Mo e Amiotonu, o le Kerisimasi o Lona Uiga O Le A Lelei Mea Uma
Faigalotu o le Kerisimasi a le Au Peresitene Sili 2022
Aso Sa, 4 Tesema, 2022
Ou te faafetai ia Peresitene Nelson ma le Au Peresitene Sili mo le avanoa le laumaua e lauga ai i lenei po. Na faamanatu e lo matou aiga agaifanua o le Kerisimasi i lo matou lava atunuu ma i Farani, Siamani, ma Pasila. Po o fea lava tatou te ola ai, mo i tatou uma o e talitonu ma mulimuli ia Iesu Keriso, o se tasi o mea moni matagofie e tumau pea lava: tatou te olioli ona o Ia o Le sa valaauina mai le amataga, o Ia o le sa faatalitali i ai mo seneturi, o Ia o Le Toatasi na Fanaua e le Tama, na afio mai o Ia—i le taulotoaiga o taimi, i tulaga aupito maualalo—na afio mai ai o Ia. Ona na afio mai o Ia, o le faitau piliona o e sa ola ai i lenei lalolagi o le a toe ola ma mafai, pe afai latou te filifilia, e maua le ola e faavavau, o le meaalofa aupito silisili o meaalofa uma a le Atua.
I totonu o le tala matagofie o Lona soifua mai i le taimi o le Kerisimasi, e tele lesona e mafai ona tatou aoaoina mai ai.
O le lesona lenei ou te fia faasoa atu ia te outou i le po nei: O popolega ma lē mautonu uma, o faigata ma faalavelave e taumulimuli ia i tatou iinei i lo tatou olaga faitino, mo i latou o e amiotonu—o e faatuatua ma faalagolago i le Alii—e oo atu i le iuga, o le a lelei mea uma.
Mafaufau i faataitaiga matagofie nei.
O se fafine amiotonu e igoa ia Elisapeta ma lona toalua, o Sakaria, ua oo i o la tausaga ua matutua, sa faanoanoa ona sa lei faamanuiaina i la’ua i se fanau. Ae sa la faamaoni ma faalagolago i le Alii.
E ui e le o tusifaamaumauina e tusitusiga paia le mea atonu na lagonaina e Sakaria ma Elisapeta ma faapea atu le tasi i le isi, ua fesoasoani le tala faamusika o le Faaola o le Lalolagi tatou te manatunatu ai i mea atonu na i ai i o la’ua loto. Ua tautino atu e Sakaria ia Elisapeta: “E lei filifilia i ta’ua e maua ni fanau. Ae ta te faalagolago pea lava i le Alii. Ona la usuina ai lea o le: “O le a ou tuu atu i le Atua e faavavau, ae le faia lo’u loto. Afai e le o lea, o le tuu atu ia te Ia e faavavau, lona uiga ou te faatali se’i vaai. … Ou te … tuu ia te Ia e ta’i a’u … seia uma lo’u taimi, o’u aso, ma o’u tausaga.”1
Ona tupu lea o se vavega. Ua tusia i tusi paia e faapea, i le malumalu, sa faaali atu ai le agelu o Kaperielu ia Sakaria. Na folafola atu e le agelu: “O le a fanauina e Elisapeta se tama tane, e te faaigoa ia te ia o Ioane. … Na te … saunia foi se nuu e faatatauina mo le Alii.”2
Na tali atu Sakaria, “Ua ou toeaina, o la’u ava foi ua loomatua ia .”3
Sa tali atu Kaperielu, “Ona ua e le talitonu mai i a’u upu,” “o le a gūgū oe, e te le magagana seia oo i le aso e fai ai nei mea.”4
Mafaufau i lagona atonu e oo ia Elisapeta ma Sakaria. Mo le tele o tausaga sa la tatalo ai mo se fanau, ae sa leai ma se tasi. Sa ia faaauau pea ona tausia poloaiga ma faalagolago i le Alii. Ona, faaali lea o se agelu ia Sakaria, peitai ina ua mavae, sa le mafai ona gagana o ia. Atonu na taumanatunatu o ia i lona tulaga i luma o le Alii. Peitai i le taimi e tatau ai, sa fanau mai le pepe. Sa toe mafai ona tautala Sakaria. Ma na oo ina avea le pepe ma Ioane le perofeta, o le sa saunia le ala mo le Faaola. Faatasi ai ma lē mautonu ma faigata uma, mo ē amiotonu, i le i’uga, e lelei mea uma.
Na sosoo ai, i le tala o le Kerisimasi, tatou te fetaia’i ai ma Maria le pele, na filifilia e avea ma tina o le Alo o le Atua. Ae, e i ai se popolega ma lē mautonu i lona soifuaga. Sa faaali atu Kaperielu ia Maria, ma ta’u atu ia te ia e uiga i lona valaauga paia. Sa fesili atu Maria, “A faapefea le mea nei, auā ou te lei iloa se tane?”5 Na faamalamalama atu e Kaperielu e faapea, o le mana o le Agaga Paia o le a oo ifo i ona luga, ma o le a faamalumalu i ona luga, o le a to foi o ia ma fanauina le Alo o le Atua, ma o le a faaigoa ia te ia o Iesu.
Mafaufau i le olioli ma le fiafia atonu na ia lagonaina i le asiasia o ia e se agelu a le Atua. Oka se faamaualaloina a o ia manatunatu i le avea ma tina o le Mesia ua loa ona faatalitali i ai. Ae peitai, ina ua faamatala atu ia Iosefa, sa le’i to’alelei ai mea uma. O Iosefa o se alii amiotonu ma sa le’i manao e faamaasiasia Maria, ae sa le’i mautinoa e ia po o le fea le ala sa’o e mulimuli ai. I ona mafatiaga ma le le mautonu, sa faaali atu se agelu ia te ia i se miti” “Iosefa e, … aua e te fefe ina aumai ia te oe Maria lau ava: aua o lana to e mai le Agaga Paia lea. E fanau mai e ia lana tama tane, e te faaigoa foi ia te ia o Iesu: aua e faaola e ia lona nuu ai a latou agasala.”6
O le mea moni e mafai ona tatou malamalama i le mafatia ma le le mautonu o Maria, i le tau mafaufau pe mafai faapefea ona tupu lenei faamanuiaga ofoofogia. O Iosefa foi ia, sa popole foi ma lē to’a. Ae o lea ua manino nei e tatau ona la uia faatasi lenei ala. Atonu ai se fiafia o Maria ina ua iloa sa faaali se agelu ia Iosefa. Atonu foi ai sa fiafia Iosefa ina ua iloa o le finagalo lea o le Atua. Faatasi ai ma le lē mautonu ma faigata uma, mo ē amiotonu, i le i’uga, e lelei mea uma.
Peitai e pei ona tatou iloa, sa i luma pea faigata; e i ai pea lava. Ina ua lata mai le taimi e fanau ai Maria, sa manaomia e tagata Roma ona toe foi atu Iosefa i le aai o Peteleema. Sa tonu ia Maria ma Iosefa o le a la o faatasi. Tatou te fiafia uma lava i le tala o le Kerisimasi. Ina ua taunuu i Peteleema, sa leai se avanoa i le fale e tali ai malo. Ai lava sa matuai popole Iosefa. Faamata e faapefea? Pe ua tatau ea i se a e Maria, o lē na filifilia mai fafine uma, ona fanauina le Alo o le Silisiliese i le faatauvaa o se falepovi? Mata o le a aunoa ma ni faaletonu po o ni faigata le soifua mai?
Atonu sa foliga o se mea e matuai faate’ia ai, matua’i le amiotonu. Ae na fanau mai le pepe; sa soifua manuia o Ia. E pei ona faamatala i le pese o le Kerisimasi, “I se faatanoa vao, e le o se moega, sa tofa ai le pepe paia o Iesu.”7
A o le’i ao, sa faaali se agelu i leoleo mamoe i le vao e aumaia le talalelei e olioli tele ai. Sa pepese foi agelu, “O le viiga i le Atua i mea aupitoaluga, ma le manuia i le lalolagi, o le finagalo alofa i tagata.”8
Sa o leoleo mamoe i Peteleema e sue ai le pepe o Iesu. Ma ina ua latou maua le tamaitiiti o Keriso, ‘ai se mafanafana ma se toefaamautinoa atonu na lagonaina e Iosefa ma Maria ina ua la iloa sa i ai se faamoemoega i faigata sa siomia ai i la’ua. Sa folafola atu e agelu Lona afio mai ma Lana misiona malualii. I le mae’a ai o tauiviga ma le le mautonu, mo ē amiotonu, i le i’uga, e lelei mea uma.
I le lalolagi fou, o faalavelave, o lē mautonu, ma popolega sa i ai foi i e amiotonu. Sa valoia e le perofeta o Samuelu e faapea, o le a soifua mai le Faaola i le lima tausaga i le lumanai, ma o le a i ai se faailoga o le po atoa e aunoa ma se pouliuli. Ina ua lata mai le aso, o se mea sa foliga e le mafai ae ua tupu. “Sa i ai se aso sa taupoina e e sa le talitonu [o e sa fai mai ua te’a le taimi,] e fasiotia ai i latou uma sa talitonu [faapea o le a oo mai ai le Faaola] vagana ai ua taunuu le faailoga.”9 Sa tauemuina e sa le talitonu e i latou sa talitonu, “Ua le aoga lo outou olioli ma lo outou faatuatua i lenei mea.”10 Manatu faalemafaufau i le le manofonofo lelei ma le popole o e amiotonu. Fai mai le mau ona alu lea o Nifae “ma ifo toele, ma ua matua alaga atu i lona Atua ona o lona nuu.”11 Ma a o tatalo Nifae, “sa oo mai le siufofoga o le Alii ia te ia ua fetalai mai: “Ina ea ia lou ulu ma ia olioli, aua faauta, ua oo mai lava le taimi, ma o le po nei o le a tuu atu ai le faailoga, ma o taeao ou te alu atu ai i le lalolagi.”12
Ua folafola mai e le mau, “sa oo ina faataunuuina upu ia na oo mai ia Nifae, … aua faauta, i le alu ifo i lalo o le la, sa leai se pogisa; [Ma] o tagata uma … sa latou ofo tele, sa oo ina latou pauu i le eleele. … [Ma] sa oo ina sa leai se pogisa i lena po atoa, ae sa malamalama e pei o le aoauli. Ma sa latou iloa o le aso lea o le a fanau mai ai le Alii.”13
Faatasi ai ma faigata uma ma le lē mautonu, mo e amiotonu—mo i latou o e faalagolago i le Atua—i le i’uga, pe i lenei olaga pe i le taimi tatou te tootutuli ai i Ona aao, o le a lelei mea uma.14
I le mafaufau ai e uiga i le taimi paia o le soifua mai o le Faaola, aisea o le a faatalitali ai le Alii seia oo i le toe po ona ta’u lea ia Nifae o le a fanau mai a taeao? Sa tatau ona Ia ta’uina ia te ia i vaiaso po o masina a o lumana’i ai. Aisea na Ia tuu ai Elisapeta ma Sakaria ia matutua e aunoa ma ni fanau a o lei faamautuina o le a fanau mai ia i la’ua le perofeta o Ioane? Aisea foi na manaomia ai e Maria ona tomanatu e uiga i le faamoemoe sa i ona luma, ma Iosefa e fesili i lona tulaga i le tala aupito sili o tala uma? Aisea na le mailoa ai le matafaioi a se falepovi ma leoleo mamoe ma agelu seia vagana ua tutupu nei mea?
I le muai olaga, na tautino mai ai e le Alii: “O le a tofotofoina i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”15 Ma mai le Faataoto: “Ia e faatuatua i le Alii ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”16
I o tatou taimi o le lē mautonu, i o tatou taimi o faalavelave ma faigata, i a tatou tauiviga, ia tatou faamaoni. Na soifua mai Iesu i lena po paia. O Ia o le Faaola o le lalolagi, o le Alii o le Filemu, o le Tupu o tupu. O loo soifua o Ia, ma “o tausaga o faamoemoe taulau ia te [Ia].”17 Ou te molimau atu a o tatou amiotonu, o o tatou loimata uma o le faanoanoa, faigata, ma le lē mautonu o le a taulau ma fai ia sa’o ia te Ia, le alo Pele o le Atua. “Le Lalolagi ia Fiafia, ua afio mai le Alii.”18 I le suafa o Iesu Keriso, amene.