Mat Daro
Priye bhaaiyon aur bahanon, hum aaj raat yahan upasthit hai kyunki hum Badadin aur Badadin ke avsar se pyaar karte hai. Kya koi cheez Badadin ke sangeet se zyaada sundar hai, parivaar aur doston ka ikattha hona, muskuraate hue chehre, aur bachchon ka khilkhilaana? Badadin ka ek divye gun hai parivaaron, doston, aur samaajon ko saath laane ka. Hum uphaar lene dene aur ek badhiya chutti waale bhojan ka anand lene ki aasha karte hai.
Angrez lekhak Charles Dickens dwara likhe kitaab, A Christmas Carol, mein Scrooge ka bhanja saal ke is pavitra samay ke chamatkaar ko samjhata hai yeh kehkar “Maine hamesha socha hai Badadin ka avsar, jab woh aata … ek achcha avsar hai; ek daya, chama, uddaarta, sukhad samay; wohi ek samay jo main jaanta hoon, pure saal bhar mein, jab purush aur mahila ek saath auron ke liye pyaar mehsoos karte hai, aur [anye] logon ke baare mein sochte hai. …. Aur iske baad … bhale hi Badadin se kuch bhi dhan na praapt ho, mai vishwaas karta hoon ki isse achcha laga hai, aur achcha hi lagtarahega hamesha; aur mai kehta hoon, Parmeshwar ka ashish ho!” (A Christmas Carol [1858], 5–6).
Ek pita ke bhumika mein, aur ab ek aaja ki bhumika mein, mujhe apne bachchon ko, aur ab unke bachchon ko dekh kar Badadin ke chamatkaar ki yaad aayi hai, Uddhaarkarta ka janam manane ka aur ek dusre ke sath ka anand lene ka jab hamara parivaar saath milta hai. Mujhe yakeen hai aapne dekha hoga, jaise maine bhi dekha hai, us khushi aur naadaani ko jisse bachche asha karte hai is khaas chutti ka anand lene ke liye. Unki khushi dekhkar hamein beete hue Badadin ki khushi yaad aate hai. Woh Dickens hi tha jisne ek baar phir samjha, “Kabhi kabhi bachcha hona achcha hai, aur Badadin din par to aur bhi achcha hai, jab us avsar ka shaktishaali Founder khud ek bachcha tha” (A Christmas Carol, 67).
Mai Los Angeles mein pala bada hua, jahan hamara ghar orange ke pedo se ghira tha. Har Badadin par ek shaam, mere maata-pita parivaar, doston, aur padosiyon ko Badadin ke geet gaane aur pakwaan ka maza lene ke liye hamare ghar bulaya jaata tha. Yeh hamara ek badhiya parampara tha, aur sangeet to ghanton tak jaari rehta tha. Hum bachchein jitne der chaahe geet gaate the, aur phir hum chupke se orange pedon ke niche khelne chale jaate the.
Meri patni, Kathy, aur maine bhi apna parivaar Dakshin California mein paala tha, jo samudri tat ke kareeb tha. Wahan Badadin ke samay hawa mein jhulte nariyal ke ped dikhte the. Har saal hamare bachche harbour mein vaarshik naao ke jalus ko dekhne ki aasha karte the. Hum ashcharye se dekhte the jab kayi sundar naao, sabhi rang ke chamchamaate raushni ke saath, harbor ka daor lagate the.
Ab jab hum Salt Lake Shahar mein rehte hai, Kathy aur maine ek parampara bana liya hai hamare bachchon aur naati/poton ko A Christmas Carol naatak ka sthaaniye pradarshan ko dikhane ka. Har saal, jab hum Ebenezer Scrooge ke parivartan ko ek beraham tyaagi se ek khushaal padosi hone ka jo Badadin ki anand se bhara hai dekhte hai, hum apne andar ke Scrooge se chutkaara paana chahate hai. Hum chahate hai ki hum apne jiwan mein thoda behtar karein Uddhaarkarta ke uddharan apnaye sabhi ko dayaluta de kar.
Badadin ke avsar ke badlaao laane waali aatma Ishu Maseeh ke mukti dene waali shakti se aati hai jiwanon ko behtar banane ke liye. Do hazaar saal se upar ho gaye Bethlehem mein is kahani ko ghate Parmeshwar ke Putra ke janam ka jo Luke ke pustak mein likha hai:
“Aur un dinon mein, Caesar Augustus ki or se aagya nikli, ki saare jagat ke logon ke naam likhe jaaye. …
“Aur sabhi log naam likhwaane ke liye apne apne shahar gaye.
“Aur Joseph bhi Galilee se, Nazareth ke shahar, Judea ko gaya jo David ka shahar tha, jise Bethlehem kaha jaata hai; …
“Ki apni mangaytar Mary ke saath jo garbhwati thi woh naam likhwaaye.
“Aur aysa hua, ki, jab woh wahan the, unke janam dene ka taareekh aa gaya.
“Aur woh apna pehlautha putra jani, aur use kapde mein lapet kar charni mein rakha; kyunki unke liye saraaye mein jagah nahin thi.
“Aur us desh mein kitne gadadiye the, jo raat ek maedaan mein rehkar apne bhedon ka pehra dete the.
“Aur, tab, Prabhu ka ek dut unke paas aa kar khada hua, aur Prabhu ki raushni unke chaaro or chamka, aur woh bahut dar gaye.
“Tab swargdut ne unse kaha, Mat daro: kyunki dekho mai tumhe bade anand ka susamachaar sunata hoon, jo sab logon ke liye hoga.
“Ki aaj David ke nagar mein tumhare liye ek Uddhaarkarta janma hai, aur yahi Maseeh Prabhu hai.
“Aur iska yeh pata hai tumhare liye; ki tum ek baalak ko kapde mein lipta hua, charni mein pada paaoge.
“Aur achanak us swargdut ke saath swargduton ka ek dal Parmeshwar ki stuti gaate huwe, aur yeh kehte sunaai diya,
“Aakash mein Parmeshwar ki Mahima, aur prithvi par sabhi manushyon ko shaanti, achchaai ho” (Luke 2:1, 3–14).
Swargdut ne gadadiyo ke dar ko jaan liya tha jab woh unke paas aaya, isliye unse kaha “daro mat.” Parmeshwar ka woh chaunka dene waala mahima, jo is swargdut se aa raha tha, ne unke dilon mein dar paeda kar diya tha. Magar swargdut ka sandesh tha darne ki koi baat nahin hai. Woh ek chamatkaar batlaane aaya tha, itne dino se ichcha ki gayi susamachaar batlane, ki manushye ka mukti shuru ho gaya tha. Usse pehle ya baad mein itni badhiya khushi kisi sandesh-waahak ne nahin di thi. Pita ke Eklaute ne Apna Maransheel yaatra shuru kar diya tha: “Ki aaj David ki nagar mein tumhare liye ek Uddhaarkarta janma hai, jo Maseeh Prabhu hai.” Yeh to zaroor bade anand ka samachaar tha.
Hum sab apne jiwan mein ayse pal dekhte hai jab woh badhiya khushi jo swargdut ne vaada kiya tha dhundhla aur dur lagta hai. Hum sab jiwan ka dukh aur takleefon se jude hai—beemaari, nakaamyaabi, musibatein, niraasha, aur ant mein, mrityu. Jabki kayi log shareerik suraksha mein jeene ka ashish paate hai, dusre log aaj woh nahin mehsoos karte. Kaiyon ko jiwan ke zarooraton ko pura karne mein bahut kathinaai hoti hai aur usse shaaririk aur bhauk takleefe uthani padti hai.
Aur tab bhi, bajae jiwan ke kathinaai ke, Prabhu ka sandesh aaj bhi hamare liye wohi hai jo gadadiyo ke liye tha do hazaar saal pehle: “Daro mat.” Shaayad swargdut ka kehna daro mat ka zyaada taallukh aaj hamare stithi se hai na ki gadadiyon ke dar ko shaant karne ke liye us pehle Badadin ke raat ko. Kya woh yeh bhi kehna chahata tha ki Uddhaarkarta ki vajah se, dar kabhi vijayi nahin hoga? yeh kehna ki aakhri mein dar ka koi mahatva nahin? hamein yaad dilana ki koi bhi dharti ka samasya lambe samay ka nahin hona chahiye, ki hum mein se koi mukti ka hakdaar nahin?
Sabse mahaan uphaar Badadin par milne waala hamesha hamare Uddhaarkarta ka uphaar hoga: Uska sampurn shaanti. Usne kaha: “Mai tumhe shaanti diye jaata hoon, apni shaanti tumhe deta hoon: jaese sansaar deta hai, mai tumhe nahin deta. Tumhara mann na ghabraae aur na dare” (John 14:27). Ek aysi duniya mein bhi jahan shaanti dur lagta hai, Uddhaarkarta ke shaanti ka uphaar hamare hridayon mein ji sakta hai hamare parishthitiyon ke bajae. Agar hum Uddhaarkarta ke saath chalne ke nimantran ko apnaaenge, lambe samay ka dar hamesha ke liye chala jaaega. Hamara bhavishye surakshit ho gaya. Yeh hai “bade anand ka samachaar, jo saare jagat ke liye hai.” “Mat dar,”bhavishyevakta Isaiah ne hamein yaad dilaya, “kyunki mai tere sang hoon: idhar udhar mat taak; kyunki mai tera Parmeshwar hoon: mai tujhe mazboot karuga; haan, teri sahayta karunga; haan, mai apne daahine haath se tujhe sambhaale rahunga” (Isaiah 41:10).
Kyunki Uddhaarkarta ka janm do hazaar varsh pehle Bethlehem mein hua tha, hamein aasha hai—aur bahut zyaada hai. Wahan mukti, aazaadi peeda se, vijay, aur safalta. “Galat log asafal honge, sachche log barkaraar rahenge” (“I Heard the Bells on Christmas Day,” Hymns, no. 214). Tabhi to achanak swargdut ki ghoshna ke baad swargduton ka dal aaya zor daalne ke liye ki Uddhaarkarta ka janam hua, aur gaaya, “Parmeshwar ki Mahima aasmaan mein ho, aur prithvi par sabhi manushyon ko shaanti, achchaai ho.”Koi aur sandesh itna aashwaasan nahin de sakta hai. Koi sandesh mein manushye ke liye itna achchaai nahin tha.
Yeh avsar shaanti aur anand laaye hum sab se liye, “ki [us] din David ke nagar mein [hamare liye] ek Uddhaarkarta janma hai, aur yahi Maseeh Prabhu hai. ” Ishu Maseeh ke naam se, amen.