O Faiaoga e O Mai mai le Atua
O Se Afiafi ma Elder M. Russell Ballard
Saunoaga i Faiaoga Faalelotu a le OAE • 26 Fepuari, 2016 • Tapeneko i Sate Leki
Ou uso e ma tuafafine pele, ou te faafetai lava i le faatasi ai ma outou i lenei po. Ou te fia manao faapitoa lava e faailoa atu le lotofaafetai i faiaoga uma ma o latou taitoalua ma i latou uma o loo lagolagoina i latou o loo aoao atu. E i ai so’u atalii faaletulafono o se faiaoga seminare i le vaveao, ma ua ou vaaia le aafiaga e faia e faiaoga tumau i le tupulaga faia’e, e aofia ai la’u fanau a fanau. Ia faamanuia outou uma mo mea o loo outou faia.
Ia Aokuso talu ai sa ou talanoa atu ia te outou e uiga i lo tatou manaomia ona tutulai ae i tiutetauave sili ua taoto i o tatou luga. E manaomia ona tatou aoaoina loloto atili le tupulaga faiae ma mamana atili nai lo se isi lava taimi muamua na tatou faia ai. Ma o lona uiga e manaomia ona tatou lelei atili ma faia ni mea ia lelei atili nai lo tagata na tatou i ai ma mea na tatou faia muamua.
A ou o’u mafaufau i lena poloaiga mai le Alii ma le avanoa e fai atu ai ni nai upu i lenei po, ua taaina atu lava lo’u mafaufau i le tala i le asiasiga a Nikotemo i le Faaola i le po, e pei ona tusia i le mataupu lona tolu o le Ioane. Sa fai atu Nikotemo: “Rapi e, ua matou iloa o oe o le a’oa’o ua maliu mai mai le Atua: aua e le mafai e se tasi ona faia o ia faailoga e te faia, [pe] ana le ia te oe le Atua.”1
Ua le gata ina tautino mai e lena faamatalaga po o ai Iesu—o se faiaoga e maliu mai le Atua—ae o mea foi e faia e faiaoga e o mai mai le Atua: Latou te faia vavega i olaga o e latou te aoaoina ona o loo ia te i latou le Atua.
Ou te iloa lelei se faiaoga faapena. Ou te fia faasoa atu se faataoto e uiga ia te ia i lenei po. Ua ta’ua “O Le Faataoto i le Taitai o le Vasega Pepe.”
Sa i ai se tuafafine sa valaauina e fai ma taitai o le vasega pepe i lana uarota. Sa lelei lona aoaoina i le iunivesite, ma sa tele ni ana aitia mo gaoioiga ma meataulima e mafai ona faia e le fanau. Sa tonu ia te ia na te faia nei le vasega pepe ma se faataitaiga o le aoao atu.
I le mavae ai o le tele o vaiaso, sa faalotovaivaia lea tuafafine. Sa avea le vasega pepe ma avega mamafa. Sa faaātu o ia e faafesagai ma tamaiti. E ui lava i ana fuafuaga, sa ‘iva tamaiti ma fetagisi ma lē ano ia te ia i vaiaso uma. Sa leai ma se mea na ia taumafaia na aogā. O vaiaso uma e foi ai o ia i le fale ma loimata.
I lona le fiafia sa ia tagi ai, “Ua ou faia le mea sili ou te mafaia! O le a se isi mea e mafai ona ou faia?”
Sa oo mai se manatu i lona mafaufau: Ole atu i le Tama Faalelagi po o le a se mea e tatau ona e faia. Sa soloese ona loimata ma tootuli ma tatalo. Sa ia tatalo mo le vasega pepe, o ona faamoemoega, lona faaātu, ma lona le fiafia. Sa ia tatalo mo Lana fesoasoani ma le taitaiga.
Sa tali mai e le Tama Faalelagi lana tatalo. Sa oo mai se uunaiga malosi ia te ia: O au fuafuaga o lesona o loo faatatau lava ia te oe. Ae ia e taulai atu i le fanau; aoao ia iloa i latou ma alofa ia i latou.
O se fautuaga lelei, o se savali lelei, ae sa faigata ona lagonaina. Sa iloa e le tuafafine lea e ao ona ia salamo. Sa manaomia ona i ai sona uiga fou ma se auala fou e taulima ai le vasega pepe. Sa ia tatalo ma suesue i tusitusiga paia mo musumusuga.
Ina ua alu le tuafafine i le vasega pepe i le Aso Sa na sosoo ai, sa leai ni ona lagona o le fefe. Sa ia faalagolago i le Alii. Sa ia faafetaui le fanau i le faitotoa, tootuli i lalo i o latou tulaga, ma faafeiloai i latou i o latou igoa. Sa ia talanoa ia i latou e uiga i o latou aiga, o meaai latou te fiafia i ai, ma isi mau mea. Sa ia fai ni taimi o pesepesega ma faitau i ai ni tala. O nisi o tamaiti na fetagisi ma ‘iva, ae sa i ai se lagona ese i le vasega pepe i lena vaiaso. Ma ina ua maea, sa vaivai le tuafafine, ae sa le toe tagi.
A o faasolosolo ina iloa lelei atili e lea tuafafine lelei ia tamaiti, sa suia ona lagona e uiga ia i latou. Sa tulimatai atu le taitai o le vasega pepe i Aso Sa. Sa tiotio ma fiafia o ia e faatasi ma tamaiti o le vasega pepe. Sa ia alofa ia i latou.
Ma … sa oo mai musumusuga. I le tasi vaiaso sa ia ave ai se meapueata i le vasega ma pue ai ata o tamaiti taitasi. Sa ia saunia se laupapa mo ata, ma faapipii i ai ata o tamaiti taitasi i luga o le laupapa, ma ave le laupapa i le vasega i vaiaso uma. Sa fiafia tamaiti e vaavaai ia i latou lava i luga o le laupapa. Sa le gata ina latou lagonaina lo latou taua; ae sa latou lagonaina le alofaina.
Ina ua mavae se taimi, sa faaaoga e le taitai o le vasega pepe ana gaoioiga ma ana galuega faatino e aoao ai le fanau. Sa fiafia i ai le fanau. O le mea moni, o le matua fiafia o le fanau i le vasega pepe, e taufetuli ai lava i le vasega pe a uma le sauniga faamanatuga. Sa fiafia le fanau e auai i le vasega pepe. Sa latou alolofa i le taitai o le vasega pepe, ma sa ia alofa ia i latou.
E tele mataupu faavae e mafai ona aoaoina e se tasi mai lenei faataoto. O le mataupu faavae sili ona taua o le faatuatua i le Tama Faalelagi ma Lona Alo o Iesu Keriso. O le faatuatua o le faiaoga na mafua ai ona tootuli ma tatalo, le faatuatua lea na faaosofia lona salamo, ma le faatuatua lea na taitai atu ai o ia ia agai i luma e aunoa ma le iloaina tonu o mea o le a ia faia. O le faatuatua o le uluai mataupu faavae.
O le lona lua o le faamoemoe. O le i ai i le vasega pepe e mafai ona faigata mo tamaiti laiti. Atonu latou te lagonaina le fefe, po o le tuuatoatasi, po o le tuulafoaiina. Atonu latou te tuufesilisili pe i ai se auala e sao ai i fafo. Sa lagona e le taitai o le vasega pepe na lava lagona e tasi, ae sa ia galue i ai, ma sa ia iloaina sa i ai le faamoemoe ia Keriso. O lona faamoemoe sa “ola,” “manino,” ma “susulu,” ma sa lagonaina e tamaiti.
O le mataupu faavae lona tolu o le lotomaualalo. O le faamaualuga ma le faalagolago i le lima o le tagata o se tulaga lamatia faalenatura lea mo se faiaoga. O le lotomaualalo—o le aoaoina gofie—o le vaifofo sili lea o le faamaualuga. Sa galue le taitai o le vasega pepe i le faatuatua ia Keriso ia faalotomaualaloina o ia lava i luma o lona Tama Faalelagi. Sa Ia faamalamalamaina o ia ma faamanuiaina o ia i le atamai e ala i le mana o le Agaga Paia.
O le mataupu faavae lona fa o le alofa—le alofa mama o Keriso. I le amataga, sa lei faigofie ona alofa i le fanau. Ae sa i ai i le taitai o le vasega pepe le faatuatua ia Keriso, ma agai i luma i le lotomaualalo ma le faamoemoe ia te Ia ia alofa i na tamaiti. Sa faamanuia e le Atua o ia i le alofa mama o Keriso, ma sa lagonaina e tamaiti. O le mea moni, sa faavae e le taitai o le vasega pepe ia sootaga o le alofa mama ma na tamaiti. O na sootaga sa avea ma se auala faaleagaga lea na mafai ona tafe mai ai le aoaoina, faamalosiauga ma le faamoemoe.
Uso e ma tuafafine, ou te tatalo mo faamanuiaga a le Atua i o tatou luga, ina ia mafai ona faatino e i tatou uma, po o fea lava o tatou faiaoga ai, ia nei mataupu faavae o le faatuatua, faamoemoe, lotomaualalo, ma le alofa faatasi ai ma se filiga tele atu, lototele, ma le onosai i lo se isi lava taimi muamua. Ou te iloa afai tatou te faia, o le a tatou maua le alofatunoa o Keriso ma o le a avea moni i tatou ma faiaoga e o mai mai le Atua, e faatutupuina vavega i olaga o a tatou tamaiti aoga. Ou te molimau atu ai i le suafa o Iesu Keriso, amene.
© 2016 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 12/15. Faamaonia le Faaliliuga: 12/15. Faaliliuga o le “Teachers Come from God.” Samoan. PD60001102 890