Laļ in En Wōnm̧aeik Kiin̄ eo An
2022 Nokon in Kūrijm̧ōj eo an Būreejtōnji eo Kein Kajuon
Jabōt, Tijem̧ba 4, 2022
Kōpeļļo̧k Buruōd n̄an Wōnm̧ae
Em̧m̧an ippa wāween an aeņōm̧m̧2an im okmāneen in al ko reim̧we kobrak jetōb ko ad.
Mere Kūrijm̧ōj!
Kar Tijem̧ba ilo 1943, im laļ in ekar jepooļ ilo Pata eo an Laļ in Kein Karuo. Aolep rekar inepata kōn ro rejitōnbōro ilo pārijet ko rettoļo̧k, im inepata ko ilo m̧ōko rekar kōn jāān im jabwe in m̧ōn̄ā. Kōn m̧weiuk ko an baam̧le me rekar lukkun kōjparoki, ekar kabwilōn̄lōn̄ n̄an jema, Harold Hillam, ilo tōre eo kar juon ļaddik ruatimjuon an iiō, ekar bōk juon menin letok an Kūrijmōj ekabwilōn̄lōn̄―juon set in tūrāin. Menin ekar jab jabdewōt tūrāin mo̧r; tūrāin in ej ettōr ilo iaļan tūrāin ilo an ejjeļo̧k ej bwilbwili. Ejjab aikuj bwilbwil. Epen ilo kalimjōk n̄an kain menin letok rōt in ekabwilōn̄lōn̄ n̄an erom̧ juon men em̧ool. O, eļap an kar Harold kaorōk tūrāin eo.
Jejjo allōn̄ tokālik, ke ekar epaaktok Kūrijm̧ōj, laļ in ekar ioone ta ko rekar waļo̧k ālikin tariņae eo. Jekdo̧o̧n jekjek ko ikkijeen jeram̧m̧an ko ilo St. Anthony bukwōn jidikdik, Idaho, ekar jab em̧m̧anļo̧k, im n̄an baam̧le eo an jema, ekar lukkuun nana ļo̧k wōt. Jemān Harold ekar lukkuun nan̄inmej, eiten epaak an kar jako. Eban kar lōn̄ an aolep menin letok ilo Kūrijm̧ōj eo—ekoba Harold im ļaddik eo jatin edik, Arnold.
Jejjo raan tokālik m̧okta jān Kūrijm̧ōj, jemān Harold ekar itok ippān im jidik wōt an kajjitōk, “Harold, kwom̧ōņōņō ke in leļo̧k tūrāin ne waam̧ n̄an Arnold bwe en maron̄ lōn̄ an menin letok ilo Kūrijm̧ōj ilo iiō?”
Ekar lukkuun jejjet an ron̄ ta eo jemān ekar ba? Tūrāin eo waan eaorōk? En̄in kar kajjitōk eo ilubwiljin aolep kajjitōk ko.
Ke ej jibbon̄ in Kūrijm̧ōj, im Arnold ekar elamōjmōj im lan̄lōn̄ ke ej bōk juon tūrāin ejjeļo̧k oktak jān eo an Harold.
Arnold ekar kile ke Harold ekar jako an ikkure kōn tūrāin eo waan. Āliktata, Arnold ekar kile ke menin letok eo an me elukkuun kaorōke ekar jab oktak jān tūrāin eo waan Harold—e kar tūrāin eo waan Harold! Ke Arnold ekar meļeļe aorōkin in menin letok eo, tūrāin eo ekar erom̧ juon men ejej wōņeen.
Ippa, bwebwenato in an baam̧le in make ej juon menin letok—im ejjab wōt kōnke ej kakeememej eō kōn jema eo ejitōnbōro im bratōr eo an ejitōnbōro. Eļapļo̧k an aorōk, ej kakeememej eō kōn kijejeto—kijejeto im iakwe eo an Eo Nejin Anij Ejitōnbōro–Eo me ļotak eo an jej kemeeme.
Jisōs Kraist ekar im ej ad menin letok eo ilo Kūrijm̧ōj jinointata im n̄an indeeo. Ij kam̧ool kōn m̧ool in: E ekar ļotak, E ekar mour im Ekar mej kōn kōj, im E ej mour―mour wōt!
Jejeram̧m̧an ilo ad erom̧ riwōnm̧ae ro an menin letok in ekam̧ōņōņō. Ilo naan ko ilo juon al in Kūrijm̧ōj eo em̧man tata ippa: “Lan̄lōn̄ n̄an laļ, Irooj ej itok, laļ en wōnm̧aeik Kiin̄ eo an!”1
Elder Neal A. Maxwell ekar katakin, “Ilo ad kalimjōk aolep men ko Anij ekar letok n̄an kōj, jej aikuj kar em̧m̧an ad wōnm̧ae, ak jejjab. Kōj jej watōk kōj make ke ebwe aolep men ippād im jej make lale kōj ekkā ad jaminene in bōk ak wōnm̧ae, barāinwōt epen. …
“[Em̧ool] menin letok ko an Anij, ejjab āinwōt menin letok ko an jijen ko, rej indeeo im jab maron̄ kakkure, ej kwaļo̧k juon Kūrijm̧ōj eo ej wōnm̧anļo̧k wōt im ejamin jem̧ļo̧k!2
Kōn menin, ewi wāween ad kar m̧ōņōņō in wōnm̧aeik kain menin letok eaiboojoj in? Ewi wāween ad kāālet menin letok eo an ad Rilo̧mo̧o̧r kajjojo raan, iakwe eo An, im pinmuur eo An ejjeļo̧k jem̧ļo̧kin?
Kōjekdo̧o̧n winto ko me repenjak kōn sno̧ im lole in kūrijm̧ōj ko rekōļar, im jen ekkatak jān eddo ko rej kōttāik kōj im juuj ko an riwōnm̧ae ro an nin̄nin̄ Rilo̧mo̧o̧r.
Wōnm̧aeik Kwojarjar eo An
Āinwōt an epaaktok ļotak eo an Rilo̧mo̧o̧r, Meri im Josep rekar pukōt iaļaer ilo iaļ kawaron̄ron̄ ko ilo Betleem, ak jikin ko an rūwamājet rekar obrak. Ekar ke ejjeļo̧k juon ruum n̄an er? Naaj ejjeļo̧k juon ej leļo̧k aer iien kakkije? Meri ekar jeļā bwe menin letok eo ekar ineeke, ak ejjeļo̧k juon elōn̄ an ruum̧ n̄an likūti, n̄an wōnm̧aeik E.
Jemaron̄ jab lukkuun jeļā ta eo Meri im Josep rekar en̄jake ilo iien eo, ak ikar pijaiki ļo̧k aer em̧m̧akūt kōn kajoor im peran. Eo̧ron̄ kūr eo an enjeļ eo n̄an “jab mijak”4 im kiiō kōppopo n̄an ļotak eo an Jisōs, rekar maron̄ kōtļo̧k jabdewōt kōtmene ko n̄an jikin in ekoņ ijjeļo̧kin aer kajjieon̄ amņak ilo juon jikin eļur im ettā. Ak ta eo me en kar āinwōt juon jikin ededeļo̧k eban kar to an pād. Eban to Irooj enaaj kobrak jikin ko ejjeļo̧k kobbaer kōn kwojarjar.
Ilo Luk 2:7 ekkā ad riit, “Im e ej keotak m̧aanjien, im kirboke, im kōbabu E ilo menjer; bwe ejeļo̧k jikier ilo im̧ōn ruwamāejet.”
Ad Rilo̧mo̧o̧r—menin letok eo aibojooj an mour, kōjatdikdik, im kallim̧ur, em̧ōj an itok n̄an laļ.
Jemaron̄ ke kōpooj ruum̧ ilo buruōd n̄an wōnm̧aeik Kraist im kōtļo̧k kwojarjar eo An n̄an kobrak jikin ko me ejjeļo̧k kobban? Āinwōt Meri im Josep, jemaron̄ lōke E im barāinwōt ilubwiljin jet iaan jekjek ko me reppen. Tōl eo—barāinwōt menin bwilōn̄ ko—me ej itok ilo mour ko ad enaaj bolen jab pād ilo lipjerjer im jeparujruj, jab ilo stage ko ak ilo stadium ko, ak ilo jikin ko relur ijo jej jokwe im jerbal ie―ijo jej ilo̧k n̄an e n̄an kappok jipan̄. Jabdewōt joko aikuj ko ad rej waļo̧k, jemaron̄ im jenaaj bōk uwaak ko n̄an jar ko ad rettino.
Eo̧ron̄ Kūr eo An n̄an Jerbal
Ekabwilōn̄lōn̄ ke bwe jet iaan ri wōnm̧ae ro jinoin tata an lam̧ an Anij eo rekar rilale sip ro?
Ekar marok laļ in ke rilale sip ro me eļo̧kjeņaer rekar koba ippān doon ium̧win juon meram emeram ke lan̄ im laļ rekar koba ilo ļotak eo an Rilo̧mo̧o̧r.
“Im enjeļ eo ear ba n̄an er, jab lōļn̄o̧n̄, bwe lo, Ij bōkwōj n̄an kom̧ naan ko rem̧m̧an. …
“Bwe rainin e ļotak ñan kom̧ ilo jikin kweiļo̧k an Devid, Rilo̧mo̧o̧r, E Kraist Irooj.”4
Em̧m̧an ippam ke rilale sip rein retiljek rekar jab karūm̧ūjļo̧k aer wōnm̧ae ak rekar kōm̧ōkaj aer ioon Kiin̄ eo aer. Jān er, jej ekkatak bwe wōnm̧ae ej juon naan jej kōm̧m̧ane. Luk ej ba n̄an kōj bwe rilale sip ro “rej jarōbtok im lo … niñniñ eo ej babu ilo menjer.”5
Elōn̄ iien ko, im̧we ko relur im reddik jān Irooj jemaron̄ jab wōnm̧ae kōnke rejjab erreo im jejjet ilo kaļanta ko ad, karōk ko ad, im iien ko ad. Bwebwenato in Kūrijm̧ōj ej kakeememej kōj n̄an erom̧ āinwōt rilale sip rein ro me rekar jab karūm̧ūj aer kōm̧m̧ane ta eo rej aikuj kar kōm̧m̧ane n̄an wōnm̧ae Kiin̄ eo aer.
Kiiō, kwoj ke loe ke Luk ekar kobaik bwebwenato ko an Kūrijm̧ōj juon im̧we eo ekam̧ōņōņō bwe wōnm̧aeik E ej kwaļo̧k E, ej kōmeļeļeik, “Im ke em̧ōj aer loe [Jisōs], rej kabun̄bun̄ļo̧k naan eo eaar waļo̧k n̄an er kōn nin̄nin̄ eo”?6 Rilale sip rein rekar bōk ennaan in jān lan̄ rekar ekairiir, im kajju ālkin wōt rekar erom̧ ribokto boktak ennaan jān lan̄, kean̄ aer “lan̄lōn̄ n̄an lan̄,” im karuwaineneik aolep n̄an “wōnm̧aeik Kiin̄ [eo aer]!”7
Wōnm̧ae kōn Tōmak eo Eniknik
Kiiō jen leļo̧k ad n̄an Em̧m̧aan Rikanpil ro. Rekar jeņoļo̧k ilubwiljin rikappukot ro rem̧m̧an tata an Jisōs Kraist. Rekar tiljek ilo aer leļo̧k mour ko aer kattar ennaan ko jān lan̄, im ekar itok, rekar em̧akūt im ilo̧k jān jikin ko ekar koņ aer pād ie, jerbal ko, baam̧le ko, im ro m̧ōttad n̄an ļoor iju eo im kappukot Kiin̄ eo aer.
Ejjab āinwōt rilale sip ro’, iaļ ko aer ekar juon iaļ ej wōnm̧aanļo̧k wōt me ebōk iien. Rekar kappukot, kajjitōk, kattar, im ilo̧k, innem bar kōm̧m̧ane, m̧ae āliktata rekar loe ajri jidikdik ippān Meri, eo Jinen. Rej leļo̧k menin leļo̧k ko me rekar lukkuun aorōk im bukwelōlō im kar kabun̄jar n̄an E.8
Ekkā aō kejokļo̧kjeņ: Ilo ad wōnm̧aeik Kraist, jej ke lukkuun tiljek ilo ad kappukot E innem kōtļo̧k E n̄an tōl iaļ ko ad n̄an jikin ko im armej ro jejjab jeļā kajjier? Ewi wāween ad maron̄ kwaļo̧k kam̧m̧oolol ko ad kōn menin letok im kabun̄ jar ko jej leļo̧k im kōm̧m̧ani?
Ejeraaṃṃan Ro Rej Kōm̧m̧an Aenōṃṃan
Kōn menin, en̄in ej—bwebwenato in Kūrijm̧ōj eo ekabwilōn̄lōn̄.
Ro m̧ōtta jitōnbōro, ejeram̧m̧an ro riwōnm̧ae. Āinwōt an aorōk menin letok tūrāin eo an jema im menin letok ko kōn iien im men ko raorōk kar kōm̧m̧an jān baam̧le ko aolep jikin, menin letok ko rejabwe aer aorōk ilo keidi n̄an bōk ak wōnm̧ae menin letok eo em̧ool an Kūrijm̧ōj—eo me ej Jisōs Kraist.
“Bwe ta em̧m̧an eo n̄an juon armej eļan̄n̄e mennin leļo̧k eo likūti ioon, im e ej jab bōk mennin leļo̧k eo?”9
Ļōmņak kōn jeje ko rekwojarjar n̄an kōmeram m̧ool indeeo: “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”10
Em̧m̧an ippa kallim̧ur eo me jabdewōt eo enaaj m̧ool ilo an wōnm̧ae menin letok eo an Kraist me kar letok ilo bon̄on eo ekwojarjar enaaj bōk mour indeeo!
Kōn menin jenaaj loe bwe kōn kijejeto ko ad aolep raan n̄an wōnm̧ae Kraist ilo m̧ool, jenaaj erom̧ āinwōt Rikanaan ro ad, Būreejtōn Russell M. Nelson, ekar karuwaineneik: “armej ro rej maron̄, pojak, im erreeo n̄an bōk Irooj n̄e E enaaj bar ro̧o̧ļtok, armej eo em̧ōj an kālet Jisōs Kraist.”11
Eaiboojoj ilo ad pijaikļo̧k raan eo n̄e jenaaj aolep ippān doon im kean̄ bar juon alen, “Lan̄lōn̄ n̄an laļ, Irooj ej itok; Laļ in [im kajjojo im aolep kōj] wōnm̧aeik Kiin̄ eo an!”12 Ilo etan Jisōs Kraist, amen.