Ko e Ngaahi Faingamālie mo e Ngaahi Fatongia ʻo e Kau Faiako ʻa e CES ʻi he Senituli hono 21
Ko ha Efiafi mo Elder M. Russell Ballard
Ko e Lea ki he Kau Faiako Fakalotu ʻa e CES • 26 Fēpueli 2016 • Tāpanekale Sōlekí
Siʻoku kāinga ʻofeina, fakamālō atu ki hoʻomou ngaahi ngāue ʻosikiavelengá ke faitāpuekina ai e moʻui ʻetau kau mēmipa kei talavou ʻo e Siasí.
Ne u vakai kimuí ni mai ki he tohi foʻou ko e, By Study and Also By Faith: One Hundred Years of Seminaries and Institutes of Religion (ʻI he Ako pea ʻI he Tui Foki: Taʻu ʻe Teau ʻo e Seminelí mo e ʻInisititiuti Fakalotú). Ko ha talanoa fakaofo ia! ʻI heʻeku lau iá, ne u fakatokangaʻi ʻa e ngaahi fatongia ʻo ʻeku kui tangata ua ko Siosefa F. Sāmitá mo ʻeku kui tangata ko Melevini J. Pālatí ʻi hono fokotuʻu mo fakalahi ʻo e ako ʻa e Siasí.
ʻOku ou ngāue he ʻahó ni ʻi he feituʻu naʻá na ngāue ai kimuʻá koeʻuhí ko ʻeku fakataha mo kimoutolú. Talu mei he 1985, mo ʻeku maʻu e faingamālie ke ngāue ʻi he taʻu ʻe 14 ʻi he Poate ʻo e Akó, pea taʻu ʻe 7 ne u ʻi he Kōmiti Pulé ai, pea ne u Sea he meimei taʻu ʻe 4 ʻo e ngaahi taʻu ko iá.
Lolotonga ʻeku ʻi he Poaté, ne tupulaki ʻeku houngaʻia lahi ʻi he Potungāue Ako ʻa e Siasí. ʻOku ou lea he pooni ki he kotoa ʻo e mātuʻá, ngaahi kuí, pea aʻu ki he ngaahi kui ua ʻi he Siasí ke fakamālo kiate kimoutolu kau faiako mo e kau pule pea mo homou ngaahi fāmilí ʻi hoʻomou ngaahi ngāue faivelengá. ʻOku fakaofo e ngaahi meʻa kuo ikunaʻi ʻe he CES ʻi he taʻu ʻe 100 kuo hilí . Ka, ʻoku ou mahuʻingaʻia ange ʻi he taʻu ʻe 100 ka hoko maí pea mo e founga te mou lava ʻo tokoniʻi ai hoʻomou fānau akó ke nau fehangahangai mo e ngaahi faingataʻa feliliuaki tuʻuloa ʻo e senituli hono 21 .
Naʻe akoʻi ʻe Palesiteni Kōtoni B. Hingikelī ʻi ha fakataha ako ʻa e Kau Taki Māʻolungá ʻa e tefito ko hono “tauhi ke maʻa ʻa e tokāteliné mo e Siasí ʻi he hala totonú.” Naʻá ne pehē, “ʻE ʻikai lava ke tau fuʻu tokanga. Kuo pau ke tau tokanga ke ʻoua naʻa tau hē mei he [halá]. ʻI heʻetau feinga ke ʻuluaki mo foʻou mo kehé, mahalo te tau akoʻi ha ngaahi meʻa ʻe ʻikai fenāpasi kakato mo e ngaahi tokāteline tefito ʻo e Siasi ʻo Sīsū Kalaisi ko ʻeni kuo toe fakafoki maí. … Totonu ke lelei mo lahi ange ʻetau tokangá. … Kuo pau ke tau hoko ko e kau tangata leʻo ʻi he tauá.”1
ʻI he ʻunu ki muʻa ʻa e ako ʻa e Siasí ʻi he senituli hono 21 , ʻoku fie maʻu ke mou takitaha fakakaukauʻi ha faʻahinga liliu ʻoku totonu ke mou fakahoko ʻi he founga te mou teuteu ai ke faiakó, founga hono akoʻí, mo e meʻa te mou akoʻí kapau te mou langaki ha tui taʻeueʻia ʻi he moʻui ʻa hotau toʻu tupu pelepelengesí.
ʻOsi atu e taimi ne fai ai ʻe ha taha ako ha fehuʻi fakamātoato pea naʻe tali ʻe he faiakó, “ʻOua te ke tokanga ki ai!” ʻOsi atu e taimi ne ʻohake ai ʻe ha taha ako ha meʻa naʻá ne hohaʻa fakamātoato ki ai pea fai ʻe he faiakó ia haʻane fakamoʻoni ko ha tali ne fakataumuʻa ke taʻofi ʻene hohaʻá. ʻOsi atu e taimi naʻe maluʻi ai e fānau akó mei he kakai naʻa nau ʻohofi ʻa e Siasí. Meʻamālié, ne tokonaki ʻe he ʻEikí kiate kimoutolu kau faiakó ʻa e faleʻi ko ʻení ʻoku mahuʻinga he taimí ni mo e taimi kotoa pē: “Pea koeʻuhí ʻoku ʻikai ke maʻu ʻe he kakai kotoa pē ʻa e tuí, mou fekumi faivelenga pea feakoʻiʻaki ʻiate kimoutolu ʻa e ngaahi lea ʻo e potó; ʻio, mou fekumi mei he ngaahi tohi lelei tahá ʻa e ngaahi lea ʻo e potó; mou fekumi ki he ʻiló, ʻio, ʻi he ako pea ʻi he tui foki.”2
ʻOku kaungatonu ʻeni he ʻahó ni koeʻuhí ʻoku ʻikai ke maʻu kotoa ʻe hoʻomou kau akó ʻa e tui ʻoku fie maʻu ke fehangahangai ʻaki mo e ngaahi faingataʻa ʻoku tuʻunuku maí pea koeʻuhí kuo ʻosi fakaʻaliʻali ki he tokolahi ʻo kinautolu ʻi he ʻInitanetí ʻa e ngaahi mālohi fakaʻauha ʻo ha māmani ʻoku tupulaki ai ʻa e fakafili ki he tuí, fāmilí, mo e ngaahi tuʻunga moʻui ʻo e ongoongoleleí. ʻOku mafola ʻa e ivi takiekina ʻo e ʻInitanetí ʻi he māmaní ki he meimei ʻapi kotoa pea ki he nima mo e ʻatamai kotoa ʻo hoʻomou fānau akó.
Te mou lava ʻo tokoniʻi ʻa e fānau akó ʻaki hono akoʻi kiate kinautolu ʻa e ʻuhinga ke fakatahaʻi ʻa e akó mo e tuí ʻi heʻenau akó. Akoʻi kinautolu ʻaki hono fakatātaaʻi ʻa e taukei ko ʻení mo e foungá ʻi he kalasí.
Naʻe fakamatalaʻi ʻe Paleniteni Hāloti B.Lī ʻo pehē:
“Te mau fakamanatu atu, ʻoku ʻikai ko ha founga faingofua ki he akó ke maʻu e ʻiló ʻi he tuí. ʻʻOku fie maʻu ha ngāue mālohi mo ha feinga hokohoko ʻi he tui. …
“Ko hono fakanounoú, ʻoku ʻikai ko e ako ʻi he tuí ko ha ngāue maʻá ha tangata [pe fefine] fakapikopiko. Naʻe pehē ʻe ha tokotaha, ko hono olá, ʻoku fie maʻu ʻe ha faʻahinga ngāue pehē ʻa e tukulolo kakato ʻo e laumālié, fakafehokotaki ʻa e ngaahi fakakaukau mo e ngaahi ongo ʻa ha tokotaha mo e ʻOtuá—kuo pau ke fokotuʻu ʻa e fehokotaki totonú. Pea toki hoko mai ʻa e ‘ʻiló ʻi he tui.’”3
ʻE ʻomi ʻe he ʻilo ʻi he tuí ha fakamoʻoni ʻoku haohaoá, pea ʻoku maʻu ʻe ha fakamoʻoni ʻoku haohaoá ha mālohi ke liliu ha moʻui, ʻo hangē ko ia ʻoku fakatātaaʻi ʻe he ngaahi talanoa ʻe tolu ko ʻení.
ʻUluakí, naʻe mavahe ʻa Fīpē Kata mei hono ʻapí ʻi Meini ke fakataha mo e Kāingalotú ʻi ʻOhaiō ʻi he 1830 tupú. Naʻá ne manatu ʻo pehē, “Naʻe fakatumutumu hoku ngaahi kaungāmeʻá ʻi he meʻa naʻá ku faí, pea pehē pē mo au, ka naʻe ʻi ai ha faʻahinga meʻa naʻá ne teke au. Naʻe ʻikai ke u meimei malava ʻo ʻūkuma siʻi mamahi ʻeku fineʻeikí ʻi heʻeku mavahe mei ʻapí, pea ka ne taʻeʻoua e Laumālie ʻi loto ʻiate aú, ne u meimei foʻi.”4
Naʻe muimui ʻa Fīpē ʻi he palōfitá pea fakataha mo e Kāingalotú ʻi ʻOhaiō pea faifai ʻo aʻu ki ʻIutā, ʻa ia naʻá ne pekia ai ko ha mēmipa faivelenga ʻo e Siasí mo ha kaungā ngāue hoa tatau pea ko e uaifi ʻo e Palesiteni ʻo e Siasí ko Uilifooti ʻUtalafi.
ʻOku ʻomi ʻa e talanoa hokó mei he piokālafi ʻo Malioni G. Lominī.
Naʻe fakapapau ʻa Malioni ʻi heʻene hoko ko ha tokotaha ako he kolisí he ʻikai te ne lava ʻo ngāue fakafaifekau koeʻuhí ko e tuʻunga fakapaʻanga hono fāmilí. Naʻá ne fanongo ʻi ha taimi ʻe taha ki ha lea ʻa ʻEletā Melivini J. Pālati. Ko e fakamatala ʻeni ʻa e piokālafí, “Naʻe ʻikai teitei ʻilo ʻe [Malioni] ʻi he taimi ko iá ʻe liliu fakaʻaufuli ʻa e halanga ʻo ʻene moʻuí ʻi ha kiʻi momeniti siʻi pē.”
Hoko atu e talanoá: “Kuo fakahā ʻe he [tamai ʻa Malioní] ki heʻene fānaú … naʻe ʻi ai ha faikehekehe lahi ʻi ha tangata naʻá ne moʻui ʻaki e ueʻi ʻa e Laumālié mo ha taha naʻe ʻikai, pea tatau pē ʻi he vahaʻa ʻo ha fuʻu ʻakau ʻoku tupu mo ha potuʻiʻakau mate. Ko e fuofua taimi ia ke mahino kakato kia Malioni … ʻa e [moʻui] ʻi he malumalu ʻo e ivi takiekina ʻo e ueʻi ʻa e Laumālié. Naʻá ne ongoʻi mahuhuhuhu mo tuʻutuʻukina. Kuo teʻeki ai ke [ne] ongoʻi pehē hangē ko e taimi ní, ʻi heʻene fakafanongo ki he lea ʻa e tokotaha foʻou taha ʻo e Kau ʻAposetoló. …
Naʻe takiekina mālohi ʻa e Talavou ko Malioní …. Naʻe fakafonu ia ʻaki ha holi taʻe-mataʻofi ke ʻalu ʻo ngāue fakafaifekau ʻe he fofonga fiefia ʻa e ʻAposetoló mo e fakamātoato ʻo ʻene fakamoʻoní. … Naʻá ne ʻilo kuo pau ke fakatoloi ʻene ngaahi palani ke hoko atu ʻene akó.”5
Ne vave pē ʻa e ʻalu ʻa Malioni ki ʻAositelēliá, ʻa ia naʻá ne ngāue faivelenga ai. Naʻá ne hoko kimui ange ko ha ʻAposetolo mālohi mo ha mēmipa ʻo e Kau Palesitenisī ʻUluakí.
Naʻe fai ʻe Palesiteni Poiti K. Peeka ʻa e talanoa fakaʻosí kau ki he mālohi naʻe maʻu ʻe ha faiako toulekeleka ko Viliami E. Paleti. Ko e faiakó ko ha papi ului mei Noaue, naʻe ʻikai ke sai ʻene ngaahi taukei he lea faka-Pilitāniá. Neongo ʻa e ngaahi fakangatangata ʻa e faiakó, ka naʻe manatu ʻa Palesiteni Peeka naʻe fakamoʻoni ʻa Misa Paleti ʻi ha ngaahi taimi lahi. “Ne mau lava ʻo fakamāfanaʻi homau nimá ʻi he māfana ʻo ʻene tuí.”6
Kimui ange aí, ne hoko ʻa Viliami ko e taki ʻi he seminelí, ʻinisititiutí mo e ngaahi ako ʻa e Siasí.
Naʻe hoko ʻa e fanongo ʻa Fīpē, Malioni, mo Viliami ki ha fakamoʻoni naʻe haohaoá ko ha meʻa ke ne poupouʻi ke liliu ʻenau moʻuí ʻo taʻe ngata. ʻE lava ke hoko moʻoni ʻa e meʻa tatau ki hoʻomou fānau akó. Neongo ia, mahalo ʻe ʻikai feʻunga maʻu pē ʻa e fakamoʻoni ʻoku haohaoá, ʻi hono ʻomi e ngaahi meʻa moʻoni ʻo e māmani ʻo e ʻaho ní. Naʻe maʻa mo haohaoa ʻa Fīpē, Malioni, mo Viliami, pea tauʻatāina mei he ponokalafí mo e ngaahi meʻa fakamāmaní ʻi heʻenau tangutu ʻi he veʻe vaʻe ʻo e kau faifekaú, kau faiako, mo e kau taki kuo ueʻi fakalaumālié. Naʻe faingofua ke hū ʻa e Laumālié ki honau loto molū mo haohaoá.
Ko e ʻahó ni, kuo kehe ʻaupito ʻa e talanoá, he kuo ʻosi maʻu e niʻihi hoʻomou fānau akó ʻe he ponokalafi mo e ngaahi meʻa fakamāmaní kimuʻa ke nau aʻu atu ki hoʻomou ngaahi kalasí.
Ne toki hū ʻa e toʻu tangata pē ʻe taha kuo ʻosí ʻi hotau kakai kei talavoú ki he ngaahi fakamatala kau ki hotau hisitōliá, tokāteliné, mo e ngaahi founga ngāué he naʻe fakangatangata pau pē ki he ngaahi nāunau naʻe paaki ʻe he Siasí. Ne maʻu ʻe ha fānau ako tokosiʻi ha ngaahi fakaʻuhinga ne kehe ia. Ko e lahi tahá, naʻe nofo hotau kakai kei talavoú ʻi ha moʻui naʻe fakangatangata.
Naʻe ʻikai ke teuteuʻi ʻe heʻetau ngaahi nāunau fakalēsoni ʻo e taimi ko iá, ʻetau fānau akó ki he ʻahó ni neongo naʻe ʻuhinga lelei—ko ha ʻaho ʻoku maʻu vave ai ʻe he fānau akó ʻa e meimei meʻa kotoa kau ki he Siasí mei he tafaʻaki kotoa pē ʻo e fakakaukaú. ʻOku nau sio he ʻahó ni ki he meʻa ʻoku ʻi heʻenau telefoni toʻotoʻó ʻoku hangē ha poleʻi ʻo e tuí pea tatau pē mo hono poupouʻi ʻo e tuí. ʻOku maheni ange hotau kakai kei talavou tokolahi mo e Google ʻo laka ange ʻi he ongoongoleleí, loto fiemālie ke maʻu ha meʻa mei he ʻInitanetí ʻo laka ange ʻi he ueʻi fakalaumālié, pea ngāue mālohi ange ʻi he Facebook kae ʻikai ʻi he tuí.
Makatuʻunga ʻi he ngaahi faingataʻa ko ʻení, ne toki fakangofua kimuí ni ʻe he Poate ʻo e Akó hano kamata ʻi he seminelí ʻa e Fakataukei Tokāteliné (Doctrinal Mastery). Ko hono langaki hake ʻi he meʻa kuo ʻosi fai ʻi he Fakataukei Folofolá, ʻe nofotaha ʻa e meʻa ko ʻeni kuo kamata foʻoú ʻi hono fakatupulaki mo fakamālohia ʻa e tui ʻetau fānau akó kia Sīsū Kalaisí mo maluʻi kinautolu ʻaki ʻa e ivi lavameʻa lahi ke moʻui mo fakaʻaongaʻi ʻa e ongoongoleleí ʻi heʻenau moʻuí. Te nau ako mei he folofolá mo e lea ʻa e kau palōfitá ʻa e founga ke ngāue ai ʻi he tui kia Kalaisí ke maʻu ʻa e ʻilo mo e mahino fakalaumālie ʻo ʻEne ongoongoleleí. Pea te nau maʻu ha ngaahi faingamālie ke ako e founga ke fakaʻaongaʻi ai ʻa e tokāteline ʻo Kalaisí mo e ngaahi tefitoʻi moʻoni ʻo e ongoongoleleí ki he ngaahi fehuʻi mo e ngaahi faingataʻa ʻoku nau fanongo mo mamata ai ʻi he ʻaho kotoa pē ʻi honau toʻú pea mo e mītia ʻa e kakaí.
ʻOku ueʻi fakalaumālie mo taimi lelei ʻa e meʻa ko ʻeni kuo fokotuʻu foʻoú. Te ne maʻu ha ivi takiekina lahi ʻi hotau kakai kei talavoú. Ka, ʻe fakafalala ʻa e ola lelei ʻo e Fakataukei Tokāteliné, pea mo e kotoa ʻo e ngaahi polokalama ako kehe ʻa e CES ʻiate kimoutolu.
ʻI he fehangahangai mo e ngaahi faingataʻa ko ʻení, ko e hā nai ho ngaahi faingamālie mo e fatongia ʻi hoʻomou hoko ko e kau faiako ʻa e CES ʻi he senituli hono 21 ? Mahino pē, kuo pau ke mou ʻofa ki he ʻEikí, Hono Siasí, pea mo hoʻomou fānau akó. Kuo pau foki ke mou toutou fai ha fakamoʻoni ʻoku haohaoa moʻoní. ʻIkai ngata aí, ka ʻoku fie maʻu foki ʻe hoʻomou fānau akó ke faitāpuekina kinautolu ʻi he ako ʻo e kakano mo e kaveinga fakatokāteline mo fakahisitōlia ʻi he ako pea ʻi he tui ʻoku ō fakataha mo e fakamoʻoni ʻoku haohaoá ke nau lava ʻo aʻusia ha ului ʻoku aʻuaʻu mo tuʻuloa ki he ongoongoleleí mo ha tukupā ʻi he kotoa ʻo e moʻuí kia Sīsū Kalaisi ʻo laka ange ʻi ha toe taimi ʻi hotau hisitōliá. ʻOku ʻuhinga ʻa e ului ʻoku aʻuaʻu mo tuʻuloá te nau “nofo maʻu ʻi he vaká pea piki ke maʻu” ʻi he kotoa ʻo ʻenau moʻuí.7
Koeʻuhí ke mahino kiate kimoutolu ʻa e kaveinga mo e kakano fakatokāteline mo fakahisitōlia ʻo e folofolá mo hotau hisitōliá, ʻe fie maʻu ke mou ako mei he “ngaahi tohi lelei tahá,”ʻo hangē ko e fakahinohino ʻa e ʻEikí. ʻOku kau ʻi he “ngaahi tohi lelei tahá” ʻa e folofolá, ngaahi akonaki ʻa e kau palōfita mo e kau ʻaposetolo ʻo onopōní, pea mo e ngaahi sikolasipi lelei taha ʻa e Siasí ʻoku ala maʻú. Te mou lava ʻo tokoni ki hoʻomou fānau akó, ʻo fakafou ʻi hoʻomou ngaahi ngāue tōtōiví ke ako ʻi he ako mo e tui, ke nau ʻilo ʻa e ngaahi taukei mo e ngaahi ʻulungaanga ʻoku fie maʻu ke fakafaikehekeheʻi ʻaki ʻa e fakamatala falalaʻanga te ne hiki hake kinautolu ki ʻolungá pea mo e ngaahi fakaʻuhinga hala mo e moʻoni fakakonga ʻo e tokāteliné, hisitōliá, mo e ngaahi founga te nau tuku hifoʻi ai kinautolu ki laló.
Akoʻi kinautolu kau ki he ngaahi faingataʻa ʻoku nau fehangahangai mo ia ʻi he taimi ʻoku nau fakafalala ai ki he ʻInitanetí ke tali e ngaahi fehuʻi ʻoku taʻengata hono mahuʻingá. Fakamanatu kiate kinautolu naʻe ʻikai ke pehē ʻe Sēmisi, “Ka ai hamou taha ʻoku masiva ʻi he potó, ke kole ʻe ia ki he [Google]!”8
ʻOku ʻikai fakafalala ʻa e kakai potó ki he ʻInitanetí ke ʻilo mo faitoʻo honau ngaahi faingataʻaʻia fakaelotó, fakaʻatamai, mo fakatuʻasinó, tautefito ki he ngaahi faingataʻaʻia fakamanavahē ʻo e moʻuí. Ka, ʻoku nau fekumi ki he kau mataotao fakaemoʻui leleí, ʻa kinautolu kuo akoʻi mo laiseni ʻe he ngaahi poate fakasiteiti mo fakafaitoʻo fakalaó. ʻOku fekumi ʻa e kakai fakapotopotó, ki he fakakaukau hono uá.
Kapau ko e founga lelei ia ke fai ʻi hono kumi ha tali ki he ngaahi meʻa fakaemoʻui lelei fakaelotó, fakaʻatamai, mo fakatuʻasinó, ʻoku toe lahi ange ia ʻi he taimi ʻoku tuʻu fakatuʻutāmaki ai ʻa e moʻui taʻengatá. ʻOku totonu ke tau fekumi ki he kau taki mohu fakakaukau mo faivelenga ʻo e Siasí ke tokoniʻi kitautolu ʻi he taimi ʻoku ʻi ai ai ha meʻa ʻoku tuʻu fakatuʻutāmaki ki heʻetau moʻui fakalaumālié, hotau ngaahi vā fetuʻutaki fakafāmili mahuʻinga tahá, pea mo ʻetau mēmipasipi ʻi he puleʻangá. ʻOku totonu ke tau kole tokoni kiate kinautolu naʻe ako fakaʻatamai leleí, taukei, mo mataotaó, ʻo ka fie maʻu.
Ko e meʻa tonu pē ʻeni ʻoku ou faí ʻi he taimi ʻoku ou fie maʻu ai ha tali ki heʻeku ngaahi fehuʻi ʻoku ʻikai ke u lava ʻo talí. ʻOku ou kumi tokoni mei hoku Kau Taki ʻi he Kōlomu ʻo e Toko Hongofulu Mā Uá pea mei he niʻihi kehe ʻoku nau mataotao ʻi he ngaahi malaʻe hisitōlia mo e tokāteline ʻo e Siasi.
ʻOku totonu ke mou hoko ko e kau taaimuʻa, ki he ngaahi fāmili hoʻomou fānau akó, ke fakafeʻiloaki ʻa e ngaahi maʻuʻanga tokoni mālohi ʻi he ngaahi tefito ʻoku ʻikai ke loko ʻiló pe faʻa fakakikihiʻí koeʻuhí ke fakafuofuaʻi ʻe hoʻomou fānau akó ʻa e meʻa ʻoku nau fanongo mo lau kimui angé mo e meʻa kuó ke ʻosi akoʻi ange kiate kinautolú.
ʻOku mou ʻilo ʻoku mau fai ha ngaahi huhu maluʻi fakafaitoʻo ki heʻetau kau faifekau pelepelengesí kimuʻa pea fekauʻi atu kinautolu ki he malaʻe ʻo e ngāue fakafaifekaú ke maluʻi kinautolu mei he ngaahi mahaki te nau uesia pe tamateʻi kinautolú. ʻI he founga tatau pē, kātaki ʻo teuteuʻi hoʻo fānau akó ʻaki hono ʻoange e ngaahi fakaʻuhinga moʻoni, fakapotopoto mo tonu ʻo e tokāteline ʻo e ongoongoleleí, folofolá, hotau hisitōliá, pea mo e ngaahi tefito ko ia ʻoku ʻikai mahino he taimi ʻe niʻihi kimuʻa peá ke toki fekauʻi atu kinautolu ki he māmaní.
ʻOku ou talanoa kau ki ha niʻihi ʻo e ngaahi tefito ʻoku ʻikai ke loko ʻiloʻi pe faʻa fakakikihiʻi, ʻa e mali tokolahí, maka kikité, ngaahi fakamatala kehekehe ʻo e ʻUluaki Mata-Meʻa-Hā-Maí, liliu ʻo e Tohi ʻa Molomoná pe ko e Tohi ʻa ʻĒpalahamé, ngaahi fakamatala ʻo e tuʻunga tangata pe fefiné, matakalí mo e lakanga fakataulaʻeikí, pe ko ha Faʻē Fakalangi.
ʻOku faʻa fakafalala ʻa e ngāue ki hono teuteuʻi hotau kakai kei talavoú kiate kimoutolu kau faiako ʻa e CES. Lolotonga hoʻomou fakakaukauloto ki aí, ʻai ha taimi ke ke fakakaukau ki homou ngaahi faingamālié mo homou ngaahi fatongiá.
ʻOku ʻiloʻi kānokato ʻe he kau taki ʻo e Siasí he ʻahó ni ʻa e malava ke maʻu taʻefakangatangata ʻa e ngaahi fakamatalá, pea ʻoku tau fakahoko ha ngaahi ngāue ʻosikiavelenga ke ʻomi ʻa e kakano mo e mahino ʻoku tonú ʻo e ngaahi akonaki ʻo e Toe Fakafoki maí. Ko ha sīpinga lelei ʻo e ngāué ni ʻa e ngaahi fakamatala (ʻēsei) ʻe 11 ʻo e Ngaahi Tefito ʻo e Ongoongoleleí (11 Gospel Topics essays) ʻi he LDS.org ʻoku nau ʻomi ʻa e ngaahi fakamatala potupotutatau mo ha ngaahi fakaʻuhinga falalaʻanga ʻo e ngaahi moʻoni ʻoku faʻa fakakikihiʻi mo ʻikai alāanga mo e ngaahi meʻa fekauʻaki mo e Siasí.
ʻOku mahuʻinga ke mou ʻiloʻi lelei ʻaupito ʻa e kaveingá ʻi he ngaahi ʻēsei ko ʻení hangē ko hoʻo ʻiloʻi ho tuʻanimá. Kapau ʻoku ʻi ai haʻamou fehuʻi kau ki ai, kātaki ʻo ʻeke ki ha taha kuó ne ako ki aí peá ne maʻu e mahinó. ʻI hono fakalea ʻe tahá, “fekumi ki he akó, ʻio ʻi he ako pea ʻi he tui foki” ʻi hoʻomou taukei mo e kaveinga ʻo e ngaahi ʻēsei ko ʻení.
ʻOku totonu foki ke ke maheni mo e uepisaiti ʻa e Joseph Smith Papers pea mo e konga ʻi he hisitōlia ʻo e Siasí ʻi he LDS.org mo e ngaahi maʻuʻanga tokoni kehe ʻa e kau ako faivelenga ʻa e Siasí.
Ko e feinga ke mahino ʻa e ongoongoleleí mo e teuteu fakalaumālie ʻi hono ako fakalelei ʻo e tokāteliné mo e hisitōliá, pea ō fakataha ia mo ha fakamoʻoni ʻoku mālohí, ko e maluʻi lelei taha ia ʻoku tau maʻu ke tokoniʻi e fānau akó ke taʻofi mo/pe tali e ngaahi fehuʻí, veiveiuá, pe ngaahi tuʻunga ʻe mole ai ʻa e tuí te nau ala fehangahangai mo ia ʻi he kuonga ko ʻeni ʻo e maʻu ngofua ʻo e fakamatalá.
Kau faiako, ʻi hoʻomou ngāue mālohi ke mahino lelei ange hotau hisitōliá, tokāteliné, mo e ngaahi foung ngāué—ʻo lelei ange ia he meʻa ʻoku mou fai he taimi ní—te mou mateuteu ai ke ʻomi e ngaahi tali lelei, tokanga, mo fakalaumālie ki he ngaahi fehuʻi hoʻomou fānau akó.
Ko e founga ʻe taha ke ʻilo ai e ngaahi fehuʻi hoʻomou fānau akó ko e fakafanongo fakalelei kiate kinautolu.
ʻI he taʻu nima ʻema ʻuluaki kiʻi taʻahiné, naʻá ne kaka hake ʻi hoku alangá lolotonga ʻeku lau nusipepá. Naʻá ne talamai ha meʻa naʻe mahuʻinga kiate ia, pea naʻe ʻikai ke u tokanga ki ai. Ko ia ai, naʻe ala hake hono ongo kiʻi nimá, fusi ki lalo ʻa e nusipepá, puke hoku matá, ʻo sio fakahangatonu mai mo ne pehē, “Tangataʻeiki, ʻoku ʻikai ke ke fanongo kiate au!” Naʻá ne moʻoni—pea naʻá ku hala ʻi he ʻikai ke u fanongo kiate iá. Kuo pau ke hoko ʻa e kau faiako lelei kotoa pē ko e kau faiako fakafanongo lelei.
ʻIkai ngata pē ʻi he fakafanongo ki hoʻomou fānau akó, kae poupouʻi kinautolu ʻi he kalasí pe fakatāutahá ke fai atu ha ngaahi fehuʻi kau ki ha faʻahinga tefito pē.
Ko e taha ʻo e ngaahi fehuʻi mahuʻinga taha ʻe ala fai atu ʻe hoʻomou fānau akó “Ko e hā e ʻuhingá?”
ʻI he taimi ʻoku fehuʻi ai ʻaki ʻa e holi fakamātoato ke mahinó, “Ko e hā e ʻuhingá?” ko ha fehuʻi maʻongoʻonga ia. Ko e fehuʻi ia ʻoku fie maʻu ʻe he kau faifekaú ke fai ange ʻe heʻenau kau fie fanongó. Ko e hā e ʻuhinga ʻoku tau ʻi heni ai? Ko e hā e ʻuhinga ʻoku hoko ai e ngaahi meʻa ʻoku koví ki he kakai leleí? Ko e hā e ʻuhinga ʻoku totonu ai ke tau lotú? Ko e hā e ʻuhinga ʻoku totonu ke tau muimui ai ʻia Kalaisí? ʻOku faʻa tataki ʻe he ngaahi fehuʻi “ko e hā e ʻuhingá” ki he ueʻi fakalaumālié mo e fakahaá. ʻE tokoni hono ʻiloʻi e palani ʻo e fakamoʻuí ʻa ʻetau Tamai Hēvaní ke tali e ngaahi fehuʻi lahi taha ʻo e “ko e hā e ʻuhingá”. Te u lea lahi ange ʻi he meʻá ni ʻi ha miniti ʻe taha pe ua.
Ko ha fakamatala fakaʻosi ʻeni kau ki hono tali e ngaahi fehuʻí. ʻOku mahuʻinga ke akoʻi hoʻomou fānau akó neongo ʻoku ʻomi ʻe he ongoongoleleí ha ngaahi tali lahi, kae ʻikai ko e lahi taha ʻo e ngaahi fehuʻi mahuʻinga taha ki he moʻuí, ʻoku ʻi ai ha ngaahi fehuʻi he ʻikai maʻu ha tali ki ai ʻi he moʻui ʻi he māmaní koeʻuhí ʻoku ʻikai maʻu ha fakamatala ʻoku fie maʻu ki he tali totonú. Hangē ko ʻetau ako ʻi he tohi ʻa Sēkopé: “Vakai, ʻoku maʻongoʻonga mo fakaofo ʻa e ngaahi ngāue ʻa e ʻEikí. Hono ʻikai ke tau faʻa ʻiloʻi hono loloto ʻo ʻene ngaahi meʻa liló, pea ʻoku ʻikai faʻa lava ʻe ha tangata ʻo ʻiloʻi ʻa ʻene ngaahi founga kotoa pē. Pea ʻoku ʻikai ʻilo ʻe ha tangata ki heʻene ngaahi foungá tukukehe ʻo ka toki fakahā ia kiate ia.”9
Ko ha lea ʻeni ʻo e fakatokangá: Kātaki ʻo fakatokangaʻi ange mahalo te ke tui, hangē ko e tokolahi ʻo hoʻomou fānau akó, ʻokú ke hoko ko e mataotao fakafolofola, fakatokāteline, mo fakahisitōlia. Naʻe fakahā ʻe ha fakatotolo kimuí ni mai “ko e “lahi ange e pehē ʻe ha kakai ʻoku nau ʻilo ki ha tefitó, ko e lahi ange ia ʻenau fakakaukau ʻoku nau ʻilo lahi ange ʻi he meʻa ʻoku nau ʻiló, ʻo aʻu ki ha tuʻunga ʻoku nau ʻai ke pehē ʻoku nau ʻilo ki he ngaahi fakamatala ʻoku ʻikai ke moʻoni pea mo e ngaahi fakamatala faʻufaʻu.”10
ʻOku ʻiloʻi ʻeni ko e “fakamatala fakalahi,” kuo pau ke mou fakaʻehiʻehi mei he ʻahiʻahi ko ʻení ʻa kimoutolu kau faiako ʻa e CES . ʻOku fakaʻofoʻofa moʻoni ke ke pehē, “ʻOku ʻikai ke u ʻilo.” Ka, ʻi hono lea ʻakí, ʻoku ʻi ai ho fatongia ke kumi ʻa e ngaahi tali lelei taha ki he ngaahi fehuʻi lelei ʻoku fai ʻe hoʻomou fānau akó.11
ʻI hono akoʻi mo tali e ngaahi fehuʻi ʻo hoʻomou fānau akó, tuku ke u fakatokanga atu ke ʻoua naʻa mou vahevahe ha talanoa taʻe-pau ʻo ha fakatupulaki ʻo e tuí pe ngaahi mahino kuo ʻosi hono taimí mo e ngaahi fakamatala ʻo ʻetau tokāteliné mo e founga ngāue ʻo e kuohilí. ʻOku fakapotopoto ke ako maʻu pē ʻa e lea ʻa e kau palōfita mo e kau ʻaposetolo moʻuí; ʻai ke mou ʻilo ʻa e ngaahi meʻa ʻoku lolotonga hoko ʻi he Siasí, ngaahi tuʻutuʻuni, mo e ngaahi fakamatala ʻi hemormonnewsroom.org mo e LDS.org; pea fekumi ki he ngaahi ngāue ʻa e kau ako ʻiloa, mohu fakakaukau, mo faivelenga ʻi he Siasí ke fakapapauʻi ʻoku ʻikai ke mou akoʻi ha ngaahi meʻa ʻoku ʻikai moʻoni, ʻosi hono taimí, pe ngalikehe mo fakaoli.
Naʻe fakatokangaʻi ʻe he kau faʻutohi ʻo e fakatotolo ki he “fakamatala fakalahí” “ko ha fakahehema ke fakamatala fakalahi, tautefito kiate kinautolu ʻoku nau pehē ʻoku nau mataotaó, te nau ala fakalotosiʻiʻi ʻa e fakafoʻituituí mei heʻenau ako ʻiate kinautolu pē ʻi he ngaahi tafaʻaki ʻoku nau fakakaukau ʻoku nau ʻiló.”
Naʻe pehē ʻe he tokoni palesiteni fakaako ʻa BYU, “ʻE lava ke fakafiefia ʻa e hoko ko ha mataotao ʻi he lēsoní, tautefito ki he taimi ʻoku fuʻu tokanga ai ʻa e fānau akó mo e kaungā ngāué ki he meʻa kotoa pē ʻoku mau lea ʻakí. Ka, ʻikai ha tukupā moʻoni ke hokohoko atu e akó te tau tō he ʻahiʻahí ʻo hoko ko ha kau fakamatala fakalahi, pea ʻoku ʻikai ke saiʻia ha taha ʻi ha taha ʻokú ne pehē ʻokú ne ʻilo e meʻa kotoa pē.’”12
ʻOku ou toe fakaongo atu ʻa e fakatokanga ʻa Palesiteni Hingikelií, “ʻE ʻikai lava ke tau fuʻu tokanga. Kuo pau ke tau tokanga ke ʻoua naʻa tau hē mei he halá.”13
Makehe mei he hoko ko ha kau ako ʻi he kotoa ʻo e moʻuí, kuo pau foki ke ke fai e ngaahi meʻa ko ia ʻi hoʻo moʻui fakatāutahá ʻokú ne fakaʻatā e Laumālie Māʻoniʻoní ke ngāue ʻiate koé. ʻOku kau ʻi he ngaahi meʻa peheé ʻa e lotu fakamātoato fakaʻahó, ʻaukai faivelengá, faʻa ako mo fakalaulauloto ki he folofolá mo e lea ʻa e kau palōfita moʻuí, ngaohi e ʻaho Sāpaté ke fakafiefia, maʻu e sākalamēnití ʻi he loto fakatōkilalo pea manatuʻi maʻu pē ʻa e Fakamoʻuí, moihū he temipalé ʻi he lahi taha ʻe ala lavá, pea fakaʻosí, tokoniʻi e faingataʻaʻiá, masivá, mo e tuēnoá—ʻa kinautolu ʻoku ofi maí pea ʻi he funga māmaní fakatouʻosi.
Ke fakahoko lelei ho ngaahi faingamālié mo e ngaahi fatongiá, ʻe hoku kaungā faiako, kuo pau ke ke fai e meʻa ʻokú ke malanga ʻakí!
Ke ke loto-toʻa ʻaki hono kumi ki ha faleʻi mo e fakatonutonu meiate kinautolu ʻokú ke falala ki aí—ho malí, kau taki lakanga fakataulaʻeikí, pe taki ngāué. Fehuʻi ange e meʻa te ke lava ʻo fakaleleiʻi ʻi ho tuʻunga fakaākonga fakatāutahá. ʻOku tautautefito e mahuʻinga ʻa e meʻá ni ki heʻetau kau ngāue taimi kakató, ʻa kinautolu ʻoku vahe ʻi he paʻanga toputapu ʻo e vahehongofulu ʻa e Siasí. Kuo pau ke ke fakaʻehiʻehi mei ha faʻahinga meʻa ʻokú ne tuli ʻa e Laumālié.
ʻIkai ngata aí, ka u fokotuʻu atu muʻa ke ke fai ha ʻinitaviu fakatautaha mo koe pē ʻi ha ngaahi meʻa ne hoko peá ke toe vakaiʻi e 2 Nīfai 26:29–32, ʻAlamā 5:14–30, mo e Tokāteline mo e Ngaahi Fuakava 121:33–46.ʻE tokoni ia ke tau ʻiloʻi e faʻahinga ʻahiʻahi te tau ala fehangahangai mo iá. Kapau ʻoku ʻi ai ha meʻa ʻoku fie maʻu ke liliu ʻi hoʻo moʻuí, fakapapauʻi ke fakaleleiʻi ia.
Fakaʻehiʻehi mei he ʻahiʻahi ke fakafehuʻia e taumuʻa hoʻo kaungā-ngāué. Kae, kātaki ʻo vakai ki ho lotó mo fekumi ki hoʻo ngaahi holi ʻaʻaú mo e meʻa ʻokú ne fakaʻaiʻai koé. ʻE toki lava leva ʻe he Fakamoʻuí ʻo liliu ho lotó mo fakafenāpasi hoʻo ngaahi holí mo e taumuʻá mo Haʻaná.
ʻOku fie maʻu ke ʻiloʻi, mahino, tali mo kau ʻa e toʻu tangata kei tupu haké ʻi he palani ʻo e fakamoʻui ʻa e ʻOtuá. ʻE ʻoange ʻe he mahino ʻa e palaní kiate kinautolu ʻa e fakakaukau fakalangi ke nau vakai kiate kinautolu ko e ngaahi foha mo e ngaahi ʻofefine ʻo e ʻOtuá, ʻa ia ʻokú ne ʻoange ha founga ke mahino ʻa e meimei kotoa ʻo e tokāteliné, founga ngāué, mo e tuʻutuʻuni ʻa e Siasí.
ʻI homou hoko ko e kau faiako ʻa e CES ʻo e ʻaho ní, ʻoku fie maʻu ke mou tali ʻa e faingamālie mo e fatongia ke akoʻi ki he kakai kei talavou ʻo e senituli hono 21 ʻa e ngaahi tefitoʻi moʻoni totonu fekauʻaki mo e palaní, kau ai hono fakangofua fakalangi ʻa e tokāteline ʻo e malí mo e fatongia ʻo e fāmilí ʻo hangē ko hono fakamatalaʻi ʻi he fanongonongo ki he fāmilí.14
Ko e tokāteline ʻo e mali mo e fāmili taʻengatá ko ha konga mahuʻinga ia ʻo e palani ʻo e fiefiá ʻa e ʻOtuá. ʻOku kau ai hotau fāmili kuo silaʻi he temipalé, ko ha konga ia ʻo e fāmili taʻengata ʻa e Tamai Hēvaní ʻi he puleʻanga fakasilesitialé. Koeʻuhí ʻoku fekauʻaki fakahangatonu ia mo Hono fāmilí mo ʻEne fānau fakalaumālié, ʻoku akoʻi kitautolu ʻia Sēnesi “naʻá ne ngaohi ʻa kinaua ko e tangata mo e fefine” pea naʻá Ne fekauʻi e Tamai ko ʻĀtamá mo e Faʻē ko ʻIví ke “fakatokolahi, mo fakakakai ʻa māmani.”15
ʻOku pehē ʻoku kamata mo fakaʻosi e palani ʻo e fiefiá ʻaki e fāmilí. Ko e moʻoni, naʻe kamata e fāmilí ʻi he maama fakalaumālié, ʻa ia ne tau nofo ai ko ha kau mēmipa ʻo e fāmili ʻo ʻetau mātuʻa fakalangí. Pea ʻi he ngataʻangá, he ʻikai ngata pē ʻi he hokohoko atu e ngaahi tukupā fakafāmili mo e ngaahi vā fetuʻutaki ʻofá ka ʻe tupulaki foki ʻi he founga ʻo e fakatupú.16
Ko e meʻa mahuʻinga ʻokú ne fakafehokotaki kotoa iá—ʻa ia ʻoku fakafalala ki ai e palani ʻa e ʻOtuá mo hotau ikuʻanga taʻengatá pea mo e meʻa kotoa pē—ko hotau Fakamoʻui ko Sīsū Kalaisí. ʻOku malava ʻa e meʻa kotoa pē ʻi Heʻene feilaulau fakaleleí, kau ai e malí mo e fāmili ʻofa, tokanga, mo taʻengatá ka ʻoku ʻikai fakangatangata pē ki ai.
ʻOku akoʻi kitautolu ʻe he ʻEikí ʻe ʻikai lava ʻe ha tokotaha tāutaha tatau ai pē pe ʻoku angatonu fēfē, ke ne maʻu kotoa ʻa ia ʻoku maʻu ʻe he Tamai Hēvaní maʻa ʻEne fānaú. Ko ha tokotaha fakafoʻituitui tāutaha ko e vaeua ia ʻo e hoa kakató, ʻoku ʻikai lava ke nofo ʻi he nāunau māʻolunga taha ʻo e puleʻanga fakasilesitialé.17
ʻOku fie maʻu ke mahino ki hoʻo fānau akó ko e taumuʻa ʻo e moʻui fakamatelié ke hoko ʻo tatau ange mo e ʻOtuá ʻi hono maʻu ha sino fakamatelie, ngāue ʻaki e tauʻatāina ke filí, mo fakahoko e ngaahi fatongia ne tomuʻa fai ʻe heʻetau mātuʻa fakalangí—ʻa e ngaahi fatongia ʻo e husepānití, uaifí, mo e mātuʻá.
Kuo fakapapauʻi mai ʻe he kau palōfitá ko kinautolu kotoa ʻoku moʻui taau pea ʻoku nau fakafalala kia Sīsū Kalaisí ka kuo teʻeki ke silaʻi ko ha ongo meʻa malí pe kuo teʻeki ke maʻu ha fānau ʻi he moʻui ní, te nau maʻu e ngaahi faingamālie ko iá ʻi he maama ka hoko maí.
Akoʻi hoʻo kakai kei talavoú ʻoku ʻi ai e faingamālie ki he taha kotoa ʻi he Siasi ʻo e ʻEikí ke lotu, ngāue, mo tutupu fakataha ko e ngaahi tuongaʻane mo e tuofāfine ʻi he ongoongoleleí. Fakamanatu kiate kinautolu e meʻa naʻe akoʻi ʻe Līhaí, ko e taumuʻa mo e ʻamanaki ʻa e ʻOtuá maʻa ʻEne fānaú kotoa ʻoku lava ke fakamāʻopoʻopo ia ʻaki ʻeni: “Naʻe hinga ʻa ʻĀtamá koeʻuhí ke ʻi ai e faʻahinga ʻo e tangatá; pea ʻoku ʻi ai e faʻahinga ʻo e tangatá koeʻuhí ke nau maʻu ʻa e fiefiá.”18
ʻOku finangalo e ʻOtuá ke tau tali ʻEne fakamatalaʻi e malí mo talangofua ki Heʻene ʻuluaki fekaú ke “fakatokolahi mo fakakakai”—ʻo ʻikai ngata pē ke fakahoko ʻEne palaní kae maʻu foki ʻa e fiefia naʻe fakataumuʻa ki ai ʻEne palani maʻa Hono ngaahi fohá mo e ngaahi ʻofefiné.
ʻOku ʻikai ko e kāingalotu pē ʻo e Siasí ʻoku nau fakatokangaʻi e ngaahi tefitoʻi moʻoni ko ʻení. Naʻe tohi ʻe David Brooks, ko ha tangata faiongoongo ʻi he New York Times, “ʻOku ʻikai ke lelei ange ʻa e kakaí ʻi hono ʻoange ha tauʻatāina fakatāutaha lahi ke nau fai e meʻa ʻoku nau fie maʻú. ʻOku nau lelei ange ʻi heʻenau fai ha ngaahi tukupā ʻoku lahi ange ʻi heʻenau fili fakatāutahá—ʻa e ngaahi tukupā ki he fāmilí, ʻOtuá, ngāué mo e fonuá.”19
ʻI hoʻomou hoko ko e kau faiako ʻa e Siasí, tokoniʻi ʻetau toʻu tupú ke mahino lelei ʻa e palani ʻo e fiefiá ʻa e ʻOtuá ʻa ia ʻe hoko mai ai ʻa e fiefia moʻoní ki he kotoa ʻo ʻEne fānaú. Tokoniʻi ke nau ʻiloʻi ia, tali ia, kau ki ai, mo maluʻi ia. Mei he aʻusia ʻo ʻeku hoko ko e Taki Māʻolunga ʻi he taʻu ʻe 40, ʻoku ou hohaʻa ki he fuʻu tokolahi hotau kāingalotu ʻo e Siasí, talavou mo e motuʻa ange, ʻoku ʻikai ke mahino kiate kinautolu ʻa e palani ki honau ikuʻanga taʻengata mo fakalangí.
Ko ia, ʻe hoku kaungā faiako, ʻoku totonu ke tau fekumi mo hanganaki fiefia atu ki he ngaahi faingamālie ke fakamatalaʻi fakatokāteline mo fakalaumālie, ʻa e ʻuhinga ʻoku tau tui ai ko e ʻilo ki he palani lahi ʻo e fiefia ʻa e ʻOtuá te ne tali ʻa e konga lahi taha ʻo ʻetau ngaahi fehuʻi “ko e hā hono ʻuhingá” ʻa ē te tau ala ʻeké. ʻOku fakaʻatā kitautolu ʻe hono fakamatalaʻi ʻetau tui ki ha moʻui fakalaumālie naʻa tau nofo ai ko ha fānau fakalaumālie ʻo ha Tamai Hēvani mo ha Faʻē Fakalangi ke tau fakamatala ki he ʻuhinga naʻe fakatupu ai ʻa e māmani ko ʻení. Ko e taumuʻa mahuʻinga ʻe taha ʻo e moʻui fakamatelié ke tau lava ʻo fakahoko ʻa e aʻusia fakafāmili ko iá ʻe kitautolu, ʻi he taimi pē ko ʻení ʻi heʻetau hoko ko e mātuʻá kae ʻikai ke tau kei hoko ko e fānaú. Mataʻikoloaʻaki ʻa e mahino ʻo e tokāteliné mo e taumuʻa ʻo e palani ʻa ʻetau Tamai Hēvaní ki heʻetau fiefia taʻengatá. Pea hokohoko atu hono akoʻi iá.
Ko ia, ke fakamāʻopoʻopo mo fakamatala fakanounoú: Mei he fakamatala ʻa Kim B. Clark kimuʻa ange he efiafi ní naʻa tau ako ai ko e kau faiako kimoutolu ʻoku mei he ʻOtuá, fakafonu ʻaki e tuí, ʻamanaki leleí, loto fakatōkilaló, mo e ʻofá.20
Ko e ngaahi meʻa kuó u vahevahe mo kimoutolú ko e:
-
Akoʻi e fānau akó ke fakatahaʻi e ʻilo ʻi he akó mo e tuí ʻaki ha fakamoʻoni ʻoku haohaoá. Akoʻi kinautolu ke nofo maʻu ʻi he vaká pea piki ke maʻu!
-
Akoʻi e fānau akó ke mapuleʻi ʻenau ngaahi telefoni toʻotoʻó pea nofotaha ke fehokotaki lahi ange mo e Laumālie Māʻoniʻoní kae ʻikai ko e ʻInitanetí
-
Teuteuʻi e fānau akó ʻaki e ngaahi moʻoni ʻo e palani ʻo e fakamoʻuí ʻoku maʻu ʻi he ongoongolelei ʻo Sīsū Kalaisí.
-
Maʻuloto e kaveinga ʻo e ngaahi ʻēsei ʻo e Ngaahi Tefito ʻo e Ongoongoleleí.
-
Manatuʻi “Ko e hā hono ʻuhingá?” ko ha fehuʻi maʻongoʻonga ʻokú ne takiakiʻi ke mahino ʻa e ongoongoleleí.
-
ʻOua ʻe fakamatala fakalahi, pea ʻoua ʻe ilifia ke pehē, “ʻOku ʻikai te u ʻilo.”
-
Hoko ko ha kau ako ʻi he kotoa ʻo e moʻuí.
-
Fekumi ki ha faleʻi mo ha fakatonutonu meiate kinautolu ʻokú ke falala ki aí.
-
Fakakaukau ke toutou fai ha ʻinitaviu fakatāutaha ke toe vakaiʻi hoʻo teuteu fakalaumālié, hoʻo faivelengá, mo e ola lelei hoʻo ngāué.
-
Akoʻi ange ʻoku kamata pea fakaʻosi mo e fāmilí ʻa e palani ʻo e fiefiá. Fakakaukau maʻu pē ki he palani ʻo e fakamoʻuí.
-
Akoʻi ange ʻoku ʻomi ʻe he nofomalí mo e fāmilí ʻa e fiefia ʻoku tuʻuloá
-
Manatuʻi ʻoku ʻomi ʻe he ʻilo ʻi he akó pea ʻi he tuí fakataha mo e fakamoʻoni ʻoku haohaoá ʻa e ului ʻoku moʻoni mo tuʻuloá.
-
ʻOku hiliō ʻi he meʻa kotoa pē ʻa e mahuʻinga ʻo e tui mālohi ki he Fakalelei ʻa e ʻEiki ko Sīsū Kalaisí maʻa hotau mālohinga mo e tupulaki fakalaumālié.
Sai, ʻe hoku kaungā faiako ʻofeina, fakatauange ke faitāpuekina kimoutolu takitaha ʻe he ʻOtuá. Fakatauange ke toʻo atu ha faʻahinga kavenga pē ʻokú ke fuesia. Fakatauange ke ke maʻu ʻa e fiefia mo e melino ʻoku maʻu mei hono ʻiloʻi ʻi hoʻo faiakó kuó ke tokoniʻi ha moʻui, kuó ke hiki hake ha taha ʻo e fānau ʻa e Tamai Hēvaní ʻi heʻene fonongá ki ha ʻaho ʻe toe talitali lelei ai ia ʻi Hono ʻaó. ʻOku ou tuku atu ʻeku fakamoʻoní ʻoku tau maʻu ʻa e kakato ʻo e ongoongolelei taʻengata ʻo Sīsū Kalaisí ʻi hono toe fakafoki mai ʻi he Palōfita ko Siosefa Sāmitá. ʻOku tau lolotonga maʻu ʻa e kakato ʻo e ongoongoleleí. Kuo pau ke tau ʻai ia ki hotau ʻatamaí mo hotau lotó pea akoʻi ia ʻaki ʻa e mālohi. Fakatauange ke faitāpuekina takitaha kitautolu ʻe he ʻOtuá ko ʻeku lotú ia ʻi he loto fakatōkilalo mo e tāpuaki, ʻi he huafa ʻo Sīsū Kalaisí, ʻēmeni.
© 2016 by Intellectual Reserve, Inc. Maʻu ʻa e totonu fakalao kotoa pē. Fakangofua ke liliu ʻi he lea faka-Pilitāniá: 12/15. Fakangofua ke Liliú: 12/15. Liliu ʻo e “The Opportunities and Responsibilities of CES Teachers in the 21st Century.” Tongan. PD60001102 900