Doctrinal Mastery ug Pagpatuhop sa Nakat-unan

Elder Kim B. Clark

Sa Seventy

Usa ka Gabii uban ni Elder Gerrit W. Gong

Pakigpulong alang sa CES Religious Educators • Pebrero 17, 2017 • Salt Lake Tabernacle

Mga kaigsoonan, nalipay ko niining oportunidad nga kauban kamo karon. Sa dili pa nako ipaila si Elder Gong, mopaambit ko’g hunahuna nga unta makatabang ninyo ug sa inyong mga estudyante.

Una ipahayag nako ang akong gugma ug pasalamat sa inyong nabuhat. Talagsaon ang inyong nabuhat sa gingharian sa Dios ug sa inyong mga estudyante. Gimahal ko kamo, ug nag-ampo nga ang pinakapiniling panalangin maanaa kaninyo ug sa inyong mga pamilya.

Gusto kong mosulti’g gamay bahin sa Doctrinal Mastery. Ang akong isulti magamit gayud ninyong nagtudlo og seminary, apan magamit kini natong tanan.

Ang Doctrinal Mastery usa ka programa sa seminary nga dunay tulo ka tumong: una, sa pagtabang nga makat-on ang atong mga estudyante sa pag-angkon og espiritwal nga kahibalo; ikaduha, sa pagtabang sa mga estudyante nga mahibalo ug makasabut sa doktrina sa Manluluwas—aron mahibalo ug masabtan ang tinuod nga doktrina sa ilang hunahuna ug kasingkasing, ug gusto namong motuhop kini sa ilang kasingkasing; ug ikatulo, sa pagtabang nga makat-on ang mga estudyante unsaon paggamit ang doktrina sa pagsunod, paggamit, ug pagtubag sa ilang mga higala o pagtudlo aron mahibalo ang uban sa kamatuoran.

Ang Doctrinal Mastery gipaila sa tibuok kalibutan niadtong tinglarag. Gusto kong masayud kamo ug mobati sa inyong kasingkasing nga gipadayag kini sa Ginoo; milagro kini. Namalandong ko giunsa, ug nganong miabut kini. Akong nakita ang Doctrinal Mastery sa mas dakong kahulugan sa Church education ug sa talagsaong buhat sa Ginoo dinhi.

Mituo kong ang Doctrinal Mastery makatabang sa atong mga estudyante nga molambo sa kahibalo ug panabut sa doktrina ug unsaon paggamit kana nga kahibalo ug panabut. Apan may mas labaw pa niana. Makatudlo sab kini sa atong estudyante sa pamaagi sa Ginoo aron motuhop sa ilang kinabuhi ang bisan unsang matang sa kahibalo ug bisan kanus-a sa ilang kinabuhi.

Motuhop ang nakat-unan kon mahimo nato ang tulo ka butang: (1) aron mahibalo ug makasabut; (2) aron makahimo og epektibo, tarung nga buhat; ug (3) aron mas mahisama sa atong Langitnong Amahan ug sa Iyang Anak, si Jesukristo.¹

Ang pagpatuhop sa nakat-unan angayng himoon sa pamaagi sa Ginoo, sa gahum sa Espiritu Santo ug sa aktibo, kugi nga pagtuon ug pagtudlo sa usag usa, uban sa grasya ni Jesukristo. Mao usab sa bisan unsang kahibalo ug bisan kanus-a sa kinabuhi.

Mao gayud kini ang atong itudlo sa atong mga estudyante sa Doctrinal Mastery (ug, unta, sa tanan natong pagpanudlo). Ang Doctrinal Mastery, usa ka tibuok kinabuhing paagi nga motuhop gayud ang nakat-unan.

Tapuson nako ang akong pakigpulong uban sa duha ka pagdapit. Ang una para kaninyong nagtudlo og seminary. Minahal kong kaigsoonan sa tibuok kalibutan, manghinaot kong makita sa inyong mga estudyante nga nagtudlo kamo unsaon nila sa pagkat-on sumala sa pamaagi sa Ginoo. Tudloi sila nga kinahanglang motuhop kanila ang kahibalo sa espiritwal ug sekyular sa tibuok nilang kinabuhi. Tabangi nga makita nila nga ang graduation sa seminary dili maoy katapusan. Gusto natong mo-graduate sila sa institute, ug moeskwela pa sila human sa high school. Gitabangan ninyo sila niini ug sa paghimo’g tibuok kinabuhing pundasyon, pagpatuhop sa nakat-unan kon unsaon sa pagkat-on sa pamaagi sa Ginoo.

Ikaduha nakong pagdapit para ninyong nagtudlo og institute. Mga kaigsoonan, palihug tabangi ang inyong mga estudyante nga makakat-on sa pamaagi sa Ginoo. Palihug tabangi silang makakita sa bili ug gahum sa pag-graduate sa institute. Ang graduation sa institute nagrepresentar sa pagkompleto sa sistematik, malukpanong pagtuon sa ebanghelyo. Ang pag-graduate sa institute mopabus-ok sa ilang panabut sa ebanghelyo, molig-on sa ilang pagpamatuod ug komitment sa Ginoo, ug makaila sila ug mahigugma ni Jesukristo.

Nasayud ko nga kon lihukon ninyo kining pagdapit, kamo ug ang inyong mga estudyante panalanginan sa Ginoo. Mosaksi ko nga ang Langitnong Amahan buhi ug nahigugma kanato. Ang Iyang Anak, si Jesukristo, ang atong Manluluwas ug Manunubos. Nasayud ko nga buhi Siya. Nasayud ko nga pinaagi Kaniya motuhop gayud kanato ang tanan natong nakat-unan sa kinabuhi, kay Siya ang Dalan, Kamatuoran, ug Kinabuhi. Sa sagradong pangalan ni Jesukristo, amen.