4:2

Fanongonongó

ʻEletā Paul V. Johnson

ʻO e Kau Fitungofulú

Fakataha Lotu ʻa e CES maʻá e Kau Tāutaha kei Talavoú • Nōvema 2, 2014 • Tāpanekale ʻOkitení, ʻOkiteni, ʻIutā

Siʻoku kāinga ʻofeina, ko kitautolu takitaha ko e foha mo e ʻofefine ʻo ha Tamai Hēvani ʻofa ʻokú Ne ui mo fakahinohino ha kau taki ke nau ʻomi kiate kitautolu ha tokoni mo ha fakahinohino. Ko ha tāpuaki ke kau fakataha ʻi heʻetau ako meiate kinautolu kuo fekau ke nau akoʻi kitautolú. Fakamālō atu ʻi hoʻomou meʻa mai he pōní. ʻI heʻetau kamatá, ʻoku ou fie fakahoko atu ha ongo fanongonongo nounou kae mahuʻinga.

Ko ʻetau fanongonongo ʻuluakí, ʻe kamata ʻi Sānuali 2015, ʻe ui ʻa e ngaahi fakataha lotu hangē ko ʻení ko e Fakataha Lotu Fakamāmani Lahi maʻá e Kau Tāutaha kei Talavoú (Worldwide Devotionals for Young Adults). ʻE fakahoko ʻa e ngaahi fakataha lotu fakamāmani lahi ko ʻení tuʻo tolu ʻi he taʻu—ʻi Sānuali, Mē, pea mo Sepitema. ʻOku fakataumuʻa ʻa e ngaahi liliu ko ʻení ke fakamahino hono mahuʻinga ʻo e fakamafola takitaha ke fakapapauʻi ʻoku fakaafeʻi ʻa e tāutaha kei talavou kotoa pē ke kau ʻo tatau ai pē pe ʻokú ke ʻi fē pea mo e tūkunga ʻokú ke ʻi aí. ʻOku mau fakaʻamu te mou fai homou tūkuingatá ke mou kau ki he fakataha lotú takitaha mo poupouʻi ʻa e niʻihi kehé ken au kau koeʻuhí ke mou lava ʻo maʻu ha faingamālie ke feohi, fanongo ki he faleʻi mei hotau kau takí, pea mo maʻu ha fakahā fakatāutaha mo ha fakahinohino. ʻOku mau poupou atu ki he kau taki lakanga fakataulaʻeikí ke nau ʻai ke mahuʻinga ʻa e ngaahi fakataha lotu fakamāmani lahi ko ʻení ʻi he ngaahi feituʻu fakalotofonuá.

Ko e fanongonongo ʻe tahá ʻoku fekauʻaki ia mo e ngaahi kalasi fakalotu ʻoku fie maʻu ke ʻosi mei he ngaahi ʻinisititiuti fakalotú mo e ngaahi ʻunivēsiti ʻa e Siasí. Kuo fakangofua ʻe he Poate Ako ʻa e Siasí mo e Poate ʻo e Kau Talāsiti ki BYU, BYU–Idaho, BYU–Hawaii, mo e LDS Business College ha ngaahi lēsoni taʻu ʻe fā ʻa ia ʻe akoʻi ʻo kamata ʻi he faʻahitaʻu fakatōlau ʻo e 2015. Ko e ngaahi lēsoni ko ʻení “Ko Sīsū Kalaisi mo e Ongoongolelei Taʻengatá,” “Ko e Ngaahi Akonaki mo e Tokāteline ʻo e Tohi ʻa Molomoná,” “Ngaahi Fakavaʻe ʻo e Fakafoki mai ʻo e Ongoongoleleí,” mo e “Ko e Fāmili Taʻengatá.”

ʻOku fakataumuʻa ʻa e ngaahi lēsoni foʻou ko ʻení ke nau hoko ko e ngaahi makatuliki ʻo hoʻomou aʻusia he ako fakalotú. ʻOku fakatefito kinautolu ʻi he ngaahi folofolá mo e ngaahi akonaki ʻa e kau palōfita ʻo e ngaahi ʻaho kimui ní, ʻo nofotaha ʻi he Fakamoʻuí, ʻEne tokāteliné, pea mo e ngaahi meʻa mahuʻinga ʻi he hisitōlia ʻo e Siasí. ʻI hoʻomou ako ʻa e ngaahi folofolá kotoa, ʻe fekauʻaki leva ʻa e ngaahi folofolá, ʻo tokoni ai k eke fakatupulaki ha ʻilo lahi ange ki he ongoongoleleí pea mo mahino kakato mo fakahoungaʻi lahi ange ʻa e ngaahi tohi takitaha ʻi he ngaahi folofola ʻe fā ʻoku fakaʻaongaʻi ʻe he Siasí. ʻE fokotuʻu ʻa e ngaahi kalasí ni ʻi hoʻomou ngaahi taukei kimuʻa he Siasí pea mo e ngaahi aʻusia fakafoʻituitui ʻi he ako ʻo e ongoongoleleí. Te nau tokoniʻi kimoutolu ʻi hono fakaʻaongaʻi e ngaahi tefitoʻi moʻoni ʻo e ongoongoleleí ʻi ha ngaahi founga ʻoku fekauʻaki mo homou ngaahi tūkunga lolotongá.

ʻOku tonu ke u toe fakahoko atu ko e ngaahi lēsoni fakafolofola lolotongá kotoa, fakataha mo e ngaahi kalasi lēsoni fakalotú, ʻe kei fakahoko pē ʻi heʻetau ngaahi ʻinisititiutí mo ʻetau ngaahi ʻunivēsití. ʻE fie maʻu ʻa e ngaahi lēsoni foʻou ko ʻení ʻi he fānau ako kotoa pē ʻoku hū mai pea ʻe ʻatā ia ki he fānau ako ʻoku hoko atú. Kātaki ʻo ʻave ʻa e ngaahi kalasi ko ʻení pea ngāue k eke ʻosi mei ha ʻunivēsiti pe ha ʻinisititiuti fakalotu ʻa e Siasí. Kapau kuó ke ʻosi fakakakato ʻa e ngaahi fiemaʻu ki he ʻosi mei he akó, fakakaukau ke ke ʻave ʻa e ngaahi kalasi ko ʻení ʻi he hoko atu hoʻo ako e ongoongoleleí ʻaki haʻo kau ʻi he ngaahi kalasi lēsoni fakalotu he ʻinisititiuti pe ʻunivēsiti ʻa e Siasí. Te mou lava ʻi he ngaahi ʻaho ka hoko maí ke ʻilo lahi ange ki he ngaahi kalasi foʻoú ni ʻaki haʻamou ʻalu ki he education.lds.org.

ʻOku ou tui pau ʻe mahino lelei ange kiate kimoutolu ʻa e folofolá ʻi haʻamou kau ʻi he ngaahi fakataha lotu fakamāmani lahí mo e ngaahi kalasi fakalotú, te mou feohi ai mo ha niʻihi kehe te nau langaki hake mo tataki fakalaumālie koe, pea te ke fakamālohia hoʻo tuí mo hoʻo fakamoʻoni kia Sīsū Kalaisí. ʻOfa ke hoko pehē kiate kimoutolu takitaha, ʻi he huafa ʻo Sīsū Kalaisí, ʻēmeni.