ចំណេះចំណានខាងគោលលទ្ធិ និង ការរៀនសូត្រស៊ីជម្រៅ

អែលឌើរ គីម ប៊ី ក្លាក

នៃពួកចិតសិបនាក់

ល្ងាចជួបជាមួយនឹងអែលឌើរ ហ្គែរីឌ ដបុលយូ ហ្គង

សុន្ទរកថាទៅកាន់អ្នកអប់រំខាងសាសនារបស់ ស៊ី.អ៊ី.អែស. • ថ្ងៃទី ១៧ ខែ កុម្ភៈ ឆ្នាំ ២០១៧ • រោងឧបោសថទីក្រុង សលត៍ លេក

បងប្អូនប្រុសស្រីជាទីស្រឡាញ់ ខ្ញុំរីករាយណាស់ដើម្បីនៅជាមួយបងប្អូនល្ងាចនេះ ។ ពីមុនខ្ញុំណែនាំអែលឌើរ ហ្គង ខ្ញុំសូមចែកចាយគំនិតមួយ ហើយសង្ឃឹមថានឹងមានប្រយោជន៍ដល់បងប្អូន និង សិស្សរបស់បងប្អូន ។

ដំបូង ខ្ញុំចង់បង្ហាញក្ដីស្រឡាញ់ចំពោះបងប្អូន និង ការដឹងគុណសម្រាប់អ្វីដែលបងប្អូនធ្វើ ។ បងប្អូនធ្វើការងារដ៏ អស្ចារ្យមួយក្នុងនគរព្រះ និង ក្នុងជីវិតសិស្សរបស់បងប្អូន ។ ខ្ញុំស្រឡាញ់បងប្អូន ហើយខ្ញុំអធិស្ឋានសូមឲ្យព្រះប្រទានពរដល់បងប្អូន និង ក្រុមគ្រួសាររបស់បងប្អូន ។

ល្ងាចនេះ ខ្ញុំចង់និយាយបន្តិចអំពីចំណេះចំណានខាងគោលលទ្ធិ ។ អ្វីដែលខ្ញុំនិយាយនឹងអនុវត្តជាពិសេសចំពោះបងប្អូនដែលបង្រៀនថ្នាក់សិក្ខាសាលា ប៉ុន្តែវាក៏អនុវត្តចំពោះយើងទាំងអស់គ្នាដែរ ។

ចំណេះចំណានខាងគោលលទ្ធិ គឺជាកម្មវិធីមួយក្នុងថ្នាក់សិក្ខាសាលាដែលមានគោលបំណងបី ៖ ទីមួយ ជួយសិស្សឲ្យរៀនរបៀបទទួលបានចំណេះដឹងខាងវិញ្ញាណ ទីពីរ ជួយសិស្សឲ្យស្គាល់ ហើយយល់គោលលទ្ធិរបស់ព្រះអង្គសង្គ្រោះ—មានន័យថាត្រូវស្គាល់គោលលទ្ធិពិតក្នុងគំនិតផង និង យល់គោលលទ្ធិពិតក្នុងចិត្តផង ហើយយើងចង់ឲ្យពួកគេធ្វើដូចនោះឲ្យស៊ីជម្រៅក្នុងចិត្តពួកគេ និង ទីបី ជួយសិស្សឲ្យរៀនរបៀបអនុវត្តគោលលទ្ធិនោះក្នុងជីវិតពួកគេ ទាំងរស់នៅតាមផង និង ប្រើវាដើម្បីឆ្លើយសំណួរមិត្តភក្ដិដែលអាចនឹងសួរ ឬ ដើម្បីបង្រៀន និង ជួយមនុស្សដទៃឲ្យដឹងសេចក្ដីពិតផង ។

ចំណេះចំណានខាងគោលលទ្ធិត្រូវបានណែនាំទូទាំងពិភពលោកកាលពីឆ្នាំមុន ។ ខ្ញុំចង់ឲ្យបងប្អូនដឹង ហើយទទួលអារម្មណ៍ថា កម្មវិធីនេះកើតមានតាមរយៈវិវរណៈពីព្រះអម្ចាស់ វាជាអព្ភូតហេតុមួយ ។ ខ្ញុំបានពិចារណាជាញឹកញាប់អំពីរបៀប ពេលវេលា និង មូលហេតុដែលកម្មវិធីនេះកើតមាន ។ ខ្ញុំបានមើលទៅចំណេះចំណានខាងគោលលទ្ធិនៅក្នុងបរិបទធំមួយនៃការអប់រំសាសនាចក្រ និង កិច្ចការដ៏អស្ចារ្យរបស់ព្រះអម្ចាស់លើផែនដីនេះ ។

ខ្ញុំជឿថា ចំណេះចំណានខាងគោលលទ្ធិជួយសិស្សយើងឲ្យរីកចម្រើនក្នុងចំណេះដឹង និង ការយល់ដឹងអំពីគោលលទ្ធិ ហើយជួយពួកគេឲ្យរៀនពីរបៀបប្រើចំណេះដឹង និង ការយល់ដឹងនោះក្នុងជីវិតពួកគេ ។ ប៉ុន្តែវាធ្វើលើសពីនោះទៅទៀត ។ វាក៏បង្រៀនសិស្សយើងអំពីរបៀបរបស់ព្រះអម្ចាស់ក្នុងការរៀនសូត្រស៊ីជម្រៅ ក្នុងចំណេះដឹងគ្រប់ប្រភេទ និងនៅគ្រប់ពេលទាំងអស់ក្នុងជីវិតពួកគេ ។

ការរៀនសូត្រមានភាពស៊ីជម្រៅនៅពេលវាបង្កើនអំណាចរបស់យើងដើម្បីធ្វើរឿងបីយ៉ាង ៖ (១) ស្គាល់ ហើយយល់ (២) ធ្វើសកម្មភាពដ៏មានប្រសិទ្ធភាព និងសុចរិត និង (៣) ក្លាយកាន់តែដូចព្រះវរបិតាសួគ៌យើង និង ព្រះរាជបុត្រាទ្រង់គឺព្រះយេស៊ូវគ្រីស្ទ ។^១

ការរៀនសូត្រស៊ីជម្រៅត្រូវតែធ្វើឡើងតាមរបៀបព្រះអម្ចាស់ តាមរយៈព្រះចេស្ដានៃព្រះវិញ្ញាណបរិសុទ្ធ និង ការសិក្សាដ៏សកម្ម និងឧស្សាហ៍ព្យាយាម ព្រមទាំង ការបង្រៀនដល់គ្នាទៅវិញទៅមក ដោយមានការចូលរួមពីព្រះគុណនៃព្រះយេស៊ូវគ្រីស្ទ ។ ការណ៍នេះពិតសម្រាប់រាល់ចំណេះដឹង និង គ្រប់ពេលទាំងអស់នៃជីវិត ។

នេះគឺជាអ្វីដែលយើងបង្រៀនសិស្សយើងក្នុងចំណេះចំណានខាងគោលលទ្ធិ ( ហើយខ្ញុំសង្ឃឹមក្នុងអ្វីទាំងអស់ដែលយើងបង្រៀន ) ។ ដូច្នេះ ចំណេះចំណានខាងគោលលទ្ធិ គឺជាច្រកទ្វារចូលទៅរកការរៀនសូត្រពេញមួយជីវិត និង ស៊ីជម្រៅ ។

ខ្ញុំចង់បញ្ចប់ដោយនូវការអញ្ជើញចំនួនពីរ ។ ទីមួយគឺចំពោះបងប្អូនដែលបង្រៀនថ្នាក់សិក្ខាសាលា ។ បងប្អូនប្រុសស្រីទូទាំងពិភពលោកជាទីស្រឡាញ់ ខ្ញុំសង្ឃឹមថា បងប្អូនកំពុងបង្រៀនសិស្សរបស់បងប្អូនពីរបៀបរៀនសូត្រតាមរបៀបព្រះអម្ចាស់ ។ សូមបង្រៀនពួកគេថា ពួកគេត្រូវរៀនសូត្រឲ្យស៊ីជម្រៅទាំងចំណេះដឹងខាងវិញ្ញាណ និង ខាងបញ្ញាពេញមួយជីវិត ។ សូមជួយពួកគេឃើញថា ការបញ្ចប់ការសិក្សាពីថ្នាក់សិក្ខាសាលាពុំមែនជាទីបញ្ចប់ឡើយ ។ យើងចង់ឲ្យពួកគេបញ្ចប់ការសិក្សាពីថ្នាក់វិទ្យាស្ថាន ហើយចង់ឲ្យពួកគេបន្តការអប់រំបន្ទាប់ពីបញ្ចប់វិទ្យាល័យ ។ បងប្អូនកំពុងជួយពួកគេឲ្យធ្វើកិច្ចការទាំងនេះផង ហើយដាក់គ្រឹះ រៀនសូត្រស៊ីជម្រៅពេញមួយជីវិតតាមរយៈការបង្រៀនពួកគេពីរបៀបរៀនតាមរបៀបព្រះអម្ចាស់ ។

ការអញ្ជើញទីពីររបស់ខ្ញុំគឺទៅដល់បងប្អូនដែលបង្រៀនថ្នាក់វិទ្យាស្ថាន ។ បងប្អូនប្រុសស្រី សូមជួយសិស្សរបស់បងប្អូនឲ្យរៀនតាមរបៀបព្រះអម្ចាស់ ។ សូមជួយពួកគេឲ្យឃើញពីតម្លៃ និង អំណាចក្នុងជីវិតនៃការបញ្ចប់ការសិក្សារបស់ពួកគេពីថ្នាក់វិទ្យាស្ថាន ។ ការបញ្ចប់ការសិក្សាពីថ្នាក់វិទ្យាស្ថាន តំណាងឲ្យការបញ្ចប់ការសិក្សាដំណឹងល្អតាមរបៀបរៀបរយ និងទូលាយ ។ ការបញ្ចប់ការសិក្សាពីថ្នាក់វិទ្យាស្ថាននឹងពង្រឹងការយល់ដឹងពួកគេលើដំណឹងល្អ ពង្រឹងទីបន្ទាល់ និង ការតាំងចិត្តចំពោះព្រះអម្ចាស់ ថែមទាំងជួយពួកគេឲ្យស្គាល់ ហើយស្រឡាញ់ព្រះយេស៊ូវគ្រីស្ទ ។

ខ្ញុំដឹងថា បើបងប្អូនធ្វើតាមការអញ្ជើញទាំងនេះ ព្រះអម្ចាស់ និង ព្រះអង្គសង្គ្រោះនឹងប្រទានពរបងប្អូន ព្រមទាំងសិស្សរបស់បងប្អូន ។ ខ្ញុំធ្វើជាសាក្សីថា ព្រះវរបិតាសួគ៌យើង មានព្រះជន្មរស់ ហើយស្រឡាញ់យើង ។ ព្រះរាជបុត្រាទ្រង់ ព្រះយេស៊ូវគ្រីស្ទ គឺជាព្រះអង្គសង្គ្រោះ និង ព្រះប្រោសលោះយើង ។ ខ្ញុំដឹងថា ទ្រង់មានព្រះជន្មរស់ ។ ខ្ញុំដឹងថា ក្នុងទ្រង់ និងតាមរយៈទ្រង់ យើងអាចរៀនឲ្យស៊ីជម្រៅពេញមួយជីវិត ដ្បិតទ្រង់ជាផ្លូវ ជាសេចក្ដីពិត ហើយជា ជីវិត ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។