Maysa nga Agdama a Pangen dagiti Anghel
Naimbag a rabii, patpatgek a kakabsatko. Mariknak a nagasatak iti daytoy a gundaway a makapagsarita kadakayo ita a rabii bayat ti panangrambaktayo ti kadayagan a pasamak iti pakasaritaan ti tao—ti yaay ti Anak ti Dios ditoy lubong. Ti pannakayanak, biag, ken Pannubbot ni Cristo ti sagut ti Nailangatan nga Amatayo kadatayo amin.
Bayat ti panangrambaktayo ti pannakayanak ti Mangisalakan iti daytoy naragsak a panawen ti tawen, ti agtultuloy ken awan patinggana nga ayat ti Apo ket kas man la sumlep iti kararuatayo a nabusbuslon, a tumultulong kadatayo nga iturong ti puspusotayo kadagiti pamilia, gagayyem, ken kaarrubatayo, ken tulongannatayo nga agbalin nga ad-adda a managrikna kadagiti makarikna iti panagmaymaysa, ladingit, wenno dagiti makasapul iti liwliwa ken kappia.
Kanayon a maawis ti riknak nga, iti panangisaritana kadagiti pasamak a naipalikmut iti pannakayanak ni Jesus, ibinglay ti Ebanghelio ni Lucas dagiti adu a pagarigan ti liwliwa ken kappia a maipaay kadagiti nakasarak iti bagbagida nga adda kadagitoy a kasasaad. Makita dagiti kasta a pagarigan idi imbaon ti managayat a Nailangitan nga Amatayo dagiti anghelna a sumarungkar kadagiti nailasin nga agpaspastor iti rabii tapno ipakaammo ti pannakayanak ti Anakna, ken idi sinarungkaran dagiti agpaspastor da Maria ken Jose, a mangay-aywan iti maysa a kaipaspasngay a maladaga iti adayo a lugar manipud iti pagtaenganda iti Galilea.
Ti atiddog a panagdaliasat da Jose ken Maria manipud iti Nazaret agingga iti Bet lehem tapno mairehistro iti buis ket saan lang a nairanta, gapu ta iti adu a siglo, naipadto dagiti nagkauna a propeta a mayanakto ti Mangisalakan ti lubong iti Betlehem, ti Siudad ni David. .1 Makitatayo nga ammo unay ti Nailangitan nga Amatayo ken nairaman iti tunggal detalye a nailikmut iti pannakayanak ti Bugbugtong nga Anakna. “Masikog idi ni Maria, ket idi addada idiay Betlehem, dimteng ti oras a panagpasngayna.”2
Iti panangpanunotko ti kasasaad dagiti agpaspastor ken ti ubbing nga agassawa, da Maria ken Jose, diak masinunuo no kasano ti panagparang ti pangen a kasla anghel kadagiti agpaspastor iti kataltalonan ken ti panagsangpet dagiti agpaspastor iti yan da Maria ken Jose a nangted iti biagda iti liwliwa, kappia, ken ragsak.
Para kadagiti agpaspastor, mabalin a nakaisangbay dagiti anghel ti kasapulan a liwliwa nga ammo ti Dios a para kadakuada ken nakitana ti pategda kas dagiti napili nga immuna a saksi ti kayyanak a maladaga a Kordero ti Dios. Para kada Maria ken Jose, mabalin a nakaisangbay dagiti agpaspastor ti kasapulan unay a liwliwa nga ammo dagiti dadduma a pasetda ti nailangitan a milagro.3
Awan duadua, maibilangtayo kadagiti agdama nga agpaspastor—lallaki ken babbai nga agtartrabaho iti rabii ken iti nasapa ti bigat tapno agsapul para iti pagbiag. Karaman dagiti sumagmamano nga agdama nga agpaspastor dagiti security guard, hospital ken emergency personnel, dagiti empleado iti all-night convenience store ken gas-station, ken dagiti news broadcasting team. No dadduma, makarikna dagiti agtartrabaho iti night-shift ti pannakailasinda manipud iti a pannakilangen kadagiti gagangay nga agtarbtrabaho iti regular nga oras ti aldaw a panagtrabaho. Mainayon pay iti dayta, adda met dagiti agdama a Jose ken Maria nga immakar iti adayo manipud iti daga a nakayanakanda ken mangpadpadas a makibagay iti baro a biag bayat ti panangrambakda kadagiti napapateg nga aldaw kas iti Paskua, panagkasangay, panagkallaysa. ken ipapatay.
Ti umadani a panangpasangbaytayo iti Paskua, panagkunak makapagbalintayo a kas pangen dagiti anghel babaen ti panangsarungkar kadagiti agdama nga agpaspastor tapno mangipaay iti naimbag a damag maipapan ken ni Cristo, maipapan iti kappia ken liwliwa. Ken panagkunakmakapagbalintayo pay a kas kadagiti agpaspastor babaen iti panangawat ti awag a sumarungkar ken agminister kadagiti agdama a Jose ken Maria iti sangakarrubaan ken iti komunidadtayo tapno mangipaay ti pammatalged nga ay-ayaten ida ti Dios ken bambantayan ken ay-aywananna ida.
Nakapadasanmi a sangapamiliaan ti adu a nadumaduma a pasamak ti rikna a pannakaliwliwa ken kappia nga isangbay ti agdama a panawen a pangen dagiti anghel. Ita a rabii kayatko a lagipen ti maysa kadagita a pasamak. Idi 2003, immakarkami ditoy Utah manipud iti pagilian a pagtaenganmi. Iti dayta a tiempo ti lam-ek (winter), napadasanmi ti maysa kadagiti kapigsaan nga snowstorm a napasaran ti Utah iti adu a naglabas a tawen. Awan pulos ti naimatanganmi a kasta iti unos ti panagbiagmi, gapu ta dimmakkelkami iti kakaykaywan dagiti palma ken kadaratan nga igid ti baybay. Masarakan ti balaymi iti suli ti bassit a bantay ti Bountiful nga addaan iti atiddog a sidewalk. Idi mangrugin ti niebe, situtured ti asawak a nangdalus ti niebe iti driveway ken sidewalk gapu ta naipagalisak iti yolo ket nablo ti punguapunguak sumagmamano nga aldaw bayat ti pannagnak idi iti driveway tapno sumarungkar iti maysa kadagiti kaarrubami. Nagresulta dayta nga aksidente iti maysa nga operasion ket adda dakkel a nangbalkot (cast) ti imak iti uneg ti sumagmano a bulan. Iti panangirugina a mangdalus iti niebe iti lugar ti umuna a gundaway iti biagna, saan nga ammo ti patpatgek nga asawak a masapul a sukatanna ti direksion ti chute kalpasan a madalusan ti maysa a parte ti driveway. Isu nga, idi napan iti bangir a parte tapno dalusanna, isu met lang ti lugar a nakaiturongan ti chute ti niebe. Nagsublisubli isuna, ket saanna a nadalusan. Ania ketdin a wara! Gapu iti nabayag a panagyanna iti lamiis, naaddaan iti doble nga impeksion ti lapayagna ket dandani nagbalin a tuleng isuna iti dua a bulan. Kasta met ti sangapulo-ket-innem ti tawenna nga anakko a lalaki a nadunor ti likudna bayat ti panagpakuyasna ket masapul nga agid-idda tapno malaingan ti sugatna. Ket kastakami ngarud, maysa a saan a makabangon, maysa a tuleng, maysa a naikkan iti bedbed, ket malamlammin ti amin. Siguradoak a maysakami a buya para kadagiti kaarrubami. Iti maysa kadagidi nga agsapa, nakalamlamiis a bigat iti agarup alas singko ti bigat, nariingak ti uni ti snowblower iti ruar ti tawak. Kimmitaak iti ruar ti tawa ket nakitak ti kaarubak iti ballasiw ti kalsada, ni Brother Blaine Williams. Iti umadani a pitopulo nga edadna, pinanawanna ti naimeng ken komportable a pagtaenganna ket siuulimek nga immay a nangdalus ti driveway ken sidewalk, nga ammona a saanmi a kabaelan nga aramiden daytoy a dakdakami. Ken kas iti yaayna iti naulimek ken simple a wagasna, maysa pay a gayyem, ni Brother Daniel Almeida, ti immay iti pagtaenganmi tapno itulnognak iti trabahok iti Salt Lake, gapu ta saannak a makapagmaneho nga addaan iti kasta unay dagsenna a naibedbed iti imak. Naayat ken siuulimek nga addada para kaniak iti kada bigat agingga a naimbagan ti pamiliak ken kabaelanmi manen ti agtrabaho a dakdakami. Bayat dayta a nalamiis a Paskua iti panawen ti 2003, dagitoy nga anghel a kakabsat a lallaki ti naipatulod kadakami, kas kadagiti ministering angels a naipatulod kadagiti napakumbaba nga agpaspastor idi un-unana. Sinurot dagitoy dua a kakabsat a lallaki ti pagwadan ti Mangisalakan ken pinanunotda nga immuna dagiti kasapulanmi sakbay a pinanunotda ti bukodda.
Patpatgek a kakabsat, ti biag ti Mangisalakan ti naan-anay a pagwadan ti ayat ken pagimbagan iti tattao. Kanayon a linipatna ti Bagina para iti dadduma. Naipeksa dagiti saan a managimbubukod nga aramidna ket naipakita iti amin a naaramidanna ti kada aldaw iti biagna ken saan a nalimitaran iti maysa lang a panawen wenno piesta opisial. Iti panangiturongtayo ti puspusotayo iti ruar kas ti inaramid ti Mangisalakan, ikarik a mapadasantayo a nasaysayaat ti kaipapanan ti Paskua. Ket no aramidentayo, maipatalgedko kadakayo a masarakantayto dagiti awan patinggana a gundaway tapno maitedtayo ti bagbagitayo a siuulimek ken siaayat kadagiti tao a makasapul kadatayo. Daytoyto ti makatulong kadatayo a mangammo a nasaysayaat ti Mangisalakan ken makitatayo iti bagbagitayo ti kappia ditoy daga ken talna kadagiti tattao, nga isunto, iti kaaduan, ti mangikeddeng iti ayat, kappia, ken napabaro a pigsa a mariknatayo ken maibinglay iti dadduma. Iti panangsurottayo kadagiti tugot ti Mangisalakan, kanayon a denggentayo koma ti uni ti paddakna ken gaw-atentayo dagiti natibker nga ima ti Allawagi. Bayat ti panangsapultayo iti Mangisalakan iti amin nga aramidentayo, saan to laeng a maysa nga aldaw wenno panawen ti Paskua ngem agbalinto a maysa a kasasaad ti puso ken panunot, ket ti ragsak ken ayat a marikna iti Paskua ket agbalinto a kanayon nga asideg. Paneknekak a ni Jesucristo, ti maladaga a nayanak idiay Betlehem, ket isu ti pudno a Mangisalakan ken Mannubbot ti lubong.
Naimbag a Paskuayo amin. Sawek dagitoy a banag iti nagan ni Jesucristo, amen.