Wan Grup blong Ol Enjel blong Tedei
Gudnaet ol dia brata mo sista blong mi. Mi filim blesing blong gat janis ia blong toktok long yufala tedei long naet taem yumi stap selebretem taem we i gat moa glori long hem long histri blong man—taem ia we Pikinini blong God i bin kam long wol ia. Taem ia we Kraes i bon, laef mo Atonmen blong Hem oli ol presen we Papa blong yumi long Heven i bin givim long yumi evriwan.
Taem yumi stap selebretem taem we Sevya i bon i kam, long glad taem ia long yia, lav blong God we i gohed mo i no gat en i stap blong blokem gud sol blong yumi, i helpem yumi blong tanem hat blong yumi long ol famli, fren mo neba blong yumi, mo stap helpem yumi blong save lisin moa long olgeta we oli filim se oli stap olgetawan, o oli nidim kamfot mo pis.
Oltaem mi bin filim gud se, taem hem i stap tokbaot ol taem we oli hapen raon long taem we Jisas i bon i kam, Gospel blong Luk i serem samfala eksampol blong kamfot mo pis we i go long olgeta we oli bin stap long ol situesen ia. Ol kaen eksampol olsem, yumi save luk taem Papa blong yumi long Heven i sendem ol enjel blong Hem oli kam visitim olgeta man blong lukaot long sipsip we oli bin stap olgetawan, long naet blong anaonsem taem we Pikinini blong Hem bae i bon, mo taem we ol man blong lukaot long sipsip oli bin go visitim Meri mo Josef, we tufala i stap lukaot long niubon bebi blong tufala longwe long hom blong tufala long Galili.
Longfala wokbaot blong Josef mo Meri, stat long Nasaret i go kasem Betlehem, blong oli rejista from takis, i no hapen nomo olsem; blong plante handred yia, ol profet bifo oli bin profesae se Sevya blong wol bae i bon long Betlehem, Taon ia blong Deved.1 Yumi luk se Papa blong yumi long Heven i bin save gud mo i bin stap long evri ditel raon long taem ia se Wan Stret Pikinini Ia Nomo blong Hem bae i bon i kam long wol. “Mo i bin hapen se, taem tufala i bin stap longwe, ol dei oli bin hapen se Meri i mas bonem bebi blong hem.”2
Taem mi tingting long situesen blong Ol Man blong Lukaot long Sipsip mo yangfala kapol ia, Meri mo Josef, mi stap askem miwan se, olsem wanem taem ia we ol enjel oli bin kamkamaot long ol man blong lukaot long sipsip long fil, mo taem we oli bin bin kamkamaot long Meri mo Josef, i mekem se, wanwan long olgeta i kasem kamfot, pis mo glad.
Long ol man blong lukaot long sipsip, ol enjel oli tekem kamfot ia we oli bin nidim, se God i save gud long olgeta mo i bin luk se oli impoten mekem se Hem i jusum olgeta blong kam ol fas witnes blong niubon Smol Sipsip ia blong God. Long Meri mo Josef, ol man blong lukaot long sipsip ia oli givim plante kamfot we tufala i bin nidim blong save se, ol narawan tu oli save long tabu merikel ia, we tufala i pat long hem3.
I tru, long medel blong yumi, i gat ol man blong lukaot long sipsip—ol man mo ol woman we oli wok had kasem let naet mo eli moning blong winim laef blong olgeta. Sam long ol man blong lukaot long sipsip tedei, i gat ol sekiuriti, ol wokman long hospital mo imejensi, ol stoa we oli open ful naet, mo ol wokman long ol fiul stesen, mo olgeta we oli wok long media. Samtaem, olgeta we oli wok long naet, oli filim se oli no pat long sosol laef wetem olgeta we oli wok long ol nomol aoa. Antap long hemia, i gat tu ol Josef mo Meri blong tedei we oli bin muvaot long homples blong olgeta, mo oli stap traem blong stretem olgeta folem wan niu laef, mo semtaem, oli stap selebretem ol impoten dei olsem Krismes, ol betdei, ol mared mo ol ded.
Taem yumi stap kam kolosap long Krismes, mi stap askem miwan sapos yumi save kam moa olsem ol enjel ia taem yumi go visitim ol man blong lukaot long sipsip tedei, blong givim gud nius ia abaot Kraes, pis mo kamfot. Mo mi stap askem miwan sapos yumi save kam moa olsem ol man blong lukaot long sipsip ia taem yumi ansa long singaot ia blong visitim mo givhan long ol Josef mo Meri blong tedei long ples we yumi slip long hem mo ol komuniti blong yumi, blong talem gud bakegen se God i lavem olgeta mo i stap wajem mo stap kea long olgeta.
Famli blong mi mo mi i bin kasem kamfot mo pis long plante long ol defren ples we wan grup blong ol enjel blong tedei i karem i kam long mifala. Long naet ia mi wantem serem wan ansa ia wetem yufala. Long 2003, mifala i bin muv aot long hom kantri blong mifala long Yuta. Long winta ia, mifala i bin gat wan bigfala strong win blong sno long Yuta, we i no bin hapen blong plante yia. Mifala i neva bin luk wan samting olsem long laef blong mifala, from mifala i groap long medel blong ol pamtri mo ol sanbij. Hom blong mifala i stap long wan kona long wan hil long Baontiful, we i gat wan longfala rod blong man i wokbaot long hem. Taem sno i stat, waef blong mi i gat strong paoa long tingting mo i stat blong bloem aot sno aot long ples blong draev mo wokbaot, from se mi bin glis long aes mo brekem bun blong han blong mi sam dei bifo, taem mi bin stap wokbaot long saed rod ia blong visitim wan long ol neba blong mifala. Aksiden ia, i mekem se oli katem mi mo oli putum bigfala simen raon long han blong mi blong 2 manis. Taem hem i bin stat blong karemaot sno long eria ia blong fas taem, dia waef blong mi i no bin save se hem i mas jenisim ples we sno bae i foldaon long hem i go long narasaed, afta we hem i klinim wan saed blong rod blong draev. Mekem se hem i go long nara saed blong klinim, mo long semmak saed ia nao sno i stap foldaon long hem bakegen. Hem i go mo kam, be nogat nao. !I mekem bigfala doti! From se hem i stap longtaem tumas long kolkol, hem i kasem soa long sora, mo hem i no save harem samting blong 2 manis. Long semtaem, boe blong mitufala we i gat 16 yia, i kasem kil long bak blong hem taem hem i bin stap ski, mo i mas stap long bed blong mekem se soa blong hem i kam oraet. Mekem se, hemia nao, wan i mas stap long bed, wan sora i fas, mo wan i stap long simen, mo evriwan i kolkol. Mi save se ol neba blong mifala i stap lukluk mifala. Wan long ol eli moning ia, samples long 5 klok moning, mi wekap from saon blong masin blong klinim sno aotsaed long windo blong mi. Mi lukluk i go aotsaed long windo blong mi mo mi luk krosem rod, se neba blong mi, Brata Blen Williams we i stap wok. Hem i gat ova 70 yia, mo hem i aot long wom naes hom blong hem mo kwaet nomo hem i kam mo klinim rod blong draev mo wokbaot blong mifala, from hem i save se mifala i no save mekem mifalawan. Mo semmak olsem we hem i kam long kwaet mo simpol wei, wan nara brata, Brata Daniel Almeita, i bin kamkamaot long hom blong mi blong draevem mi i go long Sol Lek blong mi wok, from se mi no save draev wetem han long simen. Wetem kaen fasin mo kwaet nomo, oli bin stap ia blong mi, evri moning, kasem taem we famli blong mi i kam oraet mo mifala i save mekem samting mifalawan bakegen. Long taem blong kolkol Krismes taem ia long 2003, ol enjel brata ia oli kam long mifala, semmak olsem ol givhan enjel ia oli bin go long ol man blong lukaot long sipsip long taem bifo. Tufala brata ia, oli bin folem eksampol blong Sevya mo tingting long nid blong mifala bifo oli bin tingting long nid blong olgeta bakegen.
Dia ol brata mo sista, laef blong Sevya i stret eksampol blong lav mo gudfala fasin long ol man. Hem i oltaem fogetem hem wan long ol narafala man. Ol kaen fasin i soem wanem we i mekem long evri dei laef mo i no stop long ol spesel taem blong Krismes. Taem yumi stap tanem hat blong yumi i go aot olsem Sevya i mekem, mi promesem yumi se bae yumi faenem stret mining ia blong Krismes. Taem yumi stap mekem olsem Sevya i mekem, mi promesem yumi se bae yumi faenem ol janis we i no gat en, blong yumi givim yumiwan kwaet mo wetem kaen fasin long ol pipol we oli nidim yumi. Hemia bae i helpem yumi blong kam blong save Sevya moa, mo faenem pis long wol mo gud nius i go long man; mo hemia bae i talemaot lav, pis mo niu paoa we yumi save filim mo serem wetem ol narawan. Taem yumi stap folem ol wokbaot blong Sevya, bae yumi lisin long saon blong ol sandel long leg mo yumi go from strong han blong Kapenta ia. Taem yumi stap lukaotem Sevya long evri samting we yumi stap mekem, Krismes bae i no wan dei o sesen blong spel nomo, be bae i wan fasin insaed long hat mo maen, glad ia mo lav ia we yumi filim long Krismes, bae i stap kolosap oltaem. Mi testifae se Jisas Kraes, niu bon bebi we i bon long Betlehem, i Sevya mo Ridima blong wol.
Meri Krismes i kam long yufala evriwan. Mi talem ol samting ia long nem blong Jisas Kraes, amen.