Paandama ang Matag Kasingkasing og Luna alang Kaniya
Sobra lang og usa ka semana ang milabay, ang mga suga sa Pasko sa Temple Square gipasiga, mipadayon sa tradisyon nga 53 na ka tuig ug, alang sa kadaghanan, nagtimaan sa pagsugod sa panahon sa Pasko. Sa Pasko atong saulogon ang pagkatawo, kinabuhi, ug kahayag ni Jesukristo, ang literal nga Anak sa Dios ug Manluluwas sa kalibutan. Mobati kita og paglaum sa pahibalo nga nag-uban sa Iyang pagkatawo: “Himaya sa Dios sa kalangitan, ug sa yuta, panagdait sa mga tawo nga iyang gikahimut-an.”1 Ang musika, mahinamon nga mga bata, mga gasa nga ihatag ug dawaton, mga Christmas tree, mga dekorasyon, ug mga suga pulos kabahin sa malipayong pagsaulog.
Kon maghunahuna kamo sa Pasko, unsang gihambin nga mga panumduman ang mahinumduman? Alang kanako, kini nga panahon sa tuig kanunay nga magdala og mga panumduman sa mga pagsaulog sa Pasko sa akong pagkabata.
Makahinumdom gihapon ko sa kadaghanan sa mga gasa nga akong nadawat. Makahinumdom ko og football ug basketball, mga dulaan ug mga sinina. Kadaghanan niadtong mga gasa wala na karon ug nakalimtan na; ang mga sinina dunot na ug dili na paigo. Apan ang labing mahinumduman nako sa milabay nga mga Pasko—ang akong labing nakatandog ug paborito nga mga panumduman—dili mahitungod sa akong nadawat apan sa unsay akong gihatag.
Tuguti ko sa pagpasabut. Matag tuig, sa Sabado sa dili pa mag-Pasko, ang kabatan-onan sa among ward magpundok sa among simbahan. Pun-on namo ang mga basket og mga kahil, saging, ug hinimo sa balay nga mga cookie ug keyk aron ihatud ngadto sa mga biyuda nga nagpuyo sa duol. Miadto mi sa ilang mga panimalay, nanganta og mga kanta sa Pasko, ug mihatag og mga basket sa Pasko. Mahinumduman gihapon nako ang ilang mapasalamatong mga pahiyom. Ang pipila kanila mga milalin [immigrant] o mga anak sa milalin nga mipahayag sa ilang pasalamat sa lahi og linitukan nga Iningles: sila Sister Swartz, Zbinden, Groll, ug Kackler. Dili gayud nako makalimtan ang init nga pagbati nga nakulit niini diha sa akong kasingkasing.
Sa dihang si Lesa ug ako nahimong mga ginikanan, misugod mi og tradisyon nga mohatag og mga gasa sa Pasko sa usa ka pamilya nga nanginahanglan, sama sa gibuhat sa kadaghanan ninyo. Kasagaran madawat namo ang ngalan sa pamilya gikan sa usa ka kapunungan sa komunidad, apil sa mga edad sa mga bata. Migahin kami og dakong panahon ug paningkamot sa pagpangita og tukma nga mga gasa alang kanila. Ang among mga anak daw nalingaw kaayo niini sama sa ilang pagdawat og mga regalo sa Adlaw sa Pasko! Kini nga tradisyon sa pamilya mitabang sa pagsilsil sa tinuod nga diwa sa Pasko diha sa among mga kasingkasing.
Sa akong propesyonal nga kinabuhi, naapil ako sa pagpasiugda, paghimo, ug pagbaligya og ekipo nga pang-ehersiyo sa tibuok kalibutan. Ang mga ekipo sama sa mga treadmill, stationary bike, ug elliptical nga mga makina gidesinyo og tuyo aron sa paglig-on sa kasingkasing. Sa pagkatinuod, naningkamot mi og maayo sa among kompaniya sa pagsiguro nga ang mga tiggamit sa ekipo tukma nga makasukod sa kondisyon ug lebel sa pagpitik sa ilang kasingkasing pinaagi sa mga heart-rate monitor. Karon, daghan kanato nagsul-ob og teknolohiya sa atong mga kamot nga nag-monitor sa atong kasingkasing ug nag-awhag og mga kalihokan sa paglig-on sa atong kasingkasing.
Unsa kaha kon adunay paagi nga masukod ang kondisyon sa inyong kasingkasing sa espirituhanong panglantaw—usa ka espirituhanon nga monitor sa kasingkasing, kon mahunahuna ninyo? Unsa kaha ang isulti sa inyong monitor sa kasingkasing? Unsa ka himsog sa espirituhanong paagi ang inyong kasingkasing? Ang panahon sa Pasko usa ka maayong panahon aron matimbang-timbang nato sa mahunahunaong paagi ang kahimtang sa atong kaugalingong kasingkasing.
Sama pananglit, mahimong mangutana kamo sa inyong kaugalingon, “Andam ba ang akong kasingkasing nga modawat sa Manluluwas?” Panahon sa Pasko kanunay kitang manganta og, “Paandama ang matag kasingkasing og luna alang kaniya.”2 Unsaon ninyo pag-andam og luna sa inyong kasingkasing alang kang Kristo, ilabi na niining nagkapuliki apan nindot nga panahon?
Ang mga kasulatan puno og mga paghulagway nga makatabang kanato sa pagtimbang-timbang sa kahimtang sa atong kasingkasing. Ang pipila ka mga bersikulo naglakip og mga pulong sama sa “putli,”3 “maaghup,”4 “mapaubsanon,”5 “masulub-on,”6 ug “mahinulsulon.”7 Kini nga mga pulong, ug daghan pang uban sa tibuok kasulatan, nagtabang kanato nga makasabut sa kasingkasing sa Manluluwas. Aron madawat Siya sulod sa atong mga kasingkasing, siguradong ang atong mga kasingkasing kinahanglang putli ug mapainubsanon sama sa Iyaha.
Sa pag-usab og sulti sa mga pulong ni Pablo, mahimo kitang maningkamot nga masulat ang mga pulong ug mga hiyas ni Jesukristo sama sa usa ka “sulat … nga nakudlit diha sa [atong] mga kasingkasing, nga pagahibaloan ug pagabasahon sa tanang mga tawo: … ang sulat … gikan kang Kristo … sinulat dili sa tinta kondili sa Espiritu sa Dios nga buhi; dili diha sa mga papan nga bato kondili sa mga papan nga mga kasingkasing sa mga tawo.”8 Nagkinahanglan kini og labaw pa kay sa nindot nga mga pagtimbaya sa Pasko gikan sa atong mga ngabil. Ang Ginoo mipasidaan kanato batok niadtong “[nanagpundok] ngari kanako uban sa ilang mga ngabil, apan ang ilang mga kasingkasing layo gikan kanako.”9 Panahon niining Pasko ug sa tibuok tuig, ang atong mabinationg mga buhat ug maayong binuhatan mao ang labing maayong timailhan sa atong gugma sa Manluluwas, nga nahisulat diha sa atong mga kasingkasing.
Samtang akong gikonsiderar ang kahimtang sa akong kaugalingong kasingkasing, nakakita ko og inspirasyon ug talagsaong mga ehemplo nga sundon diha sa mga kasingkasing ug sakripisyo niadtong mitabang sa pag-establisar sa Simbahan sa unang mga adlaw sa pagpahiuli niini. Gusto kong mopaambit og istorya sa Pasko mahitungod sa unang kinabig nga Santos sa Ulahing mga Adlaw gikan sa Immingham, England: si Mary Wood Littleton.
Si Mary ug ang iyang bana, si Paul, wala gayud magtuo nga biyaan nila ang ilang panimalay sa England. Apan nadunggan nila ang mensahe sa gipahiuli nga ebanghelyo ug nakaangkon og pagpamatuod sa katinuod niini. Nabunyagan sila, ug paglabay lang og duha ka bulan, si Mary ug Paul, uban sa ilang mga anak, milawig ngadto sa Amerika aron mopundok uban sa mga Santos. Miabut sila sa New York pagka-Disyembre 20, 1844. Paglabay sa lima ka adlaw, mibiyahe sila pinaagi sa karwahe padulong sa Nauvoo, Illinois. Hunahunaa lang—nagpanaw sa bugnaw nga panahon sa libaungon, lisud nga mga dalan, gisaulog nila ang ilang unang Adlaw sa Pasko sa Amerika.
Bisan pa niini nga mga kausaban, naglaum si Mary diha sa iyang kasingkasing nga ang iyang pamilya ugma damlag mosaulog og Pasko sama sa ilang gihimo sa England, nga dunay mga dekorasyon, Santa Claus, ug pagpanaygon. Subo lang, ang ilang ikaduhang Pasko sa Amerika, sa 1845, dili kaayo nindot—gigahin nila kini sulod sa usa ka kahon sa karwahe nga gihimo ni Paul nga temporaryong panimalay samtang nanlimbasug ang pamilya nga mapahimutang ang ilang mga kaugalingon sa Nauvoo. Sa makausa pa, uban sa kasingkasing nga puno sa paglaum, miingon si Mary, “Sunod tuig, ang Pasko lahi na.”
Sa misunod tuig nga 1846, ang ikatulong Pasko sa pamilya sa Amerika, si Mary ug ang mga bata didto sa Winter Quarters, nangandam alang sa unsay nahimong taas nga biyahe padulong sa kasadpan panahon sa tingpamulak. Ang mga manggugubot mipapahawa kanila sa Nauvoo, ug si Paul naglakaw padulong sa kasadpan uban sa Mormon Battalion—pipila ka gatus ka kilometro ang gilay-on. Usab, walay pagpanaygon ug walay Santa Claus. Hinoon, dihay pagpuasa ug sinsero nga pag-ampo alang sa otso anyos nga anak ni Mary, kinsa hapit mamatay tungod sa kakulang sa pagkaon. Nabuhi siya, apan laing 25 ka tawo diha sa Winter Quarters nangamatay niana mismong Adlaw sa Pasko.
Sa ikaupat lamang niyang Pasko sa Amerika, nga bag-o lang miabut sa Walog sa Salt Lake, nga si Mary ug ang iyang pamilya naghiusang misaulog sa Pasko diha sa kalinaw. Bisan pa man, dili kini ang matang sa pagsaulog nga iyang nasinati sa England. Apan, sa ubang mga paagi, mas maayo pa kini. Sa usa ka pagsaulog sa Pasko sa adlawng Igpapahulay, sa adlaw human sa Pasko sa 1847, ang mga Santos nanagpundok aron mag-ampo, mopahayag og pagpasalamat, ug mokanta og mga awit sa pagdayeg ngadto sa Dios alang sa ilang kaluwasan diha sa Zion. Usa niini nga mga kanta mao ang kinasingkasing nga pagkanta sa “Dali, Dali, Kamo mga Santos,” usa ka himno nga gisulat diha sa dalan sa pioneer nga nahimong awit sa hugot nga pagtuo ngadto niining unang mga Santos nga pioneer. Human niana, ang “Dali, Dali, Kamo mga Santos” nagpabiling usa ka paboritong himno, gani usa ka daygon sa Pasko, atol sa pioneer nga mga pagsaulog sa Pasko.10
Nagtuo ko nga ang mga hagit ni Mary sa daghang katuigan dunay nahimo sa pag-usab sa iyang kasingkasing. Daw mas klaro niyang nakita ang Pasko, uban sa bag-ong mga tradisyon sa Pasko ug bag-ong kanta diha sa iyang kasingkasing. Tinud-anay siyang nakapalambo og kasingkasing sa sakripisyo, nakasentro diha sa iyang paglaum ug gugma alang kang Jesukristo.
Ang panahon sa Pasko daw tukma nga panahon sa pagpamalandong kon unsa ka himsog ang atong mga kasingkasing sa espirituhanong paagi, ug busa motapos ko uban sa usa ka yanong sugyot nga makatabang kanato sa pag-monitor ug paglig-on sa atong espirituhanong mga kasingkasing: modapit ako sa matag usa kanato nga mopili sa pagbuhat og butang nga nagpahayag, sa dayag nga paagi, sa atong mga pagbati sulod kanato mahitungod sa Manluluwas nga si Jesukristo isip gasa nga atong ihatag Kaniya niining tuiga.
Sama ni Mary Littleton, nagpundok kita karon isip matinud-anong mga sumusunod ni Jesukristo aron sa pagsimba Kaniya. Maminaw kita karon og maayo samtang ang choir moapil sa “choir sa mga anghel” sa usa ka matahum ug nagpangamay nga himno nga nagdapit sa “tanan kaninyo nga matinud-anon” nga “moduol ug motan-aw kaniya, natawo nga Hari sa mga anghel.” Bisan asa kita nagpuyo sa kalibutan, makahimo ang matag usa kanato sa “pag-adto, … malipayon ug madaugon … sa Bethlehem”—bisan sa atong kasingkasing lamang—sa pagsimba ug pagtahud Kaniya.11
Motanyag ko sa akong pagsaksi ni Jesukristo, ang Manluluwas sa kalibutan. Hinaut nga mahisulat ang Espiritu ni Kristo diha sa atong mga kasingkasing sa tibuok holiday nga panahon ug ngadto sa bag-ong tuig mao ang akong pag-ampo sa ngalan ni Jesukristo, amen.