Ang Gasa sa Espiritu Santo
Mga kaigsoonan, dakong panalangin nga makauban kamo karong gabhiona.
Tulo ka semana gikan karon, Adlaw na sa Pasko. Nianang buntaga, minilyon ka mga bata ang mobangon og sayo ug mobitad sa ilang ginikanan gikan sa higdaanan. Puno sa dakong kahinam, mag-alirong sila sa mga gasa nga ilang gisigihan og tan-aw sa pipila ka adlaw.
Ang akong papa ganahan og Pasko; ang paghatag og gasa makapalipay kaayo niya, ug siya ug ang akong mama maayo kaayo niana. Ang akong mga igsoon ug ako, ug ang uban usab, mao ang nakabenepisyo sa ilang talento. Ang pipila sa ilang pinakamaayong mga gasa dili makita—mga kasinatian kini nga nakamugna og relasyon sa gugma ug bililhong mga handumanan. Kadtong mga handumanan nakapalipay gihapon nako karon.
Daw angay lang nga ang paghatag ug pagdawat og mga gasa maoy sentro nga bahin sa Pasko. Kay kita nagsaulog sa dili hitupngan nga gasa sa Anak sa Dios, ang Manluluwas nga si Jesukristo. Siyempre, ang atong mga gasa sa usag usa dili gayud matandi niini nga gasa, apan mituo ko nga ang kalipay sa paghatag ug pagdawat og mga gasa makapadangup sa atong kasingkasing ngadto “mga gasa sa Dios.”1
Ang bililhong gasa sa Dios nagdapit sa matag usa nato nga mangita sa “kalinaw niini nga kalibutan, ug kinabuhi nga dayon diha sa kalibutan nga umaabut.”2 Ang kalinaw daw lisud makab-ot sa kalibutan diin ang panagbingkil ug panagbahin nagkagrabe. Apan kana nga kalinaw mao gayud ang gitanyag sa atong mahigugmaong Amahan ug sa Iyang Anak alang sa matag usa nato, kon ato lamang kining dawaton.
Hunahunaa unsa kini kalahi kon, sa buntag sa Pasko, mag-alirong kita sa Christmas tree, modayeg sa nindot pagkaputos nga mga regalo, maghisgot kon unsa kaha ang sulod niini, ug dayon molakaw nga wala lang gani ablihi ang mga gasa!
Subo lang, kay mao kini ang atong buhaton usahay sa mga gasa sa Dios ngari nato. Hunahunaa kining mga pulong sa Manluluwas: “Kay unsa ang makuha sa usa ka tawo kon ang gasa itugyan diha kaniya, ug siya wala modawat sa gasa? Tan-awa, siya wala malipay niana nga gihatag ngadto kaniya, ni malipay diha kaniya kinsa mao ang naghatag sa gasa.”3
Karong gabhiona gusto nakong dapiton ang tanan nato sa pagpamalandong kon unsaon nato sa pagdawat sa tinud-anay sa mga gasa nga gitanyag sa Dios kanato. Ilabi na gayud, gusto nakong tutukan ang walay kinutuban nga gasa sa Espiritu Santo. Sa pagbuhat nako sa ingon, nag-ampo ko nga ang Espiritu Santo motabang nato nga makasabut sa kaimportante niini nga gasa, motudlo nato kon unsay atong mahimo aron mas hingpit nga makadawat niini, ug mohatag nato og grasya sa pagbuhat sa unsay atong gibati.
Nganong ang Espiritu Santo Ingon man ka Angayang Tinguhaon nga Gasa?
Ang Espiritu Santo mao ang ikatulong sakop sa Dios nga Kapangulohan. Siya ang maghuhupay,4 ang giya,5 magtutudlo,6 tigbalaan,7 ug sa ingon mao ang tig-usab sa kasingkasing sa tawo.8 Pinaagi Kaniya, madawat nato ang gahum ug mga kinaiya sa Dios sa atong kinabuhi.
Inyong mahinumduman ang pipila niadtong mga kinaiya: “gugma, kalipay, kalinaw, pailub, pagkamapuanguron, pagkamaayo, pagtuo, kaaghop, [ug] pagpugong sa kaugalingon.”9 Para nako mora kini og maayong paghulagway sa unsay kanunayng gitawag nga “ang diwa sa Pasko.” Ang mga saad sa anghel nga “maayong balita sa dakong kalipay” ug “panagdait sa mga tawo nga iyang gikahimut-an”10 gikan nianang unang gabii sa Pasko natuman, ang bahin niini, sa pagdawat nato sa Espiritu Santo.
Kanunay kitang mamulong bahin sa pagsulay sa pagpabilin sa diwa sa Pasko sa tibuok tuig. Natural lang nga ganahan kita nga kining balaanong mga kinaiya tinud-anay nga molukop sa atong kalag sa kahangturan. Ug ang atong hingpit nga Amahan gusto nga kita, ang Iyang mga anak, makadawat niining mga gasa. Kini ang dakong saad sa ebanghelyo ni Jesukristo—nga mausab ang atong kasingkasing, nga “wala nay hilig sa pagbuhat og dautan, apan sa pagbuhat og maayo sa kanunay,”11 nga mapuno sa “paglaum ug hingpit nga gugma.”12 Diha kini sa tinud-anay nga pagdawat sa Espiritu Santo nga kining bililhong mga gasa maablihan ngari kanato.
Sa talagsaong paagi, ang gasa sa Espiritu Santo gitanyag kanato pinaagi niining mga pulong: “Dawata ang Espiritu Santo.”13 Gusto kong mosugyot og tulo ka importante nga mga butang nga makatabang nato nga tinud-anay nga makadawat niining bililhong gasa. Sa pagbuhat sa ingon, modangup ko sa talagsaong sitwasyon gikan sa Basahon ni Mormon. Ang nabanhaw nga Kristo migahin og milagrusong adlaw sa pagpangalagad sa katawhan, misaad nga mobalik sa sunod adlaw. Gipahibalo kini, ug sa dakong kahinam ang katawhan nagpundok gikan sa tibuok yuta, ang uban naningkamot sa tibuok gabii aron pagkabuntag anaa sila sa dapit diin si Jesus mopakita pag-usab.
1. Nag-unang Espirituhanong Tinguha
Samtang naghulat nga mobalik ang Manluluwas, gitudloan sa mga disipulo ang katawhan sa unsay gitudlo ni Jesus sa miaging adlaw.14 Ang rekord nag-ingon nga nangluhod ug nag-ampo sila “alang niana diin sila labing nagtinguha; ug sila nagtinguha nga ang Espiritu Santo [unta] ihatag ngadto kanila.”15 Hunahunaa sa makadiyot kon unsa kini kaimportante—madasigon silang nagpaabut sa gisaad nga pagbalik sa Manluluwas, apan wala sila mag-ampo alang niana. Kay natudloan sa hingpit nga magtutudlo ug dayon sa Iyang pinili nga mga disipulo, unsa gayud ang ilang gitinguha mao ang gasa sa Espiritu Santo. Kining hilabihan, nag-unang espirituhanong tinguha importante kaayo sa pagdawat niini nga gasa.
Si Presidente Henry B. Eyring nagtudlo: “Kasagaran nato … dunay igong pagtuo nga gusto sa Espiritu Santo usahay. Kana nga tinguha mahimong huyang ug dili makanunayon, apan moabut kini, kasagaran kon magkaproblema kita. [Apan] aron magiyahan kita pataas ngadto sa kasigurohan sa umaabut nga panahon, kinahanglan kini nga makanunayon ug kusganon.”16 Mga kaigsoonan, aron makadawat kita niining gasa kinahanglan nato kining tinguhaon sa tibuok natong kasingkasing.
2. Matarung nga Moapil sa mga Ordinansa
Namulong pag-usab bahin sa sitwasyon diha sa Basahon ni Mormon, atong madiskubrihan ang laing importante nga butang. Human makapangamuyo diha sa pag-ampo alang sa gasa nga gitinguha gayud nila, ang Espiritu Santo, ang mga disipulo miadto sa tubig ug nabunyagan. “Ug nahinabo nga sa diha nga silang tanan nabunyagan … ang Espiritu Santo mikunsad diha kanila, ug silang tanan napuno sa Espiritu Santo uban sa kalayo.”17 Ang ordinansa sa bunyag nagsilbi nga pisikal nga pagsaksi sa atong pasalig sa paghinumdom ug pagtuman, sa atong kaandam nga modala sa ngalan ni Kristo ngari kanato, ug sa atong tinguha nga makadawat sa Espiritu Santo.18
Matag semana duna kitay oportunidad sa pagbag-o nianang pagsaksi pinaagi sa pag-ambit sa sakrament, “nga [kita] unta sa kanunay makabaton sa iyang Espiritu uban [kanato].”19 Ang nag-uban nga mga ordinansa sa bunyag ug ang sakrament makatabang nga madala “ang gahum sa pagka-diosnon” sa atong kinabuhi.20 Sa usa ka paagi, nagsimbolo kini sa destinasyon ug sa proseso nga mahimong diosnon. Ang mahimong bag-ong nilalang diha ni Kristo, “iyang anak nga mga lalaki, ug iyang anak nga mga babaye,”21 mao ang atong gitinguha nga destinasyon. Kana nga destinasyon makab-ot matag semana samtang maningkamot kita nga mahinumdom ug motuman. Gidapit ko kamo nga moadto sa sakrament sa Ginoo matag semana uban sa pagtuo diha sa Iyang saad nga kon motuman kita sa atong mga pakigsaad mapuno kita sa Espiritu, sa hinay-hinay, “hangtud sa hingpit nga adlaw.”22
Karong tuiga ang Adlaw sa Pasko natumong og Dominggo. Pagkanindot nga panalangin nga magsaulog sa pagkatawo ni Kristo ug sa Iyang hingpit nga Pag-ula samtang makadawat kita sa sakrament nianang adlawa.
3. Naglambo nga Pagtuo
Ang katapusan ug labing importante nga butang nga akong hisgutan mao ang pagtuo diha ni Jesukristo. Human nga ang Espiritu Santo mikunsad ngadto sa mga disipulo uban sa dakong gahum, si Kristo mipakita ug nag-ampo, nagpasalamat sa Iyang Amahan sa paghatag niining bililhong gasa ngadto nila. Misulti dayon siya niining importante nga mga pulong: “Ikaw mihatag kanila sa Espiritu Santo tungod kay sila mituo kanako.”23 Ang pagtuo diha sa Manluluwas ug sa Iyang hingpit nga Pag-ula mao ang tinubdan sa matag maayong gasa.24
Ang napalambo nga pagtuo nagdala og dugang pa nga mga gasa sa Espiritu sa atong kinabuhi. Busa sa unsang paagi kita makapalambo sa atong pagtuo diha kang Kristo? Magbusog kita ug motuman sa Iyang pulong. Si Elder D. Todd Christofferson nagtudlo, “Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo.”25 Kini nga kamatuoran makita sa tibuok Basahon ni Mormon. Si Haring Benjamin, pananglit, nagtudlo sa iyang katawhan sa mga pulong nga iyang nadawat gikan sa usa ka anghel, nga nakatabang kanila nga makabaton og “naghingapin nga hugot nga pagtuo” kang Jesukristo, ug tungod nianang pagtuo ang Espiritu nagdala og dakong kausaban sa ilang kasingkasing.26
Kon atong tinguhaon ang Espiritu Santo nga maoy atong kauban matag adlaw, magbusog kita ug motuman sa pulong ni Kristo nga nadawat pinaagi sa mga kasulatan, buhi nga mga propeta, ug sa mga paghunghong sa Espiritu. Kining inadlaw nga pagtinguha sa kahayag ug kamatuoran mopalambo sa atong pagtuo kang Kristo, sa atong tinguha nga mahisama Kaniya, ug sa atong kapasidad nga makadawat sa ikatulong sakop sa Dios nga Kapangulohan isip atong kanunay nga kauban.
Mga kaigsoonan, gitanyag sa Dios ang Iyang bililhong mga gasa nga libre ngari kanato atol sa Pasko ug sa tibuok tuig. Ako nag-ampo nga dili nato kini biyaan nga wala maablihi apan modawat niini pinaagi sa paggamit niining importante nga mga butang. Ako mopamatuod nga sa pagbuhat nato, kita mapuno, sa hinay-hinay, sa gugma, kalipay, kalinaw, kaputli, ug gahum. Mahimo kitang “mag-aambit sa diosnong kinaiya.”27 Magmaya kita sa gasa ug sa naghatag sa gasa. Ug kon Siya moabut pag-usab, andam kita nga “modawat sa [atong] Hari.”28 Sa pangalan ni Jesukristo, amen.