Ma sa Fetalai atu Iesu ia te i Latou: O A’u o le Areto o le Ola
O Se Afiafi ma Elder Gerrit W. Gong
Saunoaga i Faiaoga Faalelotu a le OAE • 17 Fepuari, 2017 • Tapeneko i Sate Leki
Uso e ma tuafafine pele, o se avanoa faapitoa le potopoto ai i lenei afiafi. Faafetai atu i le toatele o outou mo a outou feau agalelei o le alofa ma faamalosiauga. I lenei afiafi, a o tatou talanoa ai e uiga ia Keriso, olioli ia Keriso,1 aoao ia Keriso, ou te tatalo ina ia tatou faalatalata atili atu ma le migao ia te Ia.
Tagata o aiga ma taitoalua, o se faamamaluga le faatasi ai ma outou. Afai o le pelurale o le “spouse” o le “spice,” o le pelurale la o le “spouses” o le “spices.” O spouses [po o taitoalua] o spices [po o mea manogi ia] o o tatou olaga. Tou te vave ala i luga, tou te tuai ona momoe, ma tou te ola i le faatuatua i tulagaaao uma. Faafetai mo mea uma ua avea ai outou ma mea o outou faia.
O le tofiga e auai i se Afiafi ma se Pulega Aoao e oo ma ii se tusi e sainia e Peresitene Thomas S. Monson, Peresitene Henry B. Eyring, ma Peresitene Dieter F. Uchtdorf. Ou te lagonaina le alofa o le tatou Au Peresitene Sili, mo outou taitoatasi a o latou talosagaina le Alii ia faamanuia ma musuia a tatou taumafaiga i lenei afiafi.
Ina ua ou faato’a mauaina lenei tofiga, sa ou valaauliaina Elder Kim B. Clark ma Uso Chad Webb e aoao mai au e uiga ia te outou o a tatou faiaoga seminare ma inisitituti, faifeautalai, ma le aufaigaluega a le OAE i le lalolagi atoa.
Ua ou iloa e 45,731 faiaoga seminare ma inisitituti ua valaauina ma faifeautalai o loo faiaoga i atunuu e 133. E 34,527 outou o loo auauna atu i fafo atu o le Iunaite Setete; 11,204 outou o loo auauna atu i le Iunaite Setete. I se tuufaatasiga, o loo outou foai atua le 20,807,605 itula o auaunaga faaletalalelei i tausaga taitasi. Faafetai atu ia te outou!
Ua ou iloa e 2,878 le aufaigaluega a le Seminare ma Inisitituti o Mataupu Faalelotu o loo auauna atu i atunuu e 129. O le 1,849 o outou o loo galulue i le Iunaite Setete ma le 1,029 o outou i fafo atu o le Iunaite Setete. O loo outou auauna atu ma le faamaoni i atunuu i le faasologa moni mai le A (Alapania) i le Z (Zambia)—faatasi ai ma Botswana, Bulgaria, Hungary, Lithuania, ma Mozambique, ma isi i le va. Faafetai atu ia te outou!
O nisi o outou ua autausagā o faiaoga. Mo se faataitaiga, o Tuafafine Enid May, i British Columbia, sa faamaloloina talu ai nei i le mavae ai ona faiaoga i le seminare mo le 35 tausaga. Sa aoaoina e Tuafafine May le toa 9 o lana lava ia fanau e toa 10, toalua ana fanau a fanau, ma lana epikopo o loo i ai nei. Sa fai mai Tuafafine May sa tatalo lava ia lelei pea lana taavale i tausaga aoga taitasi. O le aso mulimuli lava na faiaoga ai Tuafafine May i le seminare, a o agai atu i totonu o lana auala taavale, sa iu ai loa ina leaga le kia o lana taavale.
O isi o outou lea faatoa amata ona faiaoga. Mo se faataitaiga, o Tuafafine Jang Dongran i Korea ma Tuafafine Johanna Mercader i Dominican Republic, na amata ona faiaoga i lenei tausaga i le mavae ai o le ono vaiaso talu ona avea ma tagata o le Ekalesia.
O Tuafafine Margaret Masai i Kenya sa amata faiaoga i le seminare i le na o ni nai vaiaso talu ona auai i le Ekalesia. Na fai mai ma le faamaulalo Tuafafine Masai o ana tamaiti aoga, e toatele na fananau i le Ekalesia, ua aoaoina o ia ma fesoasoani e fatua’i se faavae o le talalelei ua faamanuiaina ai ona tausaga e 17 o se faiaoga i le seminare.
Tou te aoao atu ma auauna atu i itulagi uma, i lalo o tulaga uma, ma tamaiti aoga mai talaaga uma, i vasega tetele ma laiti.
O Uso Benjamin Hadfield e faiaoga i North Pole, Alaska. Ma Tuafafine Lorena Tossen e faiaoga i Ushuaia, e latalata i Anetatika lea o loo i ai le South Pole.
I Aso Lulu i le Inisitituti o le Iunivesite o Sate Leki, e faiaoga ai Uso Jared Halverson i tamaiti aoga toeitiiti lava 400. Sa ou fesili ia Uso Halverson pe faapefea ona ia faia. Sa ia fai mai, “Ou te aoaoina le vaega atoa ae aapa atu i tagata taitoatasi, tasi le tesi i le taimi.”
I Polani, o Tuafafine Dagmara Martyniuk, o ia o se talavou nofofua matua, e ala po i luga e faigaluega i se fale taofalaoa, ona nofo lea pe a manava e faiaoga i le inisitituti.
O le vasega seminare a Tuafafine Myra Flores Aquilar i Honduras, e amata i le 5 i le vaveao. Ma o le vasega inisitituti a Uso Reuben Adrover i San Juan, Atenitina, e amata i le 10:00 i le po.
Tou te aoao foi ma pulea vasega amata ma tulagalua i Mekisiko, Kiripati, Fiti, Toga, ma Samoa.
Ona o outou, ua toatele ai talavou ma talavou matutua o loo faitauina tusitusiga paia ma upu a perofeta soifua nai lo se isi lava taimi muamua.
Ona o outou, ua toatele ai talavou o loo aoao ia maua le poto faaleagaga ma ni tali i a latou lava fesili e ala i le malamalama i aoaoga faavae.
Ma ona o outou, ua faalatalata atili mai ai e kosi o Maatulimanu i aoga ma inisitituti i le Ekalesia atoa ia tamaiti aoga ia Iesu Keriso, le Maatulimanu Autu.
E toe faapea atu, matou te faamemelo i tagata ua avea ai outou ma le auala o loo outou auauna atu ai. Po o fea lava o outou i ai, po o a lava tou tulaga, faafetai atu mo le faatasi mai i lenei afiafi ma ni loto matala ma mafaufau matala—pe toatasi, toalua, pe sili atu i Lona suafa.2
I se tasi taimi, i le mavae ai o se tofiga atofaina umi faatasi, sa matou sauni e tulaueleele i le malaevaalele i Sate Leki, faatasi ai ma se faamoemoega fiafia, sa faapea mai ai Peresitene Boyd K. Packer, “Gerrit, ua tuuina nei e lo’u toalua, o Donna, le falaoa i totonu o le ogaumu i le taimi nei a. O le a felesi le falaoa ma vevela i le taimi ou te taunuu ai i le fale.”
E mafai ona e vaai faalemafaufau pe manatuaina se falaoa manogi sasala? E mafai ona e sosogiina—le felesi ma le vevela? E mafai ona e tofoina—masalo e fai sina suamalie, fai sina oona?
O le falaoa [areto] o se meaai o aso uma i le lalolagi atoa. Ua taumamafa tagata o vaitausaga uma ma tulaga uma i le falaoa [areto]. Ioe, i la tatou vaega i le lalolagi atoa, e maua ai le falaoa [areto] i soo se tele, fuaitino uma, ma mea e gaosi ai, e oo lava i igoa eseese.
Masalo ona o tagata uma i soo se mea e malamalama ma faalagolago i le falaoa [areto], na tautino mai lo tatou Faaola: “O a’u o le areto o le ola.”3
I lenei lalolagi, i le lotolotoi ai o laau talatala ma laau lavelave, tatou te aai ai i le falaoa e ala i le afu o o tatou mata, e pei ona sa faia e Atamu ma Eva. O le faitalia moni e sau faatasi ma filifiliga moni. O le tuputupu ae faaleagaga e sau mai luitau moni. Ae e le tuua e le Faaola i tatou e na o fasilaau ma maa, o tapulaa ma le oge o le lalolagi tatou te vaai atu i ai. Ua faamanuiaina i tatou e lo tatou Faaola i le manai, le falaoa o le aso, Lana folafolaga o le faamanatuga, ina ia tatou maua le ola, faamoemoe, olioli, ma ia maua atili ai.4
Ua tautino mai lo tatou Alii:
“O Aʼu, o le Alii, na tosoina le lagi, ma fausia le lalolagi, o aʼu galuega-taulima lava; o mea uma ua i ai i totonu e a aʼu ia.
“Ma o lo’u faamoemoe o le faia lea o mea mo la’u au paia. …
“Aua ua tumu le lalolagi, ma ua lava ma totoe mea o i ai.”5
I ni isi upu, o Lona lalolagi e le o se lalolagi o fasilaau ma maa. O Lona lalolagi o se lalolagi o areto ma i’a.
Tou te manatua le auala na fafagaina ai e Iesu le motu o tagata i ni nai areto ma i’a? Se’i o tatou matamata i ai ma mafaufau e peisea’i sa tatou i ai iina.
[Video]
Iesu: “Faauta i le motu o tagata.”
Soo 1: “O le mea tuufua lenei, ua leva foi le aso. Ina e tuuina atu i latou ina ia latou o atu i aai, ma faatau ni a latou mea ai. Ua leai se mea ai.”
Iesu: “Avatu ia ni meaai ma latou.”
Soo 2: “Matou o la e faatau ni meaai e tusa ma tenari e lua selau, ma avatu ia i latou e aai ai?”
Iesu: “E fia ni tou areto?”
Soo 1: “E lima ma i’a e lua.”
Iesu: “Aumai ia te a’u. Vaevae tagata i vasega tailimagafulu, ina ia fagaina i latou. … Le Tama e, Le Alii o le lagi ma le lalolagi, ou te faafetai atu mo au faamanuiaga. Amene.”6
End of video
E fa tala o le Feagaiga Fou7 o loo faamatalaina ai le fafagaina e le Faaola o le motu o tagata e 5,000. E lua isi tala faaopoopo o le Feagaiga Fou8 i se isi taimi, sa fafagaina ai e le Faaola le motu o tagata e 4,000. O na motu o tagata e toatele e foliga mai na i ai ma tane, faatasi ma fafine ma tamaiti e faaopoopo i ai.9
O nisi taimi tatou te faapea ai o loo i ai ma le Atua i faamatalaga auiliili. Talu ai nei sa ou tuufaatasia ai auiliiliga faatusi paia o le fafagaina e lo tatou Faaola o le motu o tagata e 5,000 mai le Talalelei a Mataio, Mareko, Luka, ma Ioane, e aofia ai faamatalaga a le Tusi Paia, ma tuufaatasi i se tala faatusitusiga paia maoti se tasi.
E mafai ona outou valaauliaina le Agaga Paia ia tatala lo tatou malamalamaaga a o tatou suesueina tala faatusi paia ma mataupu faavae o le talalelei o loo maua i le faataitaiga a lo tatou Faaola?
O le matou tatalo, o le faateleina o le lotofaafetai mo le galuega a lo tatou Faaola o le a faalatalata atili atu ai i tatou, o tatou aiga, ma a tatou tamaiti aoga ia te Ia.
O le tatou fuaitau lea o le mau ua tuufaatasia:
“Ua potopoto mai le au aposetolo ia Iesu, ua latou talatala mai foi ia te ia i mea uma, o mea na latou faia, atoa mea na latou aoaoina.
“Ona fetalai atu lea o ia ia te i latou, Ina o mai ia, tau lava o i tatou, i se mea tuufua [o lona uiga o se nofoaga faalilolilo pe filemu], se’i tou mapu ae teisi; aua e toatele e na feoai ai ua le mafai ai i latou ona aai. …
“A ua vaai atu le motu o tagata ina ua latou o, e toatele foi ua iloa o ia; ona latou taufetuli atu ai lea mai aai uma, ua ui a uta, ua muamua ia te i latou; ua tolo’a’i mai ia te ia.
“Ua maliu atu Iesu, ua na silafia le motu o tagata e toatele, ona mutimuti vale ai lea o lona alofa ia te i latou, aua ua faapei o mamoe i latou e leai so latou leoleo.”10
“Ona talia lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina.”11
“Ua oo i le afiafi, ona o mai ai lea o ona soo ia te ia, ua faapea mai, O le mea tuufua lenei, ua leva foi le aso, ia e tuuina atu le motu o tagata ina ia latou o,”12 “ina ia latou o atu i faoa aai ma aai ua latalata mai, ma faatau ai ni a latou mea e ai; aua ua leai sa latou mea e aai ai.”13
“A ua fetalai atu Iesu ia te i latou, E le aoga ona latou o; ia outou avane ni mea latou te aai ai.”14
“Ona latou fai mai ai lea ia te ia, A matou o ea e faatau ni mea e ai e tusa ma tenari e lua selau, ma avatu ai ia te i latou e aai ai?”15
“Ona fai mai ai lea ia te ia o le tasi o ona soo, o Aneterea, o le uso o Simona Peteru,
“O loo iinei le tama o ia te ia areto karite e lima, ma nai i’a iti e lua lau; a e aumā ea ia mea ia i latou e toatele?”16
“Ua fetalai atu o ia, Aumaia iinei ia te au.”17
“Ona fetalai atu lea o ia ia te i latou, ia latou fai atu i tagata uma, ia taooto i latou i vasega i le mutia.”18“E tele foi le mutia i lea mea.”19“Ona taooto ai lea o i latou i vasega, e taitoaselau, ma taitoalimagafulu.”20
“Ona tago ai lea o ia i areto e lima gafua, ma i’a e lua lau, ua tepa ae i le lagi, ua faafetai, ma tofitofi,”21 “[ma ina ua uma ona ia faafetai, sa ia]”22 “avatu [areto] i le au soo, ona avatu ai lea e le au soo i le motu o tagata.”23 “Ma i’a foi e lua lau ua na tufatufa atu ai ia te i latou uma”24 “ua avatu faitalia i latou.”25
“Ona aai ai lea o i latou uma lava,”26 “ua maoona uma lava.”27
“Ua maoona lava i latou, ona fetalai ane lea o ia i ona soo ia faapotopoto toe ‘aiga, ne’i i ai ni mea e maumau.”28
“Ua latou fu’e foi toe’aiga”29 “ua tutumu ai ato e sefulu ma le lua i toe‘aiga o areto karite e lima”30 “atoa ma fasi i’a”31 “o mea ia na totoe i e na aai.”32
“O i latou foi na aai pe limagaafe o tane, a e lei faitaulia fafine ma tamaiti.”33
“[Ma ina ua] faamavae o ia [i tagata], ona maliu atu lea o ia i le mauga e tatalo.”34
“Ua iloa ia tagata le faailoga na faia e Iesu, ona faapea lea o i latou, E moni, o lea lava perofeta lenei, o lē maliu mai i le lalolagi.”35
O le a se mea na e matauina, pe lagonaina, pe aoaoina a o fafagaina e Iesu i tatou taitoatasi, ma i tatou uma, i areto e lima ma tamai i’a e lua? Sa pei ea areto o le manai, suamalie e pei o le coriander ma le meli?36 Ma sa faapefea ona fafagaina i tatou i i’a e lua—ma maoona ai tatou—uma?
O mea nei e iva ou te matauina ma lagonaina. Masalo e mafai ona latou fesoasoani ia tatou malamalama atili ai i lo tatou Faaola, faalatalata atili atu ai tatou ia te Ia, ma valaaulia ai tatou ia avea atili e faapei o Ia.
Autu 1:E uunaia lo tatou Faaola i le alofa mutimutivale.
O le tele o vavega a lo tatou Faaola e amata i Lona malamalamaaga ma le agaalofa. E silafia e Ia o tatou loto ma tulaga. E faatumulia o Ia i le alofa mutimutivale mo o tatou faamoemoega ma o tatou tiga, o tatou faanaunauga ma o tatou manaoga.
O se taimi tiga tele. Sa vavaeese le ao o Ioane le Papatiso, o lona ao sa aumai i totonu i luga o se apa mafolafola, le tautoga a se tupu salamo i le afafine siva a se tina lotofeai. Ua malaga ese atu lo tatou Faaola ma Ona soo i se nofoaga tuufua e malolo ai. Ae o le a se lagona o lo tatou Faaola ina ua silasila atu o Ia i le toatele o tagata? Sa “mutimuti vale ... lona alofa ia te i latou.”37 Na Ia taliaina i latou. Na Ia aoao i latou. Na Ia faamalolo i latou. Ma i se ala masani tele, na Ia silafia “ua leai sa latou mea e aai ai.”38
I Lana galuega atoa sa mutimutivale le alofa o lo tatou Faaola—alofa mutimutivale mo le lepela,39 alofa mutimutivale mo le atalii o se tagata sa uluitino e agaga leaga,40 alofa mutimutivale mo se tina ua oti lana tane sa oti lana tama e toatasi.41 Ua aoao i tatou e lo tatou Faaola ia faapei o le Samaria agalelei sa alofa mutimutivale i le tagata sa manua ma tuua a talioti.42
E faapena foi, le tama o le atalii faamaumau oa sa alofa mutimutivale ma tamoe atu i lona atalii “sa iloa mamao atu.”43 E mata’ina le talanoaina o le areto, ina ua “atamai’ le atalii faamaumau oa, sa ia faapea ane, “e le toatele ea o auauna a lo’u tama ua faulai a latou areto ua totoe.”44
E amata lava lo tatou Faaola i le alofa mutimutivale. Na te faamaea i le agalelei ma le alofatunoa.
Fai mai tala a faievagelia ina ua uma ona fafagaina e Iesu le motu o tagata, sa Ia “tuu atu i latou e o.” Ae ua faamanino mai e le vaefaamatalaga i le Mareko. Nai lo Lona “tuu atu [o] i latou e o,” o loo fai mai le vaefaamatalaga, na Ia “faatofa atu i tagata.”45 E le o mafai ea ona e faalogoina le faatofa atu o Iesu ma le alofa mutimutivale i tagata a o latou o ese atu ina ua uma ona fafagaina i latou?
Autu 2: Na amata lo tatou Faaola i mea na ia i latou.
I le finagalo ai e fafagaina le motu o tagata, na amata ai lo tatou Faaola i le fesili atu i Ona soo po o a ni mea o ia i latou. O Ia o Le Foafoa o le lalolagi, le Alii o le lagi ma le lalolagi, ae e amata lava o Ia i mea ua ia i latou, mai nofoaga o loo latou i ai.
“O loo iinei le tama o ia te ia areto karite e lima, ma nai i’a iti e lua lau.”46
E amata lo tatou Faaola i mea ua ia i latou: “Aumaia iinei ia te au.”47
O e tagai ea i lou lava tagata, i mea [e aoao atu ma,] po o ai foi e ao ona e aoaoina, ma tomanatu pe faamata ua lava ea mea ua ia te oe? Masalo, e tai pei o soo, tatou te tilotilo i nai a tatou ma tamai areto ma i’a ma maofa, “A e aumā ea ia mea ia i latou e toatele?”48
I le avea ai ma faiaoga, matou te valaaulia tamaiti aoga taitasi ia faisaofaga i le vasega. E ofo mai e nisi tamaiti aoga ni mea se tele atu, a o nisi e itiiti ifo. I le avea ai ma tagata aoao ma faiaoga (ma o tatou uma lava), tatou te amata i mea ua ia i tatou, i tagata ua tatou i ai nei. Ona Ia faalauteleina lea o i tatou ma faateleina a tatou taumafaiga. O le mataupu faavae o le tuputupu ae mai le mea o tatou i ai e atagia ai le upumoni i le Tusi a Mamona e faapea e faaolaina i tatou e ala i Lona alofa tunoa, “pe a uma mea uma e mafai ona tatou faia.”49
E soisoi o Ia pe a tatou aumaia mea ua ia i tatou ma o tatou ituaiga o tagata ma omai ia te Ia iinei.
Autu 3: E galue lo tatou Faaola i se aga faatulagaina lelei.
Sa i ai se taimi na utia ai oe i se motu o tagata e fetuleia’i ma feomia’i ma taufao mo se mea? Sa ou oo i ai. Sa le popole lava tagata o i luma i tagata o i tua. Sa ou fefe ina ne’i pa’u se tasi, ma latou solivaeina.
I se eseesega, “sa poloaiina [e lo tatou Faaola] i latou [o soo] ia fai atu i tagata uma ia taooto i latou i vasega.”50 O nei vaega sa faatulagaina “i vasega, i taitoaselau, ma ... taitoalimagafulu.”51
I le Ekalesia tatou te talanoa e uiga i se vasega a paionia. Tatou te talanoa e uiga i se vasega e tapuai i le malumalu. Ia i tatou, o le upu vasega (company) ua faailoa ai se vaega ua faatulagaina i se faamoemoega autasi e maualuga atu.
Ma, e ui e ta’ua o se nofoaga tuufua, ae sa lei faataootoina e le Alii le motu o tagata i luga o se palapala pefu. Sa Ia faataootoina ia vasega “i luga o le mutia.”52 Sa Ia filifilia se nofoaga sa “tele foi le mutia i lea mea.”53
Autu 4: E faailoa mai e lo tatou Faaola le lotofaafetai.
Sa Ia ave i areto ma i’a, ma “tepa a’e i le lagi, ua faafetai, ma tofitofi.54
O Le Foafoa o le lagi ma le lalolagi, le Tupu o tupu o Ia lava ua tuu atu le faafetai a o lei tofitofi e Ia le areto ma i’a ma faateleina mo i latou uma, “ua avatu faitalia i latou” i mea e ai.55
Autu 5: Na fafagaina e lo tatou Faaola le au soo ona tuu atu lea ia i latou e fafaga i le motu o tagata.
O le faatulagaga, ae e sili atu nai lo se faatulagaga. O le faamalosia lea o leoleo mamoe ina ia mafai ai e leoleo mamoe ona faamalosia ia mamoe. O le aoaoina lea o faiaoga ina ia mafai e faiaoga ona aoaoina ia tamaiti aoga. O se mamanu faalelagi i le Tusi Paia, i le Tusi a Mamona, ma i Lana Ekalesia toefuataiina: ma sa Ia “avatu i le au soo, ona avatu ai lea e le au soo i le motu o tagata.”56
O le meaalofa sili lea o foai atu ma le taliaina faaleagaga. O le iloaina o mea tatou te aoao atu e fesoasoani lea ia i tatou ia aoaoina. O le aoao atu o isi ia aoaoina, tatou te aoao ai foi ia aoao atu. O la tatou faataitaiga o le aoaoina ma le aoao atu ua fesoasoani lea i a tatou tamaiti aoga ia iloa e mafai foi ona latou aoao mai ma aoao atu.
Autu 6: Na fafagaina e lo tatou Faaola le 5,000 ma le toatasi i le taimi lava e tasi.
I se auala faavavega, na tofitofi ai areto ma i’a ona faateleina lea i tagata taitasi i le motu o tagata. “Ona aai ai lea o i latou uma lava,”57 “ua maoona uma lava.”58
O se vavega lenei o loo sailia e i tatou o faiaoga—ia aoao la tatou vasega atoa ma tagata taitoatasi i le vasega. E manaomia ai i lenei mea le auai atu i le 5,000 ma le toatasi. E valaaulia ai le talanoaina o atugaluga lautele ma manaoga taitoatasi. Ma, i talaatu o le paleni, e valaaulia ai le vavega faaleagaga lea tatou te amata ai i lena mea e oo ai ina lava.
Autu 7: E faamautinoa e lo tatou Faaola e leai ma se mea e maumau.
“Ua maoona lava i latou, ona fetalai ane lea o ia i ona soo ia faapotopoto toe ‘aiga, ne’i i ai ni mea e maumau.”59
O se vaega o le amataina i le lotofaafetai mo mea ua tatou maua o le faamautinoaina lea e leai ma se mea e maumau pe a tatou faamaea. E le faamāumauina le tamaoaiga o le lagi. O mea uma e i ai i le amataga, e leai ma se mea e tuua ina ia maumau i le faaiuga.
Sa faasoa mai e Elder Richard G. Scott le auala e mafai ai ona tatou tusifaamaumauina uunaiga ma iloa ai pe o i ai nisi uunaiga.60 O lenei faagasologa o le ole atu, mauaina, tusifaamaumauina, mafaufau loloto, usitai, fesili atu pe o i ai nisi mea ua atagia mai ai le tautinoga a lo tatou Faaola e faapea “o outou o e faalogologo, e faaopoopoina ia te outou.”61
Ma o loo i ai ma nisi mea. I le faamatalaina ai o Ia lava o le areto o le ola, sa ta’ua ai e lo tatou Faaola: “O lenei foi le finagalo o le Tama o le ua auina mai a’u, ia le maumau lava se tasi ua ia foaiina mai ia te au.”62 Na te tausi i e ua foaiina atu ia te Ia e le Tama, ina ia leai se tasi e maumau [pe leiloa]. I le avea ai ma faiaoga, faifeautalai, aufaigaluega, tatou te faia mea uma i lo tatou faatuatua ma le mana e tausia ai i latou ua faatuatuaina i la tatou tausiga, ina ia leai se tasi e maumau [pe leiloa].
Autu 8: I lo tatou Faaola, tatou te faamaea ai i mea e tele atu nai lo mea na tatou amata ai.
I le faamautinoaina ma le lotofaafetai e leai ma se mea e maumau, na iloa ai e le au soo se isi vavega: “Ua latou fu’e foi toe’aiga”63 “ua tutumu ai ato e sefulu ma le lua i toe‘aiga o areto karite e lima”64 “atoa ma fasi i’a”65 “o mea ia na totoe i e na aai.”66
O se vavega o le faatelega faaleagaga e faapea, i lo tatou Faaola, tatou te faamaea ai i mea e tele atu nai lo mea na tatou amata ai. Tatou te faamaea i se alofa tele atu, aoaoina tele atu, musumusuga sili atu, agalelei sili atu nai lo le taimi na tatou amata ai. O aoaoga e faatumulia i le Agaga e toe foi mai o se areto i luga o le vai—e pei o areto ma i’a, e sili atu i mea na tatou amata ai.
Se’i o tatou aoteleina la tatou talanoaga i lenei taimi:
E malamalama lo tatou Faaola i o tatou loto ma tulaga. E uunaia o Ia e le alofa mutimutivale e faamanuia ma faatumulia i tatou i auala uma.
E amata o Ia mai le mea o tatou i ai, i mea ua ia i tatou, e oo lava i le taliaina o ni nai areto ma ni nai i’a mai se tamaitiiti.
E faagasolo o Ia i se faiga faatulagaina lelei.
E lotofaafetai o Ia. E tepa o Ia i le lagi ae Na te lei faamanuia ma tofitofi.
Na te faasoa atu muamua i soo, ona faatonu lea o le au soo e avatu i tagata.
Na te silafia le auala e tausi ai ma aoao le 5,000 ma le toatasi i le taimi lava e tasi.
Na te ao maia ma le lotofaafetai mea ua tatou maua, ina ia leai se mea e maumau.
Na te fesoasoani ia tatou malamalama ua tatou faamaea i mea e sili atu i lo mea na tatou amata ai.
Ma o loo i ai ma nisi mea. O le fafagaina o le motu o tagata e le o le taimi muamua po o le taimi mulimuli foi lea ua faaaogaina ai e lo tatou Faaola le areto ma le i’a e aoao ai ma molimau mai e uiga i Ana mea e tele na’ua.
Ona maua ai lea o la tatou autu lona iva ma le autu faaiu:
Autu 9: Mo i latou e i ai mata e vaai ai ma taliga e faalogo ai, ua aoao mai lo tatou Faaola ma molimau mai e uiga i mea e tele naua o le faamanatuga.
“Ua iloa ia tagata le faailoga na faia e Iesu, ona faapea lea o i latou, E moni, o lea lava perofeta lenei, o lē maliu mai i le lalolagi.”67
Mulimuli ane, a o faasino patino atu i areto ma i’a, na fesili atu ai lo tatou Faaola i Ona soo:
“Tou te le manatua foi?
“Na ou tofitofi areto e lima i le lima o afe o tagata, pe fia ea ato sa tutumu i toe ‘aiga na outou fu’ea? Ona fai mai lea o i latou ia te ia, e Sefulu ma le lua.
“Atoa ma le fitu i le fa o afe, e fia ete sa tutumu i toe ‘aiga na outou fu’ea? Ona latou fai mai ai lea, e Fitu.”68
E toe fai atu: O Lona lalolagi o se lalolagi o areto ma i’a, ua tele na’ua.
I le fafine i le vaieli, i se uiga patino i se eleele matūtū, na tautino atu ai lo tatou Faaola o Ia lava o le vai o le ola. Sa fetalai atu Iesu ia te ia, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.”69
Ia i latou na fesili atu ia Iesu, “Na aai e o matou tama le manai i le vao, [e mafai ona e aumai ia i matou] le areto mai le lagi e aai ai?”70 Ua tali atu Iesu, “O lo’u Tama na te avatu ... le areto moni mai le lagi.”71 “O a’u o le areto o le ola.”72 “O le faatuatua mai ia te au ua ia te ia le ola e faavavau.”73
E leai se isi mea e sili atu ona autu, sili atu ona taua, pe sili atu ona lautele nai lo le areto ma le vai. O le a se mea tatou te mauaina pe a o mai faatasi le areto o le ola ma le vai o le ola? Ioe, tatou te mauaina le faamanatuga.
I le faaiuga o Lana galuega faaletino, i se mamanu na vaai muamua i ai le au soo, sa “tago ai [lo tatou Faaola] i le areto, ua faafetai, ua tofitofi, ma avatu ia te i latou, ua faapea atu ... Ia faia le mea nei e fai ma faamanatuga ia te au.”74
I le amataga o Lana galuega toetu, i le toe faaalia ai foi o se mamanu masani, sa faatino ai e le Faaola le faamanatuga i sa Nifae, o isi Ana mamoe:
Na Ia poloaiina Ona soo e aumai se areto ma se uaina.
Sa Ia faanonofo i le motu o tagata i luga o le eleele.
Na Ia ave le areto ma tofitofi ma faamanuia.
Na Ia avatu i le au soo ma poloai atu e tatau ona latou aai.
Ma ina ua aai le au soo ma maoona, na Ia poloai atu i le au soo ia avatu i le motu o tagata.
Na aai ma maoona le motu o tagata.75
Mulimuli ane, sa toe faatautaia e lo tatou Alii le faamanatuga ia sa Nifae, o le taimi la lea na saunia ai faavavega le areto ma le uaina:
“O lenei, sa leai se areto, po o se uaina… ;
“Ae sa ia avatu moni lava ia te i latou le areto e aai ai, ma le uaina foi e feinu ai.”76
Ua Ia folafola mai o i latou e aai i le areto ma le uaina i o latou agaga “o le a le fia ai lava pe fia inu lona agaga, ae o le a faatumuina.”77
O le mea moni, “ina ua uma ona aai ma feinu le motu uma o tagata, faauta, sa tumu i latou i le Agaga.”78
O le faataunuuga lenei o le folafolaga sili o le faamanatuga i alii ma tamaitai uma i vaitausaga uma, i tulaga uma, ia i tatou taitoatasi o loo faalagolago olaga i le areto ma le vai: “Amuia i latou uma o e e fia aai ma fia feinu i le amiotonu, aua o le a faatumuina i latou i le Agaga Paia.”79
Uso e ma tuafafine, faafetai atu mo le avea ai ma tagata aoao ma faiaoga ofoofogia i se lalolagi o loo fiaaai ma fiafeinu faaleagaga. Faafetai mo le faia o lesona taitasi, ma fegalegaleaiga a tamaiti aoga taitasi, e pei lava o se talisuaga faaleagaga o areto ma i’a!
Uso e ma tuafafine, ua ou lagonaina se vaipuna o le vai o le ola ua puna ae i totonu ia te au i se atoaga o le alofa mo lo’u Faaola.
Talu ai nei, a o ou mauaina le avanoa e Tufaina ai le areto ma le vai, sa ou lagonaina le alofa tele o lo tatou Faaola mo i latou e taliaina na faatusa paia. Sa ou lagonaina foi le lotofaafetai tele i lo tatou Faaola mo le faavaeina o le sauniga o le faamanatuga.
I nisi taimi, a o ou manatunatu (e aofia ai le aso Sapati), ou te lagona lava le faamaoniga o loo ou faia mea uma ou te mafaia i lenei taimi. E tele lava ina ou lagonaina le faamoemoe ma le faamalosiauga e mafai ona ou “[sau] ia Keriso, ma faaatoatoaina ia te ia,”80 e ui lava i o’u vaivaiga.
Ou te faamoemoe o le a vaai atu tagata taitoatasi i le areto ma i’a, ma areto ma le vai, i ni auala fou.81
Ou te faamoemoe o le a e mauaina le fiafia, olioli, ma musumusuga i fesootaiga o tala faatusitusiga paia, mataupu faavae o le talalelei, ma upu a perofeta ma aposetolo soifua a o e faataunuuina lou faatuatuaga paia e fesoasoani i a tatou tamaiti aoga ia iloa lelei atili lo tatou Faaola, ma o mai ma le migao ia te Ia.
Ou te faamoemoe tou te manatuaina “o le lalolagi e a le Alii ia, atoa ma mea uma ua tumu ai.”82 O Lona lalolagi o se lalolagi o areto ma i’a. O Lana folafolaga o le faamanatuga e faapea o loo lava mea ma totoe.
Ou te molimau atu ma le lotofaafetai i le Atua, lo tatou Tama Faavavau; Lona Alo Paia, lo tatou Faaola, o Iesu Keriso; ma le Agaga Paia. Ou te molimau atu ma le loto faafetai i upumoni toefuataiina ma le pule o le perisitua tuufaasolo e lei toe motusiaina mai le Perofeta o Iosefa ia Peresitene Thomas S. Monson i le asō, o tusitusiga paia, ma le mafanafana, taitaiga, ma le olioli tatou te maua pe a tatou maua Lona Agaga e faatasi ma i tatou pe a tatou manatua pea o Ia.
Po o fea lava o e i ai, po o a foi ni ou tulaga, po o le a foi sou fiafia ma ni luitau, ou te faamoemoe ua e lagonaina i la tatou faatasiga i lenei afiafi le tele o le alofa o le Alii ma Lana Ekalesia ia te oe. E alofa o Ia. Matou te alolofa foi [ia te outou]. I le suafa paia ma le mamalu o lo tatou Alii ma le Faaola, o Iesu Keriso, amene.
© 2017 Puletaofia e le lntellectual Reserve, Inc. Ua taofia aia tatau uma. Faamaonia le faa-Peretania: 12/16. Faamaonia le Faaliliuga: 12/16. Faaliliuga o le “And Jesus Said unto Them: I Am the Bread of Life.” Samoan. PD60003279 890