Ang mga Gasa sa Pasko

Ni Presidente Henry B. Eyring

Unang Magtatambag sa Unang Kapangulohan

Mapasalamaton ako niining oportunidad nga makasaulog uban kaninyo sa pagkatawo ni Jesukristo, ang Manluluwas sa kalibutan. Ang iyang pagkatawo usa ka gasa alang kanatong tanan. Si Juan nga Apostol, nagkutlo sa Manluluwas, misulat kabahin sa Iyang pagkatawo pinaagi niining makadasig nga mga pulong:

“Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kon dili may kinabuhing dayon.

“Kay gipadala sa Dios ang iyang Anak nganhi sa kalibutan; dili aron ang kalibutan iyang pagahukman sa silot kondili aron ang kalibutan maluwas pinaagi kaniya.”¹

Ug dayon giklaro sa Manluluwas nga ang tinuod nga hugot nga pagtuo modala ngadto sa pagsunod sa mga sugo sa Dios ug sa ingon mopasarang kanato alang sa gasa sa kinabuhing dayon, nga mao ang pagpuyo sa kahangturan uban sa Dios sa langitnong kahayag.

Ang Manluluwas mipasidaan, “Ug ang paghukom mao kini, nga ang kahayag mianhi sa kalibutan, ug ang kangitngit maoy gipalabi sa mga tawo sa paghigugma kay sa kahayag, kay dautan man ang ilang mga buhat.”²

Siya nagpadayon sa pagtudlo, “Kay ang tanan nga nagabuhat ug mangil-ad nagadumot sa kahayag, ug dili moduol sa kahayag, sa kahadlok nga tingali unya masuta ang ilang mga buhat.”³

Iyang gidayeg kadtong kinsa, mipili sa matarung ug magalakaw sa kahayag, kay sa motago sa kaulaw: “Apan siya nga nagahimo sa matuod moduol sa kahayag, aron ikapadayag nga ang iyang mga buhat nangahimo diha sa Dios.”⁴

Usa sa pinakatahum nga mga simbolo sa pagkatawo ni Jesukristo dinhi sa kalibutan mao ang kahayag. Ang pag-abut sa dugay nang gisaad nga Mesiyas nagdala og kahayag sa nagkisdom nga kalibutan.

Nahibalo kita gikan sa tinuod nga rekord diha sa Basahon ni Mormon nga ang mga propeta sa Dios dugay nang nagtudlo sa mga katawhan nga ang kahayag mao ang timailhan sa pagkatawo sa Bugtong Anak sa Dios dinhi sa unod. Si Samuel nga Lamanite nanagna mga katuigan sa wala pa ang pagkatawo ni Jesus:

“Ug tan-awa, siya miingon ngadto kanila: Tan-awa, ako mohatag nganha kaninyo og usa ka timailhan; kay lima pa ka tuig ang moabut, ug tan-awa, unya moabut ang Anak sa Dios sa pagtubos sa tanan nga motuo sa iyang ngalan.

“Ug tan-awa, ako mohatag kaninyo niini nga timailhan sa iyang pag-anhi; kay tan-awa, adunay daghan kaayo nga mga kahayag sa langit, nga diha sa gabii nga siya dili pa moabut walay kangitngit, nga sa ingon mopakita ngadto sa tawo ingon og kini adlaw.

“Busa, adunay usa ka adlaw ug usa ka gabii ug usa ka adlaw, nga sama lamang sa usa ka adlaw ug walay gabii; ug kini alang nganha kaninyo alang sa usa ka timailhan; kay kamo masayud sa pagsidlak sa adlaw ug usab sa iyang pagsalop; busa sila masayud sa tino nga adunay duha ka adlaw ug usa ka gabii; bisan pa niini ang gabii dili mangitngit; ug mao kini ang gabii sa dili pa siya matawo.

“Ug tan-awa, adunay bag-o nga bitoon nga mosubang, nga sa sukad wala pa ninyo masud-ong; ug kini usab usa ka timailhan nganha kaninyo.

“Ug tan-awa, kini dili mao ang tanan, adunay daghan pa nga mga timailhan ug mga katingalahan sa langit.

“Ug kini mahinabo nga kamo mahibulong, ug matingala, hangtud nga kamo matumba diha sa yuta.

“Ug mahinabo nga bisan kinsa ang motuo sa Anak sa Dios, ang mao makabaton sa walay katapusan nga kinabuhi.

“Ug tan-awa, sa ingon niini ang Ginoo misugo kanako, pinaagi sa iyang anghel, nga ako moanhi ug mosulti niini nga butang nganha kaninyo; oo, siya misugo nga ako gayud managna niini nga mga butang nganha kaninyo; oo, siya miingon ngari kanako: Isangyaw ngadto niini nga mga katawhan, paghinulsol ug pag-andam sa dalan sa Ginoo.”⁵

Sama sa matahum nga mga suga niining Conference Center nagtabang kanato karong gabhiona sa paghinumdom sa talagsaong panalangin sa pagkatawo sa atong Manunubos, mao usab ang pagpaminaw sa pulong sa mga anghel nga gipadala sa Dios. Dili makompleto ang pag-asoy sa istorya sa Pasko kon dili ilakip ang pulong sa mga anghel nga gipadala sa pag-andam sa dalan alang sa Iyang pag-abut. Ang pinakaimportante sa asoy sa pagkatawo ni Jesukristo mao ang pagpamatuod sa mga anghel, sigon sa rekord sa mga Apostoles nga gitawag ug giorden ni Jesus.

Ang Dios mipadala sa anghel nga si Gabriel ngadto ni Zacarias. Ang anghel misulti kaniya sa pagkatawo ni Juan Bautista ngadto sa matarung ug dili manganak nga si Elizabeth, kinsa maoy moandam sa dalan alang kang Jesus. Si Maria nakadawat sa mao gihapon nga langitnong sinugo sa pag-andam kaniya nga mahimong inahan sa Anak sa Dios, sa dugay nang gihulat nga Mesiyas. Kining matarung nga mga indibidwal nahibalo ug nagtuo sa sagradong mga kasulatan. Si Maria nahibalo ug nagmahal niini nga kasulatan, usa ka panagna ni Isaias:

“Busa ang Ginoo gayud maoy mohatag kaninyo ug usa ka timaan; Ania karon, ang usa ka ulay manamkon, ug magaanak ug usa ka anak nga lalaki ug pagatawgon ang iyang ngalan Immanuel.

“Mantikilya ug dugos maoy iyang pagakan-on hangtud sa iyang pagkahibalo sa pagsalikway sa dautan, ug sa pagpili sa maayo.”⁶

Ug si Elizabeth nahibalo kaayo nga ang Mesiyas adunay tig-una nga mag-andam sa dalan alang Kaniya. Si Isaias, ang propeta nga magbabalak, misulat, “Ang tingog sa usa nga nagasinggit, Andama ninyo sa kamingawan ang dalan sa Ginoo, himoang patag sa kamingawan ang usa ka halapad nga dalan alang sa atong Dios.”⁷

Sila si Elizabeth ug Maria naglantaw uban sa kamasaligon nga ang Manluluwas sa kalibutan moabut ug ang usa ka bantugan nga propeta mao ang Iyang tig-una. Apan sa ilang hilabihan nga pagpaubos giandam sila pinaagi sa Espiritu alang sa ilang sagrado nga bahin sa pinakatalagsaong mga hitabo sa kasaysayan sa paglalang.

Ang Unang Kapngulohan mitugot sa paghimo og usa ka pasilidad sa mga disyerto sa Utah diin ang mga eksena sa pagpangalagad sa Manluluwas mahimong himoan og usab ug himoan og salida. Ang katuyoan niana nga paningkamot mao nga mapabiling matinud-anon diha sa teksto sa mga kasulatan. Sama sa mga kasulatan nga maoy matinud-anong gisunod niining mugbo nga mga salida, maingon og alang kaninyo hilum ra kini. Ang inyong hugot nga pagtuo ug ang Espiritu Santo makamugna og pagbati nga angayan sa mausabon nga mga panghitabo sa kalibutan.

Ang Simbahan adunay mga 50 sa minugbo tin-aw nga paghulagway niana pinaagi sa video nga gipang-edit pa. Ibutang kini sa Internet website nga walay bayad sa mogamit niini. Libre kini nga gasa alang sa tanan gikan sa Unang Kapangulohan. Makakat-on pa kamo og daghan diha sa website sa LDS.org.

Si Presidente Monsin mihangyo nga sulod sa pipila ka minutos karong gabhiona manan-aw kita og mga eksena gikan niana nga mga video nga makahatag kaninyo og mga pagbati sa kahayag ug kalipay tungod sa pagbisita sa mga anghel nga nagtimaan sa gasa sa Langitnong Amahan nga mao ang Hinigugma Niyang Anak isip atong Manunubos.

Sa inyong nakita ug nadungog, ang kahayag ug ang mga anghel mao ang mihatag og giya ngadto sa mga bulahan nga mahimong bahin niadtong makadasig nga mga hitabo. Ang mga Maalamong mga Tawo gigiyahan sa usa ka bitoon ngadto kang Jesus sa pagsimba Kaniya. Ilang giablihan ang ilang mga bahandi ug mihatag Kaniya sa bililhong mga gasa nga bulawan ug insenso ug mira. Sila namulong kabahin Kaniya isip Hari sa mga Judeo.⁸

Ang mga Maalamong mga Tawo gipasidan-an sa Dios sa usa ka damgo nga kinahanglang dili sila mamalik ngadto kang Herodes tungod kay nagtinguha siya sa kinabuhi sa bata. Gipili nilang mamauli sa ilang mga nasud subay sa laing dalan.

Dayon ang usa ka anghel sa Ginoo mipakita kang Jose sa usa ka damgo. Ang anghel mipasidaan kang Jose nga molakaw palayo sa kakuyaw ngadto sa Ehipto uban ni Maria ug sa batang si Kristo. Ang anghel miingon, “Pabilin didto hangtud ingnon ko ikaw: kay si Herodes mangita na sa bata aron sa pagpatay kaniya.”⁹

Ug si Mateo mirekord, “Ug didto [siya] nagpabilin hangtud sa pagkamatay ni Herodes: kini nahitabo tuman sa giingon sa Ginoo pinaagi sa propeta, Gikan sa Ehipto gitawag ko ang akong anak.”¹⁰

Ang anghel, sama sa iyang gisaad, mipakita og usab kang Jose human sa pagkamatay ni Herodes. Ang anghel mipasidaan ug migiya sa balaang pamilya palayo sa kakuyaw, niining higayona ngadto sa Nazaret, “tuman sa gisulti sa propeta nga nag-ingon, Siya pagatawgon nga Nazaretnon.”¹¹

Karon, samtang naghinumdom kita sa pagkatawo ug sa linghod pa nga kinabuhi sa Manluluwas karong gabhiona, adunay daghang leksyon nga makat-unan. Kadaghanan niadto nga mga leksyon miabut samtang kamo nagtan-aw ug naminaw, dili kaayo tungod sa mga litrato ug sa mga pulong apan tungod sa Espiritu. Inyong nakita ug gibati ang kamaturan. Inyong gibati ang gugma gikan sa Manluluwas ug alang sa Manluluwas. Ug sa tinuoray inyong gibati ang dugang nga tinguha nga mohigugma sama sa Iyang paghigugma.

Inyong gibati ang inyong hugot nga pagtuo kabahin sa mga propeta ug sa mga sulugoon sa Dios, sa mga anghel nga mobayaw kanato ug niadtong Iyang gipangtawag nga moserbisyo Kaniya sa paggiya kanato. Sa tinuoray kamo mibati og mas dakong pagtuo nga ang Dios mao ra gihapon, walay kausaban, paglabay sa panahon.

Ug tingali kamo mibati sa Espiritu nga nagpamatuod kabahin ni Propeta Joseph Smith, kansang adlawng natawhan moabut sa pipila ka adlaw. Ang dili matarug niyang pagpamatuod nga si anghel Moroni, ang karaang propeta, miadto kaniya may hingpit nga pagkasusama sa mga kasinatian sa mga Malaamong Tawo, kang Zacarias, Elizabet, Maria, ang inahan sa atong Ginoo; kang Jose, ug sa uban pa.

Wala magpasabut nga ang leksyon mao ang pagkadawat og sama niana nga katingalahang mga kasinatian kon mangandoy man kita niini—kini dili moabut bisan mobati kita nga dako ang atong panginahanglan niini. Ang leksyon mao nga ang Dios nahibalo sa tanan natong panginahanglan, nga Siya nahigugma kanato, ug Siya nagbantay kanato.

Mihatag Siya kanato og gasa sa usa ka Manluluwas, sa Iyang perpekto nga Anak, ang Kordero nga walay lama. Pinaagi sa personal nga pagpakita sa Amahan ug sa Anak, ug pinaagi sa mga anghel, Iyang gipahiuli ang Simbahan ni Jesukristo sa ulahing mga adlaw. Mitawag Siya og mga propeta ug mga apostoles nga mogiya kanato palayo sa kakuyaw niini nga kinabuhi ug sa kinabuhing dayon sa kalibutang moabut. Si Jesukristo gilansang sa krus ug nabanhaw aron kita mabuhi pag-usab, nga kita mahimong lunsay ug malimpyohan gikan sa sala, giandam alang sa kahimayaan sa kinabuhing dayon.

Kana mao ang mga gasa ngari kanato nga atong ikatanyag ngadto sa uban alang Kaniya. Kana atong mahimo pinaagi sa paghinumdom Kaniya ug pagpaningkamot sa tibuok natong kasingkasing sa pagbuhat sa unsay Iyang ipabuhat ug sa paghigugma sama sa Iyang paghigugma.

Dunay kanta sa usa ka salida mga katuigang milabay nga may linya nga “Hatagi ang inyong kaugalingon og gamayng kamaya sa Pasko.”¹² Nan, kamo makahatag og talagsaon ug maanindot nga Pasko kon inyong hinumduman ang mga gasa nga gihatag sa Dios diha kaninyo ug, kutob sa inyong mahimo, itanyag kini ngadto sa uban sama sa Iyang gihimo. Mao kana ang diwa sa Pasko ug ang tinuod nga kalipay sa matag adlaw.

Akong ipamatuod nga si Jesus mao ang buhi nga Kristo, sa Iyang sagrado nga pangalan, amen.