Balaang mga Gasa
Ni Presidente Russell M. Nelson
Disyembre 6, 2020
Minahal kong mga kaigsoonan, usa kini ka talagsaong gabii. Ang atong mga espiritu nabayaw sa matahum nga musika ug mga mensahe. Si Sister Craven milukmay sa atong kasingkasing pinaagi sa iyang mga hunahuna sa langitnong paggakos ug sa mga habol sa kahupayan. Si Elder Nielson mitandog kanato samtang iyang giasoy ang kinabuhi sa iyang amahan, kansang katungdanan sa militar mihikaw kaniya sa Pasko sulod sa tulo ka sunod-sunod nga tuig. Si Elder Holland midasig kanato samtang nagtudlo mahitungod sa kinabuhi sa Manluluwas sa kalibutan.
Pahimuslan nako kini nga oportunidad sa pagpasalamat kaninyo sa inyong pagsanong sa akong bag-ong imbitasyon sa pagpabaha sa social media pinaagi sa mga pulong sa pasalamat sa atong daghang panalangin. Minilyon ang misanong. Ug mapasalamaton kaayo ko nga kamo nagpadayon sa pag-ampo kada adlaw ngadto sa atong Langitnong Amahan, sa pagpasalamat Kaniya sa Iyang giya, panalipod, inspirasyon, ug, labaw sa tanan, alang sa gasa nga Iyang Pinalangga nga Anak, si Jesukristo.
Ang Pasko nagpahinumdom og talagsaong mga handumanan. Usa ka tuig lang ang milabay, si Wendy ug ako adunay oportunidad nga makasaulog sa pasko kauban sa usa ka matahum nga gamayng bata nga babaye, si Claire Crosby, nga mikanta og maanindot nga awit sa Pasko. Akong ipaambit ang usa ka bahin sa among narekord nga nahimo alang sa “Light the World” nga inisyatibo.1
Sama sa gipahinumdom nato ni Elder Holland, sa tinuod, kanang bulahan nga gabii labaw na sa duha ka milenyum ang milabay mao ang gabii nga nahimong balaan tungod sa pagkahimugso sa Usa kinsa giordinahan nang daan nga modala og kalinaw niini nga yuta ug sa panagdait sa mga tawo.2 Si Jesukristo natawo aron mopanalangin sa tanang katawhan, kaniadto, karon, ug sa umaabot.
Gani kon kita manganta og “Silent Night [Mahilum nga Gabii],” nasayud kita nga ang kinabuhi sa Bata sa Betlehem wala magsugod didto, ni natapos kini sa Kalbaryo. Didto sa premortal nga kalibutan, si Jesus gidihogan sa Iyang Amahan nga mahimong Mesiyas, ang Kristo, ang Manluluwas ug Manunubos sa tanang katawhan. Giordinahan na Siyang daan nga moula alang kanato. “Gisamaran Siya tungod sa atong mga sala [ug] napangos siya tungod sa atong pagkadaotan”.3 Mianhi Siya aron sa paghimo sa pagka-imortal nga reyalidad ug sa kinabuhing dayon nga usa ka posibilidad alang sa tanan nga sukad nagpakabuhi.4
Kana nagpasabut nga kitang tanan mabanhaw—lakip niadtong inyong gimahal kinsa mibiya atol niining malisud nga tuig, ug kinsa nagpuyo na karon sa pikas habig sa tabil. Kini nagpasabut nga ang matag usa kanato makapadayon sa pag-uswag. Kini nagpasabut nga kita makalaom alang sa mas maayo nga mga butang nga moabut.
Nakahunahuna ba kamo ngano nga ang Ginoo mipili nga matawo diin Siya natawo? Mahimong matawo unta Siya bisan asa sa yuta. Apan siya mipili sa mao gayud nga dapit nga Iyang gihimong balaan.
Si Jesus natawo sa Betlehem. Kanang pulong sa Hebreohanon nga, bet lehem, nagpasabot nga “balay sa pan.” Pagkatukma gayud nga Siya, ang “pan sa kinabuhi,”5 maggikan sa “balay sa pan.”
Ang Iyang pagkahimugso nahitabo sa ubos nga mga sirkumstansya kauban sa mga hayop. Didto ang “Nating Karnero sa Dios”6 natawo sa panahon sa Pagpalabay kauban sa mga hayop nga giandam alang sa sakripisyo sa Pagpalabay. Ug moabot ang adlaw, Siya “sama sa nating karnero nga gidala ngadto sa ihawan.”7 Siya mao ang Nating Karnero ug ang Magbalantay sa Karnero.
Sa Iyang pagkahimugso kinsa gitawag nga ang “maayong magbalantay,”8 ang mga magbalantay sa karnero mao ang unang nakadawat sa pahibalo sa Iyang balaang pagkahimugso.9
Sa Iyang pagkahimugso kinsa gitawag nga “mahayag nga bituon sa kabuntagon,”10 usa ka bag-ong bituon ang nagpakita sa kalangitan.11
Sa Iyang pagkatawo kinsa mitawag sa Iyang Kaugalingon nga ang “kahayag sa kalibotan,”12 ang kangitngit nawala sa tibuok kalibotan isip usa ka timailhan sa Iyang balaang pagkahimugso.13
Si Jesus gibunyagan diha sa pinaka-ubos nga lanaw sa preskong tubig sa yuta, nagsimbolo sa gilawmon sa Iyang pagahimoon aron sa pagluwas kanato ug gikan niini Siya makabuntog sa tanan nga mga butang—usab, sa pagluwas kanato.14 Gikan sa Iyang ehemplo, siya mitudlo nga kita, usab, makabuntog sa giladmon sa atong indibidwal nga mga hagit—sa atong kasubo, kahuyang, ug mga kabalaka—aron mosangko sa gitas-on sa atong kaugalingon nga mahimayaong potensyal ug balaang kapalaran. Kining tanan posible pinaagi sa hiyas sa Iyang kalooy ug grasya.
Taliwala sa uga ug abugon nga kamingawan sa desyerto, ang Manluluwas mitudlo og mga leksyon nga masabtan lamang sa hingpit niadtong kinsa nasayud unsay bation, kon anaa sa tumang kauhaw.
Ngadto sa babaye sa atabay, si Jesus mitudlo:
“Ang tanan nga magainom niining tubiga pagauhawon pag-usab:
“Apan ang moinom sa tubig nga akong ihatag kaniya dili na gayod uhawon, kay ang tubig nga akong ihatag mahimo diha kaniya nga usa ka tuboran nga mohatag ug buhing tubig ug kinabuhing walay kataposan.”15
Kini nga kasulatan nagpahinumdom kanako sa akong usa ka makapalukmay nga kasinatian uban ni Elder Mark E. Petersen.16 Siya kaniadto sakop sa Korum sa Napulog Duha ka mga Apostoles, ug sa wala pa ako matawag ngadto niana nga korum, duna koy pribilehiyo sa pagkuyog kaniya ngadto sa Balaan nga Yuta nga mao ang iyang katapusan nga biyahe dinhi sa pagka-mortal.
Si Elder Petersen nag-antus pag-ayo sa kanser. Atol sa taas ug masakit nga gabii alang kaniya, naningkamot ko kutob sa akong mahimo sa paghupay kaniya. Nakita nako nga siya makakaon ug makainom og gamay ra kaayo. Sa sunod adlaw, nakaiskedyul siya nga mohatag og usa ka importante nga pakigpulong.
Miabut ang kabuntagon. Uban sa kaisug, si Elder Petersen miadto sa amihanang baybayon sa Dagat sa Galilea, diin ang dakong kongregasyon naghulat kaniya. Siya mipili nga motudlo gikan sa Wali sa Bungtod sa Manluluwas. Sa dihang gisulti ni Elder Petersen ang tudling, “Bulahan ang mga gigutom ug giuhaw sa pagkamatarung, kay sila pagabusgon,”17 mga luha milugmaw sa iyang mga mata. Gipadaplin niya ang iyang mubong mga sinulat, mitan-aw sa mga tawo, ug nangutana, “Nasayud ba kamo unsa gayud ang bation kon gutumon ug uhawon?” Nasayud ko nga nasayud gayud siya. Dayon siya mitudlo, “Kon kamo sa tinuod gayud gutumon ug uhawon sa pagkamatarung, nan kamo mamahimong mas sama ni Kristo.” Si Elder Petersen mao ang buhi nga ehemplo niana. Wala magdugay human niana, siya migradwar gikan niining mortal nga kinabuhi.18
Bisan kanus-a nga ako mamalandong sa kagutom ug kauhaw sa pagkamatarung, ako maghunahuna niining tinahud nga Apostol nga mihalad sa usa sa iyang katapusang mga sermon sa pagtudlo unsa gayud ang gipasabut sa giingon nga tinguhaon ang Ginoo nga si Jesukristo, nga gutumon ug uhawon sa pagkamatarung, aron mamahimong mas sama Kaniya.
Niining tuiga, si Sister Nelson ug ako sayo nga nagsugod sa among mga buluhaton sa Pasko tungod sa among gugma sa among pamilya. Sa sayo nga bahin sa Nobyembre, si Wendy mipahibalo nga kami andam na alang sa Pasko. Ang akong daling tubag, “O, maayo! Karon kita makatutok sa Manluluwas.”
Atol niining wala dahuma nga tuig, sa dihang ang matag tawo sa kalibutan sa tinuoray nag-antus sa mga epekto sa pandemya, walay laing mas importante nga atong mahimo niini nga Pasko kay sa pagpalig-on sa atong pagtutok sa Manluluwas ug sa gasa kon unsa gayud kaimportante ang Iyang kinabuhi sa matag usa kanato.
Ang atong mahigugmaong Langitnong Amahan “[nahigugma pag-ayo sa kalibotan] ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon.”19
Dayon ang Anak sa Dios misaad kanato nga “ang tanan nga buhi ug nagtuo kanako dili gayod mamatay.” 20 Dili ikasulti, dili matandi ang mga gasa gikan sa Amahan ug sa Anak!
Nagpasalamat ako sa Dios alang sa gasa nga Iyang Pinalanggang Anak. Ug ako magpasalamat sa atong Ginoo nga si Jesukristo alang sa Iyang dili matandi nga sakripisyo ug misyon. Sa Iyang una nga pag-anhi, si Jesus mianhi nga hapit wala mahibaloi. Apan sa Iyang Ikaduhang Pag-anhi, ang himaya sa Ginoo “ipadayag ug makakita niini ang tanang tawo.”21 Dayon Siya magmando isip “mao ang Ginoo sa kaginoohan ug hari sa kaharian.”22
Karon, isip usa ka gitugutan nga sulugoon sa Manluluwas, ako buot nga mohatag og panalangin sa matag usa kaninyo, minahal kong mga kaigsoonan. Hinaot nga kamo ug ang inyong mga pamilya mapanalanginan sa kalinaw, uban sa dugang nga abilidad sa pagpaminaw sa tingog sa Ginoo, ug sa pagdawat og pagpadayag uban sa milambo nga kapasidad sa pagbati kon unsa kamo ka mahal, ka pinangga sa atong Amahan ug sa Iyang Anak, ug andam sa paggiya sa tanan kinsa magtinguha Kanila. Akong idugang ang akong mga pulong sa mga pulong ni Moroni “ako modasig kanimo sa pagpangita niini nga Jesus diin ang mga propeta ug mga apostoles misulat, nga ang grasya sa Dios nga Amahan, ug usab ni Ginoong Jesukristo, ug sa Espiritu Santo, nga nagpamatuod kanila, mahimo unta nga mag-uban diha kaninyo sa kahangturan.”23 Alang niini ako nag-ampo, sa ngalan ni Jesukristo, amen.