“Ug Kamo Mahimong Masayod Usab Niini”
Debosyonal sa Pasko sa Unang Kapangulohan
Dominggo, Disyembre 5, 2021
Akong minahal nga kaigsoonan, ang Pasko sa akong panimalay sa pagkabata naimpluwensiyahan gayod sa mga tradisyon sa yutang natawhan sa akong mga ginikanan. Ang akong inahan milalin sa Estados Unidos gikan sa Sweden ug ang akong amahan gikan sa Finland. 1 Sa pagpangandam sa Pasko, gidayan-dayanan namo ang among Christmas tree og hinimo sa kamot nga mga dekorasyon, ug ang akong inahan nag-bake ug nag-bake ug nag-bake. Tingali, paryente siya sa Lola Lundgren ni Sister Craig. Ang among mga pagsaulog sa Bisperas sa Pasko nagsugod sa usa ka talagsaon nga pagpangaon nga adunay nagkalainlaing tradisyonal nga lamiang mga pagkaon nga giandam sa akong inahan—mga bolabola; champorado; ug daghang pan, mga cake, ug mga biskwit. Ang mga kalingawan sa Bisperas sa Pasko matapos sa pag-abot ni Jultomten—Santa Claus—kinsa nagdala og mga regalo alang sa tanang bata. Apan sa dili pa moabot si Jultomten, kanunay nga pundokon sa akong inahan ang akong igsoon nga lalaki, mga igsoong babaye, ug ako aron maminaw samtang basahon sa akong amahan ang istorya sa Pasko gikan sa Bag-ong Tugon.
Hilomon nga tawo ang akong amahan, usa ka tawo nga dili daghan og isulti gamit ang iyang lumad nga pinulongan ug sa Iningles nga iyang nakat-onan isip usa ka hamtong. Walay lipudlipod nga matinuoron gayod siya kanunay ug dili gayod madasigon sa pagdayeg. Dili gayod siya mahandurawon, ug wala gayod siyay daghang pakapin nga istorya. Sa Bisperas sa Pasko mibasa siya gikan sa Lucas 2. Gibasa niya ang mahitungod ni Jose ug Maria nga mibiyahe paingon sa Betlehem, ang pagpakita sa anghel ngadto sa mga magbalantay og karnero, ang pagkatawo ni Jesus, ug ang pagpamalandong ni Maria sa iyang kasingkasing sa tanang nahitabo. Apan ang akong amahan wala mihunong didto sa bersikulo 19; mipadayon siya sa istorya ni Maria ug Jose nga midala sa batang Jesus ngadto sa templo sa Jerusalem aron sa paghimo og halad agi og pagtuman sa Balaod ni Moises.
Gibasa sa akong amahan:
“Niining panahona may tawo nga nagpuyo sa Jerusalem nga ginganlag Simeon …
“Ug gipadayag kaniya sa Espiritu Santo nga dili siya mamatay hangtod nga makita niya ang Kristo nga gisaad sa Ginoo.
“Minandoan sa Espiritu, misulod si Simeon sa Templo. Sa gidala na ang bata nga si Jesus [ni Maria ug Jose] …
“Gikuha ug gikugos [siya] ni Simeon … ug nagpasalamat siya sa Dios:
“Karon, Ginoo, kay imo na mang gituman ang imong saad, itugot na nga ang imong sulugoon mopanaw nga malinawon.
“Kay sa kaugalingon kong mga mata nakita ko ang imong kaluwasan,
“Nga imong giandam atubangan sa tanang katawhan.” 2
Nianang tungora, kanunay nga mohunong ang akong amahan. Dayon ipaambit niya ang iyang pagpamatuod. Kanunay sa samang mubo nga paagi, siya mopahayag sa laing tonada nga Iningles, “Dili man ako makakugos nianang gamay nga batang Jesus sa akong mga bukton, apan nasayod ako, sama lang gayod nga si Simeon nasayod, nga kana nga bata mao ang Anak sa Dios, ang akong Manluluwas ug Manunubos. Siya tinuod, ug Siya buhi.” Human niini nga pamahayag, motan-aw siya sa matag usa kanamo sa iyang asul nga mga mata nga daw modulot ang tinan-awan ug mosulti uban sa usa ka lig-on nga pagtando, “Ug kamo mahimong masayod usab niini.”
Ang akong amahan ug inahan nasayod kon kinsa kana nga masuso didto sa Betlehem ug kon unsa ang Iyang tumanon sa pagdako. Kini nga kahibalo nakapausab kanila. Wala nila gitinguha nga motuo lang kami nga mga bata sa ilang mga pulong 3 apan nga kami mahimong masayod sa among mga kaugalingon aron mausab pod kami. Naaghat sa mga pagpamatuod sa akong mga ginikanan, misugod ako sa dalan sa pakigsaad uban sa usa ka tinguha nga “masayod usab niini.”
Sa dihang 11 anyos pa ko, ang among pamilya nagpuyo sa Göteborg, Sweden. Ang presidente sa misyon midapit sa tanang kabatan-onan sa pagbasa sa Basahon ni Mormon. Wala pa gayod unta ko naapil sa imbitasyon, apan ang akong igsoon nga lalaki usa ka deacon nianang higayona, ug gidawat niya ang hagit. Kanunay kong gusto nga mahimong sama sa akong igsoon nga lalaki ug mobuhat sa unsay iyang gibuhat, mao nga miapil ako. Ang akong mga ginikanan mihatag sa matag usa sa akong mga igsoon ug kanako og among kaugalingon nga hugpong sa mga kasulatan, ug nagsugod ako sa pagbasa kada gabii.
Pipila ka bulan ang milabay, si Presidente Gösta Malm, usa ka magtatambag sa kapangulohan sa misyon, 4 miawhag sa kabatan-onan nga nagbasa sa Basahon ni Mormon sa pagpangutana sa Dios sa katinuod niini. Mihukom ako nga buhaton gayod nako kana. Nianang gabhiona naghulat ko hangtod nga nakatulog na ang akong igsoon nga lalaki. Mibangon ako gikan sa higdaanan, miluhod sa bugnaw nga salog, ug misugod ako sa pag-ampo. Sa wala madugay nabati nako nga daw giingnan ko, “Ako nagsulti na nimo nga kini tinuod.” Ug tungod niana, usa ka dili mahulagway nga kalinaw ang miabot kanako. Nasayod ako sa akong kaugalingon pinaagi sa gahom sa Espiritu Santo nga ang Basahon ni Mormon tinuod. 5
Sama gayod sa gisaad diha sa Pasiuna sa Basahon ni Mormon, ako usab “[midangat] sa kamatuoran pinaagi sa [gahom sa Espiritu Santo] nga si Jesukristo mao ang Manluluwas sa kalib[o]tan, nga si Joseph Smith mao ang Iyang … propeta niining katap[o]san nga mga adlaw, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo nga sa makausa pa gitukod na usab dinhi sa yuta, pagpangandam sa ikaduha nga pag-anhi sa Mesiyas.” 6 Kana nga kahibalo, nga giubanan sa misunod nga mga saksi, miusab kanako, sama lang nga kini miusab sa akong mga ginikanan.
Kini nga kahibalo—nga si Jesukristo mao ang Anak sa Dios ug nga Siya gilansang alang sa mga sala sa kalibotan—usa ka espirituhanon nga gasa. 7 Kini nga gasa wala nakadepende sa usa ka piho nga katungdanan sa pagkapari ni sa usa ka piho nga sekso, hinuon, anaa kini alang sa tanan nga mosarang alang niini. Wala kita gihangyo nga dad-an ang Manluluwas og mga gasa sa bulawan, incienso, ug mirra aron mosarang alang niini nga matahom nga espirituhanon nga gasa. Gihangyo kita sa paghatag sa atong kaugalingon. 8 Ang propeta sa Basahon ni Mormon nga si Amaleki nangamuyo sa katawhan, nag-ingon, “Ug karon … ako manghina[o]t nga kamo kinahanglan moduol ngadto kang Kristo, kinsa mao ang Usa nga Balaan sa Israel, ug moambit sa iyang kaluwasan, ug [sa] gah[o]m sa iyang katubsanan. Oo, duol ngadto kaniya, ug ihalad ang inyong tibuok nga mga kalag ingon nga usa ka paghalad ngadto kaniya … ; ug ingon nga ang Ginoo buhi kamo maluwas.” 9
Samtang nagkatigulang ko, nakita nako ang akong mga ginikanan nga miserbisyo sa uban. Nakita nako sila nga mituman sa mga pakigsaad nga ilang gihimo sa Dios. Nakita nako sila nga makugihong mibuhat sa home ug visiting teaching, naningkamot sa pagpangalagad niadtong ilang giserbisyohan. Nakita nako sila nga misalmot sa mga ordinansa sa templo ug midawat og mga calling sa Simbahan. Ug sa matag tuig, sa Bisperas sa Pasko, ang akong amahan mipamatuod uban ni Simeon bahin sa Manluluwas nga si Jesukristo. Sa paglabay sa katuigan, ang akong amahan mipadangat sa iyang imbitasyon nga “masayod usab niini” ngadto sa mga umagad ug mga apo.
Mga dekada human sa akong kasinatian sa pagkabata uban sa Basahon ni Mormon, gitawag ako isip usa ka General Authority Seventy ug gisangonan nga mamulong sa kinatibuk-ang komperensiya. Ang akong mga igsoon nga babaye miseguro nga ang akong 92 anyos nga amahan makakita sa komperensiya—ug ilabi na sa akong pakigpulong. Human sa kinatibuk-ang komperensiya miadto ako sa iyang panimalay. Nangutana ko, “Pa, mitan-aw ka ba sa komperensiya?” Mitubag siya, “Ja [Oo].” Nangutana ko, “Nakadungog ka ba nako nga namulong?” Mitubag siya, “Ja [Oo].” Uban sa gamayng kapikal, misulti dayon ko, “Unya, Pa, unsay imong hunahuna?” Mitubag siya, “Ah, maayo ra man to. Hapit ko nagmapasigarbohon.”
Human sa taas nga higayon miingon siya, “Dale, duna koy kinahanglan nga isulti kanimo.” Nakaamgo dayon ko nga samtang nangita ko og pagdayeg, ang akong amahan adunay laing gihunahuna nga mas importante pa gayod kay sa paghatag og pagdayeg kanako. Mipadayon siya, “Kagabii aduna akoy damgo. Nagdamgo ko nga namatay ko, ug nakit-an nako ang Manluluwas. Gidawat ko Niya sa Iyang mga bukton ug gisultihan ko nga napasaylo na ang akong mga sala. Ug nindot kaayo ang pamati niini.” Mao ra kadto ang gisulti sa akong amahan. Apan ang iyang panagway daghan kaayo og gipamulong; nakaila siya ni Jesukristo. Nasayod siya nga ang masuso sa Betlehem, kinsa “mitubo … sa lawas ug sa kinaadman ug gikahimut-an siya sa Dios ug sa mga tawo,” 10 mao ang iyang kaluwasan, nga ang Anak sa Dios mitubo ug miula alang sa iyang mga sala. Ug dugay nang nasayod ang akong amahan niini sa wala pa kini nga damgo. Ang damgo usa lamang ka malumo nga kaluoy—usa ka gasa—gikan sa usa ka mahigugmaong Langitnong Amahan ngadto sa usa ka tigulang nga lalaki, kinsa namatay duha ka bulan ang milabay. Sa tanang gasa sa Pasko nga akong nadawat sukad, akong labing gimahal ang gasa sa pagpamatuod ug hugot nga pagtuo nga gipakita sa akong amahan ug inahan.
Niini nga Pasko, hangyoa ang inyong Langitnong Amahan alang sa espirituhanon nga gasa sa pagkahibalo sa buhi nga pagkatinuod sa Manluluwas sa kalibotan. Ang panahon sa Pasko usa ka matahom ug natural nga panahon sa pagtuon sa Iyang kinabuhi ug sa pagpaningkamot sa pagsunod sa Iyang kinaiya ug mga hiyas. Kon inyong buhaton, masayod kamo nga si Jesus mao ang Kristo, ang Anak sa Dios, ug nga Siya miula alang sa inyong mga sala. Kini nga kahibalo mas maayo ug mas molahutay kay sa bisan unsang gasa nga gidala ni Jultomten alang kaninyo, tungod kay kini makapausab kaninyo. Inyong makat-onan nga ang Manluluwas ganahan mopahiuli sa unsay dili ninyo mapahiuli, moalim sa mga samad nga dili ninyo maalim, moayo sa unsay dili maayo, moganti sa bisan unsa nga dili makiangayon nga inyong nasinati, ug permanenteng moayo bisan sa nasagmuyo nga mga kasingkasing.
Sama sa akong yutan-ong amahan, nasayod ako nga dili ako makakugos nianang gamay nga batang Jesus sa akong mga bukton, apan nasayod ako, sama lang gayod nga si Simeon nasayod, nga kana nga bata mao ang Anak sa Dios, ang akong Manluluwas ug inyong Manluluwas, akong Manunubos ug inyong Manunubos. Siya tinuod, ug Siya buhi. Ug kamo mahimong masayod usab niini. Sa ngalan ni Jesukristo, amen.