Upat ka Gasa Nga Gitanyag ni Jesukristo Kaninyo
Minahal kong kaigsoonan, pagkanindot niining panahona! Ganahan kita sa mga linya “Oh, Come, All Ye Faithful”1 ug madasigon mosimba Kaniya: Jesus ang Kristo—kanang bugtong bata sa Bethlehem—“ang Halangdong Jehova sa Daang Tugon [ug] ang Mesiyas sa Bag-o.”2
Karong gabhiona atong ikonsiderar ang mga panalangin nga moabut kanato samtang kita motutok sa kinabuhi, misyon, doktrina, ug Pag-ula ni Ginoong Jesukristo. Modapit ako kaninyo, sama sa gihimo ni Haring Benjamin alang sa mga Santos sa iyang panahon, sa “pagkonsiderar sa bulahan ug malipayon nga kahimtang niadtong nagtuman sa mga sugo sa Dios.” Kana nga panalangin alang kanato dinhi ug karon, apan ang dugang saad niini nga sa kaulahian ang “walay katapusan ang kalipay.”3 Yanong gipahayag, tinuod nga mga sumusunod ni Jesukristo adunay pribilehiyo sa pagsinati sa dili masulti nga kalipay sa kahangturan.
Napahinumduman ako niini sa miaging adlaw sa dihang nahimamat nako ang usa ka anghel nga ginganlan og Lydia. Kini nga anghel wala magsul-ob og puti, ug gihimo niyang sayon alang namo sa pagpakig-istorya niya pinaagi sa pag-adto sa akong opisina. Si Lydia nag-edad og 12 anyos. Giingnan ko nga siya nag-antus og talagsaon, agresibo nga matang sa kanser sa utok.4 Siya adunay nawong sa usa ka anghel ug pamayhon nga lapas na sa iyang pangidaron. Samtang nag-istorya kami sa iyang kinabuhi ug unsay anaa sa unahan, kalma ra siya ug malinawon. Sa dihang nangutana ko kon dunay ba siyay pangutana, dali siya mitubag, “Unsay hitsura sa langit?” Misangpot kini sa kinasingkasing nga panag-istorya mahitungod sa katuyoan sa kinabuhi ug sa mga panalangin nga gitanyag sa atong Langitnong Amahan ug sa Iyang Hinigugmang Anak ngadto niadtong motahud ug mosunod Kanila.
Natandog ko pag-ayo sa hugot nga pagtuo ni Lydia ug sa iyang pamilya! Bisan nag-atubang og grabe kaayo nga hagit kon mahitungod lang sa kinabuhi dinhi sa yuta ang kabalak-an, si Lydia puno sa hugot nga pagtuo. Siya adunay mahangturong panglantaw. Nasayud siya nga ang Ginoo nahigugma kaniya ug moatiman kaniya. Ang iyang mahalaron nga pamilya puno sa samang kalinaw ug pamayhon nga mahatag lamang sa hugot nga pagtuo sa Ginoo.
Ang pangandoy ni Lydia mao ang pagpakigkita sa Presidente sa Simbahan sa Ginoo, apan ang iyang mga tinguha mas lawom pa kay sa bisan unsa nga kausa nga kasinatian dinhi sa pagka-mortal. Ang iyang labing dako nga tinguha mao ang pagpakig-uban sa iyang pamilya sa kahangturan sa celestial nga gingharian. Kana naglakip sa iyang tinguha nga kanunay nga makauban usab ang Langitnong Amahan ug si Jesus.
Sa pagkatinuod, ang atong mga tinguha nag-impluwensya sa matag usa kanato sa dagkong mga paagi, dili lamang dinhi ug karon apan lapas pa. Ikonsiderar ang kaimportante niini nga pamahayag gikan sa Alma: “[Ang Ginoo] mohatag ngadto sa mga tawo sumala sa ilang gitinguha.”5
Ang tinguha importante niini nga panahon sa pagpanghatag og regalo, kon kita maghunahuna sa mga tinguha niadtong atong gimahal. Atol niining panahona, gidapit usab nako kamo sa pagkonsiderar sa inyong kaugalingong tinguha. Unsa ang inyong gitinguha pag-ayo? Unsa gayud ang gusto ninyong masinati ug mabuhat niini nga kinabuhi? Gusto ba gayud kamo nga mahimong mas mahisama ni Jesukristo? Gusto ba gayud kamo nga mopuyo uban sa Langitnong Amahan ug uban sa inyong pamilya sa kahangturan ug magpuyo sama sa Iyang pagpuyo?
Kon buhaton ninyo,gusto ninyong modawat sa daghang mga gasa nga gitanyag sa Ginoo aron sa pagtabang kaninyo ug kanako atol sa atong panahon sa mortal nga pagsulay. Tutukan nato ang upat sa mga gasa nga gihatag ni Jesukristo ngadto sa tanan kinsa andam nga modawat niini.6
Una, Siya mihatag kaninyo ug kanako sa walay kinutuban nga kapasidad sa paghigugma. Kana naglakip sa kapasidad sa paghigugma sa dili angay higugmaon ug niadtong kinsa dili lamang nga wala mahigugma kaninyo apan sa karon nagalutos kaninyo.7
Uban sa tabang sa Manluluwas, kita makakat-on sa paghigugma sama sa Iyang paghigugma. Magkinahanglan kini og kausaban sa kasingkasing—ilabi na sa pagpalukmay sa atong kasingkasing—samtang kita gitudloan sa Manluluwas unsaon gayud sa pag-atiman sa usag usa. Minahal kong kaigsoonan, makapangalagad gayud kita sa pamaagi sa Ginoo kon dawaton nato ang Iyang gasa sa gugma.
Pangayo og tabang sa Ginoo sa paghigugma niadtong gusto Niya nga inyong higugmaon, lakip na niadtong dili sayon kanunay nga mobati og gugma. Mahimo gani nga inyong hangyoon ang Ginoo nga ubanan kamo sa Iyang mga anghel sa pagbuhat sa butang nga dili ninyo gustong buhaton.8
Ang ikaduha nga gasa sa Manluluwas nga gitanyag kaninyo mao ang abilidad sa pagpasaylo. Pinaagi sa Iyang walay kinutuban nga Pag-ula, kamo makapasaylo niadtong kinsa nakapasakit kaninyo ug kinsa dili gayud modawat sa responsibilidad sa ilang pagkabangis nganha kaninyo.
Sa kasagaran sayon ra kaayo ang pagpasaylo sa usa ka tawo kinsa sinsero ug mapainubsanong nangayo sa inyong pasaylo. Apan ang Manluluwas mohatag kaninyo sa abilidad sa pagpasaylo ni bisan kinsa nga miabusar kaninyo sa bisan unsa nga paagi. Dayon ang ilang masakit nga mga binuhatan dili na makadaot sa inyong kalag.
Ang ikatulo nga gasa gikan sa Manluluwas mao ang paghinulsol. Kini nga gasa wala masabti pag-ayo kanunay. Sa inyong nahibaloan, ang Bag-ong Tugon orihinal nga gisulat sa pinulongan nga Gresyanhon. Sa mga tudling diin ang Manluluwas mitawag sa katawhan nga maghinulsol, ang pulong nga gihubad nga “hinulsol” mao ang termino nga Gresyanhon nga metanoeo.9 Kini usa ka gamhanan nga Gresyanhon nga berbo [verb]. Ang prefix nga meta nagpasabut og “kausaban.” Gamiton usab nato kana nga prefix sa Iningles. Pananglitan, ang pulong nga metamorphosis nagpasabut nga “kausaban sa porma.” Ang suffix nga noeo may kalabutan sa usa ka Gresyanhon nga pulong nga nagpasabut nga “hunahuna.”10 May kalabutan usab kini ngadto sa laing Gresyanhong mga pulong nga nagpasabut nga “kahibalo,”11 “espiritu,”12 ug “ginhawa.”13
Makakita na ba kita sa gilapdon ug giladmon sa unsay gihatag sa Ginoo nato sa dihang mitanyag Siya sa gasa sa paghinulsol? Siya midapit kanato sa pag-usab sa atong hunahuna, sa atong kahibalo, sa atong espiritu, bisan sa atong gininhawa. Pananglitan, kon kita maghinulsol, kita moginhawa uban sa pasalamat ngadto sa Dios, kinsa mipahulam nato sa ginhawa matag adlaw.14 Ug kita magtinguha sa paggamit niana nga ginhawa sa pag-alagad Kaniya ug sa Iyang mga anak. Ang paghinulsol usa ka talagsaong gasa. Usa kini ka proseso nga dili angay nga kahadlokan. Usa kini ka gasa nga atong dawaton uban ang kalipay ug ang paggamit—gani sagupon—matag adlaw samtang kita magtinguha nga mahimong mas sama sa atong Manluluwas.
Ang amahan ni Haring Lamoni nakasabut unsay anaa sa unahan niadtong kinsa motuo ni Kristo ug mosunod Kaniya. Mipahayag siya nga iyang isalikway ang iyang tanang mga sala alang sa pribilehiyo sa pagkaila sa Ginoo.15 Ang tinuod nga paghinulsol dili mahitabo sa usa lang ka higayon. Kini usa ka walay katapusan nga pribilehiyo. Importante kini sa kauswagan ug kalinaw sa hunahuna, kahupayan ug hingpit nga kalipay.
Ang ikaupat nga gasa gikan sa atong Manluluwas mao ang usa ka saad—usa ka saad sa kinabuhi nga walay katapusan. Kini wala magpasabut lamang nga magpuyo sulod sa taas gayud nga panahon. Ang tanan magpuyo sa kahangturan human sa kamatayon, bisan pa sa gingharian o himaya nga sila makasarang. Ang tanan mabanhaw ug makasinati og pagka-imortal. Apan ang kinabuhing dayon mas labaw pa kay sa paggahin sa panahon. Ang kinabuhing dayon mao ang matang ug kalidad sa kinabuhi nga gipuy-an sa Langitnong Amahan ug sa Iyang Hinigugma nga Anak. Sa dihang ang Amahan mitanyag kanato og walay katapusan nga kinabuhi, Siya nagpasabut, “Kon kamo mopili sa pagsunod sa akong Anak—kon ang inyong tinguha mao gayud aron mahimong mas sama Kaniya—nan sa katapusan kamo magpuyo sama sa among pagpuyo ug magdumala og mga kalibutan ug mga gingharian sama kanamo.”
Kining upat ka talagsaong gasa makahatag nato og mas daghang kalipay kon kita modawat niini. Nahimo kining posible tungod kay si Jehova mikunsad aron moanhi sa yuta isip ang batang si Jesus. Natawo siya sa usa ka imortal nga Amahan ug usa ka mortal nga inahan. Natawo siya sa Bethlehem ubos sa labing mapainubsanon nga mga sirkumtansya. Ang Iyang balaan nga pagkatawo nakita sa mga propeta sukad pa sa mga adlaw ni Adan. Si Jesukristo mao ang dili hitupngan nga gasa sa Dios—ang gasa sa Amahan ngadto sa Iyang tanang mga anak.16 Kana nga pagkatawo malipayon natong saulogon matag panahon sa Pasko.
Uban sa atong mga hunahuna ug mga pagbati nga nagtutok sa Manluluwas sa kalibutan, dayon unsa, ang angay natong buhaton aron madawat kini nga mga gasa nga walay kapin kabubut-on nga gitanyag kanato ni Jesukristo? Unsa ang yawe sa paghigugma sama sa Iyang paghigugma, pagpasaylo sama sa Iyang pagpasaylo, paghinulsol aron mahimong mas sama Kaniya, ug sa katapusan magpuyo uban Kaniya ug sa atong Langitnong Amahan?
Ang yawe mao ang paghimo ug pagtuman sa sagrado nga mga pakigsaad. Kita mopili sa pagsunod ug mouswag sa dalan sa pakigsaad sa Ginoo ug magpabilin diha niini. Dili kini komplikado nga dalan. Mao kini ang paagi ngadto sa tinuod nga kalipay niini nga kinabuhi ug kinabuhing dayon didto.
Minahal kong kaigsoonan, ang akong pinakadako nga mga tinguha mao nga ang tanang mga anak sa Langitnong Amahan makabaton sa oportunidad sa pagpaminaw sa ebanghelyo ni Jesukristo ug sa pagpatalinghug sa Iyang mga pagtulun-an ug sa pagpundok sa Israel sumala sa gisaad niining ulahing mga adlaw. Mag-ampo ko nga kita motuo ug modawat sa gugma sa Manluluwas alang sa matag usa kanato. Ang Iyang walay kinutuban ug hingpit nga gugma maoy nakaaghat Niya sa pag-ula kaninyo ug kanako. Kana nga gasa—ang Iyang Pag-ula—nakatugot sa Iyang ubang tanang mga gasa nga maato.
Sa umaabut nga adlaw—niana nga Milenyum nga maoy atong gipangandaman karon—”matag tuhod moluhod, ug matag dila mokumpisal”17 nga si Jesus mao ang Kristo. Ug dili lang ang talagsaong Tabernacle Choir sa Temple Square ang manganta og “Aleluya.”18 Ang tanang tawo kinsa mipili sa pagsunod ni Jesukristo mokanta ug mosinggit og: “Aleluya: kay nagahari ang Ginoo nga atong Dios nga makagagahum sa tanan.”19 “Ang gingharian sa kalibutan mahimong gingharian sa atong Ginoo, ug sa iyang Kristo; ug siya magahari hangtud sa kahangturan,”20 “Hari sa kaharian ug Ginoo sa kaginoohan.”21
Mopamatuod ko nga ang Dios buhi! Si Jesus mao ang Kristo—ang Mesiyas. Kini mao ang Iyang Simbahan, nga Iyang gidumala pinaagi sa Iyang mga propeta. Mapainubsanon, kaming nag-ampo sa Iyang mga panalangin sa matag usa kaninyo, lakip sa tinguha ug abilidad sa pagdawat sa tanang mga gasa nga gitanyag sa Manluluwas kaninyo, sa ngalan ni Jesukristo, amen.