Na Tadra Eso ni Bogi
Lotu ni Siganisucu ni Mataveiliutaki Taumada 2020
Sigatabu, 6 ni Tiseba, 2020
E a veivakacegui sara na ituvaki o ya me vaka e rawa ni vakarautaka mai na draki, ni toso mai na bogi ena itekivu ni vulaituibutubu. A makare sese na lomalagi, ni ra basika mai na kalokalo vaka yatini taumada, qai vaka‑drau mai, ka sa qai vaka‑udolu sara. Era kune vakacegu na ivakatawa ni sipi mai na ramase ni siga kei na wawale ni cakacaka ena yalodina. Na ka ga e matalia kina—ia, ka totoka sara—sai koya ena iyaloyalo ni vei delana drokadroka oqo ena dua na vale ni manumanu ka voleka ki na dua na koro, na nodrau mokota tu e rua na tamata na gonelailai ka davo koto, ka vica tiko kina na manumanu susu me vakadinadinataka na veika talei era sa raica.
Na lewetolu oqo, ka ratou a sega ni kunea e dua na itokani se dua me qaravi iratou ena tauni osodrigi o Peceliema, sai iratou o, matai, e dua na tina gone ka totoka a yacana o Meri (a rairai se qai yabaki tinivakacaca ke a dei tu na itovo vakavanua ni veisiga oya), ka a veilauti sara na nona yaloqaqa kei na vakabauta rogovaki me vaka e se bau volai ena ivolanikalou. iKarua, na watina a yacana o Josefa, a qase cake mai vua na watina gone ia, o koya ka mai na kena ivakamacala, rairai tagane bula kilikili duadua e vuravura me susuga cake e dua na gone dramidrami ka a sega ni luvena vakayago ia e dua ka, bulataki oti na bula, ka yaco me tamai Josefa vakayalo. iKatolu, ka talei duadua: na gonelailai me yacana ko Jisu, ka ologi tu ena isulusulu ena co mamaca savasava duadua ka rawa ni kumuna vata mai e dua na tama lomaleqa.
E dua dina na ivakamacala vagalui, dua na irairai sega ni kilai levu ni sa sucu e dua na gone ka sa kilai levu tu, ka sa levu na ka e volai baleti koya, ka sa levu sara na ka e namaki tu vua. E dina sara, na kilaka me baleta o cei kei na cava o Koya a tekivutaki ena vei matanitu mai lomalagi ni se bera ni se duae sucu mai! Me vaka ni Ulumatua nei Tamana1 ena vuravura ni yalo, sa lesi tu e kea o Koya me iVakabula ni vuravura,2 sa digitaki taumada me “Lami sa vakamatei mai na vakatekivu kei vuravura.”3 E muri, ia ni se bera tiko na Nona sucu, a yaco o Koya me Jiova cecere ni Veiyalayalati Makawa, ka vukei Noa me vakabula nona matavuvale ena gauna ni ualuvu4 ka raici Josefa me vakabula nona matavuvale ena gauna ni lauqa.5 Sai Koya na Jiova daunilewa ka okati na yacana me “Ko Veivakurabuitaki, Na Dau-ni-Vakasala, Na Kalou Qaqa, Na Tamada Tawacava, Na Ravouvou ni Sautu.”6 Sai Koya na Alifa kei na Omeka7 ena ituvatuva cecere ni loloma veivueti o koya ena yaco e muri me “vunautaka na irogorogo vinaka vei ira era sa yalomalumalumu; … vakabulai ira sa ramusu na yalodra, … vunautaka na veisereki vei ira na bobula, ka [dolava] na veisereki vei ira era tiko ena valeniveivesu.”8
Meda rawata oqo, o Koya ena sikaraka vakataucoko sara vakataki koya ga na ikeli‑ni‑waini ni veivueti, ka sega na itokani vakayago me na vukei Koya ka sega na itokani vakalomalagi ena rawata. Ena colati ni icolacola ni rarawa vakayago kece sara ena kauta mai kina o Koya na isolisoli tawa-kilai rawa ni veivakabulai ki na matavuvale kece sara ni kawatamata mai vei Atama ki na ivakataotioti kei vuravura. Ena taucoko ni Nona ilakolako, o Koya na “iVakatawa ni yalo[da],”9 “Na Bete Levu ni veika vakalomalagi,”10 ‘na ivurevure ni yalododonu kecega.”11 E gadrevi me sotavi na gagadre kei na itavi vakayago oqo. Ia e sega ena bogi nikua. E sega ena bogi oqo. Eke o koya a dua walega na gone dramidrami ena ligana e dua na tina ka lomani koya, ka yadravi mai vua e dua na tama yalomalua ka qaqa.
Era lako mai na ivakatawa ni sipi, ka vakatakilakilataki kina na itavi lolovira duadua vakayago kei na dravudravua duadua ni tamata kei na nodra cakacaka. Era qai lako malua mai na tui, na Tamata Vuku mai natuicake, ka vakatakilakilataki kina na cecere duadua ni rawaka vakayago kei na vutuniyau duadua ni tamata kei na nodra cakacaka. E cake sara—e cake dina sara—era sere mai na agilosi “Sa Nona na Kalou na vakarokoroko ena veiyasana ecake sara,”5e lewevuqa na kai lomalagi dina sara era vakacaucautaka na gone lailai sa qai yaco mai ki vuravura. E dina, ira na agilosi, era a makataka oti tu na salatu ki na valenimanumanu oqo ena vei senitiuri sa oti. Wale tiko ga oqo, a lako mai e dua na agilosi kivei Meri ena itukutuku kacivaki lagilagi vei koya ni ka sa digitaki kina me cakava kei o cei sa digitaki kina o koya me na yacova.13 A lako mai e dua na agilosi kivei Josefa ka vakayaloqaqataki koya me vakamautaka na goneyalewa oqo ka a veivakurabuitaki na nona sa tikobibi rawa tu, e dua na ivakaro ka a tacake me talairawarawa kusarawa kina o koya ena yalodina.14 Ni oti na vakasucu, a tukuna e dua na agilosi vei rau na veiwatini gone me rau—drotaka na nona vakamatei ira na tawacala o Eroti (o ira na gonelalai oya era imatai ni mate vaka Lotu Vakarisito ni Veiyalayalati Vou), ka qai tukuna tale e dua na agilosi vei rau na gauna me rau lesu mai kina mai Ijipita ia ka kakua ni tiko e Peceliema se Jerusalemi ia ka vakayawa sara ki Nasareci.15 Era kila cake vakamatata na agilosi e lomalagi mai vei ira e vuravura na ibalebale ni siganisucu oqo kei na ilesilesi ni gone oqo, me vaka “ni sa colata ko Koya na na noda rarawa; ka sa colata na rarawa ni lomada: … sa vakamavoataki ko koya ena vuku ni noda talaidredre: sa tau vua na cudruvi sa vu ni noda veivinakati tale; ia e na we ni kena kuita eda sa vakabulai kina.”16
Kivei au, e bibi me yaco na veika oqo ena bogi, na gauna e vakacegui kina na yago mai na oca, ka cavuti na masu, ni sa namaki na ivakatakila ka voleka sara mai o ira mai lomalagi. Vakadua ena veiyabaki, na bogi e gauna era sega ni dau via kabulu kina na gone me baleta na marau ka dau kacabote e lomadra ni ra kila tu ni sa mataka ni Siganisucu na siga tarava. Io, se a vakacava na dredre ni dua ga na siga, na noda tadra eso ni bogi e rawa ni cakava me dodonu na ka kece. Me vaka a vola o Elder Parley P. Pratt:
“Sa vakatakila mai na Kalou e vuqa na idusidusi bibi … ena tadra. … Ka sega ni taqiri na ivakatagi, ka toka malua na kawatamata ena vakanomodi, ka … veitalanoa kei na Kalou … na veigacagaca vakayalo, … [kei na] agilosi, ka vakataucokotaki na yalodra na tamata dodonu.”17
Ka sa mai vakakina na bogi talei koya, “na inuinui kei na taqaya”18 e sotavi ena tadra mai Peceliema.
Ena bogi oya ena lomalagi e Jutia
Na Kalokalo veivakurabuitaki a vakacilava yani ka rarama mai,
A tagane mataboko a vuki ni moce koto,
Ka qai tadra o koya ni sa matarai.
Ena bogi oya ni ra rogoca na sere na ivakatawa ni sipi
Ni agilosi mai lomalagi era lagasere voleka,
A tagane dudu ni vuki ena moce lutu,
Ka qai tadra o koya ni sa rogoca tu.
Ena bogi oya ena bai ni manumanu
Moce koto na Gone kei Tinana [sega na vosa],
A lokiloki ni vukica na yagona takelo,
Ka qai tadra o koya ni [rawa ni lako].
Ena bogi oya ki vua na Gone sucu-vou
Tacake na Meri dauloloma me vakatulou,
A vukavuka ni cata ia matadredredre ni moce,
Ka qai tadra o koya ni sa savasava.
Ena bogi oya ki na sucui Tinana
Na Tui lailai a maroroi vinaka,
A yalewa dautagane ni moce ena mamarau,
Ka qai tadra o koya ni sa savasava.
Ena bogi oya e vale‑ni‑manumanu ni davo koto
Na Vakatabui, a lako mai me veivakabulai,
A tagane ni yavala ena moce ni mate,
Ka tadra sa sega na ibulubulu.19
Au biuta vei kemuni, me noq ilomaloma ni Siganisucu, na tadra mai Peceliema. Au vakayacora oqo ena yaca ni gone ka cakava me yaco dina na veitadra oqori, ena yaca i Jisu Karisito, emeni.