14:6

Tala Lelei o le Olioli Tele

Faigalotu o le Kerisimasi a le Au Peresitene Sili 2022

Saunia e Peresitene Dallin H. Oaks

Fesoasoani Muamua i le Au Peresitene Sili

Aso Sa, 4 Tesema, 2022

Manuia le Kerisimasi! Faafetai atu ia i latou uma ua avea a latou savali ma musika ma le auaunaga e folafola atu ai “le tala lelei o le olioli tele” i lenei vaitau o le Kerisimasi.

E fiaselau o miliona o loo faailogaina le soifua mai o Iesu Keriso i lenei vaitau o le Kerisimasi. E ao lava ona faia e le lalolagi atoa. O Ia lava le soifua sa silisili ma o loo aupito sili na i ai.

I.

E oo lava i faaupuga faalelalolagi, o le soifua faaletino o Iesu le Nasareta na i ai se aafiaga sili atu i lenei lalolagi ma lona talafaasolopito nai lo isi lava na ola ai. Sa avea o Ia ma mataupu autu a perofeta ma tusisolo mo le faitau afe o tausaga. O faatufugaga aupito silisili ma musika o le lalolagi i sisifo na tuuto atu i le faamanatuina o le soifua mai ma le soifuaga ma le misiona a Iesu Keriso. Na faaaluina e le au faifilosofia ma tagata atamamai o latou olaga e suesue ai Ana aoaoga. O na aoaoga na musuia ai galuega e le mafaitaulia o le alofa mamā, faaaliga o le alofa mamā a’ia’i o Keriso.

E leai se tasi na tele atu ni maafaamanatu o Lona soifua ma aoaoga nai lo le Alii o Iesu Keriso. Ioe, o lea tulaga, e aofia ai falesa tetele ua soo ai laufanua o Europa ma le atu Amerika, o le tele lava na manaomia ai le silia ma se seneturi e fausia ai. E sili ona lata mai, O Le Ekalesia a Iesu Keriso o le Au Paia o Aso e Gata Ai ua 171 malumalu ua faapaiaina ma ua faagaoioia, ma le isi 129 ua toefuatai, ua faatoa fau, mamanu, pe ua faatoa fofogaina mai foi e Peresitene Russell M. Nelson i la tatou konafesi aoao ia Oketopa talu ai nei. Ua i ai nei maota o le Alii i konetineta uma ma i atunuu e 74 o le lalolagi. O iina tatou te tuuto atu ai o tatou ola e mulimuli ia Iesu Keriso.

E faitau miliona ua tuuina atu o latou soifua—ma, e sili atu ona taua, e faitau miliona ua mamanuina o latou olaga i le soifua o le Alii le Atua o Isaraelu, o Ieova, Iesu Keriso, lo tatou Faaola. E le’i soona lafoa e Peresitene Gordon B. Hinckley le manatu ina ua ia saunoa, “O Lana faataitaiga le mafaatusalia [o le] mana aupito silisili lea mo le lelei ma le filemu i le lalolagi uma.”¹

II.

Ua mafai ona tatou vaaia se faamoemoega ma se faatusa taua i le faasilasilaga paia o le soifua mai o le Alo e Toatasi na Fanaua e le Atua. Ua tatou aoao mai tala o le Feagaiga Fou e faapea, o le faasilasilaga mai o le soifua mai o le tama o Keriso i le lalolagi i sasae na faia i ni vaega eseese se tolu, e tofu ma uiga e matuā eseese lava. O i latou na mauaina le faasilasilaga faalelagi o le soifua mai, o ē matuai lotomaualalo lava, e matua’i paia, ma ē matua’i popoto foi.

O le faasilasilaga muamua na faia i leoleo mamoe i atumauga e lata i Peteleema. Sa folafola atu e se agelu ma se aufaipese a le lagi “tala lelei e olioli tele ai, le nuu uma … o se Faaola, o Keriso le Alii.”² Atonu na filifilia ia leoleo mamoe e maua nei tala lelei ona sa agamalu i latou ma lotomaualalo. O lea, sa iloga lo latou talitonu i le savali a le lagi, lea na latou faamaonia e ala i le asiasi atu i le pepa fou. Ona, ta’ua mai lea e le mau, “sa latou faailoa ai le upu na ta’ua mai ia te i latou i lea tama.”³ O la latou galuega o ni leoleo mamoe ma tamai mamoe sa latou tausia, na taufai faaalia ai faataitaiga na tuuina mai e le Faaola i Ana aoaoga. E le gata i lea, ina ua sau Iesu ia Ioane le Papatiso i le amataga o Lana galuega, na ta’utino mai e lena perofeta, “Faauta i le Tamai Mamoe a le Atua, na te aveesea le agasala a le lalolagi.”⁴

O le faasilasilaga lona lua o le soifua mai o le Mesia, o totonu o le malumalu i Ierusalema i tagata faigaluega paia e toalua, o o la’ua soifua faaleatua na faaagavaaiana ai i la’ua e maua le molimau a le Agaga Paia. Ina ua aumai e Maria ma Iosefa le pepe o Iesu i le malumalu mo le taulaga na faatonuina mo le ulumatua, na taufai molimauina e Simeona ma Ana o Ia lava o le Mesia. Ua tusia i le mau e faapea na si’i mai e Simeona le tamaitiiti ma faamanu atu i le Atua mo le faatagaina o ia e vaai i “lau faaolataga,” o se “malamalama e faamalamalamaina ai Nuuese, ma le mamalu o lou nuu o Isaraelu.” “I lea lava ituaso ua sau ai [Ana], o se perofeta fafine,” “ua faafetai atu i le Alii, ma tautala atu i a te ia i tagata uma lava, e na faatali atu i le togiola i Ierusalema.”⁵

Sa aoao e se vaega lona tolu e uiga i lenei soifua mai ofoofogia. O le Tusi Paia, e pei ona suia laitiiti lava e Iosefa Samita, o loo lipotia mai ai e faapea “na oo mai le au makoi mai sasae i Ierusalema, ma faapea, O fea le tamaitiiti ua fanau mai o le Mesia o tagata Iutaia? auā ua matou vaaia lona fetu i sasae, ua matou o mai ai e ifo atu ia te ia.”⁶

Mai la latou fesili ua ta’ua, e le mafai ai ona tatou masalosalo sa ta’ita’ia i latou e le Alii mo Ona faamoemoega paia. Ua aoao mai e le Tusi Paia e faapea “e le iloa e se tasi mea a le Atua, ae e ala i le Agaga o le Atua.”⁷ O nei au makoi e ese lo latou nuu ma le aganuu, o lea o se molimau ia i latou o se faamanatu na fanau mai le Mesia mo tagata uma. E le gata i lea, atonu foi na i ai se isi faamoemoega. O le tau o meaalofa na tauaaoina e le au makoi atonu na fesoasoani ia Maria ma Iosefa e faia la latou malaga faanatinati i Aikupito ma nonofo ai iina e faasaoina ai le tamaitiiti o Keriso ina ua faamata’uina Lona soifua e le poloaiga amioletonu a le Tupu o Herota.⁸

Pe le ma’eu ea le maoae o lena mea na tupu, le soifua mai o Keriso na faaalia na o e matuai lotomaualalo lava, e matuai paia, ma e matuai popoto foi? E pei ona sa aoao mai e Elder James E. Talmage i le Jesus the Christ, “E moni na faatuina e le Atua molimau mo Ia lava e fetaui ma ituaiga ma tulaga uma o tagata—o le molimau a agelu mo e matitiva ma maualalalo; o le molimau a le au makoi mo le tupu faasausili ma faitaulaga faamaualuluga o Iutaia.”⁹

O le manatuaina o Simeona ma Ana e mafai ona musuia ai i tatou ia faapei o i laua ma faaopoopo atu la tatou molimau i le fanau mai paia ma lona faamoemoega i lenei vaitau o le Kerisimasi.

III.

Mo i tatou, e leai se mea fou i le faamanatuina o le soifua mai o Keriso. Ua loa le savali ma ua masani ai. Sa aoao atu ia Atamu. Sa folafola atu i le fanauga a Isaraelu. Sa faaalia i ē na tupuga mai ia Tamā Liae. Ua faafia, ona folafola mai e perofeta upumoni tutotonu o aoaoga ma le Togiola a Iesu Keriso. Ua faafia, ona latou folafola mai o Lana misiona ma aoao mai Lana poloaiga ia fealofani fanau a le Atua ma auauna atu i le Atua ma le tasi i le isi. Ua fai soo foi i le talafaasolopito o le lalolagi, o nei folafolaga o le savali aupito taua lea i le faavavau atoa. Mo i latou o e mulimuli ia Keriso, o nei folafolaga e le tatau ona fesuia’ia. E tatau ona toefaafou i o tatou olaga taitoatasi.

O le Kerisimasi e fagua ai i tatou i se naunauga e faalautele atu i tatou lava i luga atu o o tatou noataga masani o le alofa ma le fefaauoa’i. O le folafolaga Faalelagi “o le manuia i le lalolagi, ma le finagalo alofa i tagata”¹⁰ e le’i faagataina ia i latou ua i ai o tatou lagona o le alofa ma le faamemelo. Ua faatonuina ai i tatou ia alolofa i uo faasamasamanoa, i tagata ese, e oo lava i e ita mai. O le Kerisimasi foi o se taimi o le faamagalo atu, o se taimi e faamalolo ai manu’a tuai ma toefuata’i ai sootaga ua faaletonu.

O le Kerisimasi o se taimi e faamuta ai le faasausili ma le fe’aina’i, e faamuta ai le faitio, e faataitai ai le onosai, ma tuuitiitia ai feeseesea’iga o tagata. E ao ona tatou tuu atu le faaaumea lotofaamaoni i tagata uma, i latou o lo tatou faatuatuaga ma i latou foi e le auai, tausiga o le poloaiga na poloaiina ai e le Atua ia Mose e tuu atu i le fanauga a Isaraelu:

“A aumau ia te oe se tagata ese i lo outou nuu, aua tou te faatiga ia te ia.

“O le tagata ese o loo aumau ia te outou, ia tusa lava ia ia te outou ma le tama a le eleele, e te alofa atu ia te ia e pei o oe lava ia te oe.”¹¹

O le Kerisimasi o se taimi e manatua ai o i tatou uma o fanau a se Tama i le Lagi o Le na ofoina mai Lona Alo e Toatasi na Fanaua ina ia togiolaina tagata uma mai le oti ma o Le sa ofoina mai faamanuiaga o le faaolataga ma le faaeaga i tagata uma i tuutuuga lava ia e tasi.

I le avea ai ma soo o Keriso, e tatau ona tatou aupito fefaauoa’i ma sili ona mafaufau i tagata uma i soo se mea. E tatau ona tatou aoao a tatou fanau ia agalelei ma amana’ia tagata uma. Ioe, e tatau ona tatou ‘aloese mai ituaiga mafutaga ma gaoioiga e fai ai ni fetuuna’iga o a tatou amioga pe faavaivaia ai lo tatou faatuatuaga ma le tapuaiga. Ae e le tatau ona taofia ai i tatou mai taumafaiga tuufaatasi ma tagata o faatauanauga uma—o e talitonu ma ē e le talitonu.

I ni nai tausaga talu ai, sa saunoa ai Peresitene Monson i upu nei:

“Sa saili e leoleo mamoe o anamua le tamaitiiti o Iesu. Ae ua tatou sailia Iesu o le Keriso, lo tatou Uso/Tuagane matua, o lo tatou Puluvaga i le Tama, o lo tatou Togiola, o le Tufuga o lo tatou faaolataga; o ia o le sa i ai ma le Tama i le amataga, o ia o le na tauaveina i ona lava luga agasala a le lalolagi ma sa matua naunau e maliu ina ia tatou ola e faavavau. O le Iesu lenei tatou te sailia.”¹²

Ua tulagaese le agavaa o le Au Paia o Aso e Gata Ai e faamanatu le savali faaola a Iesu Keriso i le tausaga atoa. Ua ia i tatou le meaalofa o le Agaga Paia, o lana misiona o le molimau mai lea i le Tama ma le Alo.¹³ O i tatou o fanau a se Tama i le Lagi o le sa ta’utino mai, “O laʼu galuega ma loʼu mamalu lenei—ia aumaia le tino ola pea ma le ola faavavau o le tagata.”¹⁴ Ma o perofeta a lo tatou Faaola, o Iesu Keriso, o le Alii le Atua o Isaraelu, ua folafola mai Lana talalelei:

“Na afio mai o ia i le lalolagi, o Iesu lava, e faasatauroina mo le lalolagi, ma tauave agasala a le lalolagi, ma faapaia le lalolagi, ma faamamā mai amioletonu uma;

“Ina ia mafai ona faaolaina e ala ia te ia i latou uma o e na tuu e le Tamā i lona mana ma faia e ia;

“O Lē na faamamaluina le Tama, ma faasaoina galuega uma a ona aao.”¹⁵

O le mea lea, i Lana Ekalesia toefuataiina tatou te tautino atu ai “e faaolaina tagata uma lava i le Togiola a Keriso, pe a tausia poloaiga ma sauniga o le Talalelei.”¹⁶ O lea ou te molimau atu ai i le suafa paia o Iesu Keriso, amene.