Ang mga Magtutudlo Naggikan sa Dios

Elder Kim B. Clark

Sa Seventy

Usa ka Gabii nga Kauban si Elder M. Russell Ballard

Pakigpulong ngadto sa CES Religious Educators • Pebrero 26, 2016 • Salt Lake Tabernacle

Akong mga kaigsoonan, nagpasalamat ko nga gikauban kamo karon. Labaw nakong ipahayag ang akong pasalamat sa tanang magtutudlo ug sa ilang mga kapikas ug sa tanang misuporta sa tanang nagtudlo. Duna koy umagad nga nagtudlo og sayo sa buntag nga seminary, mao nga nahibalo ko sa sakripisyo ug dedikasyon sa pagtudlo og sayo sa buntag nga seminary, ug akong nakita ang epekto sa full-time nga mga magtutudlo ngadto sa nagtubo nga henerasyon, lakip sa akong mga apo. Unta panalanginan kamo sa Dios sa tanan ninyong gihimo.

Sa miaging Agosto namulong ko kaninyo nga kinahanglan natong barugan ang dakong responsibilidad nga gisangon kanato. Kinahanglan natong edukaron sa mas lawom ug impluwensyal nga paagi ang nagtubong henerasyon kay sa atong nahimo kaniadto. Ug nagpasabut kana nga nagkinahanglan kitang tanan nga mas momaayo pa kay sa atong nahimo kaniadto.

Samtang naghunahuna ko niana nga sugo gikan sa Ginoo ug sa oportunidad nga makapamulong og gamay karon, naganoy ang akong hunahuna ngadto sa pakig-istorya ni Nicodemo sa Manluluwas nianang pagkagabii, sigon sa narekord sa ikatulong kapitulo sa Juan. Miingon si Nicodemo: “Rabi, kami nasayud nga ikaw maoy usa ka magtutudlo nga gikan sa Dios: kay wala gayuy makahimo niining mga milagro nga imong gipangbuhat, gawas lamang kon ang Dios anaa uban kaniya.” ¹

Wala lamang kana mamahayag kon kinsa si Jesus—usa ka magtutudlo nga gikan sa Dios—apan mao usab ang gibuhat sa mga magtutudlo nga gikan sa Dios: Naghimo silag mga milagro sa kinabuhi sa ilang gitudloan kay ang Dios nag-uban kanila.

Nailhan ko kaayo kana nga magtutudlo. Gusto kong mopakigbahin og usa ka pasumbingay bahin kaniya karon. Gitawag kini og “Ang Pasumbingay sa Nursery Leader.”

Usa ka sister gitawag nga nusery leader sa iyang ward. Maayo siya nga pagka-train sa unibersidad, ug daghan siyag mga ideya sa mga kalihokan ug mga kahanas nga mahimo para sa mga bata. Nakahukom siya nga himoon ang nursery nga usa ka talan-awon.

Human sa pipila ka semana, nawad-an sa kadasig ang sister. Ang nursery usa ka palas-anon. Mahadlok na siyang moatubang sa mga bata. Bisan pa sa iyang mga plano, ang mga bata moreklamo ug manghilak ug gibaliwala lang siya sa matag semana. Tanang paningkamot wala magsilbi. Matag semana mouli siya nga luhaan.

Sa kasagmuyo miingon siya, “Gibuhat nako ang tanan! Unsa pay akong mahimo?”

May nahunahunaan siya: Pangutan-a ang Langitnong Amahan unsay imong buhaton. Gitrapohan ang iyang mga luha miluhod siya sa pag-ampo. Nag-ampo siya bahin sa nursery, sa iyang gipanghinaot, ug mga kasagmuyo. Nag-ampo siya sa Iyang tabang ug giya.

Gitubag sa Langitnong Amahan ang iyang pag-ampo. Usa ka kusog nga impresyon ang miabut kaniya: Ang imong mga plano sa leksyon para kanimo ra. Tutuki ang mga bata; kat-uni ang pagkaila kanila ug higugmaa sila.

Nindot kadto nga tambag, nindot nga mensahe apan lisud pamation. Nahibalo ang sister nga kinahanglan siyang maghinulsol. Nagkinahanglan siyag bag-ong kinaiya ug bag-ong pamaagi sa nursery. Nag-ampo ug gitun-an niya ang mga kasulatan alang sa inspirasyon.

Dihang miadto ang sister sa nursery sunod Dominggo, wala na kaniya ang pagbati nga kahadlok. Misalig siya sa Ginoo. Gisugat niya ang mga bata sa may pultahan, miupo, ug gitawag sa ilang mga pangalan. Nakig-istorya siya bahin sa ilang mga pamilya, paboritong pagkaon, ug daghan pa. Dunay gihimong panahon sa pagpanganta ug gibasahan silag mga istorya. Ang ubang bata nanghilak ug mireklamo, apan dunay lahi nga pagbati sa nursery niadtong semanaha. Ug dihang nahuman kini, ang sister naluya, apan wala nay luha.

Sa hinay-hinay, dihang mas nakaila ang sister sa mga bata, nausab ang iyang pagbati ngadto kanila. Magpaabut na ang nursery leader sa adlawng Dominggo. Mahinamon na siya ug malipayon nga kauban ang mga bata sa nursery. Gihigugma niya sila.

Ug … ang inspirasyon miabut. Usa ka semana nagdala siya og camera sa nursery ug gilitratohan ang mga bata. Nag-andam siya og board para sa litrato, gipapilit ang mga litrato, ug dad-on ang board sa nursery matag semana. Ganahan ang mga bata nga motan-aw sa ilang kaugalingon diha sa board. Wala lang sila mobati nga importante, apan mibati nga gihigugma.

Pagkataud-taod, gigamit sa nursery leader ang iyang mga kalihokan ug mga proyekto sa pagtudlo sa mga bata. Ganahan na ang mga bata niini. Gani, ganahan kaayo ang mga bata sa nursery ug managan sila ngadto sa nursery inigkahuman sa sakrament miting. Naganahan ang mga bata sa nursery. Nagahanan sila sa nursery leader, ug siya nahigugma kanila.

Dunay daghang baruganan nga makat-unan gikan niini nga pasumbingay. Ang pinakaimportante kaayo mao ang pagtuo ngadto sa Langitnong Amahan ug sa Iyang Anak, si Jesukristo. Ang pagtuo sa magtutudlo nga nagpaluhod kaniya sa pag-ampo, ang pagtuo nga nagdasig kaniya sa paghinulsol, ug ang pagtuo nga naghimo niya nga magpadayon nga wala mahibalo unsa gayuy angay buhaton. Ang pagtuo maoy nag-unang baruganan.

Ang paglaum maoy ikaduha. Ang pagkaanaa sa nursery lisud para sa gagmayng bata. Mahimong mobati silag kahadlok. o pag-inusara, o napasagdan. Maglibug sila kon mahimo ba silang moikyas. Ang nursery leader aduna sa samang pagbati, apan iya kining napangitaan og paagi, ug nahibalo siyang dunay paglaum kang Kristo. Ang iyang paglaum “masadyaon,” “sanag,” ug “hayag,” ug gibati kini sa mga bata.

Ang ikatulong baruganan mao ang pagpaubos. Ang garbo ug pagsalig sa kalibutan usa ka risgo nga buluhaton sa magtutudlo. Ang pagpaubos—matudloan—maayo nga tambal sa garbo. Ang nursery leader milihok uban sa pagtuo kang Kristo nga magpaubos atubangan sa iyang Langitnong Amahan. Siya milamdag ug mipanalangin kaniya og kaalam pinaagi sa gahum sa Espiritu Santo.

Ang ikaupat nga baruganan mao ang gugma—ang tiunay nga gugma ni Kristo. Sa sinugdanan, ang mga bata dili sayon nga higugmaon. Apan ang nursery leader may pagtuo kang Kristo, ug mipadayon uban sa paglaum diha Kaniya sa paghigugma sa mga bata. Gipanalanginan siya sa Dios og tiunay nga gugma ni Kristo, ug gibati kini sa mga bata. Gani, mihimo ang lider og mga higot sa gugma uban sa mga bata. Kadto nga mga higot nahimo nga esprituhanong agianan diin ang pagkat-on, pag-awhag, ug paglaum modagayday.

Mga kaigsoonan, nag-ampo ko sa mga panalangin sa Dios nganhi kanato, nga kitang tanan, bisan asa ta magtudlo, mobuhat subay niini nga baruganan sa pagtuo, paglaum, pagpaubos, ug gugma uban sa mas dako nga kakugi, kaisug, ug paglaum kay sa kaniadto. Kon buhaton nato kini, ang grasya ni Kristo ihatag kanato ug mamahimong magtutudlo gikan sa Dios, naghimog mga milagro sa kinabuhi sa atong mga estudyante. Ako mopamatuod sa pangalan ni Jesukristo, amen.