wōt ilo aō tiljek?
Ke iaar kwaļo̧k eō make ilo teej in kōnono eo n̄an jikuuļ eo kein karuo ilo laajrak eo aō, iaar obrak kōn pere im jeleke. Ilo jikuuļ in, teej eo me eaar lukkuun in eddo eaar 45 minit intōrpiu ippān juon jury eaar tōl jen jeban eo an jikuuļ eo. Ilo jinoin intōrpiu eo eaar ejjeļo̧k oktakin, … m̧ae kar kajjitikin eō kōn juon kajjitōk ejej uwaan: “Kōm̧ jeļā bwe kwaar ekkatak eļap n̄an m̧aanjebpopo n̄an teej in. Ak kōm̧ naaj itok limo n̄an jeļā ta m̧akūtkūt ko am ilkin ekkatak ko am.” Menono eo aō eaar lukkuun bam! Ilo juon iiō iaar kōm̧m̧ane wōt ruo men ko: ekkatak im etal im jar! Iaar jeļā bwe eaar juon iien m̧ool. Iaar mijak, ļōmņak jury eo enaaj nana an ukōt aō membōr in Kabun̄ in. Ak, ilo juon wōt jekōn, iaar kōm̧m̧ane jokālet eo n̄an tiljek wōt n̄an pedped ko aō.
Iaar ba: “Ij juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata.” Innām, ilo 15 minit ko, iaar kōmeļeļeik m̧akūtkūt ko aō ilo Kabun̄ in: kweilo̧k ko an Jabōt, kūlaaj in institute eo, eddo eo aō āinwōt juon ward clerk.
Ke iaar dedeļo̧k, jeban eo an jikuuļ eo ar kōnono: “Kwoj jeļā, ij m̧ōņōņō bwe kwaar ba menin. Ke iaar likao, iaar ekkatak ilo United States. Juon iaan ro m̧ōtta eaar juon Mormon. Eaar juon likao ekabwilōn̄lōn̄, juon eo eaar wōr ippān aorōk ko reļļap an armej. Ij kile Mormon ro bwe armej ro rem̧m̧antata.”
Juon kar deoor! Raan eo iaar bōk juon iaan grade ko rem̧m̧an, eo eaar kōtļo̧k aō pād ilo jikuuļ in ippān juon jikin kautiej.
Iaar kam̧oolol Irooj kōn An em̧m̧an. Mekarta, ilo iien eo, iaar jab maron̄ bōktok eō make n̄an errā kōn likjab eo aō ilo jikuuļ eo em̧m̧antata. Ilo juon iien eaitok iaar likūt ilowaaō juon en̄jake in likjab im aaet jab jim̧we. Eaar bōk jejjo iiō ko n̄an meļeļe kōjeram̧m̧an eo eļap me aō likjab n̄an pād ilo jikuuļ eo eaar ettōņak eo kar aō. Ilo jikuuļ eo kein karuo iaar ioon armej ro rejjejet. Jeram̧m̧an ko an iaio eo aō ippāer eaar erom kam̧ool jen aolepān aetok in jerbal eo aō im n̄an rainin rej aorōk ilo mour eo aō im mour ko an baam̧le eo aō. Iaar jeļā menin, men̄e ilo iiō in jodikdik, Irooj eaar tōl bun̄tōn neeō kōn jeļāļo̧kjeņ eo m̧okta an mijen eo Enaaj kar kajjitikin eō n̄an kōtōprake tokālik ilo mour eo aō.
Ro jeiū im jatū, ālkin ami kōm̧mane ilo aolepān ami kajoor, eļan̄n̄e men otemjej rej jab rooltok ilo wāween kom̧ ar kōjatdikdik ak kōtmene kaki, pojak n̄an bōk ankilaan Jemedwōj Ilan̄. Jejeļā bwe E ej jamin naaj kipel iood men otemjej ej jab ļap n̄an em̧m̧an eo ad. Ron̄jake ainikien eo emļak me kanniōk otemjej rej pād ilo Pein, im jej aikuj in pād wōt im jeļā bwe E ej Anij (lale D&C 101:16)..
Ij kab loe juon pija eo eaar kwaļo̧k bwebwenato in Willie im Martin handcart kompani ko. Ilo Māe 1856, ruo kumi ko raar kobain elōn̄ļo̧k jān juon taujin Rikwojarjar ro raar em̧m̧akūt jān England n̄an em̧m̧akūtļo̧k n̄an Utah. Ke rej itaakļo̧k jiljino allōn̄ tokālik ilo Salt Lake Valley ilo jem̧ļo̧kin ito itak eo aer, elōn̄ļo̧k jen 200 iaer raar jako. Enan̄in aolepāer raar jako kōn nan̄inmej, kwōle, m̧ōk ilo iaļ eo ej tōlļo̧k n̄an jikin eo raar ņaetan “Zaion.”
Juon iaan paineer ro eaar waļo̧k ilo pija in eļap an kabwilōn̄ eō. Eaar kobrak kompani eo kōn m̧wil eo em̧m̧an im m̧ōņōņō. Eaar, mekarta, jab āinwōt enan̄in aolep paineer ro. Juon em̧m̧aan ekadu im m̧ōjņo̧ ilo ānbwin, eaar juon kabwilōn̄lōn̄ ilo e make! Iaar ekkatak bwe paineer in eperan eaar Robert Pierce jen Cheltenham, England.
Juon iaan rito itak ro m̧ōttan eaar kōmeļeļeik e āinwōt “juon iaan riajjikukkuk ro remōjņo̧ ij jan̄in kar elolo ej juon rito itak. Juurlaļ ko an raar jab maron̄ m̧akūtkūt im ānbwinnin eaar lukkuun kob, ak eaar kajoor ilo tōmak. Eaar maron̄ etetal kōn jon̄an ium̧ eo ekabwilōn̄lōn̄ ilo an kōjerbal jokwōņ.”11
Juon raan Robert Pierce eaar etal ilo iaļ eo ebōd im jako jān im̧aan mejān kompani eo. Jet em̧m̧aan raar jino pukōt e im āliktata kar loe ilo juon jekjek eo ekauwōtata. Ij kwaļo̧k naan kein aer:
“Kōn jon̄an mijak eo am kōm̧ ar loe peļaakin juon wōjke em̧o̧r ruo kidu wōlive reļļap raar ito itak iturin im jiljino bao ikōļ ko raar pād imejatoto in wōjke eo kōttar an em̧akūtkūt im jidilo̧k in m̧akūtkūt kōn jokwōņ ko an bwe ren maron̄ tupare im kan̄ aolepān ilo nokjek ium̧win okar ko an wōjke eo. …
Kōm̧ ar itaakļo̧k iien eo ejjejet n̄an lo̧mo̧oren e jān an mej, kanōk nam̧ōjtak, im likūt e ioon cart eo kōm̧ ar bōktok, kaam̧ņake n̄an an bar rool n̄an camp eo.”
Im kiiō, juon ļōmņak ilo piktokin m̧wil eo an Robert: “Ewi wāween an kar ļein akweļap n̄an kōm̧ bwe kōm̧in kōtļo̧k an etetal āinwōt eaar kallim̧ur ke eaar jino tūreep eo am bwe emaron̄ etetal laļ aolep bun̄tōn ko an iaļ eo n̄an Salt Lake City”
Innām, m̧ōttan eo ekabūrom̧ōjm̧ōj an bwebwenato in: “Kōn menin, kōm̧ ar lo̧mo̧o̧ren e jejjo wōt raan ko raitok, ilo jem̧ļo̧kin raan eo kein kajiljino eaar itok jorrāān eo an ilo laļ in im eaar itok n̄an juon jem̧ļo̧k im eaar kallib ilo būke ko ilo Reba Elkhorn”12
Sister Jolene Allphin, eo eaar kobaik bwebwenato in an Robert Pierce, eaar ba kōn e: : “Em̧ool ekabwilōn̄lōn̄ bwe Robert Pierce eaar ito itak 600 mael ko ilo jokwōņ ko an m̧okta jān an mej jān wāween ko reppen an iaļ eo. Būruwōn eaar kōņaan kobaļo̧k ippān Rikwojarjar ro ilo Zaion im jab erom juon eddodo n̄an jabdewōt rito itak ro m̧ōttan. … Robert eaar jab wōt kōņaan jabdewōt menin leļo̧k ak kōm̧admōd eo ejeno̧lo̧k” 13
Ro jeiū im jatū, ij kajjitikin Eō make kajjitōk in ej laajrak: Etke Anij, eo Eaar lukkuun lo̧mo̧o̧ren likao in eļap an tōmak jān olive ko im ekōļ ko, kōtļo̧k bwe e en mej ioon rājet in iaļ eo jet wōt raan ko tokālik?
Jako eo an ej juon iaan ko eļap an am̧ņak. Ilo pija in, ej ba, jidik m̧okta jen jem̧ļo̧kin:
“Mijenede ro raar jiron̄ eō bwe iaorōk im juon raan inaaj kajoor! …
“Aolep iien iaar kōņaan juon ānbwin eo ekajoor. Kiiō, inaaj bōke. N̄e kwoj tōprakļo̧k Zaion, ļōmņak kōn n̄a”14
Ilo aō ļōmņak kōn Robert Pierce, ij ļōmņak kōn naan ko jān jeje ko an Paul n̄an Hibru:
“Rein otemjej raar mej ilo tōmak, ke raar jan̄in bōk men in kallim̧ur ko, a raar loi jān etoļo̧k, im yokyokwe er, im kwaļo̧k kōn aer ruwamāejet im ri ito-itak ioon laļ.
“… Āindein eaar ba, rej kwaļo̧k alikkar bwe rej pukōt aelōn̄ eo aer. …
“A kiiō rej kōņaan tōpar aelōn̄ em̧m̧an jān eo, aet, aelōn̄ i lan̄” (Hibru 11:13, 14, 16 16).
Ilo jem̧ļo̧kin, Robert Pierce eaar kile bwe mejān kajjik eo an eļap eaar aelōn̄ in lan̄, jab Salt Lake Valley.
Āindein ej n̄an kōj aolep. Kallim̧ur ko an Irooj rej kallim̧uri kōj kōn mejān kajjik eo ad āliktata. Peba in ito itak eo n̄an kōj kajjojo enaaj ekkar n̄an jeļāļo̧kjeņ eo m̧okta an Anij. Jekjek ko ad remaron̄ oktak, m̧akūtkūt ko ejjeļo̧k kōtmene kaki remaron̄ waļo̧k, apan̄ ko remaron̄ waļo̧k, ak kallim̧ur ko an Anij n̄an kōj rej kallim̧ur jen tiljek.
Sister Ann C. Pingree eaar kōlaajraki ta meļeļein n̄an tōmak ilo kallim̧ur ko an Anij. Eaar jino kout jen Elder Bruce R. McConkie āinwōt in:
“‘Tōmak ilo aolepān im jekjek eo erreo ej karōk in juon kallim̧ur epen im … lōke edipio bwe [Anij] enaaj ron̄jake akweļap ko ad im letok ekkar n̄an kajjitōk ko ad’ ilo iien eo wōt An. Tōmak bwe, jemaron̄ barāinwōt ‘jutak dim ilo tōmak’ rainin im ilju.”
Innām eaar wōnm̧aanļo̧k:
“Ejjab aorōk ia eo jej jokwe ie ak ta maron̄ jekjek eo ad kajjojo. Kajjojo raan ad mour jim̧we emaron̄ kwaļo̧k juon tōmak ilo Jisōs Kraist eo ej lo metak ko ilo ānbwin, kōrrāāt ko, im kallim̧ur ko rejan̄in kūrm̧ool. Ej juon men eaiboojoj n̄an bōke juon tōmak eo enaaj kōmaron̄ kōj n̄an erreim̧aanļo̧k n̄an raan eo ‘n̄e aolep kallim̧ur ko n̄an Rikwojarjar ro naaj liļo̧k.’”15
Ro jeiū im jatū, jekjek ko an mour eo aō rainin relukkuun oktak jān ta eo iaar karōke ke iaar tōpar iiō ņe ami. Mekarta, ijjab tōmak bwe ijjan̄in kar m̧ōņōņōļo̧k. Eļan̄n̄e juon eaar letok n̄an eō, ke iaar 20 iiō rūtto, bwebwenato in mour eo an n̄an rainin, ij ļōmņak inaaj kar errā ilo ejjeļo̧k jojomar n̄an mour kōn ilju im jekļaj eo!
Ilju im Jekļaj eo Ami Ej Meram barāinwōt Ami Tōmak
Ikōņaan kōnono ilo etan Valérie im n̄a. Ilo an ļōmņak eļapļo̧k iaļ eo an mour ko am, ilo an ļapļo̧k aō tōmak bwe ta eo eaar kōm̧m̧an oktak ej bwe ilo ad jodikdik jej kwaļo̧k juon visiōn einjuon an mour indeeo. Jekōņaan jino juon baam̧le indeeo. Jejeļā etke jaar itok n̄an laļ in im ta kar jibadbad ko ad n̄an indeeo. Jejeļā bwe Anij ej iakwe kōj im bwe eļap tokjād im̧aan Mejān. Ewōr ad leke bwe Enaaj uwaake jar ko ad ilo wāween eo An im ilo iien eo. Ej ļōmņak em̧m̧an. Ijjab jeļā eļan̄n̄e jaar pojak n̄an bōk ankilan in An ilo men otemjej, kōnke eaar juon men eo jaar ekkatak—im bwe jej wōnm̧aanļo̧k wōt n̄an ekkatak. Ak jekōņaan in kōm̧m̧ane ijo em̧m̧antata ippād n̄an ļoor E im ko̧kwojarjare kōj make n̄an E.
Ij kam̧ool, ippān Būreejtōn Monson, bwe “ilju im jekļaj emaram āinwōt ami tōmak.” Ami lem̧ōņōņō ej pedped wōt ioon eļapļo̧k ioon pedped ko me kom̧ij kāleti n̄an ļoori innām jekjek ko itulik in mour eo ami. Kom̧win tiljek n̄an pedped kein. Anij ejeļā kajjeimi im iakwe kom̧. Eļan̄n̄e kom̧ij jokwe ilo inem̧m̧an ippān karōk eo An indeeo im eļan̄n̄e kom̧ij tōmak ilo kallim̧ur ko An, innām ijlu im jekļaj eo ami enaaj rom̧aak!
Ewōr ami ettōņak ko im kōttōpar ko? Men kein rem̧m̧an! Jerbal kōn aolepān būruwōmi n̄an kōttōpraki. Innām, kōtļo̧k bwe Irooj en kōm̧m̧an likjab eo. Enaaj tōl kom̧ n̄an ia eo kom̧ij jab maron̄ tōl kom̧ļo̧k ie ļo̧k; Enaaj kōm̧m̧ane n̄an kom̧ men eo kom̧ij jab maron̄ kōm̧m̧ane n̄an kom̧ make.
Ilo aolep iien, bōk ankil An. Pojak n̄an etal ijo Ej kajjitōk ippāmi n̄an etal, n̄an kōm̧m̧ane ta eo Ej kajjitōk bwe kom̧in kōm̧m̧ani. Erom em̧m̧aan eo ak kōrā eo Ej naajdiki n̄an erom.
Ij jar bwe kom̧ naaj en̄jake iakwe eo an Jemedwōj Ilan̄ ilo mour eo ami, bwe kom̧ naaj jeļā ewi wāween n̄an leke kom̧ make āinwōt Ej leke kom̧. Ij jar bwe kom̧ naaj aolep iien tiljek, ilo aolep iien im ilo aolep jikin. I kwaļo̧k aō iakwe n̄an kom̧ im aō nōbar im kautiej eļap n̄an waanjon̄ok im kajoor eo ami n̄an aolepān laļ in.
Ij kam̧ool bwe mour in ej juon iien em̧m̧an an indeeo. Jej pād ijin kōn juon kōttōpar eaiboojoj, eo ej m̧aanjebpopo n̄an ioon Anij. Nejin Jisōs Kraist ej mour, im Pinmuur eo An ej juon menin letok eļap an iakwe eo ej kōppeļo̧k kōjem eo n̄an juon lem̧ōņōņō indeeo. Kabun̄ eo an Jisōs Kraist ej bar waļo̧k ioon laļ in ilo juon jekjek ewāppen, ippān juon rikanaan an Anij ej jeban eo. Ej juon lan̄lōn̄ eļap im jeram̧m̧an n̄an erom uwaan Kabun̄ in. Ilo etan Jisōs Kraist, amen.
© 2012 jen Intellectual Reserve, Inc. Aolep jim̧we ko rej pād ippān. Kōmālim ilo kajin Pālle: 5/12. Kōmālim ukook eo: 5/12. Translation of We Are the Architects of Our Own Happiness. Marshallese. PD50039056 874